Faatanoraa no te "mode accessibilité"

Search

Maiti te reo

Mau faaho'iraa ê

Tapura tumu parau

Eaha to roto?

Ite no Iehova

Tahiti

A pee i to ratou faaroo

 PENE VAU

Ua mau papu oia noa ’tu te mau tupuraa faatoaruaru

Ua mau papu oia noa ’tu te mau tupuraa faatoaruaru

1. No te aha te oire taatoa o Silo e oto ai?

TE OTO atoa ra Samuela e to te oire taatoa o Silo. I roto e rave rahi fare, te faaroohia ra te vahine e te tamarii e auê ra, no te mea eita to ratou papa, ta ratou tane, ta ratou tamaiti aore ra to ratou taeae e ho‘i faahou mai. E 30 000 faehau Iseraela tei pohe i te rima o te Philiseti. E na mua rii noa ’tu, e 4 000 ïa tei pohe i roto i te tahi atu aroraa.—Sam. 1, 4:1, 2, 10.

2, 3. Eaha te anairaa ati i tupu i nia ia Silo?

2 E ere tera ana‘e te ati i tupu. Ua faarue mai Hophini raua Phinehasa, na tamaiti ino a Eli te tahu‘a rahi, ia Silo ma te rave i te afata faufaa. Teie afata tei vaiiho-noa-hia na i roto i te vahi mo‘a roa o te sekene, e taipe ïa o te faaite ra e tei pihai iho Iehova i to ’na nunaa. Afai a‘era te nunaa i taua afata faufaa ra i te vahi aroraa, ma te mana‘o paha e e paruruhia ratou, a upootia ’tu ai. Teie râ, ua haru te Philiseti i te afata faufaa e haapohe atura ia Hophini raua Phinehasa.—Sam. 1, 4:3-11.

3 Ahia ’tura hoi hanere matahiti te vai-noa-raa te afata faufaa i roto i te sekene. Mea fana‘o ïa Silo. Aita faahou râ te afata faufaa. I to Eli, 98 matahiti, faarooraa i taua parau peapea ra, topa ofera ihora oia mai nia mai i to ’na parahiraa e pohe atura. Pohe atoa ihora ta ’na hunoa, te vahine a Phinehasa tei pohe atoa hoi i taua mahana ra, i to ’na fanauraa mai i ta ’na tamaiti. Hou râ oia a pohe ai, ua parau oia: “Ua ore te hinuhinu ia Iseraela nei.” E ere faahou atura ïa Silo i te oire fana‘o.—Sam. 1, 4:12-22.

4. Eaha ta teie pene e faataa mai?

4 Eaha to Samuela huru i mua i teie mau tupuraa peapea mau? Mea puai maitai anei to ’na faaroo no te tauturu i te nunaa Iseraela tei ere i te parururaa e te haamaitairaa a Iehova? I teie mahana, e farerei paha tatou pauroa i te mau fifi e te mau tupuraa faatoaruaru o te tamata i to tatou faaroo. E nehenehe râ tatou e huti mai i te haapiiraa ia Samuela.

 ‘Ua rave oia i te parau-tia’

5, 6. (a) Eaha te faatiahia mai ra i teie nei? (b) Eaha ta Samuela ohipa i te roaraa e 20 matahiti?

5 I teie nei, te faatiahia mai ra te parau o te afata faufaa. Te faaite mai ra te Bibilia e no to ratou haruraa i te afata faufaa, ua roohia te Philiseti i te ati mauiui. No reira ratou i faaho‘i mai ai i te afata. E faahitihia mai Samuela e 20 matahiti i muri a‘e. (Sam. 1, 7:2) Eaha ta ’na i rave i tera roaraa? Te pahono mai ra te Bibilia.

Ua tauturu Samuela i te nunaa toaruaru e oto ra no to ratou mau taata i pohe

6 E 20 matahiti na mua ’tu, ‘tae noa maira te parau a Samuela ia Iseraela atoa.’ (Sam. 1, 4:1) I muri a‘e i taua tau ra, te faaite mai ra te faatiaraa e pauroa te matahiti e ratere Samuela na roto e toru oire i Iseraela no te faaafaro i te mau peapea e te mau fifi. Ia oti, e ho‘i oia i ǒ ’na i Rama. (Sam. 1, 7:15-17) Mea papu ïa e ua ohipa noa na o ’na, e i tera roaraa e 20 matahiti, mea rahi ta ’na ohipa i rave.

Aita te Bibilia e faahiti ra ia Samuela i te hoê roaraa e 20 matahiti, mea papu râ e ua ohipa noa na o ’na i roto i te taviniraa a Iehova

7, 8. (a) Eaha ta Samuela i poroi ia Iseraela i muri a‘e i to ’na tauturu-noa-raa ia ratou i te pae varua e 20 matahiti? (b) Ua aha te nunaa?

7 No te ohipa taiata e te pi‘o a na tamaiti a Eli, ua paruparu te faaroo o te nunaa. Tera paha te tumu i haamori ai e rave rahi i te idolo. I muri a‘e i to ’na tauturu-noa-raa ia Iseraela i te pae varua e 20 matahiti, teie ta Samuela i poroi ia ratou: “Ia fariu mai outou ia Iehova ma to outou aau atoa ra, a tuu ê atu ai i te mau atua ěê ra, e te mau Asetarota i roto ia outou na, e ia tano maite to outou aau ia Iehova ra, a haamori ai ia ’na ana‘e ra: e faaora oia ia outou i te rima o te Philiseti.”—Sam. 1, 7:3.

8 Ua teiaha roa “te rima o te Philiseti” i nia i te nunaa. I te pauraa te nuu Iseraela, ua mana‘o te Philiseti e e nehenehe ratou e haavî i te nunaa o te Atua ma te ore e faautuahia. Ua haapapu râ Samuela e e taui te reira ia fariu mai Iseraela ia Iehova ra. Ua farii anei ratou? Oaoa roa Samuela i te iteraa e ua faarue ratou i ta ratou mau idolo e ua ‘haamori ia Iehova ana‘e ra.’ Titau atura oia ia ratou ia putuputu mai i te oire o Mizepe, i te pae apatoerau o te tuhaa fenua mou‘a o Ierusalema. Ua putuputu mai te nunaa, ua haapae i te maa e ua tatarahapa i ta ratou ohipa haamoriraa idolo e rave rahi.—A taio i te Samuela 1, 7:4-6.

Ua opua te Philiseti e haere e tairi i te nunaa tatarahapa o Iehova tei putuputu i Mizepe

9. Eaha ta te Philiseti i opua e rave, e ua aha te nunaa o te Atua?

9 Faarooroo a‘era râ te Philiseti i teie putuputuraa rahi i Mizepe  e opua ’tura e haere i ǒ e tairi i te feia e haamori ra ia Iehova. Tono atura ïa ratou i ta ratou nuu. Faaroo a‘era Iseraela e te haere mai ra te enemi, riaria a‘era e ani atura ia Samuela ia pure no ratou. Ta Samuela ïa i rave, ma te pûpû atoa i te hoê tusia. I taua taime mo‘a ra, te haere mai ra te nuu Philiseti i Mizepe. I reira ïa to Iehova faaiteraa mai i to ’na riri. ‘Faaharuru maira oia i te patiri rahi i nia i te Philiseti i taua mahana ra.’—Sam. 1, 7:7-10.

10, 11. (a) Eita e ore e mea ê roa te patiri ta Iehova i faaharuru i nia i te nuu Philiseti, no te aha? (b) Eaha tei tupu i muri a‘e i te aroraa i Mizepe?

10 E au paha ïa tera mau Philiseti i te tamarii rii e horo riaria ra i muri mai i to ratou mama ia haruru te patiri! E ere roa ’tu, e faehau pautuutu teie ua tehu i te aroraa. Eita e ore e mea ê roa tera patiri rahi, no te ‘haruru’ paha, no te ateatea o te ra‘i, aore ra no te mea e faaroohia te haruru na te mau aivi. Ta tatou noa i ite, ua riaria roa tera mau Philiseti. Ei feia aro, oioi roa ratou i te riroraa ei feia arohia. Inaha, faarue maira to Iseraela ia Mizepe, auau a‘era i taua nuu Philiseti ra ta ratou i tairi e tae roa i te pae apatoa tooa o te râ o Ierusalema.—Sam. 1, 7:11.

11 Ua tupu te hoê tauiraa rahi no te nunaa o te Atua no taua aroraa ra. Ua faarue noa mai te Philiseti i te fenua o Iseraela i te toea o te oraraa o Samuela ei haava. Te mau oire tei riro na i te Philiseti, ua ho‘i mai ïa i te nunaa o te Atua ra.—Sam. 1, 7:13, 14.

12. (a) Ua ‘rave Samuela i te parau-tia’ i roto i teihea auraa? (b) Eaha te mau huru maitatai ta Samuela i faatupu?

12 E rave rahi hanere matahiti i muri a‘e, e faahiti te aposetolo Paulo ia Samuela i rotopu i te mau haava e peropheta taiva ore tei “rave i te parau-tia.” (Heb. 11:32, 33) Ua rave iho â Samuela i te mea maitai e te mea tia i te aro o te Atua e ua faaitoito ia vetahi ê ia na reira atoa. Na te aha i tauturu ia ’na? Ua turui o ’na i nia ia Iehova ma te faaoromai, e ua rave noa i ta ’na ohipa ma te haapao maitai, noa ’tu te mau tupuraa faatoaruaru. Ua faaite atoa o ’na i to ’na mauruuru i te Atua. I muri a‘e i to ratou upootiaraa i Mizepe, ua faatia o ’na i te hoê ofai haamana‘oraa i ta Iehova i rave no to ’na nunaa.—Sam. 1, 7:12.

13. (a) Ia pee tatou i teihea mau huru maitatai o Samuela? (b) I to oe mana‘o, eaha te taime tano e haamata ’i i te faatupu i te mau huru maitatai mai to Samuela?

13 E hinaaro anei oe atoa e “rave i te parau-tia”? Mai te peu e  e, a pee ïa i te faaoromai o Samuela, to ’na haehaa e to ’na aau mauruuru. (A taio i te Petero 1, 5:6.) O vai hoi o tatou e ore e hinaaro i tera mau huru maitatai? Aua‘e Samuela i faatupu i te reira i to ’na apîraa i nehenehe ai o ’na e faaruru i te mau tupuraa faatoaruaru atu â i to ’na ruhiruhiaraa.

“Aore ta oe pue tamarii i haapao i ta oe parau”

14, 15. (a) Eaha te tupuraa peapea ta Samuela i faaruru i to ’na ruhiruhiaraa? (b) Eaha ta Samuela i rave, taa ê atu ia Eli?

14 E “ruhiruhia” Samuela i to te Bibilia faahiti-faahou-raa ia ’na. I taua taime ra, e piti tamaiti paari ta ’na, Ioela raua Abia. Te hopoia ta ’na i horoa na raua, e tauturu ïa ia ’na i roto i te ohipa haavaraa. Tera râ, ua hape roa Samuela i te tiaturiraa ia raua. Noa ’tu e e taata afaro Samuela e te parau-tia, ua faaohipa raua i to raua tiaraa ma te miimii, a haapi‘o ai i te haavaraa e a farii ai i te moni peta.—Sam. 1, 8:1-3.

15 I te hoê mahana, haere maira te feia rahi o Iseraela e autâ i te peropheta ruhiruhia ra, a na ô ai: “Aore ta oe pue tamarii i haapao i ta oe parau.” (Sam. 1, 8:4, 5) Aita te faatiaraa e parau ra e ua ite anei Samuela i taua fifi ra. Mea papu râ e ua amo maite iho â  Samuela i ta ’na hopoia metua tane, eiaha mai ia Eli ta Iehova i tama‘i e i faautua no te oreraa e a‘o i ta ’na na tamaiti ohipa ino. Ua rahi a‘e hoi to Eli faatura i ta ’na na tamaiti, i te Atua. (Sam. 1, 2:27-29) Aita roa ’tu Iehova i faahapa ia Samuela mai tera.

Ua aha Samuela noa ’tu to ’na peapea no te haerea ino o ta ’na na tamaiti?

16. (a) Eaha te huru o te mau metua mea patoi ta ratou mau tamarii? (b) E nafea to Samuela hi‘oraa e tauturu ai i te mau metua?

16 Ua pohe anei Samuela i te haama, i te hepohepo aore ra i te inoino i to ’na faarooraa i te haerea ino o ta ’na na tamaiti? Aita te Bibilia e parau ra. Mea rahi râ te metua e taa oioi i to Samuela huru aau. I teie tau peapea mau, mea rahi o te patoi i te a‘oraa e te tiaraa upoo o te metua. (A taio i te Timoteo 2, 3:1-5.) E nehenehe te mau metua e mauiui nei no teie fifi e ite maa tamahanahanaraa e maa aratairaa i roto i te hi‘oraa o Samuela. Noa ’tu e ua maiti ta ’na na tamaiti i te taiva ia Iehova, ua tapea noa Samuela i to ’na haapao maitai. Outou te mau metua, a haamana‘o e ia ore te aau etaeta o te tamarii e putapû i te parau e te a‘oraa, te toe ra te hoê ravea puai, to outou ïa hi‘oraa. E nehenehe noa iho â outou e faaoaoa i to outou Metua, te Atua ra o Iehova, mai ia Samuela.

“Faataa na oe i te tahi arii no matou”

17. Eaha ta te feia rahi o Iseraela i titau ia Samuela, e ua aha Samuela?

17 Aita na tamaiti a Samuela i ite e e faahopearaa te tupu mai no to raua nounou e to raua miimii. Ua na ô te feia rahi o Iseraela ia Samuela: “E teie nei, e faataa na oe i te tahi arii no matou ei haava ia matou, mai te mau fenua atoa ra.” Ua mana‘o anei Samuela e te faarue ra te nunaa ia ’na? Parau mau, ahia ’tura matahiti to Samuela haavaraa i taua nunaa ra i te i‘oa o Iehova. Aita râ ratou i hinaaro faahou e na te tahi noa peropheta mai ia Samuela e haava ia ratou, na te hoê râ arii. E arii ta te mau nunaa tapiri, hinaaro atoa ’tura Iseraela i te tahi na ratou! Ua aha Samuela? Ua riri.—Sam. 1, 8:5, 6.

18. Eaha ta Iehova i parau i mahanahana ’i to Samuela aau, tei faaite atoa râ i te hara rahi a Iseraela?

18 Pure ihora Samuela ia Iehova no nia i teie ohipa. Pahono maira Iehova: “E faaroo noa ’tu oe i te parau a te mau taata na, ta ratou i parau mai ia oe ra: e ere hoi o oe ta ratou i faarue, ua faarue râ ratou ia ’u, eiaha vau ei arii [faahou] i nia iho ia ratou.” Mahanahana ihora to Samuela aau. Mea tuhi iho â ta Iseraela i te Atua Mana hope. Parau atura Iehova ia Samuela ia faaara ia ratou i te mau faahopearaa e tae mai i nia ia ratou no to ratou aniraa i te hoê arii taata. Ua faaara ’tu Samuela. Parau onoono maira râ te  nunaa: “Eiaha; ei arii â to matou i nia iho ia matou.” Ma te auraro noa i to ’na Atua, haere atura Samuela e faatahinu i te arii ta Iehova i maiti.—Sam. 1, 8:7-19.

19, 20. (a) Mai te aha te huru auraro o Samuela i ta Iehova faaueraa e faatahinu ia Saula ei arii no Iseraela? (b) Mea nafea to Samuela tauturu-noa-raa i te nunaa o te Atua?

19 Mai te aha râ te huru auraro o Samuela i to ’na Atua? Ma te faatia ture noa anei? Ma te riri anei? Ua vaiiho anei o ’na i to ’na aau ia taero i te inoino, e ia a‘a te reira i roto i to ’na aau? Mea rahi te na reira, aita râ Samuela. Ua faatahinu o ’na ia Saula e ua farii iho â e na Iehova i maiti ia ’na. Hô‘i atura oia ia Saula ei tapao maevaraa e auraroraa i te arii apî. Na ô atura oia i te nunaa: “Aita outou ite i tei haapaohia e Iehova ra, e aita o ’na e faito i te mau taata atoa ra?”—Sam. 1, 10:1, 24.

20 Aita Samuela i tiatonu i te mau huru paruparu o Saula, i te mea maitai râ o taua taata ra ta Iehova i maiti. Aita atoa o ’na i imi i te farii maitai a taua nunaa ra e taui hanoa te mana‘o. Ua tapea râ oia i to ’na taiva ore i te Atua. (Sam. 1, 12:1-4) Ua rave maite atoa o ’na i ta ’na ohipa i faauehia mai: e a‘o i te nunaa o te Atua i nia i te mau tupuraa e fifi ai to ratou taairaa e o Iehova, e faaitoito atoa ia ratou ia tapea i to ratou taiva ore ia Iehova. Putapû a‘era te aau o te nunaa i ta ’na a‘oraa e ani atura ia Samuela ia pure no ratou. Horoa maira oia i teie pahonoraa nehenehe: “Eiaha roa vau e faarue i te pure [no] outou a hara ’i au ia Iehova ra: e haapii â vau ia outou i te e‘a maitai, e te tia.”—Sam. 1, 12:21-24.

Mai ia Samuela, eiaha roa ’tu e vaiiho i te pohehae aore ra te inoino ia a‘a i roto i to tatou aau

21. Eaha ta te hi‘oraa o Samuela e haamana‘o mai ra ia inoino noa ’tu oe ia maitihia te tahi atu taata no te hoê hopoia aore ra haamaitairaa?

21 I inoino atoa na paha oe i te maitiraahia te tahi atu taata no te hoê hopoia aore ra haamaitairaa. Te haamana‘o papu mai ra to Samuela hi‘oraa e eiaha roa ’tu tatou e vaiiho i te pohehae aore ra te inoino ia a‘a i roto i to tatou aau. (A taio i te Maseli 14:30.) Mea rahi hoi ta te Atua ohipa au maitai na ta ’na mau tavini taiva ore atoa.

“E oto â oe ia Saula . . . ?”

22. No te aha Samuela i tano ai i te hi‘oraa i te mea maitai o Saula?

22 Ua tano Samuela i te hi‘oraa i te mea maitai o Saula, e taata faahiahia hoi o ’na. Noa ’tu e e tiapai taata, mea itoito, mea  maramarama, e taata aau faahaihai oia i te omuaraa. (Sam. 1, 10:22, 23, 27) Hau atu â, e tiamâraa to ’na e maiti. E nehenehe ïa o ’na e maiti i to ’na iho e‘a e e rave i ta ’na iho faaotiraa. (Deut. 30:19) Ua faaohipa maitai anei o ’na i taua ô faufaa roa ra?

23. (a) Eaha te huru maitai faufaa roa ta Saula i ere na mua? (b) Mea nafea to ’na faaiteraa i te teoteo?

23 Mea peapea ia parau e ia noaa mai i te hoê taata te mana, e pinepine o te aau faahaihai ta ’na e ere na mua. Aita i maoro to Saula teoteoraa mai. Ua faaoti oia e faaroo ore i ta Iehova i faaue ia ’na na roto ia Samuela. I te hoê mahana, no to ’na fiu i te tiairaa ia Samuela, ua pûpû oia i te hoê tusia. A‘o etaeta ihora Samuela ia ’na e tohu atura e eita te toroa arii e vai noa mai i roto i to ’na utuafare. Aita râ Saula i farii i te a‘oraa, rave atura râ i te mea ino roa ’tu â.—Sam. 1, 13:8, 9, 13, 14.

24. (a) Ua faaroo anei Saula i ta Iehova faaueraa no nia i te ati Amaleka? (b) Eaha to Saula huru i to ’na a‘oraahia, e eaha ta Iehova i faaoti e rave?

24 Na roto ia Samuela, ua faaue Iehova ia Saula e aro i te ati Amaleka. Ua parau iho â râ o ’na ia haapohe i to ratou arii ino o Agaga. Ua faaherehere râ Saula ia Agaga, te mau animara maitatai e te mau mea maitai atoa ta Iehova hoi i faaue e faaore pauroa. I to Samuela a‘oraa ia ’na, faaite maira Saula e ua taui roa o ’na. Aita Saula i farii i te a‘oraa ma te aau faahaihai. Ua parau atu râ e ua faaroo iho â o ’na i te parau a Iehova, ua imi i te otoheraa, ua haavare ite i te fifi e ua pari i te nunaa. Imi ihora o ’na i te ora, ma te parau e ua faataahia te tahi tuhaa o ta ratou i haru mai no te pûpû ei tusia ia Iehova. Eaha râ ta Samuela i pahono atu? Ua matau maitai tatou i teie parau: Mea maitai a‘e te auraro i te tusia. Ma te itoito, tama‘i ihora Samuela ia Saula e faaite atura i ta Iehova faaotiraa: e iriti-ê-hia te toroa arii o Saula e e horoahia ’tu i te tahi atu taata maitai a‘e. *Sam. 1, 15:1-33.

25, 26. (a) No te aha Samuela i oto ai ia Saula, e eaha ta Iehova i a‘o mǎrû ia ’na? (b) I to Samuela taeraa ’tu i ǒ Iese, eaha ta Iehova i parau ia ’na?

25 E ere to Samuela i te inoino nainai no ta Saula mau hara. I  tera po taatoa, ua tiaoro noa o ’na ia Iehova. Ua oto roa atoa o ’na ia Saula. I ite na o ’na i ta Saula e nehenehe e rave e to ’na maitai rahi. Ua ore râ teie mau tiaturiraa to ’na. Ua taui roa taua taata ra ta ’na i matau, ua ere oia i to ’na mau huru maitatai e ua faarue ia Iehova. Aita Samuela i haere faahou e hi‘o ia Saula. I muri iho râ, ua a‘o mǎrû noa ’tu Iehova ia ’na: “E oto â oe ia Saula, tei faaruehia oia e au eiaha oia ei arii [faahou] no Iseraela? A faaî na i to farii i te mono‘i, e haere ia Iese i Bete-lehema ra, te tono nei hoi au ia oe; ua noaa hoi te tahi arii na ’u i roto i te mau tamarii na ’na ra.”—Sam. 1, 15:34, 35; 16:1.

26 E ere tei te haapao maitai o te mau taata tia ore e tupu ai te opuaraa a Iehova. Ia taiva te hoê, e itea mai iho â ia Iehova te tahi atu no te rave i to ’Na hinaaro. Faaea ’tura Samuela ruhiruhia i te oto ia Saula. Ma te faauehia e Iehova, haere ihora Samuela i Betelehema i te fare o Iese. E tiapai taata vetahi mau tamaiti a Iese. I to Samuela râ iteraa ’tu i te matahiapo, parau ihora Iehova ia ’na e eiaha e hi‘o i to ’na tino. (A taio i te Samuela 1, 16:7.) Farerei atura Samuela i te hopea, o ’na ta Iehova i maiti. O Davida ïa.

Ua ite roa Samuela e e nehenehe ta Iehova e tamǎrû, e faaafaro aore ra e taui i te tupuraa faatoaruaru roa ino ei haamaitairaa

27. (a) Eaha ta Samuela i ite roa i puai noa ’tu â ’i to ’na faaroo? (b) Eaha ta oe e au roa i roto i te hi‘oraa ta Samuela i vaiiho mai?

27 I te mau matahiti hopea o to ’na oraraa, ua taa ’tu â ia Samuela e ua tano iho â Iehova i te monoraa ia Saula na roto ia Davida. Ua rahi noa ’tu to Saula pohehae a hinaaro atu ai e haapohe ia Davida. Ua riro atoa mai o ’na ei apotata. O Davida râ, ua faaite ïa i te mau huru nehenehe mau: te itoito, te hapa ore, te faaroo e te taiva ore. A fatata ’i Samuela i te pohe, ua puai noa ’tu â to ’na faaroo. Ua ite roa o ’na e e nehenehe ta Iehova e tamǎrû, e faaafaro aore ra e taui i te tupuraa faatoaruaru roa ino ei haamaitairaa. Pohe atura Samuela, a vaiiho mai ai i te aamu o te hoê taata faaroo faahiahia mau tei ora fatata 100 matahiti. Pauroa te Iseraela tei oto i te faarueraa mai teie peropheta taiva ore, eaha e ore ai! Mea maitai ïa ia ui te mau tavini a Iehova i teie mahana: ‘E pee anei au i te faaroo o Samuela?’

^ par. 24 Na Samuela i haapohe ia Agaga. Mea tano iho â ia pohe taua arii ino ra e to ’na atoa utuafare. Te mana‘ohia ra e e huaai atoa no Agaga o ‘Hamana ati Agaga,’ tei ora na e rave rahi hanere matahiti i muri a‘e. I tamata na oia i te haamou i te nunaa o te Atua.—Ese. 8:3; a hi‘o i na pene 15 e 16 o teie buka.