Faatanoraa no te "mode accessibilité"

Search

Maiti te reo

Mau faaho'iraa ê

Tapura tumu parau

Eaha to roto?

Ite no Iehova

Tahiti

TE PARE TIAIRAA TETEPA 2013

 E HAAFATATA ’TU I TE ATUA

Te itea-papu-hia nei to ’na mau huru maitatai

Te itea-papu-hia nei to ’na mau huru maitatai

Te tiaturi ra anei oe i te Atua? Mai te peu e e, e nehenehe anei ta oe e haapapu i to ’na vai-mau-raa? Ua haaatihia tatou i te haapapuraa o te hoê Atua Poiete paari, puai e î i te here. Eaha tera haapapuraa e e nafea te reira e ite-maitai-hia ’i? No te pahono, e hi‘o ana‘e i ta te aposetolo Paulo i faahiti i roto i ta ’na rata i te mau Kerisetiano i Roma.

Te na ô ra Paulo: ‘Te mau huru maitatai o te Atua, te itea papuhia nei ïa i te mau mea i hamanihia nei, mai te hamaniraa mai â o teie nei ao; oia hoi to ’na ra mana hope ra e te Atuaraa ra; aita ’tura o ratou otoheraa.’ (Roma 1:20) Ia au i tei faahitihia, ua vaiiho te Atua i to ’na tapao i nia i ta ’na poieteraa. E hi‘opoa maite ana‘e i ta te aposetolo mau parau.

Mai ta Paulo i faaite, e itehia to te Atua mau huru maitatai “mai te hamaniraa mai â o teie nei ao.” I roto i teie irava, aita te ta‘o Heleni “ao” e parau ra no te fenua nei, no te huitaata râ. * No reira, ia au i ta Paulo i faahiti, e itehia te haapapuraa o te mau huru maitatai o te Atua Poiete i te mau mea ta ’na i hamani mai te taime i poietehia ’i te taata.

Tei te mau vahi atoa tera haapapuraa. Aita i hunahia i roto i te natura, “te itea papuhia nei” râ. Mai tei rahi roa ’‘e i tei haihai roa ’‘e, te faaite nei te mau mea i poietehia e te vai ra te hoê Atua Poiete e e huru maitatai to ’na. Eita anei te hamaniraa faahiahia o te mau mea i roto i te natura e faaite ra i te paari o te Atua? E te mau fetia o te ra‘i e te fatiraa o te mau are, i to ’na puai? E te maa monamona e rave rau e te hitiraa e toparaa mahana nehenehe mau, i to ’na here no te huitaata?—Salamo 104:24; Isaia 40:26.

E ite-maitai-hia tera haapapuraa. Eita ’tura ïa ta te feia e ore e haapao i te reira e tei patoi i te tiaturi i te Atua e “otoheraa.” Ua horoa te tahi aivanaa i te faahi‘oraa no te taa i te reira: A feruri na i te taata faahoro pereoo o te ore e haapao i te tapao purumu “A taviri i te pae aui.” Faautua ihora te mutoi ia ’na. E imi paha taua taata ra i te otoheraa ma te parau e aita o ’na i ite a‘e i te tapao. Aita râ e varehia ta ’na mau parau i te mea e e ite-maitai-hia te reira. Ei taata faahoro, tei ia tatou te hopoia e ite e e haapao i te tapao purumu. Tei roto i te natura te tapao o te haapapuraa o te vai-mau-raa o te Atua. E ite-maitai-hia te reira. Mea maramarama te taata, e nehenehe iho â ta ’na e ite i te “tapao.” Aita e otoheraa.

Ua vaiiho te Atua i to ’na tapao i nia i ta ’na poieteraa

E au te poieteraa i te hoê buka e haapii maira no nia i to tatou Atua Poiete. Te vai ra râ te tahi atu buka o te faaite mai atu â no nia ia ’na, te Bibilia. I roto e pahonohia ’i teie uiraa faufaa roa: Eaha ta te Atua opuaraa no te fenua nei e te huitaata? Ma te ite i te pahonoraa o tera uiraa e haafatata ’tu ai oe i te Atua i ‘itea papuhia to ’na mau huru maitatai’ i te ao e haaati maira.

Taioraa Bibilia

Roma 1-16

^ par. 5 Ua faahiti atoa te Bibilia i “te ao” hara e hinaaro i te hoê faaora. I roto i tera mau irava, o te huitaata te auraa o te parau “ao” eiaha râ te fenua.—Ioane 1:29; 4:42; 12:47.