Numera 28:1-31
28 Na ô maira Iehova ia Mose i muri iho:
2 “A faaue i te ati Iseraela: ‘Haapao maitai ia pûpû mai outou i ta ˈu tusia, ta ˈu pane. E pûpûhia ta ˈu mau tusia na roto i te auahi i te taime faataahia no te reira ei mea hauˈa noˈanoˈa au maitai.’*+
3 “E a parau ia ratou: ‘Teie te tusia ta outou e pûpû ia Iehova na roto i te auahi: e piti fanauˈa mamoe oni oraora maitai hoê matahiti i te mahana hoê ei tusia taauahi tamau.+
4 E pûpû outou i te hoê fanauˈa mamoe oni i te poipoi, e te tahi fanauˈa mamoe oni e pûpû outou i te ahiahi,+
5 e te hoê tuhaa i nia ahuru o te hoê epha* faraoa ota oro-maitai-hia anoihia e hoê tuhaa i nia e maha o te hoê hina* hinu anoi-ore-hia ei tusia huero maa.+
6 E tusia taauahi tamau teie,+ tei haamauhia i te mouˈa Sinai ei mea hauˈa noˈanoˈa au maitai,* te hoê tusia ia Iehova na roto i te auahi,
7 e te tusia uaina no te reira, hoê tuhaa i nia e maha hina no te fanauˈa mamoe oni tataitahi.+ A ninii i te ava i te vahi moˈa ei tusia uaina ia Iehova.
8 E e pûpû outou i te tahi atu fanauˈa mamoe oni i te ahiahi. E pûpû outou i te reira ei mea hauˈa noˈanoˈa au maitai* pûpûhia ia Iehova na roto i te auahi,+ e te hoê â tusia huero maa tei pûpûhia i te poipoi e te hoê â tusia uaina.
9 “‘Tera râ, i te mahana Sabati,+ e pûpûhia e piti fanauˈa mamoe oni hoê matahiti oraora maitai e e piti tuhaa i nia ahuru o te hoê faito epha o te faraoa ota oro-maitai-hia anoihia i te hinu ei tusia huero maa, e te tusia uaina no te reira.
10 O te tusia taauahi teie no te Sabati, hau atu i te tusia taauahi tamau e te tusia uaina+ no te reira.
11 “‘Ia haamata te tahi avaˈe, e pûpû outou ei tusia taauahi ia Iehova e piti puaatoro oni apî, hoê mamoe oni, e e hitu fanauˈa mamoe oni apî hoê matahiti+ oraora maitai,
12 e toru tuhaa i nia ahuru o te faraoa ota oro-maitai-hia anoihia i te hinu ei tusia huero maa+ no na puaatoro oni tataitahi, e e piti tuhaa i nia ahuru o te faraoa ota oro-maitai-hia anoihia i te hinu ei tusia huero maa no te mamoe oni,+
13 e hoê tuhaa i nia ahuru o te faraoa ota oro-maitai-hia anoihia i te hinu no te fanauˈa mamoe oni tataitahi, ei tusia taauahi, ei mea hauˈa noˈanoˈa au maitai,*+ ei tusia pûpûhia ia Iehova na roto i te auahi.
14 E te tusia uaina no te reira, e afa hina uaina no te puaatoro oni hoê,+ hoê tuhaa i nia e toru hina no te mamoe oni,+ e hoê tuhaa i nia e maha hina no te fanauˈa mamoe oni hoê.+ Tera te tusia taauahi taavaˈe no te mau avaˈe atoa o te matahiti.
15 E pûpû-atoa-hia te tahi puaaniho apî ei tusia no te hara ia Iehova hau atu i te tusia taauahi tamau e te tusia uaina no te reira.
16 “‘I te 14 o te mahana o te avaˈe matamua, o te Pasa+ ïa a Iehova.
17 E i te 15 o te mahana o taua avaˈe ra, e oroa te tupu. E hitu mahana e amuhia ˈi te pane hopue ore.+
18 E tupu te tahi tairururaa moˈa i te mahana matamua. Eiaha outou e rave i te tahi ohipa rohirohi.
19 E e pûpû outou ei tusia taauahi na Iehova na roto i te auahi e piti puaatoro oni apî, hoê mamoe oni, e e hitu fanauˈa mamoe oni hoê matahiti. E pûpû outou i te animara oraora maitai.+
20 Ia pûpû outou i tera mau animara e te tusia huero maa no te reira, e faraoa ota oro-maitai-hia anoihia i te hinu,+ e toru tuhaa i nia ahuru no te hoê puaatoro oni, e e piti tuhaa i nia ahuru no te mamoe oni.
21 E pûpû outou hoê tuhaa i nia ahuru no tera e tera na fanauˈa mamoe oni e hitu,
22 e te hoê puaaniho ei tusia no te hara ei faahauraa no outou.
23 Hau atu i te tusia taauahi o te poipoi, o te pûpûhia no te tusia taauahi tamau, e pûpû atoa outou i te reira.
24 Hoê â huru e pûpû ai outou i te reira i te mau mahana atoa e hitu mahana ei maa,* ei mea hauˈa noˈanoˈa au maitai* pûpûhia ia Iehova na roto i te auahi. E pûpûhia te reira e te tusia taauahi tamau e te tusia uaina no te reira.
25 I te hitu o te mahana, e faatupu outou i te tahi tairururaa moˈa.+ Eiaha outou e rave i te tahi ohipa rohirohi.+
26 “‘I te mahana o te mau hotu paari matamua,+ ia pûpû outou i te tusia huero maa apî ia Iehova,+ e faatupu outou i te tahi tairururaa i ta outou oroa hebedoma.+ Eiaha outou e rave i te tahi ohipa rohirohi.+
27 E pûpû outou ei tusia taauahi e te mea noˈanoˈa au maitai* ia Iehova e piti puaatoro oni apî, hoê mamoe oni, e e hitu fanauˈa mamoe oni hoê matahiti,+
28 e ei tusia huero maa hamanihia i te faraoa ota oro-maitai-hia anoihia i te hinu no te reira, e toru tuhaa i nia ahuru no te puaatoro oni tataitahi, e piti tuhaa i nia ahuru no te mamoe oni,
29 hoê tuhaa i nia ahuru no tera e tera na fanauˈa mamoe oni e hitu,
30 e hoê puaaniho apî no te pûpû i te faahauraa no outou.+
31 E pûpû outou i te reira hau atu i te tusia taauahi tamau e te tusia huero maa no te reira. Ei animara oraora maitai+ ta outou e pûpû, e te mau tusia uaina no te reira.
Nota i raro i te api
^ Aore ra “tamǎrû.” Heb: “faahau.”
^ 1/10 epha: 2,2 L. Hiˈo i te tuhaa hau B14.
^ 1 hina: 3,67 L. Hiˈo i te tuhaa hau B14.
^ Aore ra “tamǎrû.” Heb: “faahau.”
^ Aore ra “tamǎrû.” Heb: “faahau.”
^ Aore ra “tamǎrû.” Heb: “faahau.”
^ Heb: “faraoa.”
^ Aore ra “tamǎrû.” Heb: “faahau.”
^ Aore ra “tamǎrû.” Heb: “faahau.”
