Faatanoraa no te "mode accessibilité"

Search

Maiti te reo

Mau faaho'iraa ê

Tapura tumu parau

Eaha to roto?

Ite no Iehova

Tahiti

TE PARE TIAIRAA TETEPA 2013

Eaha te mana‘o o ta oe haapaoraa no nia i te moni?

Eaha te mana‘o o ta oe haapaoraa no nia i te moni?

I haere pinepine na Estelle * e ta ’na e maha tamaroa e e toru tamahine i te pureraa. Te na ô ra o ’na: “Ua ani vau i to matou orometua ia haapii mai i te Bibilia.” Aita roa ’‘e râ oia i farii. Ua faaea ’tura o ’na i te haere i te fare pure. Ua na ô faahou: “A papai mai ai te mau tia haapaoraa, ua taa ia ’u e, noa ’tu e eita vau e haere i te fare pure, e mea tia ia hapono atu vau i te moni. Mana‘o a‘era vau e ‘Aita ratou e tâu‘a ra e tae atu anei au; ta ratou e hinaaro, ta ’u ïa moni.’”

Ua na ô Angelina, te tahi vahine faaroo: “I ta matou fare pure e i te mau pureraa atoa, e titauhia mai te moni e toru taime, e mea tia iho â ia horoa matou. Hopea ore te titauraa moni. No ’u, aita te varua o te Atua ia ratou ra.”

I to oe vahi, ua rau anei te ravea a te mau haapaoraa no te faahepo i te taata ia horoa i te moni? Ua tuati anei te reira i te mana‘o o te Bibilia?

EAHA TA TE BIBILIA E HAAPII RA?

Ua na ô Iesu, tei haamau i te amuiraa Kerisetiano: “I horoa-noa-hia mai ta outou, e horoa noa hoi outou.” (Mataio 10:8) Mea tamoni ore te poroi o te Bibilia. E mea tia ia faaroo te taata atoa e hinaaro ra i te reira.

Ua nafea te mau Kerisetiano matamua no te aufau i te mau haamâu‘araa no te amuiraa?

Ia horoa te taata i “ta ’na i opua i roto i to ’na aau; eiaha ma te nounou, e mai te mea e no te titau: o te taata horoa noa hoi ta te Atua e hinaaro.” (Korinetia 2, 9:7) Ua na ô te aposetolo Paulo: ‘Ua rave au i te ohipa i te rui e te ao, ia ore te hoê o outou ia teimaha ia matou, i te parauraa ’tu ia outou i te evanelia.’ (Tesalonia 1, 2:9) Ei taata hamani fare ie, na Paulo iho â i aufau i te mau haamâu‘araa no ta ’na taviniraa.—Ohipa 18:2, 3.

EAHA TE FAANAHORAA A TE MAU ITE NO IEHOVA?

E putuputu te mau Ite no Iehova i roto i te mau vahi tano noa parauhia Piha a te Basileia. E nafea te mau haamâu‘araa e aufauhia ’i? Eita roa e titauhia te moni ma te faahaere i te tahi farii aore ra ma te hapono atu i te hoê aniraa ô. Ua au ana‘e te taata i te mau putuputuraa, ma te ore e faaiteite, e nehenehe oia e tuu i te ô horoa noa i roto i te afata ô i te Piha a te Basileia.

E nafea e tia ’i ia aufau i te mau haamâu‘araa a te haapaoraa?

Mea papu e ua aufauhia te neneiraa e haponoraa o teie vea. I roto, eita oe e ite noa ’‘e i te tahi poroi faatianiani aore ra titauraa moni, i te parau mau o te Bibilia râ.

Eaha to oe mana‘o? Ua tano anei teie faanahoraa i ta Iesu mau parau e te hi‘oraa o te mau Kerisetiano matamua?

^ par. 2 Ua tauihia te tahi mau i‘oa i roto i teie anairaa tumu parau.