Esetera 8:1-17

  • Faateiteihia Moredekai (1, 2)

  • Taparuraa Esetera i te arii (3-6)

  • Faaueraa mana apî a te arii (7-14)

  • Tamǎrûraa e oaoaraa no te ati Iuda (15-17)

8  I taua mahana ra, horoa ˈtura te arii Ahasueru pauroa te faufaa a Hamana+ te enemi o te ati Iuda+ na Esetera te arii vahine. E haere maira Moredekai i mua i te arii, no te mea ua faaite Esetera mea nafea raua e fetii ai.+  Tatara ihora te arii i to ˈna tapea rima titiro+ o ta ˈna i rave mai ia Hamana e horoa ˈtura ia Moredekai. E tuu ihora Esetera ia Moredekai i nia pauroa te faufaa a Hamana.+  Hau atu â, paraparau faahou ihora Esetera i te arii. Topa ihora oia i to ˈna pae avae e taˈi ihora e taparu ihora ia ˈna ia faatitiaifarohia te ino ta Hamana te ati Agaga i rave e ta ˈna i opua no te ati Iuda.+  Toro maira te arii i te sepeta auro ia Esetera,+ e tia aˈera Esetera e tia noa ihora i mua i te arii.  Na ô atura oia: “Ia tia i te arii e ia farii maitai mai oia ia ˈu, e mai te peu mea maitai no te arii e mea au vau i to ˈna mata, ia papaihia ïa te tahi faaueraa no te faaore i te mau papai a tera taata opuaraa ino o Hamana+ te tamaiti a Hamedata no te ati Agaga,+ ta ˈna i papai no te haamou i te ati Iuda i te mau fenua atoa o te arii.  E nafea hoi au e nehenehe ai e mataitai noa ˈtu i te ati e roohia ˈi to ˈu nunaa e e nafea vau e nehenehe ai e hiˈo noa ˈtu i to ˈu mau fetii ia haamouhia?”  Parau atura ïa te arii Ahasueru ia Esetera te arii vahine e ia Moredekai te ati Iuda: “Inaha, ua horoa vau pauroa te faufaa a Hamana na Esetera+ e ua faaue au ia tarîhia oia i nia i te pou,+ no ta ˈna opuaraa e aro* i te ati Iuda.  E nehenehe orua i te iˈoa o te arii e papai i te mea ta orua i ite e mea maitai no te ati Iuda e e tapao i te reira i te tapea rima titiro o te arii. Te faaueraa mana hoi tei papaihia i te iˈoa o te arii e tei tapaohia i te tapea rima titiro o te arii, eita ïa e nehenehe e faaore.”+  Titauhia ˈtura ïa te mau papai parau a te arii i taua taime ra i te toru o te avaˈe, oia hoi te avaˈe o Sivana,* i te 23 o te mahana e papai atura ratou pauroa ta Moredekai i faaue i te ati Iuda, oia atoa i te mau tavana hau,+ te mau tavana, e te huiarii o te mau fenua+ mai Initia tae roa i Etiopia, 127 fenua, te fenua tataitahi i ta ˈna iho papai* e te nunaa tataitahi i to ˈna iho reo e i te ati Iuda i ta ratou iho papai* e to ratou iho reo. 10  Papai atura Moredekai i te reira i te iˈoa o te arii Ahasueru, tapao atura i te reira i te tapea rima titiro o te arii+ e hapono ihora i taua mau papai ra na roto i te mau vea na nia i te puaahorofenua. Ua na nia ratou i te mau puaahorofenua vitiviti faaohipahia no te ohipa a te arii. 11  I roto i taua mau papai ra to te arii horoaraa i te parau faatia i te ati Iuda na te mau oire atoa ia amui e ia paruru i to ratou ora, e ia faaore, ia haapohe e ia haamou i te nuu a te mau nunaa aore ra fenua e aro ia ratou, e te mau vahine e tamarii atoa e ia haru i ta ratou mau taoˈa.+ 12  Ia tupu te reira i te hoê â mahana i te taatoaraa o te mau fenua o te arii Ahasueru i te 13 o te mahana i te 12 o te avaˈe, oia hoi te avaˈe o Adara.*+ 13  Ia riro tei papaihia i roto i teie mau rata ei ture i te mau fenua atoa. E ia faaite-haere-hia te reira i te mau nunaa atoa, ia ineine te ati Iuda i taua mahana ra no te tahoo i to ratou mau enemi.+ 14  Reva ˈtura te mau vea na nia i te mau puaahorofenua faaohipahia no te ohipa a te arii ma te ru e te vitiviti ia au i te faaueraa a te arii. Faaite-atoa-hia ˈtura te ture i Susana*+ te pare.* 15  Haere ihora Moredekai mai mua i te aro o te arii, e te ahu arii ninamu e uouo, e te hei upoo auro rahi e te ahu roa hamani-maitai-hia i te huruhuru mamoe vareau.+ E umere ihora te oire o Susana.* 16  No te ati Iuda e taime te reira no te tamǎrûraa,* te oaoaraa, te arueraa e te hanahana. 17  E i te mau fenua atoa e te mau oire atoa, i te mau vahi atoa i tae ai te faaueraa mana a te arii e ta ˈna ture, ua oaoa te ati Iuda e ua umere, ua faatupu i te mau tamaaraa e te mau oroa. E rave rahi nunaa o te fenua tei parau e ati Iuda ratou,+ ua mǎtaˈu hoi ratou i te ati Iuda.

Nota i raro i te api

Heb: “no te mea ua faatoro oia i to ˈna rima e hauti.”
Hiˈo i te tuhaa hau B15.
Aore ra “huru papairaa.”
Aore ra “huru papairaa.”
Hiˈo i te tuhaa hau B15.
Aore ra “Susa.”
Aore ra “aorai.”
Aore ra “Susa.”
Heb: “maramarama.”