Numera 15:1-41
15 Paraparau faahou maira Iehova ia Mose, a na ô ai:
2 “A paraparau i te ati Iseraela e a na ô atu: ‘Ia tomo outou i te fenua ta ˈu e horoa ei nohoraa no outou+
3 e ia pûpû outou i te hoê tusia ia Iehova na roto i te auahi no roto i te nǎnǎ puaatoro aore ra te nǎnǎ mamoe e puaaniho, e tusia taauahi+ anei, e tusia no te hoê euhe taa ê, e ô horoa noa+ aore ra e ô pûpûhia i te roaraa o ta outou mau oroa,+ ei mea hauˈa noˈanoˈa au maitai* ia Iehova,+
4 e hopoi atoa te taata e pûpû ra i te ô ia Iehova i te hoê tusia huero maa hamanihia i te faraoa ota oro-maitai-hia,+ hoê tuhaa i nia ahuru o te hoê epha,* anoihia i te hinu, hoê tuhaa i nia e maha o te hoê hina.*
5 E pûpû atoa oe i te uaina ei tusia uaina, hoê tuhaa i nia e maha o te hoê hina, e te tusia taauahi+ aore ra te tusia o te fanauˈa mamoe oni tataitahi.
6 Aore ra no te hoê mamoe oni, e pûpû oe i te hoê tusia huero maa hamanihia i te faraoa ota oro-maitai-hia, e piti tuhaa i nia ahuru o te hoê faito epha anoihia i te hinu, hoê tuhaa i nia e toru o te hoê hina.
7 E e hopoi mai oe i te uaina ei tusia uaina, hoê tuhaa i nia e toru o te hoê hina, ei mea hauˈa noˈanoˈa au maitai* ia Iehova.
8 “‘Ia pûpû râ oe i te hoê puaatoro oni ei tusia taauahi+ anei, ei tusia no te hoê euhe taa ê+ aore ra ei tusia no te hau ia Iehova,+
9 e hopoi atoa ïa oe i te puaatoro oni, e oia atoa te hoê tusia huero maa+ hamanihia i te faraoa ota oro-maitai-hia e toru tuhaa i nia ahuru o te hoê faito epha anoihia i te hinu, e afa hina.
10 E hopoi atoa oe i te uaina ei tusia uaina,+ e afa hina, ei tusia pûpûhia na roto i te auahi, ei mea hauˈa noˈanoˈa au maitai* ia Iehova.
11 Tera te rave no te puaatoro tataitahi, no te mamoe oni tataitahi, no te mau fanauˈa mamoe oni tataitahi, aore ra no te mau puaaniho tataitahi.
12 Noa ˈtu ehia rahiraa ta oe e pûpû, tera ta oe e rave no te animara tataitahi, ia au i to ratou rahiraa.
13 Tera ta te ati Iseraela tumu atoa e hopoi ei ô pûpûhia na roto i te auahi, ei mea hauˈa noˈanoˈa au maitai* ia Iehova.
14 “‘Area te taata ê e noho ra i ǒ outou aore ra te tahi o tei ora i rotopu ia outou e rave rahi uˈi, e pûpû atoa oia i te tahi tusia na roto i te auahi, ei mea hauˈa noˈanoˈa au maitai* ia Iehova, ia rave iho â oia mai ta outou e rave.+
15 Hoê â faatureraa no outou to te amuiraa e no te taata ê e noho ra i rotopu ia outou. E faatureraa vai maoro teie no to outou mau uˈi atoa. I mua ia Iehova, ia hoê â outou e te taata ê e noho ra i rotopu ia outou.+
16 Ei hoê noa ture e faaotiraa haavaraa no outou e no te taata ê e noho ra i ǒ outou.’”
17 Na ô faahou maira Iehova ia Mose:
18 “A paraparau i te ati Iseraela e a na ô atu: ‘Ia tomo outou i te fenua e aratai ai au ia outou
19 e ia amu outou i te tahi maa o te fenua,+ e hopoi ïa outou i te hoê ô na Iehova.
20 E horoa outou i te ô no roto i te mau hotu matamua+ o te faraoa ota orarahi ei pane mai te hei ra. E horoa outou i te reira mai te ô no ǒ mai i te vahi tairiiriraa huero maa.*
21 E horoa outou ei ô na Iehova i te tahi tuhaa o ta outou hotu matamua o te faraoa ota orarahi e hope noa ˈtu to outou mau uˈi.
22 “‘Ia hape râ outou a ore atu ai e haapao i teie mau faaueraa atoa ta Iehova i parau ia Mose,
23 pauroa ta Iehova i faaue ia outou e i te mau uˈi no muri mai na roto ia Mose i te mahana i horoa ˈi Iehova i te faaueraa ia outou,
24 e mai te peu ua ravehia teie hape e aita te amuiraa i ite, e pûpû ïa te amuiraa taatoa i te hoê puaatoro oni apî ei tusia taauahi ei mea hauˈa noˈanoˈa au maitai* ia Iehova, e oia atoa te tusia huero maa e te tusia uaina no te reira ia au i te raveraa titauhia,+ e te hoê puaaniho apî ei tusia no te hara.+
25 E pûpû te tahuˈa i te faahauraa no te amuiraa taatoa o te ati Iseraela, e e faaorehia ta ratou hara,+ no te mea e hape, e ua hopoi mai ratou ei ô i te tahi ô pûpûhia ia Iehova na roto i te auahi e te tahi tusia no te hara i mua ia Iehova no ta ratou hape.
26 E faaorehia te hape a te amuiraa taatoa o te ati Iseraela e a te taata ê e noho ra i ǒ outou, no te mea ua hape te nunaa taatoa.
27 “‘Ia hape noa ˈtu te tahi taata i te hararaa, e pûpû oia i te hoê puaaniho ufa aita â i hoê matahiti ei tusia no te hara.+
28 E pûpû te tahuˈa i te faahauraa no te taata tei hape i mua ia Iehova ma te opua ore, no te pûpû i te faahauraa no te reira, e e faaorehia ta ˈna hara.+
29 No nia i te raveraa i te tahi ohipa ma te opua ore,+ ei hoê noa ture no te ati Iseraela tumu e no te taata ê e noho ra i rotopu ia outou.
30 “‘Te taata râ e rave i te tahi ohipa ma te opua,+ e taata tumu anei aore ra e taata ê e noho ra i rotopu ia outou, te faaino ra ïa ia Iehova e e haapohehia oia mai rotopu mai i to ˈna nunaa.
31 No te mea ua vahavaha oia i te parau a Iehova e ua ofati i ta ˈna faaueraa, e haapohe-mau-hia+ taua taata ra. Tei nia ia ˈna ta ˈna iho hara.’”+
32 A parahi ai te ati Iseraela i te medebara, itea ihora ia ratou te tahi taata e haaputu ra i te vahie i te mahana Sabati.+
33 Aratai aˈera te feia tei ite ia ˈna i te haaputuraa i te vahie ia Mose raua Aarona e i te amuiraa taatoa.
34 Tuu aˈera ratou ia ˈna i te tapearaa+ no te mea aita i haapapuhia e nafea ia ˈna.
35 E na ô maira Iehova ia Mose: “E haapohe-mau-hia+ taua taata ra, e na te amuiraa taatoa e pehi ia ˈna i te ofai i rapaeau i te puhapa.”+
36 Aratai atura ïa te amuiraa taatoa ia ˈna i rapaeau i te puhapa, pehi atura ia ˈna i te ofai e pohe roa ˈtura oia, mai ta Iehova iho â i faaue ia Mose.
37 Na ô faahou maira Iehova ia Mose:
38 “A paraparau i te ati Iseraela e a faaue ia ratou ia faahuruhuru i te hiti o to ratou mau ahu e hope noa ˈtu to ratou mau uˈi e e nira ratou i te tahi taura ninamu i nia ˈˈe i te hiti ahu faahuruhuruhia.+
39 ‘Ei hiti ahu faahuruhuruhia to outou ia ite outou i te reira, e ia haamanaˈo i te mau faaueraa atoa a Iehova a haapao+ atu ai i te reira. Eiaha outou e pee i to outou aau e mata, o te aratai ia outou i te taiataraa i te pae varua.+
40 Na te reira e haamanaˈo ia outou, e e haapao outou i ta ˈu mau faaueraa atoa e e moˈa outou i mua i to outou Atua.+
41 O vau to outou Atua o Iehova, tei aratai mai ia outou i rapae i te fenua o Aiphiti, no te faaite o vau to outou Atua.+ O vau o Iehova to outou Atua.’”+
Nota i raro i te api
^ Aore ra “tamǎrû.” Heb: “faahau.”
^ 1/10 epha: 2,2 L. Hiˈo i te tuhaa hau B14.
^ 1 hina: 3,67 L. Hiˈo i te tuhaa hau B14.
^ Aore ra “tamǎrû.” Heb: “faahau.”
^ Aore ra “tamǎrû.” Heb: “faahau.”
^ Aore ra “tamǎrû.” Heb: “faahau.”
^ Aore ra “tamǎrû.” Heb: “faahau.”
^ Aore ra “tamǎrû.” Heb: “faahau.”
