Numera 3:1-51
3 Teie te huaai* o Aarona raua Mose i te mahana i paraparau ai Iehova ia Mose i nia i te mouˈa Sinai.+
2 Teie te iˈoa o na tamaiti a Aarona: Nadaba te matahiapo, Abihu,+ Eleazara+ e Itamara.+
3 Tera ïa te iˈoa o na tamaiti a Aarona, te mau tahuˈa faatavaihia tei faatoroahia* no te tavini ei tahuˈa.+
4 Tera râ, ua pohe Nadaba raua Abihu i mua ia Iehova i to raua pûpûraa i te mea noˈanoˈa na roto i te auahi ma te tano ore i mua ia Iehova+ i te medebara o Sinai, e aita e tamaiti ta raua. Area o Eleazara+ raua Itamara,+ ua tamau noa ïa i te tavini ei tahuˈa e o Aarona to raua metua tane.
5 Na ô maira ïa Iehova ia Mose:
6 “A haafatata mai i te opu o Levi,+ e e tia ratou i mua ia Aarona te tahuˈa, e na ratou e tauturu+ ia ˈna.
7 E amo ratou i ta ratou mau hopoia ia ˈna e i te amuiraa taatoa i mua i te tiahapa o te amuiraa ma te rave i ta ratou taviniraa no nia i te sekene.
8 Na ratou e haapao i te mau taihaa atoa+ o te tiahapa o te amuiraa e e amo ratou i ta ratou mau hopoia i te ati Iseraela ma te rave i te mau ohipa o te sekene.+
9 E horoa oe i te ati Levi ia Aarona e ta ˈna na tamaiti. Mea horoahia ratou, horoahia ia ˈna no roto mai i te ati Iseraela.+
10 E faatoroa oe ia Aarona e ta ˈna na tamaiti, e e amo ratou i ta ratou mau hopoia tahuˈa,+ e te taata aita i faatiahia* o te tapiri atu i te nao,* e haapohehia ïa.”+
11 Paraparau noa maira Iehova ia Mose, a na ô ai:
12 “O vau nei râ, e rave au i te ati Levi no roto mai i te ati Iseraela ei mono i te mau matahiapo atoa o te ati Iseraela,+ e e riro te ati Levi no ˈu.
13 Na ˈu hoi pauroa te matahiapo e te fanauˈa matamua.+ I te mahana i tairi ai au pauroa te matahiapo e te fanauˈa matamua i te fenua o Aiphiti,+ ua haamoˈa vau no ˈu pauroa te matahiapo e te fanauˈa matamua a Iseraela.+ Ia riro ratou na ˈu. O vau o Iehova.”
14 Paraparau faahou maira Iehova ia Mose i te medebara o Sinai,+ a na ô ai:
15 “A tapao i te iˈoa o na tamaiti a Levi ia au i te mau utuafare o to ratou mau metua e to ratou fetii. E tapao oe pauroa te tamaroa mai hoê avaˈe e nia ˈtu.”+
16 Tapao ihora ïa Mose i to ratou iˈoa na nia i te faaueraa a Iehova, mai tei faauehia ia ˈna.
17 Teie te iˈoa o na tamaiti a Levi: Geresona, Kohata e Merari.+
18 Teie te iˈoa o na tamaiti a Geresona ia au i to raua utuafare: Libeni e Simei.+
19 Na tamaiti a Kohata ia au i to ratou utuafare, o Amerama, Izahara, Heberona e Uziela.+
20 Na tamaiti a Merari ia au i to raua utuafare, o Maheli+ e o Musi.+
Tera te mau utuafare o te ati Levi ia au i to ratou tupuna.
21 No roto mai ia Geresona te utuafare o te ati Libeni+ e te utuafare o te ati Simei. Tera na utuafare o te ati Geresona.
22 Te taatoaraa o ta ratou mau tamaroa hoê avaˈe e nia ˈtu tei tapaohia, e 7 500.+
23 I muri mai i te sekene+ i te pae tooa o te râ i puhapa ˈi te mau utuafare o te ati Geresona.
24 Te raatira o te mau utuafare o te ati Geresona, o Eliasapha te tamaiti a Laela.
25 Te hopoia a na tamaiti a Geresona+ i te tiahapa o te amuiraa, o te haapaoraa ïa i te sekene e te tiahapa,+ te tapoˈi,+ te paruai*+ o te tomoraa o te tiahapa o te amuiraa,
26 te mau paruru+ o te aua, te paruai*+ o te tomoraa o te aua e haaati ra i te sekene e te fata, te mau taura o te tiahapa, e pauroa te ohipa no te reira.
27 No roto mai ia Kohata te utuafare o te ati Amerama, te utuafare o te ati Izahara, te utuafare o te ati Heberona e te utuafare o te ati Uziela. Tera te mau utuafare o te ati Kohata.+
28 Te taatoaraa o te mau tamaroa hoê avaˈe e nia ˈtu, e 8 600. Na ratou e haapao i te vahi moˈa ei hopoia na ratou.+
29 I te pae apatoa o te sekene+ i puhapa ˈi te mau utuafare o na tamaiti a Kohata.
30 Te raatira o te mau utuafare o te ati Kohata, o Elizaphana te tamaiti a Uziela.+
31 Ta ratou hopoia, o te haapaoraa ïa i te Afata,+ te iri vairaa pane,+ te vairaa mori,+ na fata,+ te mau taihaa+ faaohipahia no te taviniraa i roto i te vahi moˈa, te paruai,*+ e pauroa te ohipa no te reira.+
32 Te raatira rahi o te ati Levi, o Eleazara+ te tamaiti a Aarona te tahuˈa, tei tiaau i te feia o te amo i te mau hopoia no nia i te vahi moˈa.
33 No roto mai ia Merari te utuafare o te ati Maheli e te utuafare o te ati Musi. Tera te mau utuafare o Merari.+
34 Te taatoaraa o te mau tamaroa hoê avaˈe e nia ˈtu tei tapaohia, e 6 200.+
35 Te raatira o te mau utuafare o te ati Merari, o Zuriela te tamaiti a Abihaila. I te pae apatoerau o te sekene+ i puhapa ˈi ratou.
36 Te hopoia a te mau tamaiti a Merari, o te haapaoraa ïa i te mau iri pǎpai+ o te sekene, te mau raau tarava,+ te mau pou,+ te mau niu, pauroa te taihaa,+ e pauroa te ohipa no te reira,+
37 oia atoa te mau pou ati aˈe te aua e to ratou niu,+ te mau naero rahi e te mau taura no te tiahapa.
38 O Mose, Aarona e ta ˈna na tamaiti tei puhapa i mua i te sekene i te pae hitia o te râ, i mua i te tiahapa o te amuiraa i te pae hitiraa o te mahana. Na ratou e haapao i te nao ei hopoia na ratou no te ati Iseraela. Te taata aita i faatiahia* o te tapiri atu i te nao, e haapohehia ïa.+
39 Pauroa te tamaroa ati Levi hoê avaˈe e nia ˈtu, ta Mose raua Aarona i tapao te iˈoa ia au i to ratou mau utuafare na nia i te faaueraa a Iehova, e 22 000.
40 Na ô maira Iehova ia Mose: “A tapao i te iˈoa o te mau tamaroa matahiapo a te ati Iseraela atoa hoê avaˈe e nia ˈtu,+ a taio ehia ratou, e a tapura i to ratou iˈoa.
41 A rave i te ati Levi no ˈu ei mono i te mau matahiapo atoa a te ati Iseraela,+ e a rave i te mau animara rata a te ati Levi ei mono i te mau fanauˈa matamua atoa a te mau animara rata a te ati Iseraela.+ O vau o Iehova.”
42 Tapao ihora ïa Mose i te iˈoa o te mau matahiapo atoa i rotopu i te ati Iseraela, mai ta Iehova iho â i faaue ia ˈna.
43 Te taatoaraa o te mau tamaroa matahiapo hoê avaˈe e nia ˈtu tei tapaohia te iˈoa, e 22 273.
44 Paraparau noa maira Iehova ia Mose, a na ô ai:
45 “A rave i te ati Levi ei mono i te mau matahiapo atoa i rotopu i te ati Iseraela, e a rave i te mau animara rata a te ati Levi ei mono i ta ratou mau animara rata, e ia riro te ati Levi no ˈu. O vau o Iehova.
46 Ei hoo+ no na 273 matahiapo a te ati Iseraela tei hau aˈe i te ati Levi,+
47 e rave oe e pae sekela* no ratou tataitahi,+ ia au i te sekela o te vahi moˈa.* Hoê sekela, e 20 ïa gera.*+
48 E horoa oe i te moni na Aarona e ta ˈna na tamaiti ei hoo no tei hau aˈe ia ratou.”
49 Rave ihora ïa Mose i te moni o te hoo no te hoo mai i tei hau aˈe i te ati Levi.
50 Rave ihora oia i te moni i te mau matahiapo a te ati Iseraela, 1 365 sekela, ia au i te sekela o te vahi moˈa.
51 E horoa ˈtura Mose i te moni o te hoo na Aarona e ta ˈna na tamaiti ia au i te parau a Iehova, mai ta Iehova iho â i faaue ia Mose.
Nota i raro i te api
^ Heb: “uˈi.”
^ Heb: “faaîhia te rima.”
^ Heb: “taata ê,” oia hoi e ere i te huaai o Aarona.
^ Aore ra “paruru.”
^ Aore ra “paruru.”
^ Aore ra “paruru.”
^ Heb: “taata ê,” oia hoi e ere i te ati Levi.
^ 1 sekela: 11,4 g. Hiˈo i te tuhaa hau B14.
^ Aore ra “sekela moˈa.”
^ 1 gera: 0,57 g. Hiˈo i te tuhaa hau B14.
