Numera 5:1-31

  • Faataa ê i tei viivii (1-4)

  • Faˈiraa e faahoˈiraa (5-10)

  • Tamataraa i te pape ia parihia i te faaturi (11-31)

5  Paraparau faahou maira Iehova ia Mose, a na ô ai:  “A faaue i te ati Iseraela ia tuu i rapaeau i te puhapa pauroa te taata lepera+ e pauroa te taata e tahe mai te tahi mea no te maˈi mai roto mai ia ratou+ e pauroa te taata tei viivii i te tahi taata pohe.+  E tuu outou ia ratou i rapaeau, e tane anei aore ra e vahine. E tuu outou ia ratou i rapaeau i te puhapa, ia ore ia viivii+ ia ratou te puhapa taatoa i roto vau e faaea ˈi.”*+  Na reira ˈtura ïa te ati Iseraela, a tuu ai ia ratou i rapaeau i te puhapa. Mai ta Iehova iho â i faaue ia Mose, ua na reira te ati Iseraela.  Paraparau noa maira Iehova ia Mose, a na ô ai:  “A parau i te ati Iseraela: ‘Ia rave te hoê tane aore ra vahine i te tahi o te mau hara a te taata e ia taiva oia ia Iehova, ua hara taua taata ra.+  E faˈi+ oia* i te hara ta ˈna* i rave, e faahoˈi oia i te hoo taatoa o ta ˈna* hara e e horoa atoa oia hoê tuhaa i nia e pae o taua hoo ra.+ E horoa oia i te reira i te taata ua hara oia ia ˈna.  Aita anaˈe râ e fetii piri to te taata tei harahia no te fanaˈo i te faahoˈiraa, e faahoˈihia te reira ia Iehova ra e e riro te reira na te tahuˈa, taa ê atu te mamoe oni no te faahauraa* ta ˈna e pûpû no tei rave i te hara.+  “‘Pauroa te ô moˈa+ ta te ati Iseraela e hopoi mai i te tahuˈa, e riro ïa na ˈna.+ 10  Te mau mea moˈa a te ati Iseraela tataitahi, e riro noa na te tahuˈa. Ta ratou tataitahi e horoa i te tahuˈa, e riro ïa na te tahuˈa.’” 11  Paraparau faahou maira Iehova ia Mose, a na ô ai: 12  “A paraparau i te ati Iseraela e a na ô atu: ‘Teie te rave ia hahi ê te vahine faaipoipo a te tahi tane e ia taiva oia ia ˈna, 13  e ua taoto te tahi atu tane ia ˈna,+ aita râ ta ˈna tane faaipoipo i ite e aita â i itehia ˈtura, a haaviivii atu ai oia ia ˈna, aita râ e taata i ite mata i ta ˈna hara e aita oia i noaahia: 14  Ia pohehae noa ˈtu te tane faaipoipo e ia manaˈo oia e ua taiva ta ˈna vahine faaipoipo ia ˈna, e parau mau anei aore ra eita, 15  e hopoi taua tane ra i ta ˈna vahine faaipoipo i te tahuˈa, e te tahi tusia no ˈna, hoê tuhaa i nia ahuru o te hoê epha* faraoa ota kerite. Eiaha oia e ninii i te hinu i nia iho, eiaha atoa e tuu i te tapau libano i nia iho, no te mea e tusia huero maa no te pohehae tera, e tusia huero maa o te haamanaˈo mai i te hara. 16  “‘E haafatata mai te tahuˈa ia ˈna, a tuu atu ai ia ˈna i mua ia Iehova.+ 17  E rave mai te tahuˈa i te pape moˈa i roto i te hoê farii araea, e e rave te tahuˈa maa repo i raro i te sekene, a tuu atu ai i roto i te pape. 18  E tuu te tahuˈa i mua ia Iehova i taua vahine ra ma te tuu i to ˈna rouru, a tuu atu ai i roto i to ˈna na apu rima i te tusia huero maa ei haamanaˈoraa, oia hoi te tusia huero maa no te pohehae,+ e i roto i te rima o te tahuˈa e vai ai te pape avaava o te faatae mai i te ino.+ 19  “‘I muri iho, e faahoreo te tahuˈa i taua vahine ra, a na ô ai ia ˈna: “Aita anaˈe te tahi atu tane i taoto ia oe a vai ai oe i raro aˈe i te mana faatere o ta oe tane faaipoipo+ e aita oe i hahi ê e aita i viivii, eiaha ïa oe ia roohia i te faahopearaa o teie pape avaava o te faatae mai i te ino. 20  Mai te peu râ e ua hahi ê oe a vai ai oe i raro aˈe i te mana faatere o ta oe tane faaipoipo ma te haaviivii ia oe, e ua taoto oe i te tahi atu tane+ e ere i ta oe tane faaipoipo . . . ” 21  E faahoreo te tahuˈa i taua vahine ra ma te faahiti atoa i te tahi ino, e e na ô te tahuˈa i taua vahine ra: “E faariro Iehova ia oe ei faaararaa i rotopu i to oe nunaa no nia i te faataeraa mai i te ino e te horeoraa, a oriorio* ai to oe huha* e a oru ai to oe opu ia Iehova. 22  E tahe teie pape o te faatae mai i te ino i roto i to oe aau, a oru atu ai to oe opu e a oriorio* atu ai to oe huha.”* Ia parau ïa taua vahine ra: “Amene! Amene!”* 23  “‘I muri iho, e papai te tahuˈa i teie mau ino i roto i te buka e e tumâ oia i te reira i roto i te pape avaava. 24  E faainu oia i muri iho i taua vahine ra i te pape avaava o te faatae mai i te ino, e e tahe te pape o te faatae mai i te ino i roto ia ˈna, a avaava ˈtu ai i roto ia ˈna. 25  E rave mai te tahuˈa i te tusia huero maa no te pohehae+ i roto i te rima o taua vahine ra, a taueue atu ai i te tusia huero maa i mua ia Iehova, e e hopoi oia i te reira i pihai iho i te fata. 26  E rave te tahuˈa i te tusia huero maa ia î hoê rima ei tusia taipe e e tutui oia i te reira ia au auahi i nia i te fata,+ e i muri iho, e faainu oia i te vahine i taua pape ra. 27  Ia faainu oia ia ˈna i taua pape ra, mai te peu e ua haaviivii taua vahine ra ia ˈna e ua taiva i ta ˈna tane faaipoipo, e tahe te pape o te faatae mai i te ino i roto ia ˈna, a riro atu ai te reira ei mea avaava. E oru to ˈna opu, e oriorio* to ˈna huha,* e e riro taua vahine ra ei faaararaa i rotopu i to ˈna nunaa no nia i te faataeraa mai i te ino. 28  Mai te peu râ e aita taua vahine ra i haaviivii ia ˈna, e ere ïa oia i te mea viivii, eita oia e roohia i taua utua ra, e e nehenehe oia e hapû mai e e fanau i te tamarii. 29  “‘Tera te ture no nia i te pohehae,+ ia hahi ê te tahi vahine e ia haaviivii ia ˈna a vai ai oia i raro aˈe i te mana faatere o ta ˈna tane faaipoipo, 30  aore ra ia pohehae te tahi tane e ia manaˈo oia e ua taiva ta ˈna vahine faaipoipo ia ˈna. E tuu oia i ta ˈna vahine faaipoipo i mua ia Iehova e e rave te tahuˈa i nia i taua vahine ra i te mau mea atoa o taua ture ra. 31  Eita te tane e hara, area ta ˈna vahine faaipoipo, e faautuahia ïa no ta ˈna hara.’”

Nota i raro i te api

Aore ra “puhapa ˈi.”
Heb: “ratou.”
Heb: “ta ratou.”
Heb: “ta ratou.”
Aore ra “taraehara.” Hiˈo i te titionare.
1/10 epha: 2,2 L. Hiˈo i te tuhaa hau B14.
Aore ra “pohe,” oia hoi eita ta ˈna tamarii e noaa.
Oia hoi te mero atiraa.
Aore ra “pohe,” oia hoi eita ta ˈna tamarii e noaa.
Oia hoi te mero atiraa.
Aore ra “Na reira ïa! Na reira ïa!”
Aore ra “pohe,” oia hoi eita ta ˈna tamarii e noaa.
Oia hoi te mero atiraa.