Faatanoraa no te "mode accessibilité"

Search

Maiti te reo

Mau faaho'iraa ê

Tapura tumu parau

Eaha to roto?

Ite no Iehova

Tahiti

A pee i to ratou faaroo

 PENE IVA

Ua haa oia ma te feruriraa maitai

Ua haa oia ma te feruriraa maitai

1-3. (a) Mai pohe roa te utuafare o Abigaila, eaha te tumu? (b) Eaha ta tatou e haapii mai no nia i teie vahine faahiahia mau?

A HI‘O ai Abigaila i te mata o te taata apî ra, e riaria ta ’na e ite ra. Eaha e ore ai, e 400 faehau te haere mai ra no te haapohe pauroa te tane o te utuafare o Nabala, te tane a Abigaila. Eaha te tumu?

2 No Nabala te hape. Ua haa oia ma te aroha ore e te faatura ore. Mai tera iho â o ’na. Te taata râ ta ’na i tuhi, o te raatira herehia ïa o te hoê pǔpǔ faehau taiva ore e te aravihi. Haere atura ïa hoê o ta Nabala mau rave ohipa apî, e tiai mamoe paha, e farerei ia Abigaila ma te tiaturi e e itea mai ia Abigaila te ravea ia ora mai ratou. Eaha hoi ta te hoê noa vahine e nehenehe e rave i mua i te hoê nuu?

Eaha hoi ta te hoê noa vahine e nehenehe e rave i mua i te hoê nuu?

3 Na mua, e hi‘o mai tatou o vai Abigaila, mea nafea teie fifi i te tupuraa, e eaha te haapiiraa e huti mai i te faaroo o teie vahine faahiahia mau.

E vahine feruriraa paari e te nehenehe

4. A faataa mai na i te huru o Nabala.

4 Mea taa ê roa Abigaila raua Nabala. E vahine maitai roa Abigaila. Area Nabala, e tane ino roa ïa. Parau mau, e moni ta ’na, a mana‘o atu ai oia e e taata o ’na. Teie râ, eaha to vetahi ê mana‘o? Ia hi‘o oe i roto i te Bibilia, aita e parau maitai to ’na. To ’na noa i‘oa, “Maamaa,” aore ra “Neneva” te auraa. Aita tatou i ite e na to ’na na metua anei i horoa i tera i‘oa no ’na, aore ra e i‘oa pii noa. Tano maitai râ tera i‘oa no ’na. E taata etaeta o ’na, te ohipa ino, te haavî e mea inu roa atoa. Mea rahi te mǎta‘u ia ’na e eita atoa e au ia ’na.—Sam. 1, 25:2, 3, 17, 21, 25.

5, 6. (a) No oe, eaha te mau huru maitatai au-roa ’‘e-hia o Abigaila? (b) No te aha Abigaila i faaipoipo ai i te hoê tane haapaoraa ore?

 5 E ere roa ’tu Abigaila mai ia Nabala. “Ua oaoa to ’u metua tane” te auraa o to ’na i‘oa. E haapeu roa e rave rahi papa i ta ratou tamahine no to ’na nehenehe. E oaoa roa ’tu â râ te hoê papa î i te paari ia ite oia e mea nehenehe te huru o ta ’na tamarii. E pinepine roa te hoê taata haviti i te mana‘o e aita e faufaa ia faahotu i te mau huru maitatai mai te feruriraa maitai, te paari, te itoito aore ra te faaroo. Aita Abigaila i mana‘o mai tera. Te haapopou ra te Bibilia ia ’na no to ’na feruriraa maitai e to ’na nehenehe.—A taio i te Samuela 1, 25:3 i roto i te nota i raro i te api. *

6 E ui paha vetahi: ‘No te aha te hoê potii maramarama hoi i faaipoipo ai i te hoê tane haapaoraa ore?’ A haamana‘o e i tahito ra, mea rahi te faaipoiporaa na te metua i faaau. Noa ’tu eaha te tupuraa, mea faufaa roa ta ratou parau faatia. Ua farii anei na metua o Abigaila i teie faaipoiporaa, ua faaau atoa anei i te reira, no ta Nabala faufaa e to ’na tiaraa aore ra no te veve? Aita tatou i ite. Teie râ, noa ’tu ta Nabala faufaa, e ere roa ’tu o ’na i te tane maitai.

7. (a) No te haapii i te mana‘o tano no nia i te faaipoiporaa i ta ratou mau tamarii, eaha ta te mau metua e ore e rave? (b) Eaha ta Abigaila i faaoti papu e rave?

7 E haapii maitai te mau metua î i te paari i te mana‘o tano no nia i te faaipoiporaa i ta ratou mau tamarii. Eita ratou e turai ia ratou ia faaipoipo no te moni aore ra ia haamatau i te hoê apiti e mea apî roa ratou no te amo i te hopoia a te taata paari. (Kor. 1, 7:36) No Abigaila râ, e ere teie te taime no te feruri i teie mau mea. Noa ’tu eaha te tumu i faaipoipo ai o ’na, e vahine o ’na na Nabala e ua faaoti papu o ’na e faaoromai i teie tupuraa fifi.

“Ua avau oia ia ratou”

8. O vai ta Nabala i tuhi, e no te aha tatou e parau ai e ua hape roa o ’na i te na reiraraa?

8 Ua fifi roa ’tu â to Abigaila tupuraa ia Nabala. Te taata ta Nabala i tuhi, o Davida ïa te tavini taiva ore a Iehova ta Samuela te peropheta i faatahinu. O Davida ta te Atua i maiti no te mono i te arii Saula. (Sam. 1, 16:1, 2, 11-13) No to ’na pohehae, imi ihora Saula e haapohe ia Davida, o tei horo e tapuni i te medebara e ta ’na na 600 faehau tei turu ia ’na.

9, 10. (a) I roto i teihea tupuraa i imi ai Davida e ta ’na mau faehau i te ora? (b) No te aha ia mauruuru hoi Nabala ia Davida e ta ’na mau faehau? (A hi‘o atoa i te nota o te paratarafa 10.)

 9 I faaea na Nabala i Maona, i rave na râ o ’na i te ohipa i pihai iho mai, i Karemela, e fenua paha to ’na i reira. * To ropu teie na oire i te mau fenua teitei rii te vai ra te matie no te mamoe. Tano maitai, e 3 000 mamoe ta Nabala. E ati a‘e râ, i te pae apatoa, te tarava noa ra te medebara o Parana. I te pae hitia o te râ, e na roto atu oe i te mau vahi papamǎrô te vai ra te faa e te ana, e tae atu ai oe i te miti Avaava (parauhia miti Pohe i teie mahana). Na taua mau tuhaa fenua ra ïa i imi ai Davida e ta ’na mau faehau i te ora. Mea papu e ua auau ratou i te animara ei maa na ratou e ua faaruru e rave rahi fifi. E pinepine ratou i te farerei i te feia apî e tiai ra i te mau nǎnǎ a Nabala te taata tao‘a rahi.

10 Mai te aha te huru o teie mau faehau i nia i te mau tiai mamoe? Mea ohie no ratou ia raverave i te mamoe ei maa na ratou. Aita ratou i na reira. Ua riro râ ratou mai te hoê aua paruru i te mau nǎnǎ e te mau tavini a Nabala. (A taio i te Samuela 1, 25:15, 16.) E nehenehe te mau tiai e te mau mamoe e roohia i te fifi atâta rau. Mea rahi hoi te animara oviri. E pinepine atoa te tahi mau taata ěê i te haru i te mau mamoe e te tahi atu mau mea, mea piri roa mai hoi te otia fenua o Iseraela i te pae apatoa. *

11, 12. (a) Ua aha Davida i roto i ta ’na poroi i faatae ia Nabala? (b) Eaha te fifi i roto i ta Nabala pahonoraa i ta Davida poroi?

11 E ere mea ohie no Davida ia faatamaa i ta ’na mau faehau i roto i te medebara. Tono ihora ïa oia hoê ahuru vea ia Nabala no te ani i te tauturu. Ua maiti maitai o ’na i te taime: te tau paotiraa mamoe, e tau oroa e tamaa maitai ai te taata e mea horoa atoa ratou. Ua maiti maitai atoa Davida i ta ’na mau parau, e parau faatura. Ua faahiti atoa oia i te parau ra “to tamaiti na Davida,” peneia‘e no te faaite ma te faatura e mea paari a‘e Nabala ia ’na. Eaha te pahonoraa a Nabala?—Sam. 1, 25:5-8.

12 Ua hae roa o ’na! “Ua avau oia ia ratou,” ta te taata apî ïa o te omuaraa i parau ia Abigaila. Ua pipiri Nabala i ta ’na faraoa, ta ’na pape, e ta ’na i‘o mamoe tupaihia, nounouhia e ana! Ua faariro o ’na ia Davida mai te hoê taata faufaa ore e ua faaau ia ’na i te hoê tavini tei faarue i to ’na fatu. Tera atoa paha to Saula mana‘o ia Davida. Eita hoi o ’na e au ia ’na. Aita râ to raua mana‘o e tuati ra e to  Iehova. Mea here na Iehova ia ’na. No ’na, e ere Davida i te hoê tavini orure hau, o ’na râ te riro mai ei arii no Iseraela.—Sam. 1, 25:10, 11, 14.

13. (a) Ua aha Davida i to ’na faarooraa i ta Nabala i rave? (b) Eaha ta te Iakobo 1:20 e faaite mai ra no nia i te riri o Davida?

13 I to te mau vea faatiaraa ia Davida i te ohipa i tupu, riri a‘era oia, e faaue atura: “A tatua na outou atoa i ta outou mau ‘o‘e.” Na reira atoa ihora oia, rave a‘era e 400 faehau e reva ’tura ratou. Ua horeo oia e haapohe pauroa te tane o to Nabala utuafare. (Sam. 1, 25:12, 13, 21, 22) Ua tano Davida i te ririraa, ta ’na râ i opua e rave, aita ïa. Te na ô ra te Bibilia: “E ore hoi te riri o te taata nei e faatupu i te parau-tia a te Atua.” (Iak. 1:20) Mea nafea hoi Abigaila i faaora ’i i to ’na utuafare?

‘Ia haamaitaihia to ’na feruriraa maitai’

14. (a) Eaha te taahiraa avae matamua ta Abigaila i rave no te faaafaro i te hape a Nabala? (b) Eaha te haapiiraa e huti mai i te taa-ê-raa i rotopu ia Nabala e ia Abigaila? (A hi‘o atoa i te nota i raro i te api.)

14 E nehenehe tatou e parau e ua rave ê na Abigaila i te taahiraa avae matamua no te faaafaro i teie hape rahi. Ua horoa oia i te tari‘a faaroo, taa ê roa i ta ’na tane o Nabala. Aita te tavini apî i faaara ia Nabala i te ati e tae mai i nia i to ’na utuafare taatoa, no te mea “e taata haapaoraa ore roa oia, a ore atu ai e nehenehe e paraparau ia ’na.” * (Sam. 1, 25:17, Traduction du monde nouveau) Eita iho â Nabala e hinaaro e faaroo mai, mea teoteo roa o ’na. Mai tera te rahiraa o te taata i teie mahana. Ua ite râ te tavini apî e mea taa ê Abigaila. No reira paha ïa o ’na i faaara ’tu ai ia ’na.

Ua horoa Abigaila i te tari‘a faaroo, taa ê roa ia Nabala

15, 16. (a) Mea nafea to Abigaila faaiteraa e e au o ’na i te vahine maitai o te buka Maseli? (b) No te aha tatou e parau ai e aita Abigaila i patoi i te tiaraa upoo o ta ’na tane?

15 Feruri ihora Abigaila e haaviti atura. Te na ô ra te Bibilia: “Haapeepee ihora Abigaila.” I roto i teie noa faatiaraa, e maha taime e parauhia ’i e ua “haapeepee” o ’na. Ua faaineine o ’na i te hoê ô huru rahi na Davida e na ta ’na mau faehau: te faraoa, te uaina, te i‘o mamoe, te huero maa tunu paa, te vine e te suke. Ua ite maitai ïa Abigaila eaha te maa e vai ra i te fare e ua rave maite o ’na i ta ’na hopoia utuafare, mai te vahine maitai o te buka Maseli. (Mas. 31:10-31) Tuu atura o ’na i taua ô ra i vetahi o ta ’na mau tavini, ta ’na i tono ia  Davida ra, e na muri maira o ’na. “Aita râ oia i faaite i tana tane ia Nabala.”—Sam. 1, 25:18, 19, V.C.J.S.

16 Te auraa anei ïa e te patoi ra Abigaila i te tiaraa upoo o ta ’na tane? E ere. A haamana‘o e ua tuhi Nabala i te hoê tavini ta Iehova i faatahinu, e mai pohe e rave rahi taata aita hoi ta ratou e hara. Ia ore Abigaila e ohipa mai, e riro ïa oia i te apiti i te hara a ta ’na tane. I roto i teie tupuraa, ia faaite ïa oia e o to ’na Atua ta ’na e auraro, eiaha ta ’na tane.

17, 18. (a) Eaha ta Abigaila i rave i to ’na farereiraa ia Davida, e eaha ta ’na i parau atu? (b) No te aha Davida i putapû roa ’i?

17 Aita i maoro, farerei atura Abigaila ia Davida e ta ’na mau faehau. Haapeepee faahou atura oia, i tera taime, i te pou mai nia mai i ta ’na asini e tipapa ihora i mua ia Davida. (Sam. 1, 25:20, 23, V.C.J.S.) Haamahora ihora oia i to ’na aau e taparuparu atura ia Davida ia aroha i ta ’na tane e to ’na utuafare. Ua putapû roa Davida. No te aha?

“E parau noa ’tu na râ to tavini vahine ia oe na”

18 Ua parau Abigaila ia Davida: “Ei nia ia ’u, e tau fatu, teie nei hara.” Ani atura oia ia Davida ia faaore mai i ta ’na hara. Ua parau roa oia e e taata maamaa ta ’na tane, tera hoi te auraa o to ’na i‘oa, peneia‘e no te haaferuri ia Davida e ia faautua o ’na i tera huru taata, e riro ïa o ’na mai ia Nabala ra te huru. Ua papu ia ’na e e tia Davida no Iehova, inaha te aro ra o ’na i ‘te mau tama‘i a Iehova.’ Ua ite atoa o ’na e ua fafau Iehova e e arii mai Davida, ua parau hoi oia e e ‘faariro Iehova ia ’na ei tavana i nia ia Iseraela.’ Ua taparu atoa oia ia Davida eiaha e haamanii faufaa ore noa i te toto, a riro hoi te reira ei “mauiui” no ’na, oia hoi a tatarahapa ’tu ai oia. (A taio i te Samuela 1, 25:24-31.) Mahanahana mau â teie mau parau e te hamani maitai!

19. Ua nahea ’tura Davida, e no te aha o ’na i haapopou ai ia Abigaila?

19 Ua nahea ’tura Davida? Ua rave o ’na i te ô a Abigaila e ua na ô: “Ia haamaitai hia te Fatu ra te Atua o Iseraela, o tei tono mai ia oe i teienei mahana e farerei ia’u, e ia haamaitai atoa hia ta oe ra parau [aore ra to oe feruriraa maitai]. E ua haamaitai atoa hia oe, o oe tei tapea mai ia’u i teienei mahana, ia ore au ia haamanii i te toto.” Ua haapopou Davida ia ’na no te mea ua haapeepee oia ma te itoito i te haere mai e farerei ia ’na. Ua parau roa oia e ua tapea Abigaila ia ’na ia ore ia haamanii i te toto. Na ô atura oia: “A haere ma te hau i to utuafare, inaha, ua faaroo vau i to parau.”—Sam. 1, 25:32-35, V.C.J.S.

“Inaha . . . to tavini vahine”

20, 21. (a) Eaha te mea faahiahia no oe i to Abigaila ho‘iraa i ta ’na ra tane? (b) Mea nafea to Abigaila faaite-faahou-raa i te itoito e te feruriraa maitai?

20 Reva ’tura Abigaila. Eita e ore e ua mana‘o noa o ’na i taua  farereiraa ra. Mea taa ê roa Davida taata haapao maitai e te hamani maitai i ta ’na tane ino mau. Aita râ o ’na i tapea mai i teie mau mana‘o. Te na ô ra te Bibilia: “Haere maira Abigaila ia Nabala ra.” Ua ho‘i iho â o ’na i ta ’na ra tane, a faaoti papu ai e amo maite i ta ’na hopoia vahine faaipoipo. Ia faaite ïa o ’na i ta ’na tane e ua horoa oia i te tahi ô na Davida e na ta ’na mau faehau. E tiaraa hoi to Nabala ia ite i te reira. Ia faaite atoa o ’na e mai pohe to Nabala utuafare. Mai te peu e na vetahi ê e faaite atu, mea haama roa ïa no ’na. Teie râ, eita ta Abigaila e nehenehe e parau atu i taua taime ra. E tamaaraa hoi ta Nabala mai ta te arii e ua taero roa oia.—Sam. 1, 25:36.

Ua faatia Abigaila ma te itoito ia Nabala i ta ’na i rave ia ora mai o ’na

21 Ua faaite faahou Abigaila i te itoito e te feruriraa maitai. Ua tiai oia ia poipoi a‘e. Ua pee to Nabala taero, e taa mai ïa ia ’na ta Abigaila e parau atu. Te fifi râ, e iria mai paha Nabala. Noa ’tu râ, ua faatia pauroa Abigaila i te ohipa i tupu. Mea papu e ua mana‘o Abigaila e e hae mai Nabala, a rave ino atoa ’i paha ia ’na. Aita râ, ua parahi noa Nabala e aita i hautiuti noa ’‘e.—Sam. 1, 25:37.

22. (a) Eaha hoi to Nabala? (b) Eaha ta teie aamu e faaite mai ra no nia i te mau haavîraa aore ra te mau rave-ino-raa i roto i te utuafare?

22 Eaha hoi to Nabala? “Tarapape roa a‘era tana aau, riro atura oia mai te ofai.” Ua roohia paha o ’na i te tahi ma‘i haaparuparu. Ua pohe râ o ’na ahuru mahana i muri iho, e ere no te ma‘i. “Tairihia ihora Nabala e Iehova, pohe roa a‘era.” (Sam. 1, 25:38) Na roto i taua faautuaraa ra tano roa, ua tiamâ mai Abigaila i te hoê oraraa faaipoipo maoro ino mau. I teie mahana, eita Iehova e rave i teie huru faautuaraa semeio. Te haamana‘o mai ra râ teie aamu e te ite mai ra iho â o ’na i te mau haavîraa aore ra te mau rave-ino-raa i roto i te utuafare. I te taime ta ’na i faataa, e faaafaro iho â o ’na i taua fifi ra.—A taio i te Luka 8:17.

23. (a) Eaha te tahi atu haamaitairaa ta Abigaila i fana‘o? (b) No te aha tatou e parau ai e aita o ’na i teoteo noa ’‘e no ta Davida aniraa?

23 Ua matara mai Abigaila i te hoê faaipoiporaa ino mau. Ua fana‘o râ oia i te tahi atu haamaitairaa. I to Davida faarooraa e ua pohe Nabala, tono ihora oia i te tahi mau vea ia Abigaila ra no te parau atu e e rave oia ia ’na ei vahine na ’na. Teie ta Abigaila pahonoraa: “Inaha, ia riro noa ’tu to tavini vahine ei tavini horoi avae no te mau tavini o tau fatu.” Aita oia i teoteo noa ’‘e no teie aniraa e riro ei vahine na Davida. Ua parau roa ’tu oia e e tavini o ’na i ta ’na mau tavini.  Ua haapeepee faahou â oia, i taua taime ra, i te faaineine ia ’na no te haere ia Davida ra.—Sam. 1, 25:39-42, V.C.J.S.

24. (a) Eaha te tahi mau fifi ta Abigaila i farerei i muri iho? (b) Eaha to Davida e to Iehova mana‘o ia ’na?

24 Te auraa anei ïa e mea ohie to Abigaila oraraa i pihai iho ia Davida? E ere. E vahine ê na ta Davida, o Ahinoama. Noa ’tu e ua vaiiho te Atua i teie peu i tera ra tau, mea papu e mea fifi no te mau vahine faaipoipo haapao maitai. Aita â atoa Davida i arii atura. E faaruru atoa oia e rave rahi haafifiraa. Teie râ, ua tauturu e ua turu Abigaila ia Davida i te roaraa o to ’na oraraa i pihai iho i ta ’na tane e ua fanau atoa mai oia i te hoê tamaroa. Ua ite roa o ’na e mea here e mea paruru iho â na ta ’na tane ia ’na. I te hoê mahana, ua faaorahia o ’na e Davida i to ’na haruraahia e te tahi mau taata! (Sam. 1, 30:1-19) Ua pee ïa Davida i te hi‘oraa o Iehova, o te here nei e o te poihere nei i te mau vahine feruriraa maitai, itoito e te haapao maitai.

^ par. 5 Samuela 1, 25:3 (Te Bibilia Mo’a V.C.J.S., 1976): “O Nabala te ioa o taua taata ra, e o Abigaila te ioa o tana ra vahine, e vahine manao paari oia e te nehenehe hoi ; tana tane râ e taata etaeta ïa e te ino e te ââu ino, no te opu o Kaleba oia.”

^ par. 9 O te oire Karemela teie e parauhia ra, i Apatoa, pihai iho i te medebara o Parana. E ere râ o te mou‘a Karemela matau-maitai-hia, i Apatoerau, i reira to te peropheta Elia faaûraa i muri a‘e i te mau peropheta a Baala.—A hi‘o i te pene 10.

^ par. 10 No Davida, te parururaa i te mau fatu fenua e ta ratou mau animara i te fenua o Iseraela, e huru taviniraa ïa ia Iehova. I opua na hoi Iehova ia parahi to Aberahama huaai, to Isaaka e to Iakoba i taua fenua ra. E taviniraa mo‘a ïa te parururaa i taua fenua ra i te feia haru e te mau eiâ ěê.

^ par. 14 Na roto i te reo Hebera, e “tamaiti na beliala (na te faufaa ore)” te auraa o te parau “taata haapaoraa ore.” I roto i te tahi atu mau huriraa Bibilia, e parauhia Nabala mai te hoê taata “eita iho â o ’na e faaroo mai” aore ra “aita e apî ia paraparau ia ’na.”