Utor u Hiihii 16:1-34
16 Yehova ôr kwagh a Yehu+ wan u Hanani,+ sha Baasha kaa ér:
2 “Yange m dugh u shin vuulevu, m ver u orhemen sha ior av Iserael,+ kpa u zer zenden sha gbenda u Yeroboam, shi u na ior av Iserael er isholibo, ve vihim ishima ker sha asorabo a ve la.+
3 Nahan me ese Baasha a ya na kera vindi vindi, shi me er ya na una hingir er ya u Yeroboam,+ wan u Nebati nahan.
4 Hanma or u hen tsombor u Baasha u nana kpe ken gar yô, aniwaav vea ya nan; shi hanma or u hen tsombor na u nana kpe ken toho yô, inyon i sha ia ya nan.”
5 Akaa agen ken yiase i Baasha cii, kwagh u er, man ityom na i ageegh la, i nger ken takeda u yiase i sha ayange a ator a Iserael la.
6 Tsô Baasha kpe, i ii un vea uter nav ken Tirsa;+ wan na Ela kar tema tor sha ityough nagh.
7 Shi Yehova ôr kwagh u una er Baasha man ya na yô sha ikyev i profeti Yehu wan u Hanani, sha ci u akaabo a Baasha er sha ishigh ki Yehova u vihin un ishima sha tom u a er sha ave a na la cii, kua er a hingir u eren kwagh er ya u Yeroboam nahan, man sha ci u a wua un* kpaa yô.+
8 Ken inyom i sha 26 i Asa lu tor u Yuda la, Ela wan u Baasha tema tor sha Iserael ken Tirsa, a hemen anyom ahar.
9 Shimeri ortom na u lu kurutya u vegher môm u mbahendan un akekeautya la, zua zwa sha a na shighe u lu ken Tirsa, ma kwagh hunde hen ya u Arsa u nengen sha ya u Tirsa la.
10 Ken inyom i sha 27 i Asa tema tor sha Yuda la, Shimeri nyôr za wua un,+ maa kar tema tor sha ityough nagh.
11 Hingir tor, teman sha ikyônough nagh ki torough yô, fese je a wua mba hen ya u Baasha cii. A undu nomsoor* môm uma ga, anmgbianev nav* shin azende a na kpaa ga.
12 Nahan Shimeri tim ya u Baasha cii, vough er kwagh u Yehova ôr sha ikyev i profeti Yehu ér una er Baasha la nahan.+
13 Kwagh ne er nahan sha ci u asorabo a Baasha man wan na Ela er la, kua asorabo a ve na Iserael er sha u civir ieev vev mbi gbilinigh,+ nan Yehova Aôndo u Iserael ishimavihin la cii.
14 Akaa agen ken yiase i Ela cii, hanma kwagh u er la cii, i nger ken takeda u yiase i sha ayange a ator a Iserael la.
15 Ken inyom i sha 27 i Asa tema tor sha Yuda la, Shimeri tema tor ayange ataankarahar ken Tirsa. Hen shighe ne, akumautya a Iserael haa afo u nôngon ityav a Gibeton+ u Mbafiliti.
16 Shighe kar yô, akumautya a a haa afo la ungwa i kaa ér: “Shimeri zua zwa vea ior shi za wua tor.” Nahan Iserael cii ver Omeri,+ kurutya la tor sha Iserael sha iyange la ken afo.
17 Tsô Omeri mough vea Iserael cii hen Gibeton ve kôndo ve za kase Tirsa ve wa un atô.
18 Shimeri nengen ér i ngohol gar la yô, a za nyôr ken iyou i taver i taven i tor la, a nande i, a hia ker, a kpe.+
19 Kwagh ne er un nahan sha ci u asorabo a yange er, sha u eren kwaghbo sha ishigh ki Yehova, zenden sha gbenda u Yeroboam la, man sha ci u isholibo i na Iserael er la.+
20 Akaa agen ken yiase i Shimeri cii, man er zua zwa a ior la, i nger ken takeda u yiase i sha ayange a ator a Iserael la.
21 Lu hen shighe ne, ior i Iserael pav ker iniongo ihiar ye. Nongo môm lu dondon Tibeni wan u Ginati, ve soo u nan un tor; nongo ugen la di lu dondon Omeri.
22 Kpa ior mba ve lu dondon Omeri la hemba ior mba ve lu dondon Tibeni wan u Ginati la ityav. Nahan Tibeni kpe, maa Omeri hingir tor.
23 Ken inyom i sha 31 i Asa lu tor u Yuda la, Omeri tema tor sha Iserael, a hemen anyom 12. Hen Tirsa di a hemen anyom ataratar.
24 A yam uwo u Samaria hen Shemer sha azurufa utalenti* uhar, a maa gar sha uwo shon. A ii gar u maa la iti ér Samaria,*+ sha iti i Shemer, un u lu uwo na la.*
25 Omeri za hemen u eren kwaghbo sha ishigh ki Yehova, nahan kwagh na hemba vihin a mba ve vande lun a na la cii.+
26 A zende sha igbenda i Yeroboam wan u Nebati la cii, man ken isholibo i na Iserael er, sha u civir ieev vev mbi gbilinigh,+ nan Yehova Aôndo u Iserael ishimavihin la.
27 Akaa agen ken yiase i Omeri cii, kwagh u er, man ityom na i ageegh la, i nger ken takeda u yiase i sha ayange a ator a Iserael la.
28 Tsô Omeri kpe, i ii un vea uter nav ken Samaria; maa wan na Ahaba+ kar tema tor sha ityough nagh.
29 Ken inyom i sha 38 i Asa lu tor u Yuda la, Ahaba wan u Omeri tema tor sha Iserael, nahan Ahaba wan u Omeri hemen Iserael ken Samaria+ anyom 22.
30 Ahaba wan u Omeri za hemen u eren kwaghbo sha ishigh ki Yehova, nahan kwagh na hemba vihin a mba ve vande lun a na la cii.+
31 Er kwagh u zenden ken asorabo a Yeroboam+ wan u Nebati la, lu kwagh u kiriki ga nahan kpa, shi a tôô Yesebel+ wan u Etebaal tor u Mbashidon,+ hingir kwase na, maa a gba civir Baal,+ guren un inya.
32 Heela tseegh ga, a ta atse a nan nagh sha ci u Baal hen ya* u Baal,+ u maa ken Samaria la.
33 Ahaba shi er ityôgh ki akombough ki sha kon.*+ Ahaba hemba eren akaa a vihin Yehova Aôndo u Iserael ishima, a ator a Iserael a a vande lun a na la cii.
34 Sha ayange a Ahaba tema tor la, Hiel Orbetel hide maa Yeriko. Yange we imaagh nagh yô, waniunda na Abiram kpe, shi va we un ihinda yô, wan na u masetyô Segubi kpe, vough er Yehova ôr sha ikyev i Yoshua wan u Nun nahan.+
Ngeren mba shin kpe
^ Ka Nadabi wan u Yeroboam je la.
^ Zwa Heberu, “hanma or u nyanden sha kpekpe.” Ka mkaanem ma ken zwa Heberu ma tuhwan nomso a mi.
^ Shin “mba oron iyev i awambe nav.”
^ Zwa Heberu, “ter u uwo la.”
^ Inja na yô ér, “Hingir Kwagh u Tsombor u Shemer.”
^ Talenti môm yange a lu ukilogeram 34.2. Nenge Ngeren u Seer u B14 la.
^ Shin “tempel.”
^ Nenge Ngeren u Pasen Asember.
