Numera 6:1-27
6 Paraparau faahou maira Iehova ia Mose e na ô maira:
2 “A paraparau i te ati Iseraela e a na ô atu: ‘Ia euhe te hoê tane aore ra vahine i te hoê euhe taa ê no te ora ei Nazira*+ no Iehova,
3 e haapae oia i te uaina e te tahi atu mau ava. Eiaha oia e inu i te vinega uaina aore ra te vinega o te tahi atu ava.+ Eiaha oia e inu i te pape vine, eiaha atoa e amu i te vine, te mea ota e te mea mǎrô.
4 I te mau mahana atoa o to ˈna Naziraraa, eiaha oia e amu i tei hamanihia i te vine, te vine puu anei tae roa ˈtu te paa o te vine.
5 “‘I te mau mahana atoa o ta ˈna euhe Nazira, eiaha to ˈna upoo ia hahuhia.+ Ia vai moˈa noa oia ma te vaiiho i te rouru o to ˈna upoo ia tupu e ia hope roa te mau mahana i faataa-ê-hia ˈi oia no Iehova.
6 Eiaha oia e tapiri atu* i te hoê taata pohe i te mau mahana atoa i faataa-ê-noa-hia ˈi oia no Iehova.
7 Noa ˈtu e o to ˈna metua tane, to ˈna metua vahine, to ˈna taeae aore ra to ˈna tuahine te pohe, eiaha oia e haaviivii ia ˈna,+ no te mea tei nia i to ˈna upoo te tapao o to ˈna Naziraraa no to ˈna Atua.
8 “‘Mea moˈa oia no Iehova i te mau mahana atoa o to ˈna Naziraraa.
9 Tera râ, ia pohe taue te tahi taata i pihai iho ia ˈna+ e ia haaviivii oia i to ˈna rouru, te taipe o to ˈna faataa-ê-raahia no te Atua,* e hahu oia i to ˈna upoo+ i te mahana o to ˈna tamâraa. E hahu oia i te reira i te hitu o te mahana.
10 E i te vaˈu o te mahana, e hopoi mai oia e piti uupa aore ra e piti uuairao apî i te tahuˈa i te tomoraa o te tiahapa o te amuiraa.
11 E faaineine te tahuˈa hoê ei tusia no te hara e te tahi atu ei tusia taauahi e e pûpû oia i te tamâraa* no ˈna no ta ˈna hara+ no te taata tei pohe. I muri iho, e haamoˈa oia i to ˈna upoo i taua mahana ra.
12 E e faataa ê faahou oia ia ˈna no Iehova no te mau mahana o to ˈna Naziraraa, e e hopoi mai oia hoê mamoe oni apî aita â i hoê matahiti ei tusia no te hapa. Eita râ te mau mahana na mua ˈtu e taiohia no te mea ua haaviivii oia i to ˈna Naziraraa.
13 “‘Teie te ture no te Nazira: Ia hope te mau mahana o to ˈna Naziraraa,+ e arataihia oia i te tomoraa o te tiahapa o te amuiraa.
14 I reira, e hopoi mai oia i ta ˈna tusia ia Iehova: hoê mamoe oni apî oraora maitai aita â i hoê matahiti ei tusia taauahi,+ hoê fanauˈa mamoe ufa oraora maitai aita â i hoê matahiti ei tusia no te hara,+ hoê mamoe oni oraora maitai ei tusia no te hau,+
15 hoê farii pane hopue ore mai te hei ra hamanihia i te faraoa ota oro-maitai-hia e tei ôihia e te hinu, te pai hopue ore paraihia i te hinu, e te tusia huero maa+ e te tusia uaina+ no te reira.
16 E hopoi mai te tahuˈa i te reira i mua ia Iehova e e pûpû oia i ta ˈna tusia no te hara e ta ˈna tusia taauahi.
17 E pûpû oia i te mamoe oni ei tusia no te hau ia Iehova e te farii pane hopue ore atoa, e e hopoi mai te tahuˈa i te tusia huero maa+ e te tusia uaina no te reira.
18 “‘I reira, e tâpû haapoto roa ino te Nazira i to ˈna rouru aita i tâpûhia*+ i te tomoraa o te tiahapa o te amuiraa. E rave oia i to ˈna rouru tei tupu i te roaraa o to ˈna Naziraraa e e tuu oia i te reira i nia iho i te auahi i raro aˈe i te tusia no te hau.
19 E rave te tahuˈa hoê huha mua vaipâhia+ o te mamoe oni, hoê pane hopue ore mai te hei ra no roto mai i te farii pane, e hoê pai hopue ore e e tuu oia i te reira i roto i na apu rima o te Nazira i muri iho i te hahuraahia te tapao o to ˈna Naziraraa.
20 E taueue te tahuˈa i te reira ei tusia taueuehia i mua ia Iehova.+ Mea moˈa te reira no te tahuˈa, tae noa ˈtu te ouma o te tusia taueuehia e te huha ei tuhaa moˈa.+ I muri iho, e nehenehe te Nazira e inu i te uaina.
21 “‘Teie te ture no te Nazira+ o tei euhe: Ia euhe oia e ia nehenehe ta ˈna e pûpû i te tahi tusia ia Iehova ia au i te pee ia ˈna, hau atu i te mau titauraa o to ˈna Naziraraa, e rave oia i ta ˈna i euhe ia au i te ture o to ˈna Naziraraa.’”
22 Na ô maira ïa Iehova ia Mose:
23 “A parau ia Aarona e ta ˈna na tamaiti: ‘Mai teie ia haamaitai outou+ i te nunaa o Iseraela. A na ô atu:
24 “Ia haamaitai Iehova ia outou+ e ia paruru oia ia outou.
25 Ia faaanaana mai Iehova i to ˈna aro i nia ia outou,+ e ia farii maitai oia ia outou.
26 Ia fariu Iehova i to ˈna aro ia outou e ia horoa ˈtu oia i te hau.”’+
27 E e tuu ratou i to ˈu iˈoa i nia i te nunaa o Iseraela,+ ia haamaitai au ia ratou.”+
