Faatanoraa no te "mode accessibilité"

Search

Maiti te reo

Mau faaho'iraa ê

Tapura tumu parau

Eaha to roto?

Ite no Iehova

Tahiti

TE PARE TIAIRAA TETEPA 2013

 E HAAFATATA ’TU I TE ATUA

Tei faaî ra i to tatou aau

Tei faaî ra i to tatou aau

Te tâu‘a mau maira anei te Atua? Te haapao maira anei i te tupuraa peapea o te taata i te fenua? Ia au i te Bibilia, te aupuru maira te Atua i te taata e te hinaaro atoa ra ia oaoa tatou. Mea putapû mau, e ere anei? Noa ’tu e mea mauruuru ore te rahiraa, te hamani maitai ra te Atua i te taata i te mau mahana atoa. E hi‘opoa ana‘e i ta Paulo mau parau.—A taio i te Ohipa 14:16, 17.

Teie ta Paulo i parau i te taata no Lusetera tei ore hoi i tiaturi i te Atua: “O [te Atua] tei vaiiho noa i te mau fenua atoa i mutaa iho, ia haapao noa na ratou i ta ratou iho parau. Aita râ oia i ere i te faaite ia ’na iho, oia i hamani maitai mai, e te horoaraa mai i te ûa no nia i te ra‘i ra, e te anotau auhune, e te faaîraa mai i to tatou aau i te maa e te oaoa.” Ua taa anei te feia e faaroo ra ia Paulo i teie mau parau?

E. E repo maitai to Lusetera e e pinepine hoi i te ûa i reira. Mea auhune iho â ïa te faaapu. Mai ta Paulo râ i haamana‘o atu, no ǒ mai te ûa e te anotau auhune i te Atua. No reira, i te mau taime atoa e auhune e e amu ai ratou i te maa monamona, te hamani maitai atu ra te Atua.

Te faaite mai ra ta Paulo mau parau i to Lusetera e rave rau haapiiraa faufaa no nia i te Atua Iehova.

Ua horoa mai Iehova i te tiamâraa. A tapao na e ua vaiiho Iehova i te taata no te mau nunaa atoa “ia haapao noa . . . i ta ratou iho parau.” Ia au i te tahi buka no te feia huri Bibilia, e nehenehe teie parau e hurihia “ia rave mai ta ratou i hinaaro” aore ra “ia rave i ta ratou e mana‘o ra e mea maitai a‘e.” Aita Iehova e faahepo ia haamori ia ’na. Ua horoa mai oia i te tiamâraa e maiti.—Deuteronomi 30:19.

Te hinaaro ra Iehova ia ite tatou o vai o ’na. Ua faataa Paulo e o te Atua “te[i] faaite ia ’na iho.” Ia au i te buka i faahitihia ’tu na, e nehenehe te reira e hurihia “ua faaite papu oia i te taata i to ’na huru.” Te haapapu ra iho â ta te Atua poieteraa i to ’na mau huru maitatai, mai te hamani maitai, paari, puai e here. (Roma 1:20) Ua faaite atu â râ Iehova ia ’na i roto i te Bibilia. (Timoteo 2, 3:16, 17) E ere anei ïa te auraa e te hinaaro ra o ’na ia ite tatou o vai o ’na?

Noa ’tu e mea mauruuru ore te rahiraa, te hamani maitai ra te Atua i te taata i te mau mahana atoa

Te hinaaro ra Iehova ia oaoa tatou. Ua na ô Paulo, “te faaîraa mai i to tatou aau i te maa e te oaoa” no ǒ mai ïa i te Atua. E nehenehe te taata hara o te ore i ite ia ’na e amu i te maa ta ’na e au e e oaoa i te tahi taime. Te hinaaro ra râ te Atua ia ite tatou i te oaoa mau e mure ore. E fana‘o noa tatou i te reira ma te haapii i te parau mau no nia ia ’na e ma te haapao i te reira i roto i to tatou oraraa.—Salamo 144:15; Luka 11:28.

Te faufaahia nei tatou i te hamani maitai o Iehova i te mau mahana atoa. No te aha e ore ai e haapii e nafea ia faaite i to oe mauruuru i te Atua e faaî ra i to aau “i te maa e te oaoa”?

Taioraa Bibilia

Ohipa 11-28