Numera 11:1-35
-
Faataeraa mai te Atua i te auahi no te amuamuraa (1-3)
-
Autâ te nunaa e hinaaro ra i te iˈo (4-9)
-
Faaiteraa o Mose i to ˈna manaˈo eita e haere ia ˈna (10-15)
-
Tuuraa Iehova i to ˈna varua i nia e 70 matahiapo (16-25)
-
Eledada e Medada. Haapeapearaa Iosua no Mose (26-30)
-
Faataehia te manu. Faautuahia te nunaa no te nounou (31-35)
11 Amuamu aˈera te nunaa i mua ia Iehova. I to Iehova faarooraa i te reira, ura ihora to ˈna riri, faatae maira Iehova i te auahi i nia ia ratou e pau aˈera vetahi i te auahi na rapaeau i te puhapa.
2 I te haamataraa te nunaa i te tuô ia Mose, taparuparu ihora oia ia Iehova,+ e pohe ihora te auahi.
3 Topahia ihora taua vahi ra i te iˈoa o Tabera,* no te mea ua faatae mai Iehova i te auahi i nia ia ratou.+
4 Nounou+ aˈera te nahoa taata ěê*+ i rotopu ia ratou i te maa, e haamata atoa ˈtura te ati Iseraela i te autâ faahou a na ô ai: “Na vai e horoa mai i te iˈo na matou ia amu?+
5 Te haamanaˈo ra hoi tatou i te iˈa ta tatou i amu noa na i Aiphiti ma te tamoni ore, e te totoma, te mereni, te poaro, te oniani e te âi!*+
6 I teie nei râ, ua paruparu tatou. Aita ˈtu mea ta tatou e ite ra, tera mâna+ anaˈe.”
7 E te mâna,+ mai te huero gede+ ïa, e mai te tapau noˈanoˈa ra te hohoˈa.
8 E ohi haere e e taviri te nunaa i te reira i te taviri huero maa aore ra e pâpâhia i roto i te farii pâpâraa. E vaipâ ratou i te reira i roto i te pani aore ra e hamani ratou ei faraoa menemene,+ e mai te faraoa momona ôihia e te hinu ia tamatahia te reira.
9 Ia topa mai te hupe i nia i te puhapa i te po, e topa atoa mai te mâna.+
10 Faaroo ihora Mose i te nunaa ia autâ, tera e tera utuafare, te taata tataitahi i te tomoraa o to ˈna fare ie. Riri roa ihora Iehova,+ e au ore roa ihora Mose.
11 Parau atura Mose ia Iehova: “Eaha oe i haamauiui ai i to tavini nei? Eaha ta ˈu i rave i ore ai au i fariihia e oe, a tuu mai ai oe i te hopoia teimaha o teie nunaa taatoa i nia ia ˈu?+
12 Ua hapû anei au i teie nunaa taatoa? Na ˈu anei i fanau ia ratou, ia parau mai oe ia ˈu: ‘A amo ia ratou i nia i to ouma, mai ta te tahi tavini* e amo i te aiû aruaru,’ i te fenua ta oe i horeo e horoa no to ratou mau tupuna?+
13 Ihea e noaa mai ai ia ˈu te iˈo ia horoa ˈtu na teie nunaa taatoa? Te tamau noa ra hoi ratou i te autâ i mua ia ˈu, a na ô ai: ‘A horoa mai i te iˈo na matou ia amu!’
14 Eita ta ˈu e nehenehe e amo i teie nunaa taatoa o vau anaˈe, mea teimaha roa no ˈu.+
15 Ia na reira mai oe ia ˈu, a haapohe na ia ˈu i teie nei.+ Mai te peu ua fariihia vau e oe, eiaha e faaite mai i te tahi atu ati.”
16 Pahono maira Iehova ia Mose: “A haaputuputu no ˈu e 70 tane no rotopu i te mau matahiapo o Iseraela, e tane ta oe i ite e matahiapo e e raatira o te nunaa,+ e a aratai ia ratou i te tiahapa o te amuiraa, e tia ratou i reira i pihai iho ia oe.
17 E pou+ atu vau e paraparau ia outou i reira,+ e rave au i te tahi vahi o to ˈu varua+ i nia ia oe a tuu atu ai i nia ia ratou, e e tauturu ratou ia oe ia amo i te hopoia teimaha o te nunaa ia ore oe e amo i te reira o oe anaˈe.+
18 E parau oe i te nunaa: ‘A haamoˈa ia outou no ananahi,+ e amu mau â hoi outou i te iˈo, no te mea ua autâ outou i te tariˈa o Iehova+ e ua parau: “Na vai e horoa mai i te iˈo na matou ia amu? Mea maitai aˈe i Aiphiti.”+ E horoa mau â Iehova i te iˈo na outou, e e amu iho â outou i te reira.+
19 E amu outou i te reira, eiaha hoê noa mahana, e 2 mahana, e 5 mahana, 10 mahana aore ra e 20 mahana,
20 hoê avaˈe taatoa râ, e ia na roto roa mai te reira i to outou apoo ihu e ia faufau outou i te reira,+ ua faarue hoi outou ia Iehova, o te faaea ra i rotopu ia outou, e ua autâ noa outou i mua ia ˈna, a na ô ai: “Eaha matou i haere ai i rapae i Aiphiti?”’”+
21 Parau atura Mose: “Tei rotopu vau i te hoê nunaa e 600 000 tane,*+ e ua parau râ oe: ‘E horoa vau i te iˈo na ratou ia amu ratou hoê avaˈe taatoa’!
22 Ahiri e tupaihia te nǎnǎ puaatoro e te nǎnǎ mamoe e puaaniho taatoa no ratou, e navai anei? Aore ra ahiri pauroa te iˈa o te miti te noaa mai no ratou, e navai anei?”
23 Na ô maira ïa Iehova ia Mose: “Mea poto roa anei te rima o Iehova?+ I teie nei oe e ite ai e tupu anei ta ˈu e parau ra aore ra eita.”
24 Haere ihora ïa Mose i rapaeau e parau atura i ta Iehova mau parau i te nunaa. Haaputuputu maira oia e 70 tane no rotopu i te mau matahiapo o te nunaa e ia tia ratou ati aˈe te tiahapa.+
25 Pou maira ïa Iehova na roto i te hoê ata,+ paraparau maira ia ˈna,+ rave maira i te tahi vahi o to ˈna varua+ i nia ia ˈna e tuu ihora i nia i na 70 matahiapo tataitahi. E i te pouraa mai iho â te varua o te Atua i nia ia ratou, haamata aˈera ratou i te tohu mai te peropheta,+ aita râ ratou i na reira faahou.
26 E piti tane to roto â i te puhapa, to raua iˈoa o Eledada e o Medada. Pou maira te varua o te Atua i nia ia raua, i te mea to rotopu atoa raua i te feia tei tapaohia to ratou iˈoa, aita râ i haere i te tiahapa. Haamata aˈera raua i te tohu mai te peropheta i roto i te puhapa.
27 Horo maira te hoê tane apî e faatia maira ia Mose: “Te tohu nei Eledada e Medada mai te peropheta i roto i te puhapa!”
28 Pahono maira ïa Iosua+ te tamaiti a Nuna, te tavini a Mose mai to ˈna apîraa mai â, a na ô ai: “To ˈu fatu Mose, a tapea ia raua!”+
29 Na ô atura râ Mose ia ˈna: “Te haapeapea ra oe no ˈu? Eiaha, te hinaaro ra hoi au ei peropheta te nunaa taatoa o Iehova e ia tuu Iehova i to ˈna varua i nia ia ratou!”
30 I muri iho, hoˈi atura Mose i te puhapa e te mau matahiapo o Iseraela.
31 Farara maira te hoê mataˈi no ǒ mai ia Iehova e hopoi maira i te manu na tai mai e faatopa maira i te reira ati aˈe te puhapa,+ hoê mahana tere i teie pae e hoê mahana tere i te tahi atu pae, ati aˈe te puhapa, e piri i te piti kubiti* te teitei i nia ˈˈe i te fenua.
32 Tia noa aˈera ïa te nunaa i tera mahana taatoa e tera po taatoa e ananahi aˈe i te ohi-haere-raa i te manu. Aita hoê aˈe i ohi i raro mai i te ahuru homera,* e taraˈi noa aˈera ratou i te reira no ratou ati aˈe te puhapa.
33 To roto â râ te iˈo i to ratou vaha, aita â i pau atura i te amuhia, ura ihora to Iehova riri i te nunaa, e haamata ihora Iehova i te tairi i te nunaa i te hoê haapoheraa rahi roa.+
34 Topa ˈtura ratou i taua vahi ra i te iˈoa o Kiberota-hataava,*+ no te mea i reira to ratou hunaraa i te feia tei nounou i te maa.+
35 Faareva aˈera te nunaa mai Kiberota-hataava no te haere i Hazerota, e faaea ihora i Hazerota.+
Nota i raro i te api
^ “Ura” te auraa, oia hoi e ati auahi, e ura i te auahi.
^ E au ra e te taata e ere i te ati Iseraela.
^ Aore ra “oniani piropiro.”
^ Aore ra “tane hii.”
^ Te mau tane e nehenehe e riro ei faehau.
^ 1 kubiti: 44,5 cm. Hiˈo i te tuhaa hau B14.
^ 1 homera: 220 L. Hiˈo i te tuhaa hau B14.
^ “Vahi hunaraa o te nounou” te auraa.
