Utor u Hiihii 9:1-28
9 Solomon maan iyou i Yehova man iyou i tor*+ shi Solomon eren hanma kwagh u soo u eren+ la cii been yô, fese je
2 Yehova ande hen Solomon sha kwa har, vough er yange ande hen a na ken Gibeon nahan.+
3 Yehova kaa a na ér: “M ungwa msen wou shi m lumun u zungwen we mhôônom er u sen sha ishigh yagh nahan. M tsegha iyou i u maa ne, m ver iti yam ia lu ker gbem sha won,+ shi ashe a am man ishima yam vea luun her hanma shighe.+
4 Man aluer u ngu zenden sha ishigh yagh a ishima i mimi+ man a ishima i jighilii,+ er teru Davidi zenden nahan,+ u ngu eren hanma kwagh u m kaa a we mer er,+ shi u ngu dondon akaawan a am man ajiraôron a am yô,+
5 me ver ikyônough ki torough ki tartor wou sha Iserael gbem sha won, vough er yange m tôndo zwa a teru Davidi nahan mer, ‘Mayange or nana ban hen tsombor wou u nana tema sha ikyônough ki torough ki Iserael ga.’+
6 Kpa aluer ne man ônov enev ne gema ijime a mo, ne de u dondon mo shi kuran atindi a am man akaawan a am, a m ver sha ishigh yenegh la, ne yem ne mba za civir mbaaôndo mbagen guren ve inya yô,+
7 me tim Mbaiserael ken tar u m ne ve la kera,+ shi me kar a iyou i m tsegh sha ci u iti yam la kpa sha ishigh yagh kera,+ nahan Mbaiserael vea hingir kwagh u kunya* man kwagh u ior cii vea lahan yô.+
8 Shi iyou ne ia hingir atihi a alôgh.+ Hanma or u nana kar gbenda her cii, nana nenge a kpiligh nan iyol, nana jingir ityough,* nana pine ér, ‘Er nan Yehova a er kwagh la a tar ne man iyou ne nahana?’+
9 Maa vea kaa ér, ‘Lu sha ci u ve undu Yehova Aôndo ve, un u yange due a uter vev ken tar u Igipiti la, ve za var a mbaaôndo mbagen ve lu guren ve inya civir ve. Ka nahan ve, Yehova a ve a ican ne cii sha a ve ye.’”+
10 Solomon maan ayou a ahar, ka iyou i Yehova man iyou i tor* je la, ken anyom 20 been yô,+
11 Hiram+ tor u Tiru na Solomon ikyon i sedar man ikyon i yunipa man zanaria kpishi er soo la,+ nahan Tor Solomon na Hiram agar 20 ken tar u Galilia.
12 Tsô Hiram mough ken Tiru, za nenge agar a Solomon na un la, kpa a doo un ga.*
13 Maa a pine ér: “Ka nyi agar u nem nee, anngômo?” Nahan i gema yilan a ér Tar u Kabul* zan zan nyian.
14 Hen shighe ne nahan, Hiram tindi tor a utalenti* mba zanaria 120.+
15 Ka kwagh u ior mba Tor Solomon kighir ve, ve lu eren tom kpan+ sha u maan iyou i Yehova+ man iyou na* man Igyungu*+ man girgar u Yerusalem man Hasor+ man Megido+ kua Geser+ je ne.
16 (Farou tor u Igipiti yange kôndo va ngohol Geser shi nande un sha usu, shi Mbakaanan mba ve tema ken gar shon la kpa wua ve kera.+ Maa a gema gar la a na wan na u kwase iyua,*+ ka kwase u Solomon je la.)
17 Solomon maa Geser* man Bete-horon u Shin,+
18 man Baalati+ man Tamar ken taaikyôngo, ken tar la,
19 kua agar a Solomon a koson akaa cii man agar a akekeautya+ man agar a mbahendananyinya man nyityôkwagh igen i Solomon soo u maan ken Yerusalem man ken Lebanon kua ken ityar i a lu a tahav sha mi la cii.
20 Kpa hide ior mba ve shi ken Mbaamor man Mbahiti man Mbaperishi man Mbahivi, kua Mbayebushi+ mba ve lu ior i Iserael ga la cii yô,+
21 ônov vev mba ve shi ken tar la, ka ior mba Mbaiserael fatyô u timin ve ga je la, Solomon kighir ve, ve hingir ikpan, mba eren tom zan zan nyian.+
22 Kpa Solomon kôr Oriserael môm kpan ga,+ sha ci u ve lu mbautyaav nav man mbatomov nav man mbahemenev nav man mbautyaav mba vesen, kua mbavesen mba nengen sha mbahendan akekeautya a na man mbahendananyinya a na.
23 Utyombaiorov mba tagher tagher 550 lu nengen sha tom u Solomon, ka mbahemenev mba ve lu nengen sha ior mba ve lu eren tom shon la je la.+
24 Kpa wan u Farou u kwase,+ mough hen gar u Davidi+ kôndo yem hen ya na, u Solomon maa sha ci na la; nahan Solomon maa Igyungu* la.+
25 Solomon yange a na iniav mbi nanden man iniav mbi bem sha atse a nan nagh, a a maa sha ci u Yehova la,+ shi a nande iniav, mnyim ma due sha atse a nan nagh a a lu sha ishigh ki Yehova la; a er akaa ne cii kwa tar ken inyom,+ nahan a maa iyou la a kure.+
26 Tor Solomon shi er utso kpishi hen Eshion-geber+ u a lu ikyua a Eloti, hen kpe u Zegemnger u Nyian, ken tar u Edom la.+
27 Hiram tindi mbatomov nav a utso kpishi,+ lu ior mba ve fa kwagh u zegemnger tsema tsema yô; ve za er tom vea mbatomov mba Solomon imôngo.
28 Ve za hen Ofir,+ ve za tôô utalenti mba zanaria 420 her, ve va a mi hen Tor Solomon.
Ngeren mba shin kpe
^ Shin “ya u tor.”
^ Zwa Heberu, “injakwagh.”
^ Zwa Heberu, “nana tôngo hondo.”
^ Shin “ya u tor.”
^ Zwa Heberu, “a doo sha ashe a na ga.”
^ Shin a fatyô u kaan ér, “Tar u U Doo I Kom Ga Yô.”
^ Talenti môm yange a lu ukilogeram 34.2. Nenge Ngeren u Seer u B14 la.
^ Shin “ya u tor.”
^ Shin “Milo.” Inja i ishember i ken zwa Heberu ne ér “iv.”
^ Shin “iyua i ivesegh; kem.”
^ Shin “maa Geser kase.”
^ Shin “Milo.” Inja i ishember i ken zwa Heberu ne ér “iv.”
