Numera 10:1-36
10 I muri iho, na ô maira Iehova ia Mose:
2 “A hamani e piti pu ario+ na oe, a hamani i te reira i te ario tupaihia, e a faaoto atu no te titau i te amuiraa e no te tatara i te mau fare ie.
3 Ia faaotohia na pu e piti, ia putuputu mai ïa te amuiraa taatoa ia oe ra i te tomoraa o te tiahapa o te amuiraa.+
4 Ia faaotohia hoê noa pu, o te mau raatira anaˈe, te mau upoo o te mau tausani o Iseraela, te putuputu mai ia oe ra.+
5 “Ia faaoto outou i te hoê oto pu tauiui noa, e faareva te mau puhaparaa o to te pae hitia o te râ.+
6 Ia faaoto outou i te hoê oto pu tauiui noa i te piti o te taime, e faareva te mau puhaparaa o to te pae apatoa.+ Ia faaotohia te pu mai teie i te mau taime atoa e faareva ˈi hoê o na puhaparaa.
7 “No te titau i te amuiraa ia putuputu mai, e faaoto outou i na pu,+ eiaha râ i te oto pu tauiui noa.
8 Na te mau tamaiti a Aarona, te mau tahuˈa, e faaoto i na pu,+ e e riro te faaotoraa i te reira ei faatureraa vai maoro no outou e hope noa ˈtu to outou mau uˈi.
9 “Ia titauhia ia haere outou i te tamaˈi i to outou fenua no te aro i te hoê enemi e aa mai ra ia outou, e faaoto outou i te hoê oto pu tamaˈi i na pu,+ e haamanaˈohia mai outou e Iehova to outou Atua e e faaorahia outou i to outou mau enemi.
10 “Oia atoa, i te mau taime oaoa no outou,+ ta outou mau oroa+ e te haamataraa o ta outou mau avaˈe, e faaoto outou i na pu i nia ˈˈe i ta outou mau tusia taauahi+ e ta outou mau tusia no te hau.+ E riro te reira ei haamanaˈoraa no outou i mua i to outou Atua. O vau o Iehova to outou Atua.”+
11 I te piti râ o te matahiti, i te 20 o te mahana o te piti o te avaˈe,+ pee aˈera te ata mai nia i te sekene+ o te Haamanaˈoraa.
12 Faarue maira ïa te ati Iseraela i te medebara o Sinai ia au i te anairaa faataahia no to ratou faarevaraa,+ e faaea ihora te ata i te medebara o Parana.+
13 A tahi ra ratou a faareva ˈi ia au i te faaueraa a Iehova na roto ia Mose.+
14 Faareva aˈera ïa na mua te puhaparaa e toru opu o te puhapa o na tamaiti a Iuda ia au i to ratou pǔpǔ, e o Nahasona+ te tamaiti a Aminadaba te raatira o to ratou pǔpǔ.
15 O Netanela+ te tamaiti a Zuara te raatira o te pǔpǔ o te opu o na tamaiti a Isakara.
16 O Eliaba+ te tamaiti a Helona te raatira o te pǔpǔ o te opu o na tamaiti a Zebuluna.
17 I te tuuraahia te sekene i raro,+ faareva aˈera na tamaiti a Geresona+ e na tamaiti a Merari,+ na ratou e amo i te sekene.
18 I muri iho, faareva aˈera te puhaparaa e toru opu o to Reubena puhapa ia au i to ratou pǔpǔ, e o Elizura+ te tamaiti a Sedeura te raatira o to ratou pǔpǔ.
19 O Selumiela+ te tamaiti a Zurisadai te raatira o te pǔpǔ o te opu o na tamaiti a Simeona.
20 O Eliasapha+ te tamaiti a Deuela te raatira o te pǔpǔ o te opu o na tamaiti a Gada.
21 I muri iho, faareva aˈera te ati Kohata, na ratou e amo i te mau taihaa o te sekene.+ E faatiahia te sekene hou ratou a tae mai ai.
22 I muri iho, faareva aˈera te puhaparaa e toru opu o te puhapa o na tamaiti a Epheraima ia au i to ratou pǔpǔ, e o Elisama+ te tamaiti a Amihuda te raatira o to ratou pǔpǔ.
23 O Gamaliela+ te tamaiti a Pedazura te raatira o te pǔpǔ o te opu o na tamaiti a Manase.
24 O Abidana+ te tamaiti a Gideoni te raatira o te pǔpǔ o te opu o na tamaiti a Beniamina.
25 I muri iho, faareva aˈera te puhaparaa e toru opu o te puhapa o na tamaiti a Dana ia au i to ratou pǔpǔ, na ratou e paruru i te mau puhapa atoa na muri mai, e o Ahiezera+ te tamaiti a Amisadai te raatira o to ratou pǔpǔ.
26 O Pagiela+ te tamaiti a Okarana te raatira o te pǔpǔ o te opu o na tamaiti a Asera.
27 O Ahira+ te tamaiti a Enana te raatira o te pǔpǔ o te opu o na tamaiti a Naphatali.
28 Tera te anairaa o te faarevaraa ta te ati Iseraela e ta to ratou mau pǔpǔ i pee ia faareva+ ratou.
29 Parau atura Mose ia Hobaba te tamaiti a Reuela*+ te ati Midiana, to Mose metua hoovai: “Te reva ra matou i te vahi ta Iehova i parau: ‘E horoa ˈtu vau i te reira no outou.’+ A haere mai na muri ia matou,+ e e hamani maitai matou ia oe, no te mea ua fafau Iehova i te mau mea maitatai no Iseraela.”+
30 Na ô maira râ oia: “Eita vau e haere. E hoˈi au i to ˈu iho fenua e to ˈu mau fetii.”
31 Parau atura Mose: “Eiaha na oe e faarue ia matou, ua ite hoi oe ihea e tano ai ia puhapa matou i te medebara, e e nehenehe oe e riro ei aratai* no matou.
32 E ia haere mai oe na muri ia matou,+ e fanaˈo atoa oe i te mau maitai atoa ta Iehova e horoa mai na matou.”
33 Reva aˈera ïa ratou mai te mouˈa o Iehova+ no te hoê tere e toru mahana, e to mua te afata+ o ta Iehova faufaa ia ratou i taua tere ra e toru mahana i te imi-haere-raa i te tahi vahi faafaaearaa no ratou.+
34 E to nia ˈˈe te ata+ a Iehova ia ratou i te ao i to ratou faarevaraa mai to ratou puhapa.
35 I te mau taime atoa e reva ˈi te Afata, e parau Mose: “A tia, e Iehova,+ e ia purara to oe mau enemi, e ia horo ê mai mua ia oe te feia mea hae na ratou ia oe.”
36 E ia faaea te Afata, e parau oia: “A hoˈi mai, e Iehova, i te mau tausani e rave rahi roa o Iseraela.”+
