Faatanoraa no te "mode accessibilité"

Search

Maiti te reo

Mau faaho'iraa ê

Tapura tumu parau

Eaha to roto?

Ite no Iehova

Tahiti

TE PARE TIAIRAA TETEPA 2013

 TE TAHI TAUAPARAURAA E TE HOÊ ITE NO IEHOVA

Te tâu‘a maira anei te Atua ia mauiui tatou?

Te tâu‘a maira anei te Atua ia mauiui tatou?

Teie te hoho‘a o te tauaparauraa a te mau Ite no Iehova. A feruri na e te farerei ra Michelle, te hoê Ite no Iehova ia Sophia, te tahi atu vahine.

NO TE AHA O ’NA E VAIIHO AI IA TUPU TE ATI?

Michelle: O Michelle to ’u i‘oa e to oe?

Sophia: O Sophia to ’u.

Michelle: Te oaoa nei au i te farerei ia oe. Te pûpû nei au i teie api parau na to oe vahi. Te uihia ra E hinaaro anei oe e ite i te parau mau? Teie ta oe.

Sophia: Ua taaihia anei te reira i te haapaoraa?

Michelle: E. A tapao na e i te api matamua e ono uiraa. Teihea ta oe i ui a‘enei?

Sophia: Ua ite oe, mâu‘a to oe taime ia paraparau mai.

Michelle: No te aha oe e parau ai mai tera?

Sophia: Aita vau i papu e te vai mau ra anei te Atua.

Michelle: Mauruuru no to oe faaiteraa mai i te reira. Tera noa iho â anei ta oe i mana‘o?

Sophia: Aita, na mua ’‘e e haere na vau i te fare pure. Mea maoro râ teie nei.

Michelle: Aaa! Aita vau i haere mai no te faahepo ia oe ia tiaturi. Tera râ, e hinaaro vau e ite, eaha tei tupu i faaea ’i oe i te farii e te vai mau ra te Atua?

Sophia: A 17 matahiti a‘enei, ua tupu te tahi ati pereoo i nia i to ’u mama.

Michelle: Ua pepe o ’na?

Sophia: E, ua ino roa. Aita faahou ta ’na e nehenehe e hauti e e haere.

Michelle: Auê te aroha e! Eita e ore e ua peapea roa oe!

Sophia: Ua oti roa vau! Te uiui noa râ ra vau e, ahiri te vai ra te Atua, no te aha o ’na e vaiiho ai ia tupu tera ati? No te aha te Atua e vaiiho ai ia mauiui tatou mai tera?

MEA INO ANEI IA UI NO TE AHA?

Michelle: E hiti mai iho â tera mau uiraa. E hinaaro iho â tatou e ite no te aha i tupu ai te ati? I tahito ra, ua na reira atoa vetahi mau tane e vahine taiva ore i te Atua!

Sophia: Eaha ïa!

Michelle: E. E farii anei oe ia faaite atu vau i te tahi hi‘oraa o te Bibilia?

Sophia: E.

Michelle: A hi‘o na eaha ta te peropheta taiva ore Habakuka i ui i te Atua. Tei roto ïa i te Habakuka 1:2, 3 o te na ô ra: “Te maoro, e Iehova, o ta ’u tiaororaa, e aore oe i faaroo mai! te maoro o ta ’u pii-hua-raa ’tu ia oe, e hamani ino teie e vai nei, e aita oe i faaora! Eaha ra hoi oe i faaite mai ai i te ino?” Ua ui atoa anei oe mai tera?

Sophia: E.

Michelle: Aita te Atua i tama‘i noa ’‘e ia Habakuka. Ua parau atu râ ia rahi atu â to ’na faaroo.

Sophia: Mea anaanatae mau te reira.

MEA AU ORE NA TE ATUA I TE MAUIUI

Michelle: Te haapii ra te Bibilia e te ite e te tâu‘a ra te Atua i to tatou mau ati.

Sophia: Eaha ta oe e hinaaro ra e parau?

Michelle: A hi‘o na i te faaitehia ra i roto i te Exodo 3:7. E hinaaro anei oe e taio?

Sophia: Na reira ïa. Te na ô ra: “Ua parau maira Iehova, Ua hi‘o papu vau i te pohe o to ’u ra mau taata i Aiphiti, e ua faaroo vau i to ratou auê i ta ratou mau faaau ohipa; e ua ite hoi au i to ratou oto.”

 Michelle: Mauruuru. Ia au i teie irava, te ite ra anei te Atua i te mau mauiui o to ’na nunaa?

Sophia: E au ra e e.

Michelle: E aita o ’na i hi‘o noa i tei tupu. I te pae hopea o te irava, ua parau te Atua: “Ua ite hoi au i to ratou oto.” Tera anei ta te hoê Atua aroha ore e parau?

Sophia: Aita.

Michelle: Mea taa ê ia hi‘o i te tupu ra e ia mauiui a tupu ai te reira.

Sophia: Parau mau.

Michelle: Ma te haamana‘o i te reira, e taio ana‘e i tei tupu a mauiui ai te nunaa o te Atua. Tei roto ïa i Te mau tavana 10:16. I te pae hopea, te na ô ra: “Aroha ’tura to ’na aau i te pohe rahi o Iseraela.” I to oe mana‘o, ua oto anei te Atua a ite ai i te mauiui o to ’na nunaa?

Sophia: E.

Michelle: Te parau mau, Sophia, te tâu‘a mau maira te Atua. Eita o ’na e au ia mauiui tatou. Ia oto tatou, e oto atoa o ’na.

NO TE AHA TE ATUA I ORE AI I FAAORE ATURA I TE MAUIUI?

Michelle: Te vai ra te tahi atu mana‘o ta ’u e hinaaro e faaite atu hou a vaiiho ai ia oe.

Sophia: Ahani na.

Michelle: A hi‘o na i ta te Bibilia e parau ra no nia i te mana o te Atua. E taio mai na oe i te Ieremia 10:12.

Sophia: Te na ô ra: “Na ’na i hamani i te fenua i to ’na ra mana, e na ’na i haamau i te ao atoa nei i to ’na ra paari, e na ’na i hohora i te mau ra‘i i to ’na ra ite.”

Michelle: Mauruuru. A feruri na maa taime i te auraa o teie irava. A poiete ai i te ao nui e te mau mea atoa, e puai rahi mau to te Atua, e ere anei?

Sophia: Te reira iho â.

Michelle: E i te mea e e puai rahi to te Atua no te poiete i te mau mea atoa e haaati maira, aita anei to ’na e mana no te faaore i te ino?

Sophia: Oia.

Michelle: A feruri na i to oe mama. No te aha oe e peapea ’i ia mauiui o ’na?

Sophia: No te mea e mama no ’u, mea here roa iho â na ’u ia ’na.

Michelle: Ahani e nehenehe aore ra e mana to oe, e faaora anei oe ia ’na?

Sophia: Mea papu ïa.

Michelle: Te haapii ra te Bibilia e te tâu‘a maira e te mauiui ra te Atua no tatou. Hau atu â, e puai rahi to ’na. A feruri na ïa i te Atua e haavî ra ia ’na ia ore e faaohipa i te reira no te faaore oioi i to tatou mau mauiui.

Sophia: Aita roa vau i feruri a‘enei mai tera.

Michelle: E ere anei i te mea tano ia mana‘o e e tumu ïa te Atua i ore ai i faaore atura i te mauiui? *

Sophia: Peneia‘e.

Michelle: Te ta‘i ra ta oe niuniu, eaha to oe mana‘o e e ho‘i mai au i te tahi atu taime no te pahono i tera uiraa.

Sophia: Na reira ïa, mauruuru. *

E uiraa anei ta oe no te tahi tumu parau Bibilia? E hinaaro anei oe e ite atu â no nia i te mau tiaturiraa aore ra haapiiraa a te mau Ite no Iehova? Mai te peu e e, eiaha e taiâ i te ui atu. E oaoa roa ïa ratou i te tauaparau.

^ par. 59 No te mau haamaramaramaraa hau, a hi‘o i te pene 11 o te buka Eaha ta te Bibilia e haapii mau ra? piahia e te mau Ite no Iehova.

^ par. 62 E faaite to muri a‘e tauaparauraa e te hoê Ite no Iehova i te tumu e vaiiho ai te Atua i te mauiui aore ra ino.

No te ite atu â

No te aha te Atua e vaiiho ai ia mauiui tatou?

E nehenehe te Atua e faaore i te mauiui, te faataa ra râ te buka matamua o te Bibilia no te aha o ’na e vaiiho ai ia tupu te reira.