Eaha to roto?

Mau faaho'iraa ê

Tapura tumu parau

Ite no Iehova

Tahiti

Te Pare Tiairaa  |  Tetepa 2013

 A PEE I TO RATOU FAAROO

Ua faaorahia o ’na e e hitu atu

Ua faaorahia o ’na e e hitu atu

A ÛA noa ’i, tei pihai iho Noa i to ’na utuafare. A feruri na ia ratou e faaea ra i roto i te poiri e te hoê lamepa hinu. Te hi‘o haere ra a faaroo noa ’i i te maniania o te ûa e topa ra i nia i te tapoi e te hiti o te araka.

A hi‘o ai i to ’na utuafare here, ta ’na vahine taiva ore e na tamaiti itoito e toru e ta ratou vahine, ua mauruuru mau to Noa aau. I tera taime hepohepo roa ’‘e, te oaoa ra Noa no te mea tei pihai iho to ’na utuafare here ia ’na. Ua ora paatoa mai hoi ratou. Noa ’tu te maniania, mea papu e ma te mauruuru e te reo puai, ua pure oia ia faaroo to ’na utuafare i ta ’na mau parau.

E faaroo puai mau to Noa. No te reira te Atua Iehova i paruru ai ia ’na e to ’na utuafare. (Hebera 11:7) E faaea anei ratou i te faatupu i te faaroo i te mea e ua haamata te ûa? Eita, e hinaaro atu â ratou i tera huru maitai no te faaruru i te tupu i te mau mahana i muri a‘e. Mai ia ratou, e hinaaro atoa tatou i te faaroo i teie tau arepurepu. E hi‘o ana‘e ïa i te haapii mai i te faaroo o Noa.

“MAHA A‘ERA AHURURAA O TE PO, E MAHA HOI AHURURAA O TE AO”

I rapae, ua topa noa te ûa e “maha a‘era ahururaa o te po, e maha hoi ahururaa o te ao.” (Genese 7:4, 11, 12) Ua maraa e te maraa noa ’tu ra te pape. I ite na ïa Noa e e nehenehe te Atua Iehova e paruru i te taata parau-tia e e faautua i te feia iino i te hoê â taime.

Ua tapea te diluvi i te orureraa hau i tupu i rotopu i te mau melahi. Ma te pee i te feruriraa miimii o Satani, e rave rahi melahi tei “faarue . . . i to ratou parahiraa” i te ra‘i no te rave i te vahine a fanau atu ai i te taata teitei. (Iuda 6; Genese 6:4) Ua oaoa roa iho â Satani i tera orureraa hau a ino atu ai te taata, ta Iehova poieteraa hopea i te fenua nei.

A maraa noa ’i râ te pape diluvi, no te ho‘i i te ao varua, ua vaiiho te mau melahi orure hau i to ratou tino taata a ore roa ’tu ai e nehenehe e rave faahou i te reira. Ua faarue ïa i ta ratou mau vahine e tamarii ia pohe e te taata i te diluvi.

I te tau o Enoha, e hitu hanere matahiti a‘enei, ua faaara Iehova e haamou i te feia ino e paieti ore. (Genese 5:24; Iuda 14, 15) Mai reira mai, ua haaviivii-noa-hia te fenua a ino roa ’tu ai te taata. I tera taime, ua pohe ratou. Ua oaoa anei Noa e to ’na utuafare i te reira?

Aita! Hoê â atoa no to ratou Atua aroha. (Ezekiela 33:11) Ua hinaaro Iehova ia ora mai te rahiraa. Ua tono oia ia Enoha no te faaara ’tu e ua faaue ia Noa ia hamani i te araka. I ohipa rahi na Noa e to ’na utuafare tau matahiti i mua i te taata atoa no taua opuaraa ra. Hau atu â, ua tauturu Iehova ia Noa ia riro ei “taata i a‘o i te parau-tia.” (Petero 2, 2:5) Mai ia Enoha, ua faaara oia i te ati e tupu. Mai te aha te huru o te taata i to ’na tau? Mai te ra‘i mai, ua ite Iesu i tei tupu i parau ai o ’na: “Aore roa i ite, e roohia  noa ihora ratou e te diluvi, pau roa ’tura ratou.”—Mataio 24:39.

A feruri na ua aha Noa e to ’na utuafare a tapiri ai Iehova i te opani e a haamata ’i te ûa i te topa e 40 mahana? Ua aupuru iho â ratou te tahi e te tahi, ua atuatu i te araka a faatamaa ’i i te mau animara. I te hoê taime, ua hauti te araka e ua haamata i te tere! Maraa ’tura te araka i nia i te pape rahi e “teitei a‘era i nia ’‘e i te fenua.” (Genese 7:17) Auê faaiteraa faahiahia o te puai o te Atua Mana hope, Iehova e!

A paruru ai te Atua ia ’na e to ’na utuafare, ua mauruuru mau Noa. No to Iehova aroha, ua faaohipa ’tu no te faaara i te feia i rapae mai i te araka. I te mea e aita te taata i haapao atu, e mana‘ohia paha e ua mâu‘a to ratou taime! A feruri na. Hou te diluvi, mea papu e e tamarii ta te mau taeae e tuahine o Noa. Noa ’tu râ, aita hoê a‘e fetii i faaroo ia ’na. (Genese 5:30) I teie nei, e vau i roto i te araka tei ora mai. Auê ratou i te oaoa a mana‘o ai i te taime rahi ta ratou i haafaufaa ia ite te taata i te ravea no te ora ’tu!

Mai te tau o Noa, aita Iehova i taui. (Malaki 3:6) Ua faataa Iesu e e au to tatou tau i “te anotau ra ia Noa.” (Mataio 24:37) I te mea e e haamouhia te ao ino, e tau taa ê e te arepurepu roa to tatou. Te faaara atoa nei te nunaa o te Atua i te tahi poroi i te taata atoa e faaroo. Ua ite anei oe i te reira? Mai te peu e mea mau tera poroi faaora, e faaite anei oe i te reira ia vetahi ê? Ua horoa mai Noa e to ’na utuafare i te hi‘oraa.

UA ORA MAI NA ROTO I TE PAPE

A tere noa ’i te araka na nia i te moana, ua faaroohia iho â te maniania o te mau raau i faaohipahia no te hamani i te araka. Ua haapeapea anei Noa i te rahi o te mau are aore ra ia parari te araka? Mai tera paha te huru o te feia taiâ o teie mahana, o Noa râ e ere oia mai tera. Te na ô ra te Bibilia: “No te faaroo hoi to  Noa, . . . i tarai ai i te [araka].” (Hebera 11:7) Ua faatupu oia i te faaroo i roto i te aha? Ua faaau Iehova i te tahi faufaa e haapapu ra e e ora mai Noa e to ’na utuafare i te diluvi. (Genese 6:18, 19) Eita anei ta tei poiete i te ao nui, te fenua e te mau mea atoa e nehenehe e haapao ia ore te araka e parari? Oia iho â! Ua tiaturi papu Noa e e faatupu mau Iehova i ta ’Na i fafau. No reira o ’na e to ’na utuafare “i ora [mai] . . . na roto i te pape.”—Petero 1, 3:20, Te Faufaa Api.

Ua mau te ûa i muri a‘e e 40 ao e e 40 rui. Ia au i ta tatou tarena, ua tupu ïa i te area o te ava‘e Titema i 2370 hou to tatou nei tau. Ua hope anei te ati o tei roto i te araka? Aita. Te tere noa ra teie afata tei î i te mau mea ora na nia i te moana a tae roa ’tu ai i te tupuai o te mau mou‘a. (Genese 7:19, 20) A feruri na i ta Noa, Sema, Hama e Iapheta i rave ia tamaa, ia mâ e ia maitai noa te mau animara atoa. I te mea e i faarata na te Atua i te mau animara oviri no te tomo i roto i te araka, e nehenehe iho â ta ’na e na reira i te roaraa o te diluvi. *

Ua faataa maitai mai Noa i tei tupu. Te faaite ra te faatiaraa afea te ûa i haamata ’i e i mau ai. Te haapapu atoa ra e ua î te fenua i te pape 150 mahana e i muri a‘e ua topa te faito o te reira. I te tahi mahana, i Eperera 2369 hou to tatou nei tau, ua iri te araka i nia i “te mou‘a ra o Ararata,” i Turekia i teie nei. E 73 mahana i muri a‘e, i Tiunu, i itehia ’i te tupuai o te mou‘a. E toru ava‘e i muri a‘e, i Tetepa, iriti a‘era Noa i te tahi haamaramarama o te araka. Ua ohipa rahi paha oia i te na reira, ua nehenehe râ te maramarama e te mata‘i apî e haumǎrû e ô mai. No te ite e mea atâta anei ia haere i rapae, ua tuu Noa i te tahi oreba tei maue tau taime a ho‘i mai ai. I muri a‘e, ua tuu i te tahi uupa, tei ho‘i noa mai ia ’na ra, e tae roa ’tu i te taime e itea ’i ia ’na te tauraa.—Genese 7:24–8:13.

I te taime hepohepo roa ’‘e, ua faatere tamau iho â Noa i ta ’na haamoriraa utuafare

I te mau mahana atoa, ua haafaufaa a‘e iho â Noa i te mau taairaa e te Atua. Te ite ra anei oe i to ’na utuafare e putuputu tamau ra no te pure e no te aparau no nia i te paruru a to ratou Metua i te ra‘i? Ua turui noa iho â Noa i nia ia Iehova no te rave i te mau faaotiraa faufaa atoa. A noho ai hoê matahiti tiahapa i roto i te araka e a ite ai e ua mǎrô te fenua, ua tatara anei Noa i te opani ia tiamâ to te araka? (Genese 8:14) Aita, ua tiai i ta Iehova e parau atu!

Mea faufaa mau ta te mau upoo utuafare e haapii i te hi‘oraa o tera tavini taiva ore. E taata itoito hoi, faaoromai, ite i te faanaho e te aupuru i to ’na utuafare. Hau roa ’tu â, ua tuu i te hinaaro o te Atua Iehova na mua roa. Ia pee tatou i te hi‘oraa o Noa, e haamaitaihia ïa te feia ta tatou e here ra.

A HAERE NA I RAPAE I TE ARAKA

Tae mai nei ta Iehova faaueraa. Ua parau te Atua ia Noa: “A haere na i rapae i te [araka], o oe, to vahine, e to mau tamarii, e na vahine a to mau tamarii atoa.” Ma te auraro, tia ’tura te utuafare, pee a‘era te mau animara atoa. Mea huehue anei to ratou haereraa i rapae? Aita roa ’tu! Te na-ô-hia ra: “Ua haere ihora Noa i rapae, e ta ’na mau tamarii, e ta ’na vahine, e te vahine a na tamarii na ’na ratou atoa.” (Genese 8:15-19) I rapae, ua huti Noa e to ’na utuafare i te mata‘i haumǎrû o te mou‘a, ua hi‘o haere i te tuhaa fenua Ararata e ua itea i te hoê fenua mâ. Aita faahou te taata teitei, te ino, te mau melahi orure hau e te feia iino atoa! * E haamataraa apî to te huitaata!

O te haamoriraa te ohipa matamua ta Noa i rave. Ua hamani i te hoê fata, pûpû atura ia Iehova vetahi animara tataihitu viivii ore i te aro o te Atua tei arataihia i roto i te araka ei tusia taauahi. (Genese 7:2; 8:20) Ua farii anei Iehova i te reira?

 Te pahono ra te Bibilia ma teie mau parau faaitoito: “Ho‘i ihora Iehova i te hau‘a no‘ano‘a.” Ua oto te Atua a î ai te ao i te ino. A ite ai râ e ua faaoti papu te mau melo o teie utuafare taiva ore i te fenua nei e rave i to ’na hinaaro, ua tamǎrû e ua mauruuru roa oia. Aita Iehova i titau atu i te tia-roa-raa. Te na ô ra taua noâ irava: “Ino noâ te mana‘o o to te taata aau mai to ’na tamariiriiraa mai â.” (Genese 8:21) E hi‘opoa ana‘e mea nafea Iehova i faaite ai i to ’na faaoromai a aroha ’tu ai i te huitaata.

Ua faaore te Atua i te ino i nia i te repo o te fenua. A orure hau ai Adamu e Eva e a faautua ’tu ai te Atua, ua fifi te faaapu. I nia i ta ’na tamaiti, ua mairi Lameha i te i‘oa Noa, peneia‘e o “Tamǎrûraa” aore ra “Tamahanahanaraa” te auraa. Ua tohu oia e e aratai ta ’na tamaiti i te huitaata i te tamǎrûraa o tera utua. Ua oaoa mau Noa a taa ’i e ua tupu tera parau tohu e e maitai atoa mai te repo. Aita i maoro, ua tanu Noa i te maa!—Genese 3:17, 18; 5:28, 29; 9:20.

A haere mai ai i rapae i te araka, ua itea ia Noa e to ’na utuafare i te hoê fenua mâ

I te hoê â taime, ua horoa Iehova i to Noa huaai atoa vetahi ture ohie e te maramarama maitai no te aratai i to ratou oraraa. Ua opani atu ia taparahi i te taata e ia faaohipa ma te tano ore i te toto. Ua haamau atoa te Atua i te hoê parau faufaa e te huitaata ma te fafau e e ore oia e faatupu faahou i te diluvi i te fenua nei. No te haapapu i te huitaata i te reira, ua faatupu Iehova i te tahi ohipa maere e faahiahia o te natura, te anuanua. Te haamana‘o maira te mau anuanua atoa i ta Iehova parau fafau î i te here.—Genese 9:1-17.

Ahani e e aai to Noa aamu, aita atoa ïa e anuanua i teie mahana. E taata mau Noa tei ora a‘e nei e e ere to ’na oraraa i te mea faufaa ore. I to ’na tau, i ora maoro na te taata, ua faaoromai tera tavini taiva ore e 350 â matahiti e e rave rahi fifi ta ’na i faaruru. I te tahi mahana, a inu hua ’i i te ava, ua hara Noa. Ua rahi roa ’tu â râ te reira a rave ai ta ’na mootua Kanaana i te tahi ohipa ino roa. Mea teimaha mau te faahopearaa o tera hara i nia i to Kanaana utuafare. Ua ora maoro Noa no te ite i ta ’na huaai tamarii e haamori i te mau idolo a ino roa ’tu ai i te tau o Nimeroda. Ua tamahanahanahia atoa râ oia a horoa ’i ta ’na tamaiti Sema i te hi‘oraa o te faaroo puai i to ’na utuafare.—Genese 9:21-28; 10:8-11; 11:1-11.

Mai ia Noa, ei Kerisetiano, e titauhia ia faaoromai. Ia ore te feia e haaati maira e haapao i te Atua mau aore ra ia faaea i te tavini ia ’na, e tapea ana‘e i to tatou taiva ore. Te haafaufaa ra Iehova i taua faaoromai ra. Mai ta Iesu i parau, “te mau papu e tae noa ’tu i te hopea ra, oia te ora.”—Mataio 24:13.

^ par. 17 Ua parau vetahi e ua faataoto paha te Atua i te mau animara ia iti mai te maa ta ratou e amu, mai i te tau toetoe. Ua na reira anei aore ra aita, ua faatupu o ’na i ta ’na i fafau. Ua aupuru e ua faaora i to te araka.

^ par. 22 A ore ai te ô Edene i te diluvi, ua nehenehe te mau kerubi i tiai i te tomoraa o te ô e ho‘i i te ra‘i. Ua haapao ïa i ta ratou hopoia 1 600 matahiti.—Genese 3:22-24.