Numera 32:1-42
-
Te mau puhaparaa i te pae hitia o te râ o Ioridana (1-42)
32 E rave rahi roa animara ta te mau tamaiti a Reubena+ e te mau tamaiti a Gada,+ e ua ite ratou e fenua maitai Iazera+ e Gileada no te animara.
2 Faafatata maira ïa te mau tamaiti a Gada e te mau tamaiti a Reubena ia Mose, Eleazara te tahuˈa, e te mau raatira o te amuiraa e na ô maira:
3 “Atarota, Dibona, Iazera, Nimera, Hesebona,+ Eleale, Sebama, Nebo,+ e Beona,+
4 te fenua tei pau ia Iehova i mua i te amuiraa o Iseraela,+ e fenua maitai no te animara, e e rave rahi animara+ ta to mau tavini nei.”
5 Na ô faahou maira ratou: “Ia fariihia matou i mua i to aro, ia horoahia teie fenua no to mau tavini ia fatu matou. Eiaha oe e faahaere ia matou i te tahi atu pae o Ioridana.”
6 Parau atura Mose i te mau tamaiti a Gada e te mau tamaiti a Reubena: “E haere anei to outou mau taeae i te tamaˈi a parahi noa ˈi outou i ǒ nei?
7 Eaha outou e faatoaruaru ai i te nunaa o Iseraela ia haere i te tahi atu pae o Ioridana i te fenua ta Iehova e horoa mau â no ratou?
8 Tera ta to outou mau metua i rave i to ˈu tonoraa ia ratou mai Kadesa-barenea ˈtu no te hiˈopoa i te fenua.+
9 I to ratou paumaraa i te peho o Esekola+ e to ratou iteraa i te fenua, faatoaruaru atura ratou i te nunaa o Iseraela ia haere i te fenua ta Iehova e horoa no ratou.+
10 Ura ihora to Iehova riri i taua mahana ra e horeo+ ihora oia:
11 ‘Te mau taata tei haere mai i rapae i Aiphiti mai te 20 matahiti e nia ˈtu, eita ïa e ite i te fenua+ ta ˈu i horeo ia Aberahama, Isaaka e Iakoba,+ no te mea aita ratou i faaroo ia ˈu ma te aau atoa,
12 o Kaleba+ anaˈe râ te tamaiti a Iephune te ati Kenizi raua Iosua+ te tamaiti a Nuna, no te mea ua pee raua ia Iehova ma te aau atoa.’+
13 Ura ihora ïa to Iehova riri ia Iseraela e vaiiho noa ˈtura ia ratou ia overe i roto i te medebara e 40 matahiti+ e ia pohe roa+ te uˈi tei rave i te ino i mua i te aro o Iehova.
14 E na outou, feia rave hara, e rave nei i te hoê â ohipa e ta to outou mau metua o tei faauˈana i te riri o Iehova ia Iseraela.
15 Ia fariu ê outou ia ˈna a ore atu ai e faaroo ia ˈna, mea papu e vaiiho faahou oia ia ratou i te medebara e e mou teie nunaa taatoa no outou.”
16 I muri aˈe, faafatata maira ratou ia ˈna e na ô maira: “A faatia ia matou ia patu i te aua no ta matou mau animara, e te oire no ta matou mau tamarii.
17 E vai ineine râ matou no te tamaˈi+ na mua i te ati Iseraela e aratai roa ˈtu ai matou ia ratou i to ratou nohoraa, a parahi hau noa ˈi ta matou mau tamarii i roto i te mau oire auahia i te patu, ma te ore e taiâ i te feia o te fenua.
18 Eita matou e hoˈi i to matou mau fare e fanaˈo roa ˈi te ati Iseraela tataitahi i to ratou tuhaa fenua.+
19 Eita hoi matou e fanaˈo i te tahi tuhaa e o ratou i te tahi atu pae o Ioridana e i ǒ roa ˈtu, no te mea ua fanaˈo matou i ta matou tuhaa i te pae hitia o te râ o Ioridana.”+
20 Pahono atura Mose ia ratou: “Ia rave outou i te mauhaa tamaˈi i mua ia Iehova no te tamaˈi,+
21 ia rave pauroa outou i te mauhaa tamaˈi, ia haere outou i te tahi atu pae o Ioridana i mua ia Iehova a tiahi ai oia i to outou mau enemi mai mua ia ˈna+
22 e ia pau roa to tera fenua ia Iehova,+ e nehenehe ïa outou e hoˈi mai+ ma te hapa ore i mua ia Iehova e ia Iseraela. E fatu ïa outou i teie fenua i mua ia Iehova.+
23 Ia ore râ outou ia na reira, e hara ïa outou ia Iehova. Ia ite ïa outou e e roohia outou e ta outou hara.
24 E nehenehe ïa outou e patu i te oire no ta outou mau tamarii, e te aua patuhia i te ofai no ta outou mau animara.+ E rave râ outou i ta outou i fafau.”
25 Parau maira te mau tamaiti a Gada e te mau tamaiti a Reubena ia Mose: “E rave to mau tavini nei mai ta to ˈu fatu iho â e faaue nei.
26 Ta matou mau tamarii, vahine faaipoipo, animara e pauroa ta matou animara rata te faaea i ǒ nei i te mau oire no Gileada.+
27 E haere râ to mau tavini nei i te tahi atu pae, te mau tane atoa ma te mauhaa tamaˈi no te tamaˈi i mua ia Iehova,+ mai ta to ˈu fatu iho â e parau nei.”
28 Horoa ˈtura ïa Mose i te faaueraa no ratou ia Eleazara te tahuˈa, ia Iosua te tamaiti a Nuna, e te mau upoo o te utuafare o te mau metua o te ati Iseraela.
29 Na ô atura Mose ia ratou: “Ia haere noa ˈtu te mau tamaiti a Gada e te mau tamaiti a Reubena i te tahi atu pae o Ioridana na muri ia outou, te mau tane atoa ma te mauhaa tamaˈi no te tamaˈi i mua ia Iehova, a pau atu ai to te fenua ia outou, e horoa ïa outou i te fenua o Gileada ia fatu ratou.+
30 Ia ore râ ratou ia rave i te mauhaa tamaˈi e ia ore ia haere i tera ˈtu pae na muri ia outou, e parahi ïa ratou i rotopu ia outou i te fenua o Kanaana.”
31 Pahono maira ïa te mau tamaiti a Gada e te mau tamaiti a Reubena: “E rave matou i ta Iehova i parau i to mau tavini nei.
32 E rave matou i te mauhaa tamaˈi e e haere matou i te tahi atu pae i mua ia Iehova i te fenua o Kanaana.+ Area te fenua ta matou e fatu, tei teie pae mai ïa o Ioridana.”
33 Horoa ˈtura ïa Mose na te mau tamaiti a Gada e te mau tamaiti a Reubena,+ e te afaraa o te opu o Manase+ te tamaiti a Iosepha, i te faatereraa a Sihona+ te arii o te ati Amori, e te faatereraa a Oga+ te arii o Basana, te fenua o to ˈna mau oire i taua mau tuhaa fenua ra, e te mau oire o te fenua ati aˈe.
34 Patu* atura te mau tamaiti a Gada ia Dibona,+ Atarota,+ Aroera,+
35 Aterota-sophana, Iazera,+ Iogebeha,+
36 Bete-nimera+ e Bete-harana,+ e oire auahia i te patu, e hamani atura i te aua patuhia i te ofai no ta ratou mau mamoe e puaaniho.
37 Patu atura te mau tamaiti a Reubena ia Hesebona,+ Eleale,+ Kiriataima,+
38 Nebo+ e Baala-meona+ (ua tauihia to ratou iˈoa), e Sibema. E haamata ˈtura ratou i te taui i te iˈoa o te mau oire ta ratou i patu faahou.
39 Haere aˈera te mau tamaiti a Makira+ te tamaiti a Manase e aro ia Gileada, haru ihora i te reira e tiahi aˈera i te ati Amori e parahi ra i reira.
40 Horoa ˈtura ïa Mose ia Gileada no Makira te tamaiti a Manase, e parahi ihora oia i reira.+
41 Haere aˈera Iaira te tamaiti a Manase e aro ia ratou, haru maira i ta ratou mau puhapa e topa ˈtura i te reira i te iˈoa o Havota-iaira.*+
42 Haere aˈera Noba e aro e haru maira ia Kenata e te mau oire ta ˈna e tiaau ra.* Topa ˈtura oia i te reira i te iˈoa o Noba, to ˈna iho iˈoa.
