Utor u Hiihii 8:1-66
8 Hen shighe la, Solomon kohol+ mbatamen mba Iserael, ka mbayaav mba sha uipyaven cii man mbahemenev mba sha uya mba uter mba Mbaiserael je la.+ Ve va hen Tor Solomon ken Yerusalem sha u vea za tôô areki u ikyuryan u Yehova la ken Gar u Davidi,+ ka Shion je la,+ vea kôndo a va a mi yô.
2 Nomso mba Iserael cii kohol sha ishigh ki Tor Solomon hen iniongo* igen, ken uwer u Etanim,* ka uwer u sha utaankaruhar je la.+
3 Tsô mbatamen mba Iserael cii va, maa upristi kende a Areki sha.+
4 Ve kôndo ve va a Areki u Yehova man tenti u kohol ker la,+ man uicighanmbaakaav mba ve lu ken tenti shon la. Lu upristi man Mbalevi ve kôndo ve va a mi ye.
5 Tor Solomon man Mbaiserael mba i lôhô ve ér ve za kohol imôngo vea na la cii, tile sha ishigh ki Areki. Nahan i na nagh sha iyôngo man ibua kpishi,+ ngee je gande u ôron iyenge.
6 Maa upristi va a areki u ikyuryan u Yehova la hen ijiir na,+ ve nyôr a mi ken kparyou u hemban lun ken atô cii ken iyou la, ka Icighankpar u Hemban Cii je la, ve ver un shin akper a ucerubi mbara.+
7 Sha nahan yô, akper a ucerubi mbara samber sha ijiir i Areki la, nahan ucerubi mbara cir Areki la, man igbough na cii.+
8 Igbough la+ lihe je yô, aluer or tile hen Icighankpar, sha ishigh ki kparyou u hemban lun ken atô la yô, nana nenge a ityouv mbi igbough mbi shon, kpa aluer or tile ken won yô, nana nenge a mbi ga. Mbi her zan zan nyian.
9 Kwagh môm lu ken Areki la ga, saa di ikpande-awen i ihiar+ i Mose wa ker+ hen Horebi la tseegh. Mose yange er kwagh ne shighe u Yehova ya ikyur+ vea ior i Iserael, zum u ve lu duen ken tar u Igipiti la.+
10 Upristi mba dugh hen icighanjiir la yô, ibyeenegh+ iv iyou i Yehova la.+
11 Upristi kera fatyô u tilen eren tom ga sha ci u ibyeenegh kira, gadia iengem i Yehova iv iyou i Yehova.+
12 Hen shighe la, Solomon ôr ér: “Yehova kaa ér una lu ken angôghime.+
13 M maa iyou i taven i doon tsung sha ci wou m bee, ka ijiir i u lu her gbem sha won yô.”+
14 Tor maa gema ishigh na sha nongoior u Iserael cii, gba veren u doo doo; nongoior u Iserael gema tile lu ungwan.+
15 A kaa ér: “I wuese Yehova Aôndo u Iserael, un u yange tôndo zwa a terem Davidi iyol na, shi a kur kwagh ne sha uwegh nagh la; yange kaa ér,
16 ‘Hii sha iyange i m due a ior av Iserael ken Igipiti la je, m ngu a tsua gar môm ken uipyaven mba Iserael cii, u a maa iyou sha u nan iti yam icivir her ga,+ kpa m tsua Davidi mer a hemen ior av Iserael.’
17 Yange sar terem Davidi u maan iyou sha ci u iti i Yehova Aôndo u Iserael.+
18 Kpa Yehova kaa a terem Davidi ér, ‘Yange sar u u maan iyou sha ci u iti yam, man doo er sar u u eren kwagh ne yô.
19 Nahan kpa, ka we u maa iyou la ga, ka wan u a mar u* la una maa iyou sha ci u iti yam ye.’+
20 Yehova kure ityendezwa i yange er la, sha ci u m kar m tile sha ityough ki terem Davidi, m tema sha ikyônough ki torough ki Iserael vough er Yehova yange tôndo zwa nahan. Shi m maa iyou sha ci u iti i Yehova Aôndo u Iserael,+
21 shi m er ijiir ker sha ci u Areki u a lu a ikyur+ i Yehova ya a uter asev, shighe u lu duen a ve ken tar u Igipiti la.”
22 Solomon maa tile sha ishigh ki atse a nan nagh a Yehova, sha ishigh ki nongoior u Iserael cii, a kende ave sha,+
23 maa a kaa ér: “We Yehova Aôndo u Iserael, Aôndo ugen ngu er we nahan+ sha shin, shin tar kpaa ga, we u u kuren ikyuryan shi u tesen mbacivir we dooshima tsung,+ ve mba ve zenden sha ishigh you a ishima ve cii la.+
24 U kure ityendezwa i yange u er a wanye wou Davidi terem la. Yange u er ityendezwa la sha zwa wou shi sha iyange ne u kure i sha uwegh ough.+
25 Hegen yô, we Yehova Aôndo u Iserael, kure ityendezwa i yange u er a wanye wou terem Davidi shighe u u kaa wer: ‘Aluer ônov ou ver ishima sha gbenda ve, mba zenden sha ishigh yagh, vough er u zende sha ishigh yagh nahan yô,+ mayange or nana ban hen tsombor wou, u nana tema sha ikyônough ki torough ki Iserael sha ishigh yagh ga’ la.
26 Man hegen yô, Aôndo u Iserael, ityendezwa i yange u er a wanye wou terem Davidi la i̱ kure sha mi, wea lumun yô.
27 “Kpa mimi je Aôndo una tema shin tara?+ Nenge! Usha, een, sha u usha la je kpa, kehe kuma u u tema ken a ve ga;+ man hide anyou u cuku u m maa ne ve, u tema ker yee?+
28 Hegen yô, ungwa msen u wanye wou shi zungwe un mhôônom er a sen u nahan, we Yehova Aôndo wam, shi ungwa mliam ma wanye wou a lu vaan ér we u wase un la man msen u a lu eren sha ishigh you nyian ne.
29 Shi ver ashe a ou sha iyou ne tugh man atetan, sha ijiir i yange u kaa wer ‘Iti yam ia lu her,’+ u ungwan msen u wanye wou una ver ishigh hen ijiir ne una er la.+
30 Shi ungwa kwagh u wanye wou a sen u ér u zungwe un mhôônom la, kua msen u ior ou Iserael vea ver ishigh hen ijiir ne vea er la, nahan ma u ongo sha ijiir you i teman sha la;+ een, ma u ongo shi ma u de se a kwaghbo.+
31 “Shighe u or nan er orwanndor a nan kwaghbo man i kaa a nan ér nana bum, maa nan bum ér ifyan i kôr nan, nahan hen shighe u nan bum la nan va sha ishigh ki atse a ou a nan nagh ken iyou ne yô,+
32 ungwa sha usha, er kwagh, shi ôr mbatomov ou ijir, na iferor ibo shi hide a kwagh u nan er la sha ityough ki nan, gema na orperapera ishô man injar sha perapera u nan.+
33 “Shighe u mbahyomov ve hembe ior ou Iserael ityav sha ci u ve za hemen u eren we isholibo,+ kpa ve hidi hen a we ve va wuese iti you+ shi ve er msen ve zamber a we ér u zungwe ve mhôônom ken iyou ne yô,+
34 ungwa sha usha, de ior ou Iserael a isholibo shi hide a ve ken tar u yange u na uter vev ne.+
35 “Shighe u usha ve cir ura u kera lu nôôn ga+ sha ci u Mbaiserael za hemen u eren we isholibo,+ kpa ve ne ishigh hen ijiir ne ve er msen ve wuese iti you, ve de isholibo ve sha ci u u hide a ve ijime* yô,+
36 ungwa sha usha shi de mbatomov ou kwaghbo, ka ior ou Iserael je la, gadia u tese ve+ gbenda u dedoo u vea zenden sha mi yô; shi nôô ura sha tar wou+ u yange u na ior ou wer u lu dyako ve la.
37 “Aluer ijen gba ken tar ne+ shin bouange va shin ahumbe a tseen shin kuruku*+ shin ikpela i ikyomon shin ikyomon i* yan kwagh kpishi shin aluer mbahyomov vev va kase ve wa atô ken ma gar ken tar* ne shin nyityô ican igen shin angev va yô,+
38 nyityô msen, shin nyityô kwagh i ma or shin ior ou Iserael cii ve sen+ u ér we u zungwe ve mhôônom (gadia hanma or nan fa ican i nan lu yan ken ishima i nan la)+ shighe u ve kende ave sha, ve ver ishigh sha iyou ne yô,
39 ungwa sha usha mba ve lu ijiir you i teman la,+ nahan de ve a kwaghbo+ shi er kwagh shi na hanma or injar sha igbenda i nan cii,+ sha ci u u fa ishima i nan (ka we tseegh u fe ishima i hanma orumace mimi ye),+
40 sha er vea cia u sha ayange a vea lu uma ken tar u u ne uter asev ne cii yô.
41 “Shi sha kwagh u shiror u nan lu môm ken ior ou Iserael ga, u nan mough ken tar u icaa nan ve sha ci u iti you+
42 (gadia ve ungwa kwagh u iti you i hemban+ man uwegh ough ku ageegh kua uwegh ough ku naregh la), nan ve nan va ver ishigh sha iyou ne, nan er msen yô,
43 ungwa sha usha mba ve lu ijiir you i teman la+ shi er hanma kwagh u shiror la nan sen u cii, sha er ior mba sha tar cii vea fa iti you shi vea cia u+ er ior ou Iserael nahan shi vea fa er i yer iyou i m maa ne sha iti you yô.
44 “Aluer ior ou za u za nôngon ityav a orhyom ve sha gbenda u u tindi ve la+ man ve ver ishigh sha gar u u tsough ne+ ve er msen+ hen Yehova shi ve ver ishigh sha iyou i m maa sha ci u iti you ne yô,+
45 ungwa msen ve sha usha shi er kwagh u ve sen u ér we u zungwe ve mhôônom sha mi la shi ôr ijir sha ci ve.
46 “Aluer ve er u isholibo (gadia ma or ngu u nan eren isholibo ga ze),+ nahan ishima vihi u a ve tsung shi u kende ve a orhyom ve, orhyom ve la kura ve yem a mi uikyangen ken tar u nan, ica shin ikyua;+
47 nahan ve va gema ishima ken tar u i kura ve i yem a ve uikyangen ker la,+ maa ve hide hen a we+ shi ve zamber a we ér, u zungwe ve mhôônom ken tar u orhyom ve la,+ ve kaa ér, ‘Se er isholibo shi se er kwagh u shami ga; se er iferkwagh,’+
48 man vea hide hen a we a ishima ve cii+ man a uma ve cii ken tar u mbahyomov vev mba ve kura ve ve yem a ve uikyangen la, nahan vea ver ishigh vegher u tar ve u u ne uter vev la man vegher u gar u u tsough la kua iyou i m maa sha ci u iti you la, vea er msen hen a we yô,+
49 ungwa msen ve sha usha mba ve lu ijiir you i teman la+ shi er kwagh u ve sen u ér we u zungwe ve mhôônom sha mi la, shi ôr ijir sha ci ve
50 shi de ior ou mba ve er u isholibo la a isholibo ve, de ve a asorabo a ve, a ve er u la cii. U er ve vea hingir kwagh u kunya sha ishigh ki mbahyomov vev, nahan kunya a kôr ve a ve+
51 (gadia mba ior ou man dyako wou,+ ve mba yange u due a ve ken Igipiti+ ken atô u atse a usu u soughon iyôgh la).+
52 Ver ashe a ou sha ortom wou u a sen u ér we u zungwe un mhôônom la+ shi ver ashe a ou sha ior ou Iserael mba ve sen u ér u zungwe ve mhôônom la, nahan hanma shighe u ve yer u yô, ungwa.*+
53 Gadia u dugh ve ken ior mba sha tar cii u ver ve kposo wer ve lu dyako wou+ vough er we Yehova Ter u Hemban Cii, yange u ôr sha ikyev i ortom wou Mose, shighe u u lu duen a uter asev ken Igipiti la nahan.”
54 Solomon eren msen ne cii, shi sônon ér Yehova a zungwe ve mhôônom been yô, fese je a kighir a mough sha ishigh ki atse a nan nagh a Yehova, ape gure samber ave sha la.+
55 Maa a tile a ver nongoior u Iserael cii doo doo, a ôr genger genger ér:
56 “I wuese Yehova, un u a ne ior nav Iserael ijiir i memen vough er yange tôndo zwa la.+ Ma kwagh môm ken ityendezwa i dedoo, i yange er sha ikyev i ortom na Mose cii, gba inya ga.+
57 Yehova Aôndo wase a lu a vese vough er yange lu a uter asev nahan.+ A de undun se shin kenden se ga.+
58 A urugh ishima yase a va a mi hen a na,+ sha er se zenden sha igbenda na cii, shi se kuran atindi a na man akaawan a na kua ajiraôron a na, a yange kaa a uter asev ér ve dondon la.
59 Akaa a m zamber Yehova, m kaa mer a zungwe se mhôônom sha mi ne, a lu ikyua a Yehova Aôndo wase tugh man atetan, sha er una ôr ijir sha ci u ortom na man sha ci u ior nav Iserael, hanma iyange i i gbe u a er nahan cii,
60 nahan ior mba sha tar cii, vea fa er Yehova a lu Aôndo u mimi yô.+ Aôndo ugen ngu ga!+
61 Yô, ishima yen cii i lu sha Yehova+ Aôndo wase, zenden nen sha akaawan a na shi kuran nen atindi a na, er i lu sha iyange i nyian ne nahan.”
62 Tsô tor man Mbaiserael mba ve lu vea na la cii na nagh ku vesen sha ishigh ki Yehova.+
63 Solomon na Yehova iniav mbi bem:+ A na abua 22,000 man iyôngo 120,000. Kape tor man Mbaiserael cii tsegha iyou i Yehova la.+
64 Sha iyange la, tor tsegha tembe u hen atô, u u lu sha ishigh ki iyou i Yehova la, gadia lu her a na iniav mbi nanden man iniav mbi sha samuyia, kua ahôm a iniav mbi bem ye; sha ci u atse a nan nagh a sha togula+ a sha ishigh ki Yehova la, ndahar gande u nan iniav mbi nanden man iniav mbi sha samuyia, kua ahôm+ a iniav mbi bem mbira sha mi.
65 Hen shighe la, Solomon er iniongo+ vea Iserael cii imôngo, sha ishigh ki Yehova Aôndo wase ayange 7 man ayange agen 7, kohol cii lu ayange 14; lu zege mkohol hii hen Lebo-hamati* sen za nyôr hen Uwagh u Igipiti.+
66 Kpernan* yô, a kaa a ior ér ve yem, nahan ve ver tor doo doo, maa ve hide ve yem hen uya vev saan saan, doo ve kpishi sha erdoo+ u Yehova tese ortom na Davidi man ior nav Iserael cii la.
Ngeren mba shin kpe
^ Ka Iniongo i Atumbe je la.
^ Nenge Ngeren u Seer u B15 la.
^ Zwa Heberu, “wan wou, u una due ken iwenge you.”
^ Shin “na ve ican.”
^ Shin “mkumbem.”
^ Shin “mbaahungwa mba.”
^ Zwa Heberu, “ken tar u ihinda na.”
^ Shin “keghen ato a hanma kwagh u ve kaa a we ér we u er ve cii.”
^ Shin “hunda u Hamati.”
^ Zwa Heberu, “iyange i sha anigheni,” ka iyange i i dondo sha ayange 7 a masetyô la je la.
