Lekwalo la ga Jakobe 5:1-20
5 Jaanong, reetsang lona bahumi, lelang lo bo lo bokolele ka ntlha ya masetlapelo a a lo tlelang.+
2 Dikhumo tsa lona di bodile e bile diaparo tsa lona di jelwe ke motoutwane.*+
3 Gauta le selefera ya lona di jelwe ke ruse, mme ruse ya tsone e tla bontsha gore lo molato e bile e tla ja nama ya lona. Se lo se bolokileng se tla tshwana le molelo mo malatsing a bofelo.+
4 Badiri ba ba neng ba bereka mo masimong a lona ba roba, ba nna ba goa ka gonne ga lo a ba duela, e bile Jehofa* wa masomosomo o utlwile selelo sa bone ba kopa thuso.+
5 Lo ne lo tshela mo manobonobong e bile lo tshelela go ijesa monate mo lefatsheng. Dipelo tsa lona di tshwana le diphologolo tse di nontsheditsweng letsatsi la go tlhabiwa.+
6 Lo bone motho yo o siameng molato e bile lo mmolaile. Modimo ga a lo itumelele.
7 Ka jalo bakaulengwe, nnang pelotelele go fitlha ka nako ya go nna gone ga Morena.+ Molemi o nna a letetse thobo e e tlhwatlhwakgolo ya lefatshe, a le pelotelele go fitlha pula ya ntlha le pula ya morago di na.+
8 Le lona nnang pelotelele;+ nonotshang dipelo tsa lona, ka gonne nako ya go nna gone ga Morena e atametse.+
9 Bakaulengwe, lo se ka lwa galefelana,* gore Morena a se ka a tla a lo atlhola.+ Moatlhodi o eme fa pele ga kgoro.
10 Bakaulengwe, etsang sekao sa baporofeti ba ba neng ba bua mo leineng la ga Jehofa.*+ Ba ne ba boga ka ditsela tse dintsi+ e bile ba ne ba itshoka ka bopelotelele.+
11 Ba ba itshokileng ke bone ba ba itumetseng.*+ Lo utlwile kafa Jobe a ileng a itshoka ka gone+ e bile lo bone se Jehofa* a mo diretseng sone kwa bofelong,+ gore Jehofa* o pelotlhomogi thata* e bile o kutlwelobotlhoko.+
12 Bakaulengwe ba me, mo godimo ga dilo tsotlhe, tlogelang go ikana, e ka tswa e le ka legodimo kgotsa ka lefatshe kgotsa lo ikana ka sepe fela. Mme a “Ee” wa lona e nne ee le “Nnyaa” wa lona e nne nnyaa,+ gore Modimo a se ka a lo atlhola.
13 A go na le motho yo o bogang ka ntlha ya mathata? A a tswelele a rapela.+ A go na le motho yo o itumetseng? A a opele dipesalema.+
14 A go na le motho yo o lwalang mo go lona? A a biletse bagolwane+ ba phuthego kwa go ene, mme a ba mo rapelele, ba mo tlotse ka leokwane+ ka leina la ga Jehofa.*
15 Mme thapelo e motho a e rapelang a na le tumelo e tla fodisa yo o lwalang,* e bile Jehofa* o tla mo tsosa. Gape, fa a dirile boleo, Modimo o tla mo itshwarela.
16 Ka jalo, ipolelelaneng maleo lo sa fitlhe sepe+ lo bo lo rapelelane gore lo fole. Thapelo ya mosiami yo o rapelang ka tlhoafalo e na le maatla a magolo.*+
17 Elija e ne e le motho yo o nang le maikutlo a a tshwanang le a rona, mme fa a ne a rapela ka tlhoafalo gore pula e se ka ya na, e ne ya se ka ya na dingwaga di le tharo le dikgwedi di le thataro.+
18 Go tswa foo, o ne a rapela gape, mme pula e ne ya na, lefatshe le lone la ungwa.+
19 Bakaulengwe ba me, fa mongwe mo go lona a fapoga mo boammaaruring mme yo mongwe a mmusa,
20 itseng gore ope fela yo o thusang moleofi gore a tlogele go dira boleo+ o tla mmoloka gore a se ka a swa e bile o tla mo thusa gore a itshwarelwe maleo a gagwe a mantsi.+
Dintlha Tse di Kwa Tlase
^ Kgotsa “mmoto.”
^ Bona Dintlha A5.
^ Seger., “lo se ka lwa fegelwa mongwe go yo mongwe.”
^ Bona Dintlha A5.
^ Seger., “o na le lorato lo logolo lwa bopelonomi.”
^ Bona Dintlha A5.
^ Bona Dintlha A5.
^ Kgotsa “ba ba segofetseng.”
^ Bona Dintlha A5.
^ Kgotsa gongwe “yo o lapileng.”
^ Bona Dintlha A5.
^ Seger., “e na le maatla fa e dira.”
