Numera 30:1-16
30 Parau atura Mose i te upoo+ o te mau opu o te ati Iseraela: “Teie te parau ta Iehova i faaue:
2 Ia euhe+ te hoê tane ia Iehova aore ra ia horeo+ oia e haapae i te tahi mea, eiaha oia e ofati i ta ˈna parau.+ E rave oia i te mau mea atoa ta ˈna i euhe e rave.+
3 “E ia euhe te hoê vahine ia Iehova aore ra ia euhe oia e haapae i te tahi mea i to ˈna apîraa a ora noa ˈi i ǒ to ˈna metua tane
4 e ua faaroo to ˈna metua tane i ta ˈna euhe aore ra ta ˈna i euhe e haapae e eita to ˈna metua tane e patoi mai, e mana ïa ta ˈna mau euhe atoa, e e mana pauroa ta ˈna i euhe e haapae.
5 Ia patoi râ to ˈna metua tane i to ˈna faarooraa i ta ˈna euhe, aore ra ta ˈna i euhe e haapae, eita ïa te reira e mana. E faaore Iehova i ta ˈna hapa no te mea ua patoi to ˈna metua tane i te reira.+
6 “Tera râ, ia faaipoipo noa ˈtu oia i te hoê tane a vai noa ˈi oia i raro aˈe i ta ˈna euhe aore ra ta ˈna fafau i parau ru no ˈna
7 e e faaroo ta ˈna tane faaipoipo i te reira e eita e patoi mai i te mahana o ˈna i faaroo ai i te reira, e mana ïa ta ˈna mau euhe e ta ˈna i euhe e haapae.
8 Ia opani râ ta ˈna tane faaipoipo ia ˈna i te mahana o ˈna e faaroo ai i te reira, e nehenehe oia e faaore i te euhe aore ra ta ˈna fafau i parau ru no ˈna,+ e e faaore Iehova i ta ˈna hapa.
9 “Ia euhe râ te hoê vahine ivi aore ra tei taa i ta ˈna tane faaipoipo, e mana ïa te mau mea atoa ta ˈna i euhe no ˈna.
10 “Ia euhe râ te hoê vahine aore ra ia euhe oia e haapae i te tahi mea a vai noa ˈi oia i ǒ ta ˈna tane faaipoipo
11 e ua faaroo ta ˈna tane faaipoipo i te reira e aita i patoi mai aore ra i au ore mai, e mana ïa te mau mea atoa ta ˈna i euhe aore ra ta ˈna i euhe e haapae.
12 Ia faaore roa râ ta ˈna tane faaipoipo i te mau euhe atoa ta ˈna i euhe aore ra ta ˈna i euhe e haapae i te mahana e faaroo ai o ˈna i te reira, eita ïa te reira e mana.+ Ua faaore ta ˈna tane faaipoipo i te reira, e e faaore Iehova i ta ˈna hapa.
13 No te tahi euhe, aore ra te tahi horeo o te ô mai i roto i te euhe e haapae ia ˈna iho, e haapapu ta ˈna tane faaipoipo i te reira aore ra e faaore ta ˈna tane faaipoipo i te reira.
14 Ia ore râ ta ˈna tane faaipoipo e patoi i te reira i tera e tera mahana, te haapapu ra ïa oia i te mau mea atoa ta ˈna i euhe aore ra ta ˈna i euhe e haapae. Te haapapu ra oia i te reira no te mea aita oia i patoi mai i te mahana i faaroo ai oia i te reira.
15 Ia faaore râ oia i te reira i muri aˈe, tau mahana i muri aˈe i te faarooraa i te reira, na ˈna ïa e amo i te utua o te hapa a ta ˈna vahine faaipoipo.+
16 “Tera te mau faaueraa ta Iehova i faaue ia Mose no te hoê tane e ta ˈna vahine faaipoipo, e no te hoê metua tane e ta ˈna tamahine apî e ora ra i ǒ ˈna.”
