Numera 14:1-45
14 Faateitei aˈera te amuiraa taatoa i to ratou reo, e tamau atura te nunaa i te tuô e te taˈi i taua po taatoa ra.+
2 Haamata ˈtura pauroa te ati Iseraela i te amuamu ia Mose raua Aarona,+ e faaino atura te amuiraa taatoa ia raua, a na ô ai: “Ahiri iho â matou i pohe i te fenua o Aiphiti, aore ra ahiri iho â matou i pohe i teie medebara!
3 Eaha Iehova e aratai ai ia tatou i tera fenua no te pohe i te ˈoˈe?+ E haruhia ta tatou mau vahine faaipoipo e tamarii.+ E ere anei mea maitai aˈe no tatou e hoˈi i Aiphiti?”+
4 Te parau atoa ra ratou te tahi i te tahi: “Mai faatoroa anaˈe i te tahi raatira no tatou, e hoˈi anaˈe i Aiphiti!”+
5 Topa ihora Mose raua Aarona te mata i raro i mua i te amuiraa taatoa o te ati Iseraela tei putuputu i reira.
6 Area Iosua+ te tamaiti a Nuna e Kaleba+ te tamaiti a Iephune, to rotopu atoa i te feia tei hiˈopoa haere i te fenua, hahae ihora ïa i to raua ahu,
7 e teie ta raua i parau i te amuiraa taatoa o te ati Iseraela: “E fenua maitai roa ino te fenua+ ta matou i hiˈopoa haere.
8 Ia mauruuru Iehova ia tatou, e aratai mau â oia ia tatou i tera fenua e e horoa mai oia i te reira no tatou, te hoê fenua e tahe noa te û e te meri.+
9 Eiaha râ outou e orure hau ia Iehova, e eiaha e mǎtaˈu i te feia o tera fenua,+ e pau hoi ratou ia tatou.* Ua tatarahia to ratou paruru, e tei ia tatou ra Iehova.+ Eiaha e mǎtaˈu ia ratou.”
10 Tera râ, paraparau atura te amuiraa taatoa e pehi ia raua i te ofai.+ Fa maira ïa to Iehova hanahana i nia i te tiahapa o te amuiraa i mua i te nunaa taatoa o Iseraela.+
11 Na ô maira ïa Iehova ia Mose: “Ehia â maororaa e faatura ore+ ai teie nunaa ia ˈu, e ehia â maororaa e ore ai ratou e tiaturi ia ˈu noa ˈtu te mau tapao atoa ta ˈu i faatupu i rotopu ia ratou?+
12 E tairi au ia ratou i te maˈi pee, e tiahi au ia ratou e e faariro vau ia oe ei nunaa rahi aˈe e te puai aˈe ia ratou.”+
13 Parau atura râ Mose ia Iehova: “E faaroo ïa to Aiphiti, no rotopu mai ia ratou to oe aratairaa i teie nunaa i rapae i to oe mana,+
14 e e faatia ratou i te reira i te mau taata o tera fenua. Ua faaroo atoa ratou e tei rotopu oe, Iehova, i teie nunaa+ e ua fa mai oe ia ratou e aro e aro.+ O oe o Iehova, to nia ˈˈe ia ratou ta oe ata, e te haere ra oe na mua ia ratou i roto i te pou ata i te ao e te pou auahi i te po.+
15 Ia haapohe pauroa oe i teie nunaa, teie ta te mau nunaa tei faaroo i to oe roo e parau:
16 ‘Aita i haere ia Iehova ia aratai i teie nunaa i te fenua ta ˈna i horeo e horoa no ratou, no reira oia i haapohe ai ia ratou i te medebara.’+
17 I teie nei, Iehova, ia rahi mai na to oe mana, mai ta oe i fafau a na ô ai:
18 ‘Iehova, o te ore e riri oioi e tei rahi i te here taiva ore,*+ o te faaore i te hape e te hapa, e faautua iho â râ oia i tei hapa, a faatae ai i te utua no te hape a te mau metua i nia i te mau tamarii, i nia i te toru o te uˈi e te maha o te uˈi.’+
19 A faaore na i te hape a teie nunaa ia au i to oe here taiva ore rahi, mai ta oe i faaore i te hape a teie nunaa mai Aiphiti mai e tae roa mai i teie nei.”+
20 Na ô maira ïa Iehova: “E faaore au i ta ratou hape mai ta oe i parau.+
21 Tera râ, te horeo nei au i to ˈu nei ora, e î te fenua taatoa i te hanahana o Iehova.+
22 Tera râ, aita hoê aˈe o te mau taata tei ite i to ˈu hanahana e ta ˈu mau tapao+ i faatupu i Aiphiti e i te medebara, tei tamau râ i te aa mai ia ˈu+ a ahuru atura taime e tei ore i faaroo i to ˈu reo,+
23 aita hoê aˈe o ratou e ite i te fenua ta ˈu i horeo i to ratou mau tupuna. Aita, aita hoê aˈe o te feia e faatura ore ra ia ˈu e ite i te reira.+
24 No te mea râ e huru feruriraa ê to ta ˈu tavini ra o Kaleba+ e ua tamau oia i te pee ia ˈu ma te aau atoa, e aratai mau â vau ia ˈna i te fenua ta ˈna i haere, e e fatu to ˈna huaai i te reira.+
25 I te mea e te parahi ra te ati Amaleka e te ati Kanaana+ i te peho, e hoˈi ïa outou i muri ananahi no te haere i te medebara na te eˈa o te miti Uteute.”+
26 Na ô maira Iehova ia Mose raua Aarona:
27 “Ehia â maororaa e amuamu ai teie amuiraa ino ia ˈu?+ Ua faaroo vau eaha ta te ati Iseraela e amuamu ra ia ˈu.+
28 A parau ia ratou: ‘“Te horeo nei au i to ˈu nei ora,” te parau ra Iehova, “e rave iho â vau ia outou i ta ˈu i faaroo ia outou i te parauraa!+
29 I teie medebara e topa ˈi to outou mau tino pohe,+ pauroa outou mai te 20 matahiti e nia ˈtu tei tapaohia te iˈoa, pauroa outou tei amuamu ia ˈu.+
30 Aita hoê aˈe o outou e tomo i te fenua ta ˈu i horeo* e haaparahi+ ia outou, o Kaleba anaˈe râ te tamaiti a Iephune e o Iosua te tamaiti a Nuna.+
31 “‘“E faatomo vau i ta outou mau tamarii, ta outou i parau e haruhia,+ e e ite ratou i te fenua ta outou i vahavaha.+
32 E topa râ to outou mau tino pohe i teie medebara.
33 E riro ta outou mau tamaiti ei tiai mamoe i te medebara e 40 matahiti,+ e e amo ratou i te utua o ta outou mau ohipa taiva* e ia topa roa te hopea o to outou mau tino pohe i te medebara.+
34 Ia au i te rahiraa mahana i hiˈopoa haere ai outou i te fenua, e 40 mahana,+ hoê mahana hoê ïa matahiti, hoê mahana hoê ïa matahiti, e amo outou i te utua no ta outou mau hape e 40 matahiti.+ E ite ïa outou eaha te tupu ia patoi outou ia ˈu.*
35 “‘“O vau o Iehova tei parau. Teie ta ˈu e rave i teie amuiraa ino taatoa, te feia tei haaputuputu no te patoi ia ˈu: I teie medebara e mou ai ratou, e i ǒ nei ratou e pohe+ ai.
36 Te mau tane ta Mose i tono e hiˈopoa haere i te fenua e tei turai i te amuiraa taatoa ia amuamu ia ˈna i to ratou hoˈiraa mai ma te parau faatoaruaru no te fenua,+
37 oia mau, e faautuahia taua mau tane ra tei faatia i te parau faatoaruaru no te fenua, a pohe atu ai ratou i mua ia Iehova.+
38 Area o Iosua te tamaiti a Nuna e o Kaleba te tamaiti a Iephune, to rotopu i te feia tei haere e hiˈopoa i te fenua, e ora mau â raua.”’”+
39 I to Mose faaiteraa i teie mau parau i te ati Iseraela taatoa, oto roa ihora te nunaa.
40 Hau atu â, tia aˈera ratou i te poipoi roa e tamata aˈera i te pauma i te tupuai o te mouˈa, a na ô ai: “Teie matou ua ineine i te pauma i te vahi ta Iehova i faahiti, ua hara hoi matou.”+
41 Parau atura râ Mose: “No te aha outou e na nia ˈˈe ai i te faaueraa a Iehova? E ore te reira e manuïa.
42 Eiaha e pauma, aita hoi Iehova ia outou ra, e e pau outou i to outou mau enemi.+
43 To ǒ hoi te ati Amaleka e te ati Kanaana no te aro mai ia outou,+ e e pohe outou i te ˈoˈe. No te mea aita outou i tamau i te pee ia Iehova, aita Iehova ia outou ra.”+
44 Ma te teoteo râ, haere aˈera ratou i te tupuai o te mouˈa,+ area te afata o ta Iehova faufaa e o Mose, aita ïa i faarue i te puhapa.+
45 Pou maira ïa te ati Amaleka e te ati Kanaana o te parahi ra i nia i taua mouˈa ra e tairi aˈera ia ratou, a purara ˈtu ai ratou e tae roa i Horamâ.+
Nota i raro i te api
^ Heb: “e maa hoi ratou na tatou.”
^ Aore ra “hamani maitai.”
^ Heb: “amo i to ˈu rima i nia.”
^ Heb: “taiata.”
^ Aore ra “ia riro vau ei enemi no outou.”
