Numera 31:1-54
31 Na ô maira Iehova ia Mose:
2 “A faautua+ i te ati Midiana+ no ta ratou i rave i te ati Iseraela. I muri iho, e amuihia oe i to oe mau taata.”*+
3 Parau atura ïa Mose i te nunaa: “A faaineine i te mau tane i rotopu ia outou no te tamaˈi* ia Midiana e no te faatupu i te tahoo o Iehova ia Midiana.
4 E tono outou 1 000 tane no roto i te opu tataitahi o te mau opu atoa o Iseraela i te tamaˈi.”
5 Faatoroahia aˈera ïa 1 000 tane no roto i te opu tataitahi o te mau tausani o Iseraela,+ 12 000 tane ïa tei faaineinehia no te tamaˈi.*
6 Tono atura Mose i na 1 000 tane no roto i te opu tataitahi, e o Phinehasa+ te tamaiti a Eleazara te tahuˈa tei haere na muri i te nuu, tei roto i to ˈna rima te mau taoˈa moˈa e na pu tamaˈi.+
7 Aro atura ïa ratou ia Midiana, mai ta Iehova iho â i faaue ia Mose, e haapohe atura ratou i te mau tane atoa.
8 Hau atu i te feia tei haapohehia, ua haapohe ratou i na arii o Midiana, oia hoi o Evi, Rekema, Zura, Hura e Reba, na arii e pae o Midiana. Ua haapohe atoa ratou ia Balaama+ te tamaiti a Beora i te ˈoˈe.
9 Hopoi aˈera râ te ati Iseraela i te mau vahine e te mau tamarii no Midiana ta ratou i haru. Ua haru atoa ratou pauroa ta ratou animara rata e te tahi atu mau animara, e pauroa ta ratou faufaa.
10 E ua tanina ratou i to ratou mau oire atoa i reira ratou i parahi ai e to ratou mau puhaparaa* atoa.
11 Rave aˈera ratou pauroa ta ratou i haru, te taata e te animara.
12 Hopoi atura ratou i te mau taata ta ratou i haru ia Mose, ia Eleazara te tahuˈa e i te amuiraa o te ati Iseraela, i te puhapa i te mau vahi papu pâpâmǎrô o Moabi+ i pihai iho i Ioridana i Ieriko.
13 Haere maira Mose raua Eleazara te tahuˈa e te mau raatira atoa o te amuiraa i rapaeau i te puhapa.
14 Aita râ Mose i mauruuru i te mau tane tei faatoroahia no te tamaˈi, te mau raatira tausani e te mau raatira hanere na te tamaˈi mai ra.
15 Na ô atura Mose ia ratou: “Ua vaiiho outou i te mau vahine ia ora noa?
16 Inaha, na ratou i haavarevare i te ati Iseraela i te parau a Balaama ia taiva+ ia Iehova no nia ia Peora,+ a roohia ˈtu ai te nunaa o Iehova i te ati.+
17 I teie nei, a haapohe pauroa te tamarii tamaroa e a haapohe pauroa te vahine tei taoto i te tahi tane.
18 Area pauroa te tamahine tei ore i taoto aˈenei i te tane,+ e nehenehe outou e vaiiho ia ratou ia ora noa.
19 E puhapa outou e hitu mahana i rapaeau i te puhapa. Outou pauroa tei haapohe i te tahi taata e outou pauroa tei tapea i te tahi taata pohe.+ E tamâ outou ia outou iho+ i te toru o te mahana e i te hitu o te mahana, outou e te feia ta outou i haru.
20 E tamâ outou i te mau ahu atoa i te hara, pauroa te taihaa iri animara, pauroa te mea i hamanihia i te huruhuru puaaniho, e pauroa te taihaa raau.”
21 Parau atura Eleazara te tahuˈa i te mau tane o te nuu tei haere i te tamaˈi: “Teie te faatureraa o te ture ta Iehova i faaue ia Mose:
22 ‘Te auro, te ario, te veo, te auri, te bidila e te tapau,
23 te mau mea atoa eita e pau i te auahi, e tanina ïa outou, e e mâ te reira. Tera râ, e tamâ-atoa-hia te reira i te pape no te tamâraa.+ Te mau mea atoa te ore e nehenehe e tuu i roto i te auahi, e horoihia ïa i te pape.
24 Ia horoi outou i to outou mau ahu i te hitu o te mahana e ia mâ outou, i reira outou e nehenehe ai e hoˈi mai i roto i te puhapa.’”+
25 Na ô maira Iehova ia Mose:
26 “A taio i te taata e te animara tei haruhia. Na orua Eleazara te tahuˈa e te mau upoo o te mau opu o te amuiraa e rave i te reira.
27 A tufa i tei haruhia ei piti tuhaa, hoê na te feia o te nuu tei apiti i te tamaˈi, e pauroa te toea na te amuiraa.+
28 Ei tute na Iehova, e rave oe no rotopu i te mau faehau tei haere i te tamaˈi hoê i nia e 500, to te taata, te puaatoro, te asini, te mamoe e te puaaniho.
29 E rave oe i te reira no roto i ta ratou afaraa, e e horoa ˈtu oe i te reira ia Eleazara te tahuˈa ei ô na Iehova.+
30 No roto i te afaraa horoahia na te ati Iseraela, e rave mai oe hoê i nia e 50, to te taata, te puaatoro, te asini, te mamoe e te puaaniho, e te mau huru animara rata atoa, a horoa ˈtu ai na te ati Levi+ o te haapao ra i te mau hopoia no te sekene o Iehova.”+
31 Rave aˈera ïa Mose raua Eleazara te tahuˈa mai ta Iehova iho â i faaue ia Mose.
32 Tei haruhia, te toea o ta te feia i haere i te tamaˈi i haru mai, e 675 000 mamoe e puaaniho,
33 e 72 000 puaatoro,
34 e 61 000 asini.
35 E 32 000 vahine tei ore i taoto aˈenei i te tane.+
36 Te afaraa tei riro ei tuhaa na te feia i haere i te tamaˈi, e 337 500 mamoe e puaaniho.
37 Te tute na Iehova no roto i te reira, e 675 mamoe e puaaniho.
38 E te mau puaatoro, e 36 000. Te tute i nia i te reira no Iehova, e 72 puaatoro.
39 E te mau asini, e 30 500. Te tute i nia i te reira no Iehova, e 61 asini.
40 E te mau taata, 16 000, e te tute i nia ia ratou no Iehova, e 32 taata.
41 Horoa ˈtura Mose i te tute ei ô na Iehova ia Eleazara te tahuˈa,+ mai ta Iehova iho â i faaue ia Mose.
42 Te afaraa faufaa a te ati Iseraela, ta Mose i vahi no roto i te tuhaa a te feia tei haere i te tamaˈi,
43 e 337 500 mamoe e puaaniho,
44 e 36 000 puaatoro,
45 e 30 500 asini,
46 e 16 000 taata.
47 Rave maira Mose no roto i te afaraa a te ati Iseraela hoê i nia e 50, to te taata e to te animara, e horoa ˈtura na te ati Levi+ o te haapao ra i te hopoia i to Iehova sekene,+ mai ta Iehova iho â i faaue ia Mose.
48 Faafatata maira te mau tane faatoroahia i nia i te mau raatira tausani o te nuu,+ te raatira tausani e te raatira hanere, ia Mose
49 e parau atura ratou ia ˈna: “Ua taio ta oe mau tavini i te mau faehau i raro aˈe i ta matou faatereraa, e aita hoê aˈe i moˈe.+
50 No reira, e pûpû matou tataitahi i ta matou i ite mai ei ô na Iehova: e taihaa auro, e fifi avae, e tapea rima, e tapao taati, e tapea tariˈa, e te tahi atu faaunauna, no te pûpû i te faahauraa no matou i mua ia Iehova.”
51 Farii maira ïa Mose raua Eleazara te tahuˈa i ta ratou auro, pauroa ta ratou mau faaunauna.
52 Pauroa te auro ta ratou i pûpû ei ô na Iehova, ua raea i te 16 750 sekela,* no ǒ mai i te mau raatira tausani e raatira hanere.
53 Ua rave te faehau tataitahi i te tahi tuhaa o tei haruhia mai.
54 Ua farii ïa Mose raua Eleazara te tahuˈa i te auro no ǒ mai i te mau raatira tausani e raatira hanere e ua hopoi i te reira i te tiahapa o te amuiraa ei haamanaˈoraa no te nunaa o Iseraela i mua ia Iehova.
Nota i raro i te api
^ E parau pehepehe teie no te pohe.
^ Aore ra “no te nuu e aro.”
^ Aore ra “no te nuu.”
^ Aore ra “puhaparaa auahia i te patu.”
^ 1 sekela: 11,4 g. Hiˈo i te tuhaa hau B14.
