Eaha to roto?

Mau faaho'iraa ê

Tapura tumu parau

Ite no Iehova

Tahiti

A pee i to ratou faaroo

 PENE PITI AHURU MA HOÊ

Ua aro oia i te mǎta‘u e te feaa

Ua aro oia i te mǎta‘u e te feaa

1-3. (a) Eaha ta Petero i ite ia Iesu i te raveraa? (b) Eaha ta Petero i faaû i nia i te miti no Galilea?

A TAUTOO noa ’i Petero i te hôe, ite ihora oia i te tahi mea i te pae hitia o te râ. O te marama anei o te mahana? Ahia ’tura hoi hora to ’na hôe-noa-raa, ua maui roa to ’na tua e to ’na tapono. Mataare te miti no Galilea no te mata‘i e farara maira i nia ia ’na. Fati noa maira te are i nia i te muaraa o te poti, a rari atu ai oia. Noa ’tu râ, tamau noa ’tura oia i te hôe.

2 I vaiiho atu na hoi Petero e te tahi atu mau pǐpǐ ia Iesu i te tahi vahi i uta. I tera mahana, ua ite ratou ia Iesu i te faatamaaraa e tausani taata tei poiâ: maa faraoa e maa i‘a noa. Hinaaro a‘era taua mau taata ra e faaarii ia ’na. Aita râ Iesu i hinaaro e faaô i roto i te poritita. Ua faaoti atoa oia e haapii i ta ’na mau pǐpǐ e pee i to ’na hi‘oraa. Faaue ihora oia ia ratou ia fano i te tahi atu pae. O ’na râ, e faaho‘i ïa i te nahoa. Haere atura oia i nia i te mou‘a o ’na ana‘e e pure.—Mar. 6:35-45; a taio i te Ioane 6:14-17.

3 I te revaraa te mau pǐpǐ, to nia ê na te ava‘e aita i ati roa. Te tape mǎrû noa ra râ te ava‘e i te pae tooa o te râ. Tau kilometera noa râ to ratou hôeraa. No te rohirohi e no te vavâ o te mata‘i e te are, aita e taata i hinaaro e paraparau. To Petero râ feruriraa, to vaho ïa.

Mea rahi te haapiiraa ta Petero i huti mai ia Iesu e piti matahiti, e mea rahi â ta ’na e haapii mai

4. No te aha e hi‘oraa maitai ai Petero no tatou?

4 Mea rahi te ohipa ta Petero e mana‘o ra. Te taime matamua i farerei ai o ’na ia Iesu no Nazareta, e piti ïa matahiti na mua ’tu. Mea rahi te haapiiraa ta ’na i huti mai ia Iesu, e mea rahi  â ta ’na e haapii mai. Ua hinaaro mau â oia ia noaa ia ’na ia aro i to ’na mau paruparu, mai te mǎta‘u e te feaa. E hi‘oraa maitai ïa o ’na no tatou. E hi‘o mai tatou no te aha.

“Ua itea ia mâua te Mesia”

5, 6. A faataa na i te huru oraraa o Petero.

5 Aita roa ’tu i moe ia Petero te mahana i farerei ai o ’na ia Iesu. Na to ’na taeae o Anederea i faaite atu ia ’na i teie parau apî faahiahia mau: “Ua itea ia mâua te Mesia.” Na taua parau oaoa ra i faataui roa i to Petero oraraa.—Ioa. 1:41.

6 I Kaperenaumi Petero i faaea ’i. Tei te hiti apatoerau o te roto piihia miti no Galilea tera oire. E ohipa tai‘a ta raua Anederea, e to raua na hoa ohipa Iakobo raua Ioane, na tamaiti a Zebedaio. E vahine ta Petero, e faaea atoa râ to ’na metua hoovai vahine e to ’na taeae Anederea i ǒ ’na. No te tai‘a e tamaa ’i te utuafare, e titauhia ia fetu, te itoito e te aravihi. Ia po, e faaea noa te feia tai‘a i tai ehia hora: e tuu ratou i te upe‘a mai nia mai e piti poti, a huti mai ai no te ohi i te i‘a i mau i roto. Aitâ te ohipa i oti atura. Ua ao ana‘e, e faataa ê ratou i te i‘a, a hoo atu ai. I muri iho, e tafai ratou i te upe‘a, a tamâ ’tu ai. Ua oti ana‘e, ua rohirohi roa ratou.

7. Eaha ta Petero i faaroo no nia ia Iesu, e no te aha e parau apî oaoa roa ’i te reira?

7 Te faaite mai ra te Bibilia e e pǐpǐ Anederea na Ioane Bapetizo. Papu roa, ua faaroo Petero ma te anaanatae rahi i to Anederea faaiteraa ia ’na i ta Ioane poroi. I te hoê mahana, ua ite Anederea ia Ioane i te tohuraa ia Iesu no Nazareta, a na ô atu ai: “A hi‘o na i te Arenio a te Atua.” Riro oioi maira Anederea ei pǐpǐ na Iesu e faaite ru atura oia ia Petero i te parau api oaoa roa: ua tae mai te Mesia! (Ioa. 1:35-41) I muri a‘e i te orureraa hau i tupu i te ô i Edene e 4 000 matahiti na mua ’tu, i fafau na Iehova e e tono mai o ’na i te hoê faaora o te horoa i te tiaturiraa mau no te huitaata. (Gen. 3:15) No farerei noa mai nei Anederea i taua Faaora ra, te Mesia! Haaviti ihora Petero i te haere e farerei ia Iesu.

8. (a) Eaha te auraa o te i‘oa Kepha ta Iesu i horoa no Petero? (b) Eaha to vetahi mana‘o i taua i‘oa ra?

8 I piihia na Petero i te i‘oa ra Simona aore ra Simeona. I to Iesu râ hi‘oraa mai ia ’na, na ô maira oia: “O Simona oe, te tamaiti a Iona, e mairihia oe ia Kepha (oia hoi Petero).” (Ioa. 1:42) E “ofai,” aore ra e “pǎpǎ” te auraa o te i‘oa Kepha. E parau tohu  teie. Ua ite ê na Iesu e e riro mai Petero mai te hoê pǎpǎ, oia hoi te hoê taata aueue ore, itoito e te nehenehe e tiaturi, o te horoa i te hi‘oraa maitai no te mau pǐpǐ a te Mesia. Tera atoa anei to Petero mana‘o? E ere paha. Aita atoa te tahi mau taata taio i te mau Evanelia e mana‘o ra e e au Petero i te pǎpǎ. No te tahi atu, e taui hanoa to ’na mana‘o e to ’na huru.

9. Eaha ta Iehova e ta ’na Tamaiti e imi, e no te aha e tiaturi ai ia raua?

9 E paruparu iho â to Petero, e ua ite Iesu i te reira. Mai to ’na râ Metua ra o Iehova, e imi noa Iesu i te maitai i roto i te taata. Ua ite oia e mea rahi te huru maitatai o Petero, e ua hinaaro e tauturu ia ’na ia faahotu atu â i taua mau huru maitatai ra. E imi atoa Iehova e ta ’na Tamaiti i te maitai i roto ia tatou. Eita paha tatou e tiaturi e e maitai to roto ia tatou. E pee ana‘e râ i te hi‘oraa o Petero, ma te tiaturi e ma te vaiiho ia raua ia haapii ia tatou.—A taio i te Ioane 1, 3:19, 20.

“Eiaha e mǎta‘u”

10. Eaha paha ta Petero i ite mata, ua ho‘i atu râ oia i te aha?

10 Peneia‘e ua apee Petero ia Iesu i roto i to ’na tere pororaa no te hoê taime. Ua ite mata paha ïa oia i ta ’na semeio matamua: to ’na tauiraa i te pape ei uaina i te oroa faaipoiporaa i Kana. Te mea faufaa roa ’tu â, ua faaroo oia i ta Iesu poroi faahiahia o te horoa mai i te tiaturiraa: te Basileia o te Atua. Teie nei râ, faaea ihora Petero i te apee ia Iesu, e ho‘i atura i ta ’na ohipa tai‘a. Tau ava‘e râ i muri iho, farerei faahou a‘era raua, e i tera taime, parau ihora Iesu ia Petero ia poro na muri ia ’na ma te taime taatoa.

11, 12. (a) A faataa na i to Petero tai‘araa i te hoê po. (b) A faaroo noa ’i Petero ia Iesu, eaha paha ta ’na i uiui?

11 I fetu noa na Petero i tera po. I tuu noa na oia e to ’na mau hoa i te upe‘a, aita râ e i‘a. Ua faaohipa paha o Petero i to ’na ite e to ’na aravihi e ua paimi i te vahi i‘a. Eita e ore e ua mana‘o oia i te tahi taime, mai e rave rahi feia tai‘a, ahani e nehenehe ta ’na e ite atu i roto i te hohonuraa o te roto i te aere i‘a, a faahaere atu ai i roto i te upe‘a! Aita e apî ia mana‘o o ’na mai tera, e toaruaru roa ’tu â ïa o ’na. E ere teie ohipa i te faaanaanataeraa no Petero, e imiraa râ na ’na. Ho‘i atura o ’na i te fare aita ta ’na e i‘a, e tamâ ’tura i ta ’na mau upe‘a. Te ohipa ïa ta ’na e rave ra a tae mai ai Iesu.

Aita roa Petero i fiu i te faaroo ia Iesu ia faataa i te tumu parau rahi o ta ’na pororaa: te Basileia o te Atua

12 Ati a‘e ia Iesu, te faaroo maite ra te hoê nahoa ia ’na. No te rahi o te taata, haere ihora Iesu i nia i te poti o Petero, a ani  atu ai ia faaatea rii i tai. Haapii ihora oia i tera rahiraa taata o te faaroo maitai ra i to ’na reo aua‘e te pape. Ua faaroo maitai atoa Petero. Aita roa o ’na i fiu i te faaroo ia Iesu ia faataa i te tumu parau rahi o ta ’na pororaa: te Basileia o te Atua. Mea fana‘o roa ia tauturu i te Mesia ia haaparare i teie poroi o te horoa mai i te tiaturiraa. E haere anei râ ia Petero? E nafea hoi oia ia faatamaa i to ’na utuafare? Peneia‘e ua mana‘o faahou o ’na i te po i mairi iho nei, aita hoi ta ’na i‘a i roaa noa ’‘e.—Luka 5:1-3.

13, 14. (a) Eaha te semeio ta Iesu i faatupu no Petero? (b) Eaha te huru o Petero?

13 I te otiraa ta Iesu paraparauraa, na ô maira oia ia Petero: “H[ôe] atu i te vahi moana, e tuu i ta outou upe‘a.” Te feaa ra te mana‘o o Petero. No tamâ iho nei o ’na i te upe‘a, e ere ïa no te tuu faahou i roto i te miti. Aita atoa hoi e i‘a i tera hora. Parau atura oia: “Fatu, i haa noa na matou e ao noa a‘enei te rui, e aore roa i noaa, e tuu râ vau i te upe‘a o oe i parau mai.” Ua faaroo iho â Petero, a tarape atoa ’i paha i to ’na mau hoa i nia i te tahi atu poti ia pee mai.—Luka 5:4, 5.

14 Haamata ihora Petero i te huti mai i te upe‘a. Iae! Mea teiaha! Maere roa ihora oia i te iteraa i te aere i‘a i roto i te upe‘a. Tarape atura oia i te mau hoa i roto i te tahi atu poti ia haere mai e tauturu. Eita e navai hoê noa poti no te faaho‘i i tera rahiraa i‘a i uta, te piti atoa hoi. Fatata roa na poti e piti i te tomo. E ere to Petero i te maere nainai nei! I ite na oia ia Iesu i te faaohiparaa i to ’na puai, i tera râ taime, o ’na e to ’na utuafare tei faufaahia i te reira. E mana to Iesu e faahaere i te i‘a i roto i te upe‘a, aita râ to ’na. Roohia ihora Petero i te mǎta‘u, tuturi ihora e na ô atura: “E haere ê oe, e te Fatu, e taata hara hoi au.” Eita ïa e tano ia apiti oia ia Iesu e mana rahi to ’na no ǒ mai i te Atua ra. Te mana‘o ïa o Petero.—A taio i te Luka 5:6-9.

“Fatu, e taata hara hoi au”

15. Eaha ta Iesu i parau ia Petero no te tamǎrû ia ’na?

15 Pahono maira Iesu ma te mǎrû: “Eiaha e mǎta‘u, i teie nei, e taata ta oe e noaa.” (Luka 5:10) E ere teie i te taime no te mǎta‘u aore ra no te feaa. Ia tiatonu hoi Petero i te pororaa, te hoê ohipa faufaa, eiaha râ o ’na e uiui e nahea o ’na ia faatamaa i to ’na utuafare aore ra e maraa anei ia ’na ia poro. E ohipa rahi  ta Iesu e rave, te hoê taviniraa o te taui i te aamu o te huitaata. Te tavini ra oia i te hoê Atua, “te rahi ra hoi ia ’na te faaore i te hara.” (Isa. 55:7) Na Iehova e tauturu ia Petero ia aupuru i to ’na utuafare e ia poro.—Mat. 6:33.

16. Mea nafea to Petero, Iakobo, e Ioane pahonoraa i ta Iesu titau-manihini-raa, e no te aha tera te faaotiraa maitai roa ’‘e ta ratou i rave?

16 Faaroo ihora Petero i ta Iesu parau, Iakobo raua Ioane atoa. “Tae maira to ratou pue pahi i tahatai, faarue ana‘e ihora ratou e ua pee maira ia ’na.” (Luka 5:11) Faaite ihora Petero e e faaroo to ’na ia Iesu e i te Atua tei tono mai ia Iesu. O te faaotiraa maitai roa ’‘e ta ’na i rave. Te mau Kerisetiano e haavî nei i te feaa e te mǎta‘u no te tavini i te Atua, te faaite atoa nei ïa i te faaroo.  E aupuru noa iho â Iehova i te feia e tiaturi ra ia ’na.—Sal. 22:4, 5.

‘Eaha Petero i feaa ’i?’

17. Eaha paha ta Petero i mana‘o a hôe noa ’i o ’na?

17 Fatata e piti matahiti i muri a‘e i to ’na farereiraa ia Iesu, û a‘era Petero i tei faahitihia i te omuaraa o teie pene. Te hôe ra oia a faaû ai i te mata‘i i tera po i te miti no Galilea. Aita tatou i ite eaha ta Petero i mana‘o i tera taime, peneia‘e to Iesu faaoraraa i te ma‘i o te metua hoovai vahine o Petero, to ’na horoaraa i ta ’na A‘oraa i nia i te mou‘a, to ’na haapapuraa ehia taime na roto i ta ’na haapiiraa e ta ’na mau semeio, e o ’na te Mesia, tei maitihia e Iehova. Oia atoa paha to Petero haapii-noa-raa i te haavî i to ’na mau paruparu, mai te mǎta‘u e te feaa, ahia ’tura ava‘e. E to Iesu maiti-atoa-raa ia ’na ei hoê o na 12 aposetolo. E ite oioi râ Petero e aita â i vî roa ’tura ia ’na te mǎta‘u e te feaa.

18, 19. (a) A faataa na i ta Petero i ite i nia i te miti no Galilea. (b) Mea nafea to Iesu pahonoraa i ta Petero aniraa?

18 I te maha o te araraa o taua po ra, oia hoi mai te hora 3 i te aahiata tae atu i te hitiraa mai o te mahana, faaea taue ihora Petero i te hôe, e fâao atura. Te hautiuti ra te tahi mea i ǒ roa ’tu! Peneia‘e o te hoho‘a o te ava‘e i nia i te miti mataare. E ere râ, mea tia noa taua mea e hautiuti noa ra. E taata! Tera iho â, e taata te haere ra na nia i te miti, te tapiri mai ra e te haere tia mai ra ia ratou ra! Mehameha a‘era te mau pǐpǐ e mana‘o atura e e orama. (Mat. 14:25, 26, Traduction du monde nouveau) Parau maira taua taata ra: “A faaitoito, o vau, eiaha e mǎta‘u.” Taa ihora ia ratou e o Iesu tera!—Mat. 14:27.

19 Pahono atura Petero: “Fatu, o oe ra, [a] parau mai ia ’u ia haere atu vau ia oe na na nia i te are.” (Mat. 14:28) Mea itoito Petero! Ua hinaaro oia, tei maere roa, e haapuai atu â i to ’na faaroo, ma te faaô roa ’tu i roto i taua semeio otahi ra. Parau maira Iesu ia ’na ia haere mai. Pou ihora Petero mai nia mai i te poti, hoê avae na mua, e te tahi atu avae i muri iho. Iae! Mea ê roa: mea paari te pape i raro a‘e i to ’na avae. Tia a‘era oia, e haere atura ia Iesu ra. Eaha râ paha oia i te maere! Tera râ, taui taue ihora te hoho‘a mata o Petero.—A taio i te Mataio 14:29.

“Ia ite râ oia i te u‘ana o te mata‘i, mǎta‘u ihora”

20. (a) Mea nafea i nevaneva ’i to Petero mata? (b) Mea nafea to Iesu haaferuriraa ia Petero?

20 Mea tano iho â ia tiatonu Petero ia Iesu. Na Iesu hoi e  faatia ra ia ’na i nia i te miti mataare maoti te puai o Iehova. No te haamaitai ia ’na no to ’na faaroo ia ’na i na reira ’i Iesu. Nevaneva ihora râ to Petero mata. Te taio nei tatou: “Ia ite râ oia i te u‘ana o te mata‘i, mǎta‘u ihora.” I to ’na hi‘oraa i te mau are e faataueue ra i te poti, a pee atu ai te hu‘a miti i te mata‘i, riaria ihora oia. Ua puta mai paha te mana‘o e te mure ra oia i raro i te roto, a paremo atu ai. A rahi noa ’tu â ’i to ’na riaria, ua iti mai to ’na faaroo. O ’na hoi tei piihia “pǎpǎ” no to ’na aueue ore, te mure ra ïa i raro i te miti no to ’na faaroo tapetepete. Mea ite o ’na i te ǎu, aita râ i tiaturi i to ’na iho puai. Tuô atura oia ia Iesu ia faaora ia ’na. Haru maira e huti maira Iesu ia ’na. To nia noa â raua i te miti, haaferuri ihora Iesu ia Petero: “E teie nei taata faaroo haraini [aore ra tapetepete], eaha oe i mǎta‘u ai [aore ra feaa ’i]?”—Mat. 14:30, 31.

21. No te aha mea atâta ’i ia feaa, e e nafea ia tinai i te reira?

21 Ua feaa iho â Petero, e mea ino roa te reira. Ia feaa tatou, e nehenehe to tatou faaroo e paruparu, a ere atu ai tatou i te reira. E tutava ana‘e ïa i te tinai i te feaa. E nafea? Ma te haamau i to tatou feruriraa i nia i te mau mana‘o maitatai. Ia mana‘o noa tatou i te mau mea e riaria ’i, e toaruaru ai tatou, a fariu ê atu ai ia Iehova e ta ’na Tamaiti, e rahi roa ’tu tatou i te feaaraa. Ia tiatonu râ tatou ia Iehova e ta ’na Tamaiti, ta raua i rave na, e rave nei e e rave â no te feia e here ra ia raua, e tinai ïa tatou i te feaa o te haaparuparu i to tatou faaroo.

22. No te aha mea hoona ’i ia pee i to Petero faaroo?

22 Pauma ’tura Petero raua Iesu i nia i te poti, pohe ihora te mata‘i, e mania ’tura te miti no Galilea. Na ô a‘era Petero e te tahi atu mau pǐpǐ: “E tamaiti mau â oe na te Atua.” (Mat. 14:33) A marama mai ai, eita e ore e ua mauruuru roa Petero. Ua noaa ia ’na ia haavî i te feaa e te mǎta‘u. Parau mau, mea rahi â te tauiraa e rave, a riro atu ai oia ei Kerisetiano e au i te pǎpǎ ta Iesu i ite atea. Ua faaoti papu râ oia e tamau â i ta ’na aroraa, ia haere atu â oia i mua. E oe, e na reira atoa anei oe? E ite iho â oe e mea hoona ia pee i to Petero faaroo.