Baroma 4:1-25

  • Aborahame o bolelwa a siame ka tumelo (1-12)

    • Aborahame, rre wa botlhe ba ba nang le tumelo (11)

  • Tsholofetso e bonwa ka ntlha ya tumelo (13-25)

4  Mme gone, re ka reng ka rraaronamogolo, Aborahame?  Ka sekai, fa e le gore Aborahame o ne a bolelwa e le motho yo o siameng ka ntlha ya dilo tse a di dirileng, o ne a tla nna le lebaka la go ipelafatsa, mme e seng fa pele ga Modimo.  Gonne lokwalo lwa reng? “Aborahame o ne a dumela mo go Jehofa,* mme o ne a tsewa* e le motho yo o siameng.”+  Jaanong fa motho a bereka, madi a a a amogelang ga a tsewe e le mpho* mme a tsewa e le sengwe se a tshwanetseng go se newa.*  Ka fa letlhakoreng le lengwe, fa motho a sa bereke mme a dumela mo Modimong, Ene yo o bolelang gore motho yo o bosula o siame, motho yoo o tsewa a siame ka ntlha ya tumelo ya gagwe.+  Dafide le ene o ne a bua ka motho yo o itumelang ka gonne Modimo a mo tsaya e le motho yo o siameng tota le fa a sa berekela tshiamo eo, a re:  “Go itumela ba ba itshwaretsweng diphoso le ba maleo a bone a phimotsweng;*  go itumela motho yo Jehofa* a se kitlang a gakologelwa boleo jwa gagwe.”+  Jaanong, a batho ba ba rupileng ke bone fela ba ba itumelang kgotsa a le batho ba ba sa rupang ba a itumela?+ Gonne ra re: “Tumelo ya ga Aborahame ke yone e e dirileng gore a tsewe e le motho yo o siameng.”+ 10  Jaanong, o ne a tsewa e le motho yo o siameng leng? A ke fa a ne a setse a rupile kgotsa fa a ne a ise a rupe? O ne a tsewa e le motho yo o siameng fa a ne a ise a rupe. 11  Mme o ne a amogela sesupo,+ e leng go rupa, e le letshwao la* gore o bolelwa e le motho yo o siameng ka ntlha ya tumelo ya gagwe pele a rupa. Seo se ne sa direga gore a tle a nne rre wa botlhe ba ba nang le tumelo+ le fa a ne a ise a rupe gore ba bolelwe e le batho ba ba siameng; 12  le gore a tle a nne rre wa bana ba ba rupileng. Mme e seng gore a nne rre wa ba ba rupileng fela, mme gape a nne wa ba ba latelang tumelo e rraaronamogolo Aborahame+ a neng a na le yone pele a rupa. 13  Gonne Aborahame kgotsa ditlogolwana* tsa gagwe ga ba a ka ba newa tsholofetso ya go rua lefatshe+ ka gonne ba latela molao, mme ba ne ba e newa ka gonne a na le tumelo.+ 14  Gonne fa e le gore batho ba ba bonang ditsholofetso tseo ke ba ba latelang molao, go raya gore tumelo ga e na mosola e bile tsholofetso e e neng ya newa Aborahame ga e kitla e diragadiwa. 15  Boammaaruri ke gore, molao wa ga Moshe o dira gore batho ba otlhaiwe,*+ mme fa o seyo, ga go na molao ope o o ka tlolwang.+ 16  Ke gone ka moo re bonang ditsholofetso tsa Modimo ka ntlha ya tumelo, ka gonne di ikaegile ka bopelonomi jo bogolo jwa Modimo.+ Ditlogolwana* tsotlhe tsa gagwe di ka kgona go bona ditsholofetso tseo,+ e seng fela ba ba latelang molao wa ga Moshe, mme gape le ba ba nang le tumelo e e tshwanang le ya ga Aborahame, yo e leng rre wa rona rotlhe.+ 17  (Seno ke fela jaaka go kwadilwe go twe: “Ke go tlhomile gore o nne rre wa ditšhaba di le dintsi.”)+ Aborahame o ne a na le tumelo e e ntseng jalo mo Modimong, Ene yo o tsosang baswi le yo o buang ka dilo tse di iseng di nne teng jaaka e kete di teng.* 18  Go ne go lebega go ka se kgonege gore Aborahame a nne le bana, mme o ne a na le tsholofelo e bile a dumela gore o tla nna rre wa ditšhaba di le dintsi go dumalana le se se neng sa buiwa fa go ne go twe: “Losika* lwa gago lo tla nna lontsi.”+ 19  Tota le fa a ne a sa koafala mo tumelong, o ne a tsaya mmele wa gagwe jaaka e kete o setse o sule (ka gonne o ne a na le dingwaga di ka nna 100).+ Gape o ne a itse gore Sara o godile thata gore a ka tshola bana.+ 20  Mme ga a ka a belaela e bile tumelo ya gagwe ga e a ka ya koafala mo go se Modimo a neng a se solofeditse. Go na le moo, tumelo ya gagwe e ne ya dira gore a nonofe, mme o ne a galaletsa Modimo. 21  O ne a tlhatswegile pelo gore se Modimo a neng a se solofeditse o ne a tla se diragatsa.+ 22  Ka jalo, “o ne a tsewa e le motho yo o siameng.”+ 23  Le fa go ntse jalo, mafoko a a reng, “o ne a tsewa e le motho yo o siameng,” a ne a sa lebisiwa mo go ene fela,+ 24  mme a ne a lebisitswe le mo go rona, gore le rona re tle re tsewe re siame ka gonne re dumela mo Modimong yo o neng a tsosa Jesu, Morena wa rona mo baswing.+ 25  Modimo o ne a letla batho gore ba bolaye Jesu ka ntlha ya maleo a rona+ e bile o ne a tsosiwa gore Modimo a tle a re bolele re siame.+

Dintlha Tse di Kwa Tlase

Kgotsa “kaiwa.”
Kgotsa “bopelonomi jo bogolo.”
Kgotsa “e le sekoloto.”
Kgotsa “itshwaretsweng.” Seger., “bipilweng.”
Kgotsa “e le go tlhomamisa.”
Seger., “losika.”
Seger., “gore go nne le tšhakgalo.”
Seger., “Losika.”
Kgotsa gongwe “yo o bitsang dilo tse di seyong a re di teng.”
Seger., “Ditlogolwana.”