Numera 27:1-23
27 Faafatata maira na tamahine a Zelophehada,+ te tamaiti a Hepheri, te tamaiti a Gileada, te tamaiti a Makira, te tamaiti a Manase, o te mau fetii o Manase te tamaiti a Iosepha. Te iˈoa o ta ˈna na tamahine, o Mahala, Noa, Hogela, Mileka e Tireza.
2 Tia aˈera ratou i mua ia Mose, Eleazara te tahuˈa, te mau raatira+ e te amuiraa taatoa i mua i te tiahapa o te amuiraa e na ô atura:
3 “Ua pohe to matou metua tane i te medebara, aita oia i roto i te pǔpǔ tei tahoê no te orure hau ia Iehova, ratou te feia tei turu ia Kora.+ Ua pohe oia no ta ˈna iho hara e aita ta ˈna e tamaiti.
4 Eaha te iˈoa o to matou metua tane e morohi ai no roto i to ˈna fetii no te mea aita ta ˈna e tamaiti? A horoa mai i te tahi faufaa no rotopu i te mau taeae o to matou metua tane ia fatu matou.”
5 Faataa ˈtura ïa Mose i to ratou tupuraa i mua ia Iehova.+
6 Na ô maira Iehova ia Mose:
7 “Ua tano na tamahine a Zelophehada. E horoa mau â oe ei tuhaa na ratou i rotopu i te mau taeae o to ratou metua tane i te tahi faufaa ia fatu ratou, e e faafatu oe ia ratou i te tuhaa a to ratou metua tane.+
8 E a parau i te ati Iseraela: ‘Ia pohe te tahi tane e aita ta ˈna e tamaiti, e faafatu outou i ta ˈna tamahine i ta ˈna tuhaa.
9 Aita anaˈe ta ˈna e tamahine, e horoa outou i ta ˈna tuhaa na to ˈna mau taeae.
10 Aita anaˈe to ˈna e taeae, e horoa outou i ta ˈna tuhaa na te mau taeae o to ˈna metua tane.
11 Aita anaˈe to to ˈna metua tane e taeae, e horoa outou i ta ˈna tuhaa na te fetii piri roa ˈˈe, a fatu atu ai oia i te reira. E riro te reira ei faatureraa na roto i te faaotiraa haavaraa no te ati Iseraela, mai ta Iehova iho â i faaue ia Mose.’”
12 Na ô maira Iehova ia Mose: “A pauma i nia i teie mouˈa o Abarima,+ e e ite oe i te fenua ta ˈu e horoa no te ati Iseraela.+
13 Ia ite oe i te reira, e amui-atoa-hia oe i to oe mau taata,*+ mai ia Aarona to tuaana,+
14 no te mea i te mârôraa te amuiraa ia ˈu i te medebara o Zîna, ua patoi oe i ta ˈu faaueraa e haamoˈa ia ˈu i mua ia ratou maoti te pape.+ O te pape ïa o Meriba+ i Kadesa+ i te medebara o Zîna.”+
15 Na ô atura Mose ia Iehova:
16 “Ia faatoroa Iehova, te Atua o te puai ora* o te taata atoa, i te hoê tane i nia i te amuiraa
17 o te haere atu i rapae e te tomo mai i roto i mua ia ratou, e o te aratai atu ia ratou i rapae e te aratai mai i roto, ia ore ta Iehova amuiraa ia riro mai te mau mamoe aita e tiai.”
18 Na ô maira ïa Iehova ia Mose: “A rave ia Iosua te tamaiti a Nuna, e tane e huru feruriraa taa ê to ˈna, e a tuu i to rima i nia ia ˈna.+
19 A tuu ia ˈna i mua ia Eleazara te tahuˈa e i mua i te amuiraa taatoa, e e haamana oe ia ˈna i mua i to ratou mata.+
20 E tuu oe i nia ia ˈna maa vahi o to oe mana,*+ ia faaroo te amuiraa taatoa o te ati Iseraela ia ˈna.+
21 E tia oia i mua ia Eleazara te tahuˈa, o te uiui no ˈna na roto i te haavaraa o te Urima+ i mua ia Iehova. I ta ˈna faaueraa e haere ai ratou i rapae, e i ta ˈna faaueraa e tomo mai ai ratou i roto, o ˈna e pauroa te ati Iseraela na muri ia ˈna e te amuiraa taatoa.”
22 Na reira ˈtura ïa Mose mai ta Iehova iho â i faaue ia ˈna. Rave maira oia ia Iosua e tuu atura ia ˈna i mua ia Eleazara te tahuˈa e i mua i te amuiraa taatoa,
23 e tuu ihora oia i to ˈna rima i nia ia ˈna e haamana ihora ia ˈna,+ mai ta Iehova iho â i faaue na roto ia Mose.+
