Baroma 7:1-25

  • Setshwantsho sa fa motho a gololwa mo Molaong wa ga Moshe (1-6)

  • Molao o dira gore boleo bo itsiwe (7-12)

  • Go lwantshana le boleo (13-25)

7  Jaanong ke bua le lona bakaulengwe ba ba itseng molao wa ga Moshe: A ga lo itse gore molao oo o laola motho fela fa a sa ntse a tshela?  Ka sekai, molao wa ga Moshe wa re mosadi yo o nyetsweng o tswelela a nyetswe fa monna wa gagwe a sa ntse a tshela; mme fa monna wa gagwe a swa, o gololwa mo molaong wa monna wa gagwe.+  Fa mosadi yoo a ka nyalwa ke monna yo mongwe, mme monna wa gagwe a sa ntse a tshela, o dira boaka.+ Mme fa monna wa gagwe a ka swa, o gololesegile mo molaong wa gagwe. Ka jalo, fa a ka nyalwa ke monna yo mongwe ga a dire boaka.+  Ka tsela e e tshwanang bakaulengwe, mmele wa ga Keresete o lo golotse mo molaong wa ga Moshe gore lo tle lo nne ba ga Keresete,+ yo o neng a tsosiwa mo baswing+ gore re tle re kgone go direla* Modimo.+  Fa re ne re tshelela dikeletso tsa rona, molao wa ga Moshe o ne wa dira gore go bonale gore dikeletso tsa rona tse di bosula ke tsone tse di neng di dira gore mebele* ya rona e leofe, mme boleo joo bo dira gore re swe.+  Le fa go ntse jalo, gone jaanong re golotswe mo molaong wa ga Moshe,+ ka gonne ga o tlhole o re golegile. Mme re batlhanka ba Modimo ba ba kaelwang ke moya o o boitshepo+ e seng ke tsela e kgologolo ya molao.+  Jaanong, a ra re molao wa ga Moshe ke boleo? Nnyaa, le e seng! Tota nkabo ke sa itse gore boleo ke eng fa e ka bo e se ka molao.+ Ka sekai, nkabo ke sa itse gore ga ke a tshwanela go eletsa dilo tsa batho ba bangwe fa molao oo o ne o sa re: “Ga o a tshwanela go eletsa selo sa motho yo mongwe.”+  Mme ka ntlha ya taelo eno, boleo bo ne jwa dira gore ke eletse sengwe le sengwe se se bosula. Fa molao oo o ne o ka bo o seyo, boleo bo ne bo ka se nne le maatla.+  Tota e bile, pele ga molao o nna teng ke ne ke tshela. Le fa go ntse jalo, fa taelo eo e sena go tla, boleo bo ne jwa tshela, mme nna ke ne ka swa.+ 10  Mme ke ne ka lemoga gore taelo e e neng e tshwanetse go nnaya botshelo,+ e ne e nkisa kwa losong. 11  Ka ntlha ya taelo eo, boleo bo ne jwa ntsietsa e bile bo ne jwa mpolaya. 12  Ka jalo, molao wa ga Moshe one o boitshepo, le taelo eno e boitshepo, e siame e bile e molemo.+ 13  A go raya gore ke bolailwe ke sengwe se se molemo? Le e seng! Ke bolailwe ke boleo. Molao wa ga Moshe one o molemo, mme o dirile gore go bonale gore boleo ke jone bo dirang gore ke swe.+ Ka jalo, taelo eo e ne ya bontsha gore boleo bo bosula.+ 14  Gonne re a itse gore Modimo ke ene a re neileng molao wa ga Moshe a dirisa moya wa gagwe, mme nna ke na le boleo,* e bile ke motlhanka wa boleo.*+ 15  Gonne ga ke tlhaloganye se ke se dirang. Go na le gore ke dire se ke se eletsang, ke dira se ke se tlhoileng. 16  Ke a dumela gore molao wa ga Moshe o molemo, mme ke sa ntse ke dira se ke sa batleng go se dira. 17  Ka jalo, tota ga se nna yo ke dirang dilo tseno tse di bosula, mme ke boleo jo bo leng mo go nna.+ 18  Ke a itse gore ga go na sepe se se molemo mo go nna, ke raya, mo mmeleng wa me. Le fa ke eletsa go dira se se molemo, ga ke kgone go se dira.+ 19  Ga ke dire dilo tse di molemo tse ke batlang go di dira. Go na le moo, ke dira dilo tse di bosula tse ke sa batleng go di dira. 20  Jaanong, fa ke dira dilo tse ke sa batleng go di dira, ga se nna yo ke di dirang, mme ke boleo jo bo mo go nna. 21  Ke fitlhela kgang eno e le boammaaruri mo go nna: Fa ke batla go dira se se siameng, se se bosula se gone mo go nna.+ 22  Tota nna ke rata molao wa Modimo ka pelo ya me yotlhe,*+ 23  mme mo mmeleng* wa me go na le molao o mongwe o o lwantshanang le molao wa mogopolo wa me.+ Molao oo ke boleo+ jo bo leng mo mmeleng* wa me e bile o a ntaola. 24  Ruri ke tlhomola pelo! Ke mang yo o tla nkgololang* mo mmeleng ono o o dirang gore ke swe? 25  Ke leboga Modimo ka gonne o nkgolola a dirisa Jesu Keresete, Morena wa rona! Ka jalo, ke motlhanka wa molao wa Modimo ka mogopolo wa me, mme ke motlhanka wa molao wa boleo ka mmele wa me.+

Dintlha Tse di Kwa Tlase

Seger., “ungwela.”
Seger., “ditokololo.”
Seger., “ke nama.”
Polelwana eno ka Segerika e kaya gore mongwe o go rekiseditse mo boleong.
Kgotsa “go ya ka motho yo ke leng ene mo teng.”
Seger., “ditokololong.”
Seger., “ditokololong.”
Kgotsa “nnamolang.”