Utor u Hiihii 5:1-18
5 Hiram tor u Tiru+ ongo ér i shighe Solomon mkurem, hingir tor sha ityough ki ter na yô, a tindi mbatomov nav hen Solomon, sha ci u Hiram yange lu ijende i Davidi.+
2 Solomon kpa tindi ér i za ôr Hiram ér:+
3 “U fa wang er terem Davidi yange fatyô u maan iyou sha ci u iti i Yehova Aôndo na ga yô. Kwagh lu nahan sha ci u i nôngo ityav a na hanma vegher cii, zan zan Yehova kar veren mbahyomov nav shin akevangahar a na.+
4 Kpa hegen yô, Yehova Aôndo wam nam mmem hanma vegher cii.+ Or môm nan ngu hendan kwagh a mo ga, shi kwaghbo môm kpa ngu zan hemen ga.+
5 Nahan m wa ishima u maan iyou sha ci u iti i Yehova Aôndo wam, vough er Yehova tôndo zwa a terem Davidi nahan, ér: ‘Ka wan wou, u me ver un sha ikyônough you ki torough sha ityough you la, una maa iyou sha ci u iti yam ye.’+
6 Nahan kaa ior ou ve gber ikyon i sedar ken Lebanon+ sha ci wam. Mbatomov av vea er tom vea mbatomov ou, nahan me kimbi mbatomov ou injar i u kaa wer i kimbi la, sha ci u u fa er mô wase môm nan fe u gberen ikyon er Mbashidon nahan ga yô.”+
7 Hiram ongo kwagh u Solomon kaa la yô, saan un iyol kpishi, a kaa ér: “I wuese Yehova nyian, sha ci u a na Davidi wan u lun a kwaghfan ér a hemen ikpelaior ne!”+
8 Tsô Hiram tindi i za ôr a Solomon ér: “M ungwa loho u u tindi hen a mo la. Me er hanma kwagh u u soo la cii; me na u ikyon i sedar man ikyon i yunipa.+
9 Mbatomov av vea kura i ken Lebanon vea sen a mi hen zegemnger; me kange i ijiir i môm, me kar a i ken mnger me za ver hen ijiir i u kaa wer m za ver la. Nahan me sagh i her, maa u va kura u yem a mi. We di u gema u nam kwaghyan u m kaa mer na ya wam la.”+
10 Tsô Hiram na Solomon ikyon i sedar man ikyon i yunipa i soo la cii.
11 Solomon di gema na Hiram alakema ukoor uikyaren* 20,000 sha ci u kwaghyan u ior mba hen ya na, shi a na un mkurem ma olev ma doon tsung* ukoor uikyaren 20. Lu kwagh u Solomon naan Hiram hanma inyom je la.+
12 Yehova na Solomon kwaghfan, vough er yange tôndo zwa nahan.+ Shi bem lu hen atô u Hiram man Solomon; ve uhar cii ve ya ikyur ayol a ve.
13 Tor Solomon kighir nomso ken Iserael cii, ve lu eren un tom; lu nomso 30,000 kighir ve ve lu eren tom ye.+
14 Hanma uwer a tindi ve ken Lebanon iorov 10,000, mba ve vande zan la di ve hide. Ve tsa ken Lebanon uwer môm, ve cin ve hide ve va tsa hen uya vev iwer ihiar. Adoniram+ lu nengen sha ior mba i kighir ve ve lu eren tom la.
15 Solomon lu a mbatomov* 70,000, man mbatôndon awen+ sha iwo+ iorov 80,000,
16 Solomon shi lu a utyombaiorov+ 3,300 mba ve lu nengen sha mbatomov yô.
17 Tor na zwa ve za dugh uzegembaawenev ve kua; lu awen a taver ishe,+ sha er vea wa imaagh+ ki iyou la sha awen a kuan yô.+
18 Nahan mbamaankwagh mba Solomon man mbamaankwagh mba Hiram kua Mbagebal+ er tom u awen, shi ve sôr ikyon man awen iyol sha er a maa iyou la a mi yô.
Ngeren mba shin kpe
^ Zwa Heberu, “mkurem ma i kume ma yô.”
^ Koor môm yange a lu ulita 220. Nenge Ngeren u Seer u B14 la.
^ Shin “mbatôôn ikyav.”
