Numera 21:1-35
21 I te faarooraa te arii ati Kanaana no Arada,+ o te parahi ra i te Negeba, e ua tae mai Iseraela na te eˈa o Atarima, aro atura oia ia Iseraela e hopoi tîtî aˈera i vetahi o ratou.
2 Euhe ihora Iseraela ia Iehova a na ô ai: “Ia tuu oe i teie nunaa i to ˈu nei rima, e faataa mau â vau i to ratou mau oire no te haamouraa.”
3 Faaroo ihora ïa Iehova i te reo o Iseraela, tuu atura i te ati Kanaana ia ratou, e haamou aˈera ratou i te ati Kanaana e to ratou mau oire. No reira, topa ˈtura ratou i tera vahi i te iˈoa o Horamâ.*+
4 A tamau ai ratou i to ratou tere mai te mouˈa Hora+ na te eˈa o te miti Uteute no te haaati i te fenua o Edoma,+ rohirohi aˈera te nunaa no te tere.
5 Faaino noa ˈtura te nunaa i te Atua e ia Mose,+ a na ô ai: “Eaha orua i aratai ai ia matou i rapae i Aiphiti no te pohe i te medebara? Aita e maa e aita e pape,+ e ua faufau roa matou i teie pane hairiiri.”+
6 Faatae atura ïa Iehova i te mau ophi taero i rotopu i te nunaa, hohoni atura ratou i te nunaa, e pohe+ atura e rave rahi Iseraela.
7 Haere maira ïa te nunaa ia Mose e na ô maira: “Ua hara matou i te faainoraa ia Iehova e ia oe.+ A pure ia Iehova no matou ia faaatea oia i te mau ophi ia matou.” Pure ihora Mose no te nunaa.+
8 Na ô maira ïa Iehova ia Mose: “A hamani i te hohoˈa o te tahi ophi taero e a tuu i te reira i nia i te tahi pou. E ua hohoni-anaˈe-hia te tahi, e hiˈo oia i te reira ia ora noa oia.”
9 Hamani ihora Mose i te tahi ophi i te veo+ e tuu atura i te reira i nia i te tahi pou,+ e ia hohonihia te tahi taata e te ophi, e ia hiˈo oia i te ophi veo, e ora mai oia.+
10 I muri aˈe, faareva aˈera te ati Iseraela e puhapa ihora i Obota.+
11 Faareva aˈera ratou mai Obota mai e puhapa ihora i Iie-abarima,+ i te medebara e fariu ra ia Moabi, i te pae hitia o te râ.
12 Mai reira mai, faareva aˈera ratou e puhapa ihora i te peho no Zereda.+
13 Mai reira mai, faareva aˈera ratou e puhapa ihora i te tuhaa fenua o te Aranona,+ i te medebara e tarava ra mai te otia o te ati Amori, o te Aranona hoi te otia o Moabi, i ropu ia Moabi e te ati Amori.
14 No reira te buka o te mau Tamaˈi a Iehova e faahiti ai ia “Vaheba i Supha e te mau peho o Aranona,
15 e te haapouraa* o te mau peho, o te haere roa i te puhaparaa o Ala a tuati atu ai i te otia o Moabi.”
16 I muri aˈe, haere atura ratou i Beere. O te apoo pape teie ta Iehova i parau ia Mose: “A haaputuputu i te nunaa e e horoa vau i te pape na ratou.”
17 I tera taime, himene ihora Iseraela i teie himene:
“A pihaa mai, e te apoo pape e! A pahono* atu!
18 Te apoo pape ta te huiarii i ô, ta te huimana i ô,I te hoê raau a te raatira e i ta ratou mau raau.”
Haere aˈera ratou mai te medebara i Mâtana,
19 mai Mâtana i Nahaliela, mai Nahaliela i Bamota.+
20 Haere aˈera ratou mai Bamota mai i te peho i te tuhaa fenua o Moabi,+ i nia roa i Pisega,+ i reira e itehia ˈi o Iesimona*+ na nia mai.
21 Tono ihora Iseraela i te vea ia Sihona, te arii o te ati Amori, a na ô ai:+
22 “A vaiiho na ia matou ia haere na to oe fenua. Eita matou e tipuu aˈe i roto i te tahi faaapu aore ra faaapu vine. Eita matou e inu i te pape o te tahi apoo. E haere matou na nia i te purumu o te arii e faarue roa ˈi matou i to oe tuhaa fenua.”+
23 Aita râ Sihona i faatia ia Iseraela ia haere na to ˈna tuhaa fenua. Haaputuputu maira Sihona i to ˈna mau taata atoa, haere atura e aro ia Iseraela i te medebara, tae maira i Iahaza e haamata aˈera i te aro ia Iseraela.+
24 Upootia aˈera râ Iseraela i nia ia ˈna ma te ˈoˈe+ e rave maira i to ˈna fenua+ no ˈna mai te Aranona+ tae roa i te Iaboka,+ i pihai iho i te ati Amona, no te mea tei te otia o te ati Amona+ o Iazera.+
25 Riro maira ïa teie mau oire atoa ia Iseraela, e parahi ihora ratou i taua mau oire atoa ra a te ati Amori,+ i Hesebona e pauroa te oire ta ˈna e tiaau ra.*
26 O Hesebona hoi te oire o Sihona, te arii o te ati Amori, tei aro i te arii o Moabi e tei rave mai i to ˈna fenua taatoa e tae roa i te Aranona.
27 No reira mai teie parau paari faaooo:
“E haere mai i Hesebona.
Ia patuhia te oire o Sihona e ia haamau-maitai-hia.
28 E auahi hoi tei faura mai na Hesebona, e ura auahi no ǒ mai i te oire o Sihona.
Pau aˈera Ala no Moabi, te mau fatu o te mau vahi teitei o te Aranona i te auahi.
29 Ua ati oe Moabi! E haamouhia oe, e te nunaa o Kemosa+ e!
No ˈna e horo ê ai ta ˈna mau tamaiti e e riro ai ta ˈna mau tamahine ei tîtî na Sihona, te arii o te ati Amori.
30 E aro anaˈe ia ratou,E haamouhia Hesebona tae roa i Dibona,+E haamou anaˈe i te reira tae roa i Nôpha,E purara te auahi tae roa i Medeba.”+
31 Parahi ihora ïa Iseraela i te fenua o te ati Amori.
32 Tono ihora Mose i te tahi mau tane e hiˈopoa haere ia Iazera.+ Haru aˈera ratou i te mau oire ta ˈna e tiaau ra* e tiahi atura i te ati Amori i reira.
33 I muri iho, tipuu aˈera ratou e pauma aˈera na te eˈa o Basana. Haere maira ïa Oga+ te arii o Basana e to ˈna mau taata atoa e aro ia ratou i Ederei.+
34 Na ô maira Iehova ia Mose: “Eiaha e mǎtaˈu ia ˈna,+ e tuu hoi au ia ˈna, ta ˈna nuu taatoa e to ˈna fenua i to oe rima,+ e e rave oe ia ˈna mai ta oe iho â i rave ia Sihona te arii o te ati Amori, tei ora na i Hesebona.”+
35 Tairi aˈera ratou ia ˈna, ta ˈna mau tamaiti e pauroa ta ˈna nuu, e aita roa ˈtura e taata i ora mai,+ e rave maira ratou i te fenua no ratou.+
