Numera 4:1-49
4 Paraparau maira Iehova ia Mose e ia Aarona, a na ô ai:
2 “Ia taiohia te mau tamaiti a Kohata+ i rotopu i te mau tamaiti a Levi, ia au i to ratou mau utuafare e ia au i to ratou mau tupuna,
3 ratou pauroa mai te 30+ tae atu i te 50 matahiti+ o te pǔpǔ faataahia no te rave i te ohipa i te tiahapa o te amuiraa.+
4 “Teie te ohipa a te mau tamaiti a Kohata i te tiahapa o te amuiraa.+ Mea moˈa roa te reira:
5 Ia faareva te puhapa, e tomo mai Aarona e ta ˈna na tamaiti, e tatara ratou i te paruru,+ a tapoˈi atu ai i te afata+ o te Haamanaˈoraa i te reira.
6 E tuu ratou i te hoê tapoˈi iri humi na nia iho, e vauvau ratou i te hoê ahu mea ninamu anaˈe na nia iho, e e oomo ratou i na raau amoraa+ i roto i te vairaa.
7 “E vauvau atoa ratou i te hoê ahu ninamu na nia iho i te iri vairaa pane pûpûhia,+ a tuu atu ai na nia iho i te mau farii maa, te mau hapaina, te mau auˈa e te mau pita no te tusia uaina.+ Ia vai noa na pane pûpûhia+ i nia iho.
8 E vauvau ratou i te hoê ahu uteute na nia iho i te reira, a tapoˈi atu ai i te hoê tapoˈi iri humi, e a oomo atu ai i na raau amoraa+ i roto i te vairaa.
9 I muri iho, e rave ratou i te hoê ahu ninamu, a tapoˈi atu ai i te vairaa mori+ no te maramarama, e to ˈna mau mori,+ to ˈna mau paoti, to ˈna mau farii auahi,+ e pauroa to ˈna farii no te mori e faaohipahia ia ama noa te mori.
10 E puohu ratou i te reira e pauroa to ˈna taihaa i te hoê tapoˈi iri humi, a tuu atu ai i nia iho i te hoê iri raau amoraa.
11 E vauvau ratou i te hoê ahu ninamu na nia iho i te fata auro,+ e tapoˈi ratou i te reira i te hoê tapoˈi iri humi e e oomo ratou i na raau amoraa+ i roto i te vairaa.
12 I muri iho, e rave ratou pauroa te taihaa+ o te taviniraa ta ratou e faaohipa pauroa te mahana i roto i te vahi moˈa, a tuu atu ai i roto i te hoê ahu ninamu, a tapoˈi atu ai i te hoê tapoˈi iri humi e a tuu atu ai i nia iho i te hoê iri raau amoraa.
13 “E tatara ratou i te rehu* mai nia i te fata+ e e vauvau ratou i te hoê ahu huruhuru mamoe vareau na nia iho.
14 E tuu ratou i nia iho pauroa to ˈna taihaa e faaohipahia ia rave ratou i ta ratou taviniraa i te fata: te mau farii auahi, te mau patia, te mau ope e te mau auˈa, pauroa te taihaa no te fata.+ E vauvau ratou i te hoê tapoˈi iri humi na nia iho, a oomo atu ai i na raau amoraa+ i roto i te vairaa.
15 “Ia oti ia Aarona e ta ˈna na tamaiti i te tapoˈi i te vahi moˈa+ e pauroa te taihaa no te vahi moˈa ia faareva te puhapa. I reira ïa na tamaiti a Kohata e tomo mai ai no te amo i te reira,+ eiaha râ ratou e tapea i te vahi moˈa a pohe ratou.+ No nia i te tiahapa o te amuiraa, na te mau tamaiti a Kohata e haapao i teie mau taihaa ei hopoia na ratou.
16 “Na Eleazara+ te tamaiti a Aarona te tahuˈa te hopoia e tiaau i te hinu no te mori,+ te mea noˈanoˈa,+ te tusia huero maa pûpûhia pauroa te mahana, e te monoˈi faatavai.+ Na ˈna e tiaau i te sekene taatoa e pauroa te mea i roto, tae noa ˈtu te vahi moˈa e to ˈna mau taihaa.”
17 Paraparau faahou maira Iehova ia Mose e ia Aarona, a na ô ai:
18 “A ara eiaha te opu o te mau utuafare o te ati Kohata+ ia haapohehia i rotopu i te ati Levi.
19 Ia na reira râ orua no ratou ia ora noa ratou e ia ore ia pohe no te tapiriraa ˈtu i pihai iho i te mau mea moˈa roa.+ E tomo Aarona e ta ˈna na tamaiti i roto, a faataa ˈtu ai i ta ratou tataitahi ohipa e i ta ratou e amo.
20 Eiaha te ati Kohata e tomo i roto e eiaha ratou ia ite i te mau mea moˈa noa ˈtu maa taime poto noa, a pohe ratou.”+
21 Paraparau maira Iehova ia Mose, a na ô ai:
22 “Ia taiohia te mau tamaiti a Geresona+ ia au i to ratou mau tupuna e utuafare.
23 E tapao oe i te iˈoa o te mau tane atoa mai te 30 tae atu i te 50 matahiti o te pǔpǔ faataahia no te rave i te ohipa i te tiahapa o te amuiraa.
24 Teie tei faataahia na te mau utuafare o te ati Geresona e haapao e e amo:+
25 Na ratou e amo i te mau tapoˈi o te sekene,+ te tiahapa o te amuiraa, to ˈna tapoˈi e te tapoˈi iri humi na nia iho,+ te paruai* o te tomoraa o te tiahapa o te amuiraa,+
26 te mau paruru o te aua,+ te paruai* o te tomoraa o te aua+ e haaati ra i te sekene e te fata, to ratou mau taura e pauroa to ratou taihaa e te mauhaa e faaohipahia i te sekene. Tera ta ratou hopoia.
27 E tiaauhia pauroa te ohipa e te hopoia a te ati Geresona+ e Aarona e ta ˈna na tamaiti. E faataa oe i teie mau hopoia atoa na ratou.
28 Tera ïa te ohipa ta te mau utuafare o te ati Geresona e rave i te tiahapa o te amuiraa,+ e i raro aˈe i te aratairaa a Itamara+ te tamaiti a Aarona te tahuˈa e amo ai ratou i ta ratou mau hopoia.
29 “No te mau tamaiti a Merari,+ e tapao oe i to ratou iˈoa ia au i to ratou utuafare e ia au i to ratou tupuna.
30 Mai te 30 tae atu i te 50 matahiti e tapao ai oe i to ratou iˈoa, pauroa to te pǔpǔ tei faataahia no te rave i te ohipa i te tiahapa o te amuiraa.
31 No nia i ta ratou ohipa i te tiahapa o te amuiraa, teie ta ratou e amo+ ei hopoia na ratou: te mau iri pǎpai+ o te sekene, to ˈna mau raau tarava,+ to ˈna mau pou,+ to ˈna mau niu,+
32 te mau pou+ o te aua ati aˈe, to ratou mau niu,+ to ratou mau naero rahi+ e to ratou mau taura, e pauroa to ratou taihaa e pauroa te ohipa no te reira. E faataa oe na ratou tataitahi i te taihaa na ratou e amo.
33 Mai tera ia rave te mau utuafare o na tamaiti a Merari+ i ta ratou ohipa i te tiahapa o te amuiraa, i raro aˈe i te aratairaa a Itamara te tamaiti a Aarona te tahuˈa.”+
34 Tapao aˈera ïa Mose, Aarona e te mau raatira+ o te amuiraa i te iˈoa o na tamaiti a te ati Kohata+ ia au i to ratou mau utuafare e ia au i to ratou tupuna,
35 pauroa te tane mai te 30 tae atu i te 50 matahiti o te pǔpǔ faataahia no te rave i te ohipa i te tiahapa o te amuiraa.+
36 Te taatoaraa o tei tapaohia te iˈoa ia au i to ratou mau utuafare, e 2 750.+
37 Tera te mau tane tei tapaohia te iˈoa o te mau utuafare o te ati Kohata, pauroa te tane e rave ra i te ohipa i te tiahapa o te amuiraa. Ua tapao Mose raua Aarona i to ratou iˈoa na nia i te faaueraa a Iehova na roto ia Mose.+
38 Ua tapaohia te iˈoa o na tamaiti a Geresona+ ia au i to ratou mau utuafare e ia au i to ratou tupuna,
39 pauroa mai te 30 tae atu i te 50 matahiti o te pǔpǔ faataahia no te rave i te ohipa i te tiahapa o te amuiraa.
40 Te taatoaraa o tei tapaohia te iˈoa ia au i to ratou mau utuafare e ia au i to ratou tupuna, e 2 630.+
41 Tera te mau tane tei tapaohia te iˈoa o te mau utuafare o na tamaiti a Geresona, pauroa te tane e rave ra i te ohipa i te tiahapa o te amuiraa. Ua tapao Mose raua Aarona i to ratou iˈoa na nia i te faaueraa a Iehova.+
42 Ua tapaohia te iˈoa o na tamaiti a Merari ia au i to ratou mau utuafare e ia au i to ratou tupuna,
43 pauroa mai te 30 tae atu i te 50 matahiti o te pǔpǔ faataahia no te rave i te ohipa i te tiahapa o te amuiraa.+
44 Te taatoaraa o tei tapaohia te iˈoa ia au i to ratou mau utuafare, e 3 200.+
45 Tera te mau tane tei tapaohia te iˈoa o te mau utuafare o na tamaiti a Merari, ta Mose raua Aarona i tapao te iˈoa na nia i te faaueraa a Iehova na roto ia Mose.+
46 Tapao aˈera Mose, Aarona e te mau raatira o Iseraela i te iˈoa o teie ati Levi taatoa ia au i to ratou mau utuafare e ia au i to ratou mau tupuna,
47 mai te 30 tae atu i te 50 matahiti, e ua faataahia ratou pauroa no te rave i te ohipa e no te amo i te hopoia no nia i te tiahapa o te amuiraa.+
48 Te taatoaraa o tei tapaohia te iˈoa, e 8 580.+
49 Ua tapaohia to ratou iˈoa na nia i te faaueraa a Iehova na roto ia Mose, te tane tataitahi i ta ˈna ohipa faataahia e ta ˈna hopoia. Ua tapaohia to ratou iˈoa mai ta Iehova iho â i faaue ia Mose.
