Faatanoraa no te "mode accessibilité"

Search

Maiti te reo

Mau faaho'iraa ê

Tapura tumu parau

Eaha to roto?

Ite no Iehova

Tahiti

A pee i to ratou faaroo

 PENE PITI AHURU MA TORU

Ua haapii mai oia i te Fatu ia faaore i te hara

Ua haapii mai oia i te Fatu ia faaore i te hara

1. Eaha paha te taime peapea roa ’‘e o to Petero oraraa?

MAU roa ia Petero tera taime i tano ai to raua Iesu mata i te hi‘oraa te tahi i te tahi. Ua ite atu anei oia i te inoino aore ra te mauruuru ore i roto i ta Iesu huru hi‘oraa mai ia ’na? Aita tatou i ite. Ta te faatiaraa noa e parau ra, “fariu maira te Fatu, hi‘o maira ia Petero.” (Luka 22:61) I tera noa râ taime, puta maira ia Petero ta Iesu i tohu na, e taa ihora ia ’na ta ’na hape rahi. No parau mai nei oia e aita o ’na i ite ia Iesu, te ohipa mau ïa ta ’na i parau onoono noa na e ore roa o ’na e rave. Ua ino roa Petero, tera paha te taime peapea roa ’‘e o to ’na oraraa.

2. Eaha ta Iesu i haapii ia Petero, e eaha te faufaaraa o to ’na aamu no tatou?

2 Te auraa anei e ua oti iho â ïa no Petero? E ere roa ’tu. Ei taata faaroo rahi, ua nehenehe oia e faaafaro i ta ’na mau hape. Ua horoa ’tu Iesu i te hoê haapiiraa faufaa roa: te faaoreraa i te hara. No tatou pauroa atoa tera haapiiraa. E hi‘o mai tatou mea nafea Petero i te hutiraa mai i taua haapiiraa ra.

Mea rahi ta ’na i haapii mai

3, 4. (a) Eaha ta Petero i ui ia Iesu? (b) Eaha ta Iesu i faaite na roto i ta ’na pahonoraa?

3 E ono ava‘e na mua ’tu i Kaperenaumi, i reira Petero i faaea ’i, ui ihora oia ia Iesu: “Fatu, ia tuatapapa tau taeae i te hamani ino mai ia ’u, ia hia a ’u faaoreraa ’tu i ta ’na hara? ia hitu anei?” Ua mana‘o paha Petero e mea maitai ïa o ’na. Te haapii ra hoi te mau aratai haapaoraa i tera tau e e toru noa taime e faaore ai i te hara. Pahono maira Iesu: “Aore au i parau atu ia oe e, Ia hitu; ia hitu râ ahuru i te hituraa.”—Mat. 18:21, 22.

4 Te faaitoito ra anei Iesu ia Petero ia tapaopao i te rahiraa taime e hamani-ino-hia ’i o ’na? Aita. I to ’na tauiraa i ta Petero 7 na roto i te numera 77, no te faaite ïa e e opani te here ia tatou ia taotia i te faaoreraa i te hara. (Kor. 1, 13:4, 5) Ua faaite atoa oia e ua peehia Petero i te huru feruriraa etaeta i tera ra tau, oia hoi mea  numera i te taime e faaore ai i te hara. O Iehova râ, e faaore rahi oia i te hara.—A taio i te Ioane 1, 1:7-9.

5. I roto i teihea tupuraa e haapii rahi mai ai tatou no nia i te faaoreraa i te hara?

5 Aita Petero i mârô ia Iesu. Ua putapû râ anei to ’na aau i ta Iesu haapiiraa i horoa ’tu? I te tahi taime, e haapii rahi mai tatou no nia i te faaoreraa i te hara ia hinaaro roa tatou iho ia faaorehia ta tatou. E hi‘o mai ïa tatou i te tahi mau ohipa i tupu hou Iesu a pohe ai. I tera mau taime fifi roa, ua hinaaro mau â Petero ia faaore to ’na Fatu i ta ’na mau hape e rave rahi.

Ua rahi noa ’tu â ta ’na mau hape

6. Eaha ta Petero i rave i to Iesu haapiiraa i te mau aposetolo i te haehaa, eaha râ to Iesu huru i nia ia ’na?

6 I te po hopea o te oraraa o Iesu i te fenua nei, e po faufaa roa, mea rahi â ta te mau aposetolo i haapii mai ia Iesu, te parau iho â râ o te haehaa. Ua horoa ’tu Iesu i te hi‘oraa ma te horoi i to ratou avae, na te hoê tavini haihai roa hoi tera ohipa. Na mua, ui ihora Petero ia Iesu e e horoi anei oia i to ’na avae. I muri iho, na ô ihora oia: “Eiaha.” I te pae hopea, parau atura oia ia Iesu e horoi eiaha noa i to ’na avae, to ’na atoa râ rima e to ’na upoo! Aita Iesu i riri atu, ua faataa râ ma te mǎrû i te faufaaraa e te auraa o te ohipa ta ’na e rave ra.—Ioa. 13:1-17.

7, 8. (a) Mea nafea Petero i te tamata-faahou-raa i to Iesu faaoromai? (b) Mea nafea to Iesu faaiteraa e mea hamani maitai o ’na e ua ineine i te faaore i te hara?

7 I muri rii a‘e, ua tamata â Petero i to Iesu faaoromai. Mârô a‘era te mau aposetolo te tahi i te tahi no te ite o vai tei rahi a‘e. Papu roa to roto atoa Petero i tera ohipa haama e faaite ra i te huru teoteo o te taata. Ma te hamani maitai râ to Iesu a‘oraa ia ratou, ma te haapopou atoa ia ratou no te pee-maite-raa i to ratou Fatu. Ua tohu râ oia e e faarue ratou pauroa ia ’na. Pahono atura Petero e ua ineine oia i te pohe e o ’na. Tohu ihora râ Iesu e hou te hoê moa e totereo ai e piti taime, e parau Petero e toru taime e aita o ’na i ite ia ’na. Mârô faahou ihora Petero ia Iesu, e faatietie atura ia ’na i te parauraa e e faarue te tahi atu mau aposetolo atoa ia ’na, o ’na râ eita ïa.—Mat. 26:31-35; Mar. 14:27-31; Luka 22:24-28; Ioa. 13:36-38.

8 Ua taahoa roa anei Iesu ia Petero? I taua taime fifi ra, ua hi‘o noa Iesu i te huru maitai o ta ’na mau aposetolo tia ore. Ua ite oia e e faarue Petero ia ’na, na ô atura râ oia: “I pure na . . . vau [no] oe ia ore ia mure to oe faaroo; e ia faafariuhia mai oe ra, a faaitoito  i to mau taeae.” (Luka 22:32) Te faaite ra ïa Iesu i to ’na tiaturi e e tatarahapa Petero, a tavini faahou atu ai i te Atua ma te taiva ore. Mea hamani maitai mau â Iesu, tei ineine i te faaore i te hara!

9, 10. (a) I te ô i Getesemane, no te aha Petero i a‘ohia ’i? (b) Eaha ta te tupuraa o Petero e haamana‘o mai ra?

9 I muri iho, i te ô i Getesemane, ua a‘o-pinepine-hia Petero e ua tano iho â. Ua parau Iesu ia ’na, ia Iakobo raua Ioane atoa, ia vai ara noa a pure ai oia. E ahoaho iti rahi to ’na e ua hinaaro oia ia turuhia o ’na. O Petero ma râ, ua taoto ïa e toru taime. Faaite ihora Iesu i te aumihi, a faaore atu ai i ta ratou hape. No reira oia i parau ai: “Ua itoito hoi te varua [aore ra mana‘o], te paruparu nei râ te tino.”—Mar. 14:32-41, Te Bibilia Mo’a V.C.J.S. (1976)

10 Aita i maoro, tae maira te hoê nahoa, e mori, e ‘o‘e e e raau ta ratou. Ia haapao maitai iho â ïa i tera taime. O Petero râ, huti maira ïa i ta ’na ‘o‘e, tairi ihora ia Malako te tavini a te tahu‘a rahi, e mutu ê atura to ’na tari‘a. A‘o maira Iesu ia Petero ma te mǎrû, tapea ihora i te tari‘a o Malako e ora ’tura. Faataa maira oia no te aha eiaha ’i ta ’na mau pǐpǐ e rave ino i te taata. (Mat. 26:47-55; Luka 22:47-51; Ioa. 18:10, 11) Mea rahi ta Petero hape ia faaorehia e to ’na Fatu. Te haamana‘o mai ra ïa te tupuraa o Petero e e hara pinepine tatou pauroa. (A taio i te Iakobo 3:2.) E hinaaro mau â tatou pauroa ia faaore te Atua i ta tatou mau hara i te mau mahana atoa. O Petero râ, e hape ino roa ’tu â ta ’na i rave i taua po ra.

Ta ’na hape rahi roa ’‘e

11, 12. (a) Mea nafea to Petero faaiteraa e mea itoito roa o ’na i to Iesu afairaahia? (b) Ua tapea iho â anei Petero i ta ’na parau?

11 Parau ihora Iesu i te nahoa ia tuu i ta ’na na aposetolo ia haere, o ’na hoi ta ratou e imi ra. Hi‘o noa ’tura Petero a taamu ai te nahoa i to Iesu na rima, ma te ore e nehenehe e tapea i te reira. Horo atura oia, mai te tahi atu mau aposetolo.

12 Faaea ihora Petero raua Ioane i te horo, peneia‘e i pihai iho i te fare o Ana tahu‘a rahi na mua ’‘e, i reira to Iesu uiuiraahia na mua. A arataihia ’i Iesu i te tahi atu vahi, apee maira Petero raua Ioane na te atea ê. (Mat. 26:58; Ioa. 18:12, 13) E ere ïa Petero i te hoê taata mǎta‘u hanoa, mea itoito roa râ i to ’na apeeraa ia Iesu. E ‘o‘e e e raau ta te nahoa, e i pêpê na hoê o ratou ia ’na. Aita râ tatou e ite ra i te here taiva ore o Petero i to ’na faahua-parau-raa e ua ineine oia i te pohe e to ’na Fatu.—Mar. 14:31.

13. Eaha te ravea tano hoê roa e pee ai i te Mesia?

13 Mea rahi atoa i teie mahana e hinaaro nei e pee i te Mesia  na te atea ê, ia ore ratou ia itehia mai. Mai ta Petero râ i papai i muri a‘e, te ravea tano hoê roa e pee ai i te Mesia, te ati-maite-raa ïa ia ’na, ma te pee maite i to ’na hi‘oraa, noa ’tu eaha te mau haapaeraa e rave.—A taio i te Petero 1, 2:21.

14. Eaha ta Petero i rave a haavahia ’i Iesu?

14 A na muri noa ’tu ai Petero ia Iesu na te atea ê, tae atura oia i te hoê fare rahi i Ierusalema. No Kaiapha tahu‘a rahi mana tera fare e mea rahi ta ’na mau tao‘a. E aua to ropu i tera mau huru fare, e to mua ’tu te uputa. I to Petero taeraa ’tu i te uputa, aita o ’na i faatiahia ia tomo atu. Area Ioane, matauhia e te tahu‘a rahi, to roto ê na ïa. Haere maira oia e parau i te tavini vahine tiai i te uputa ia faatomo mai ia Petero. E au ra e aita Petero i apee ia Ioane. Aita atoa o ’na i tamata i te tomo i roto i te fare no te tia ’tu i pihai iho i to ’na Fatu. Ua faaea noa râ oia i roto i te aua, to reira atoa te tahi mau tavini i te tia-noa-raa i pihai iho i te auahi ta ratou i tahu no te toetoe. E ite noa ’tura oia i te mau ite haavare ia haere hoê hoê mai no te faahapa ia Iesu i mua i te haavaraa.—Mar. 14:54-57; Ioa. 18:15, 16, 18.

15, 16. A faataa na mea nafea ta Iesu i tohu i tupu ai.

15 I roto i te marama o te auahi, ite maitai a‘era te tavini vahine tiai uputa i te hoho‘a mata o Petero, e taa ihora e na muri atoa na oia ia Iesu no Galilea. Maere a‘era Petero, e parau atura e aita o ’na i ite ia Iesu, aita atoa o ’na e taa ra eaha ta ’na e parau ra. Haere atura oia i pihai iho i te uputa no te haamoe ia ’na. Ite maira râ te tahi atu tavini vahine ia ’na e na ô ihora: “Ia Iesu [n]o Nazareta atoa ra teie nei taata.” Horeo ihora Petero: “Aore au i ite i tena na taata.” (Mat. 26:69-72) Teie ïa te pitiraa o te taime i parau ai Petero e aita o ’na i ite ia Iesu. I reira paha te faarooraahia te hoê moa i te totereoraa. No to ’na râ horuhoru rahi, ua moe ia ’na ta Iesu i tohu tau hora na mua ’‘e.

16 I muri iho, tapiri maira te tahi mau taata ia Petero o te imi noa ra i te haamoe ia ’na. E fetii hoê o ratou no Malako. Parau maira oia ia Petero e ua ite atu o ’na ia ’na i roto i te ô e o Iesu atoa. Tamata ihora Petero i te haapapu e aita. Horeo atura oia ma te parau e ia faautua te Atua ia ’na ia haavare o ’na. Parau atura oia e aita o ’na i ite i tera taata, te toruraa ïa o te taime. I reira iho, totereo a‘era te hoê moa, te pitiraa ïa o te taime.—Ioa. 18:26, 27; Mar. 14:71, 72.

“Fariu maira te Fatu, hi‘o maira ia Petero”

17, 18. (a) Eaha to Petero huru i to ’na taaraa e ua hara roa o ’na i to ’na Fatu? (b) Eaha paha ta Petero i mana‘o?

17 No haere noa ’tura Iesu i nia i te taupee, mai reira ’tu e itehia  ’i te aua. I taua taime ra ïa i tano ai to raua Petero mata i te hi‘oraa te tahi i te tahi, mai tei faataahia i te omuaraa o teie pene. Taa ihora ia Petero e ua hara roa oia i to ’na Fatu. Haere atura oia i rapae i te aua e te tatarahapa pauroa. Na roto atura oia i te mau aroâ i taua po marama maitai ra. Ua î roa to ’na mata i te roimata, a ore atu ai oia e ite maitai. Aita i haere faahou ia ’na ia tapea, ta‘i atura o ’na no te peapea rahi.—Mar. 14:72; Luka 22:61, 62.

18 Mea ohie roa ia mana‘o e e ore roa ’tu te hoê hara rahi mai tera e faaorehia. Ta Petero paha ïa i mana‘o. Tera iho â anei râ?

Ua faaorehia ta Petero hara

19. Eaha paha to Petero huru no ta ’na i rave, mea nafea râ to tatou iteraa e aita o ’na i taora i te tauera?

19 Ua mamae roa paha Petero ia poipoi a‘e i to ’na iteraa i ta Iesu i faaruru! E ere paha to ’na i te tatarahapa nainai nei i to Iesu poheraa i muri a‘e i taua mahana ra i roto i te mauiui rahi! Eaha râ paha o ’na i te mamae ia puta mai te mana‘o e ua rahi atu â te oto o to ’na Fatu no ’na noa ’‘e i taua mahana hopea ra o to ’na oraraa i te fenua nei. Noa ’tu râ to ’na peapea iti rahi, aita Petero i taora i te tauera. Te faaite ra te faatiaraa e ua amuimui oioi faahou atu oia i te tahi atu mau pǐpǐ. (Luka 24:33) Eita e ore e ua tatarahapa pauroa te aposetolo i ta ratou i rave i taua po fifi mau ra, e ua tamahanahana te tahi i te tahi.

20. Eaha te haapiiraa e huti mai i ta Petero i rave?

20 Tera hoê o te mau faaotiraa maitai roa ’‘e ta Petero i rave. Ia hi‘a te hoê tavini a te Atua, te mea faufaa roa ’‘e, e ere te huru ino mau o to ’na hi‘araa, ta ’na râ faaotiraa papu e tia faahou mai, a faaafaro atu ai i ta ’na mau hape. (A taio i te Maseli 24:16.) Ua faaite Petero i te faaroo mau ma te amuimui i to ’na mau taeae noa ’tu to ’na peapea rahi. Ia rahi roa ana‘e te oto aore ra te tatarahapa, e ô mai te hinaaro e faaea i te fare. Mea atâta râ te reira. (Mas. 18:1) Mea maitai a‘e ia tapiri noa i to tatou mau taeae e tuahine ia itoito faahou mai tatou no te tavini â i te Atua.—Heb. 10:24, 25.

21. No te mea ua amuimui oia i te tahi atu mau pǐpǐ, eaha ta Petero i faaroo?

21 No te mea ua amuimui oia i te tahi atu mau pǐpǐ, faaroo ihora Petero i te tahi parau apî maere mau: aita to Iesu tino i roto i te  menema. Horo atura Petero raua Ioane i te menema, tei opanihia na te uputa i te hoê ofai rahi. O Ioane, mea apî a‘e paha, tei tae atu na mua. Ite ihora oia e ua matara te menema, taiâ ihora oia i te tomo i roto. O Petero râ, aita ïa. Noa ’tu e ua paupau te aho, tomo roa ’tura oia i roto e ite atura e aita to Iesu tino!—Ioa. 20:3-9.

22. No te aha to Petero oto i pee ai, a ore atu ai oia i feaa faahou?

22 Ua tiaturi anei Petero e ua faatia-faahou-hia mai Iesu? Aita, noa ’tu atoa te faatiaraa a te tahi mau vahine haapao maitai e ua haapapu e piti melahi e ua faatiahia mai Iesu mai te pohe mai. (Luka 23:55–24:11) I te pae ahiahi râ, pee a‘era to Petero oto, aita ’tura i feaa faahou. Te ora ra Iesu ei varua puai! Hou râ oia a faaite ai ia ’na i ta ’na mau aposetolo atoa, ua haere oia e hi‘o ia Petero ana‘e. Inaha, ua parau te mau aposetolo i taua mahana ra: “Ua tia mau â te Fatu i nia, e ua faaite mai [ia ’na] ia Simona.” (Luka 24:34) Ua papai atoa te aposetolo Paulo i muri a‘e e ua fa ’tu Iesu ia “Kepha, e i te ahuru ma piti i muri a‘e.” (Kor. 1, 15:5) Simona e Kepha, e i‘oa atoa teie no Petero. E au ra ïa i tera mahana, ua haere Iesu e farerei ia Petero, i te hoê taime o ’na ana‘e.

Mea rahi te hape a Petero ua faaorehia e to ’na Fatu, o tatou atoa râ te hinaaro mau nei pauroa te mahana ia faaorehia ta tatou

23. No te aha e haamana‘o ai i to Petero tupuraa ia hara tatou?

23 Aita te Bibilia e faaite ra eaha te ohipa i tupu i to Iesu raua Petero farerei-faahou-raa. E nehenehe râ tatou e mana‘o e ua oaoa roa Petero i te ite-faahou-raa ’tu i to ’na Fatu here, a faaite atu ai i to ’na peapea e to ’na tatarahapa. E hinaaro iti rahi to ’na ia faaorehia ta ’na hara. Papu roa e ua faaore roa Iesu i ta ’na hara. Inaha, ua tia maitai oia i to ’na Metua o te ‘faaore rahi i te hara.’ (Isa. 55:7) E haamana‘o ana‘e ïa i to Petero tupuraa ia hara tatou. Eiaha roa ’tu e mana‘o e e ore te Atua e faaore i ta tatou hara.

Haapapuraa hau e ua faaorehia ta Petero hara

24, 25. (a) A faataa na i te po tai‘araa a Petero i te miti no Galilea. (b) Eaha ta Petero i rave no ta Iesu semeio?

24 Parau atura Iesu i ta ’na mau aposetolo ia haere i Galilea, i reira ratou e farerei faahou ai. I to ratou taeraa i ǒ, faaoti ihora Petero e haere e tai‘a, apee atoa ’tura vetahi ia ’na. Era faahou Petero i nia i te miti no Galilea, e pinepine hoi oia i te tai‘a na reira na mua ’‘e. Tapea i te upe‘a, faaroo te paapaaina o te poti, te are ia tairi mǎrû i nia i te poti, ua matau maitai oia i teie mau mea. Aita râ ta ratou e i‘a i noaa i taua po ra.—Mat. 26:32; Ioa. 21:1-3.

Ua ou‘a Petero i roto i te miti, e ua ǎu atu i uta

25 A haamata ’i râ i te marama, tuô maira te hoê taata na uta mai i te feia tai‘a ia taora i ta ratou upe‘a i te pae atau o te poti. Na  reira ihora ratou. Huti maira ratou i te upe‘a, mea rahi te i‘a: 153! Taa ihora ia Petero o vai tera taata, ou‘a ihora i roto i te miti, e ǎu atura i uta. I reira, horoa maira Iesu na to ’na mau hoa maa i‘a ta ’na i tunu i nia i te arahu, e paraparau maira ia Petero.—Ioa. 21:4-14.

26, 27. (a) Eaha ta Iesu i ani ia Petero e toru taime? (b) Eaha te haapapuraa e ua faaore roa Iesu i ta Petero hara?

26 Ui ihora Iesu ia Petero mea here anei na ’na i to ’na Fatu hau a‘e i teie mau mea, a toro ai paha i to ’na rima i tera rahiraa  i‘a i noaa mai. Oia hoi, mea puai a‘e anei to Petero here ia Iesu i te ohipa tai‘a mea au hoi na ’na? E toru taime to Petero parauraa na mua ’tu e aita o ’na i ite i to ’na Fatu. E toru atoa ïa taime to Iesu aniraa ia Petero ia haapapu i mua i te tahi atu mau pǐpǐ e mea here iho â na ’na i to ’na Fatu. A na reira ’i Petero, faataa ’tura Iesu e nafea ia faaite i taua here ra. Te mea faufaa roa ’‘e i roto i to Petero oraraa, te raveraa ïa i to Iehova hinaaro, oia hoi te haapiiraa e te aupururaa i te mau pǐpǐ a te Mesia.—Luka 22:32; Ioa. 21:15-17.

27 Ua haapapu ïa Iesu e e faaohipa noa â oia e to ’na Metua ia Petero. E ohipa faufaa ta Petero e rave i roto i te amuiraa i raro a‘e i te aratairaa a te Mesia. Te auraa ïa e ua faaore roa Iesu i ta ’na hara! Papu roa, ua putapû Petero i taua aroha hamani maitai ra e ua huti mai i te haapiiraa.

28. Mea nafea to Petero faaiteraa e e au o ’na i te hoê pǎpǎ?

28 Ua rave maite iho â Petero i ta ’na ohipa e rave rahi matahiti. Ua faaitoito oia i to ’na mau taeae, mai ta Iesu i faaue ia ’na hoê mahana hou to ’na poheraa. Ma te hamani maitai e te faaoromai, ua aupuru e ua haapii oia ia ratou. Ua faaite Simona e ua tano iho â to Iesu horoaraa i te i‘oa ra Petero, aore ra Pǎpǎ, no ’na. Ua haa mau â o ’na ei tiai mamoe aueue ore, itoito rahi e te nehenehe e tiaturi, a riro atu ai ei hi‘oraa maitai no te amuiraa. Eaha te haapapuraa? Ta ’na ïa na rata mahanahana e piti, tei tuuhia i roto i te mau buka faufaa roa o te Bibilia. Te faaite atoa ra taua na rata ra e aita roa ’tu i moe ia Petero ta Iesu i haapii ia ’na no nia i te faaoreraa i te hara.—A taio i te Petero 1, 3:8, 9; 4:8.

29. E nafea ia pee i to Petero faaroo e to Iesu aroha hamani maitai?

29 E o tatou? Te ani ra anei tatou ia Iehova pauroa te mahana ia faaore mai i ta tatou hara e rave rahi? Te farii ra anei tatou i ta Iehova faaoreraa i te hara, ma te tiaturi papu e e nehenehe tatou e tamâhia i ta tatou mau hara? Te faaore atoa ra anei tatou i ta vetahi ê? Mai te peu e e, te pee ra ïa tatou i to Petero faaroo e to Iesu aroha hamani maitai.