Utor u Hiihii 12:1-33
12 Tsô Rehoboam yem ken Shekem, sha ci u Iserael cii va ken Shekem+ u va nan un tor.+
2 Yeroboam wan u Nebati ongo kwagh ne yô, (gadia a lu ken Igipiti her sha ci u yange yevese Tor Solomon za lu ken Igipiti),+ fese je
3 ve tindi ér a hide. Hidi yô, Yeroboam man nongoior u Iserael cii, va hen Rehoboam va kaa ér:
4 “Teru yange tôô se ikyav mbi yuhwan kpishi.+ Kpa aluer u pande tom u sha ican u teru na se lu eren la, shi u heghem ikyav mbi yuhwan mbi tôô se la yô,* se eren we tom.”
5 Tsô a kaa a ve ér: “Yem nen; ayange atar a karen yô, hide va nen hen a mo.” Nahan ior yem.+
6 Tor Rehoboam maa za idyu a mbaganden* mba yange ve er ter na Solomon tom shighe u lu uma la, a pine ve ér: “Ka nyi ne nenge ner doo u me ôr a ior mbana?”
7 Ve kaa a na ér: “Aluer nyian u hingir ortom u ior mban, shi u ngu eren kwagh u ve kaa la, shi u ôr kwagh a ve kundu kundu yô, vea lu eren we tom hanma shighe.”
8 Nahan kpa, a venda kwaghwan u mbaganden* wa un la, a yem a za tume idyu a agumaior a ve vese imôngo, a a lu eren un tom hen shighe ne la.+
9 A pine ve ér: “Ka nyi ne nenge ner, doo u me za ôr a ior mba ve kaa a mo ér, ‘Heghem se ikyav mbi teru a tee se ne’ laa?”
10 Tsô agumaior a ve vese imôngo la kaa a na ér: “Ka kwagh u u ôr a ior mba ve kaa a we ér, ‘Teru yange tôô se ikyav mbi yuhwan, kpa we gema heghem se ikyav ne’; ka kwagh u u ôr a ve je ne, ‘Me na ne ican a hemba ican i terem yange na ne la ica je.*
11 Terem yange tôô ne ikyav mbi yuhwan, kpa mo me gema me seer ne ikyav. Terem yange tsaha ne sha mbaakpa, kpa mo me gema me tsaha ne sha ukwagil.’”
12 Nahan Yeroboam man ior cii, hide va hen Rehoboam sha iyange i sha utar la, vough er tor kaa nahan, ér: “Hide va nen hen a mo sha iyange i sha utar.”+
13 Kpa tor lam a ior nyang nyang, a venda kwaghwan u mbaganden* wa un la.
14 A ôr ve kwagh u agumaior wa un la, a kaa ér: “Terem yange tôô ne ikyav mbi yuhwan, kpa mo me gema me seer ne ikyav. Terem yange tsaha ne sha mbaakpa, kpa mo me gema me tsaha ne sha ukwagil.”
15 Nahan tor kegh ato a ior ga, sha ci u lu Yehova na kwagh lu nahan ye,+ sha er kwagh u Yehova ôr a Yeroboam wan u Nebati sha ikyev i Ahiya,+ Orshilo la una kure sha mi yô.
16 Mbaiserael cii mba nengen er tor a vende u keghen ato a ve yô, ior kaa a tor ér: “Se mba a kwar ken Davidi? Se mba a dyako ken wan u Yese ga. Ne Mbaiserael, yem nen hen mbaaôndo enev. Hegen yô, we Davidi, nenge sha ya wou!” Nahan Mbaiserael hide yem sha uya* vev.+
17 Kpa Rehoboam za hemen u hemen Mbaiserael mba ve lu ken agar a Yuda la her.+
18 Tor Rehoboam maa tindi Adoram,+ un u nengen sha mba i kighir ve, ve lu eren tom u kpan la, kpa Iserael cii ta un awen a kpe. Tor Rehoboam nôngo unde sha ikyekyeutya na yevese yem ken Yerusalem.+
19 Nahan Mbaiserael gema ijime+ a ya u Davidi zan zan nyian.
20 Mbaiserael cii mba ongo ér Yeroboam hide yô, fese je ve yila un; a va hen ape ior kohol la, maa ve ver un tor sha Iserael cii.+ Lu ipyaven u Yuda tseegh dondo ya u Davidi ye,+ ior mbagen cii venda.
21 Rehoboam za nyer ken Yerusalem yô, fese je a kohol ya u Yuda man ipyaven u Benyamin cii, ve lu mbautyaav mba i tsaase ve tsembelee yô,* iorov 180,000, sha u nôngon ityav a ya u Iserael, sha er a hide a hementor a na Rehoboam wan u Solomon yô.+
22 Tsô Aôndo u mimi ôr kwagh a Shemaia,+ or u Aôndo u mimi la kaa ér:
23 “Ôr a Rehoboam wan u Solomon, tor u Yuda kua ya u Yuda man Benyamin cii, man ior mbagen mbara cii wer,
24 ‘Ka kwagh u Yehova a kaa je ne, ér: “De kôndon za nôngon nen ityav a anmgbianev enev Mbaiserael ga. Hanma wen nana hide nana yem hen ya u nan, sha ci u ka mo m ne kwagh ne a er ye.”’”+ Nahan ve ungwa kwagh u Yehova ôr la, ve hide ve yem ken ya, er Yehova ôr a ve nahan.
25 Tsô Yeroboam maa Shekem*+ hen haregh u iwoogh u Eferaim lu her. Shi mough heela za maa Penuel.*+
26 Yeroboam kaa ken ishima na ér: “Hegen yô, tartor la ua hide hen ya u Davidi.+
27 Aluer ior mban za hemen u kôndon, za nan iniav hen iyou i Yehova ken Yerusalem yô,+ ishima i ior mban kpa ia hide a lu sha orvesen ve, Rehoboam tor u Yuda. Een, vea wuam vea hide a za kohol Rehoboam tor u Yuda.”
28 Tor ze idyu yô, a er ônov mba ibuav uhar sha zanaria,+ maa a kaa a ior ér: “Ka ne ya ican u kôndon zan sha Yerusalem yum. We Iserael, nenge! Aôndo wou ngun, un u due a we ken tar u Igipiti la.”+
29 Maa a ver wanbua môm ken Betel,+ a ver ugen ken Dan.+
30 Kwagh ne na ve er isholibo,+ nahan ior ve yem ica ken Dan, u za civir u lu ker la.
31 Shi a maa ayou a civir mbaaôndo sha ajiir a taven, shi a tsua mbagen ken ior mba ve lu Mbalevi ga yô, a ver ve upristi.+
32 Yeroboam shi ver iniongo igen ken uwer u sha anigheni, ayange 15 ken uwer shon, er iniongo i ken Yuda la nahan.+ A na ônov mba ibuav mba er la iniav sha atse a a maa hen Betel la,+ shi a ver upristi sha ajiir a taven a a er hen Betel la.
33 Maa a gba nan iniav sha atse a a er hen Betel sha iyange i sha 15, ken uwer u sha anigheni la, ka uwer u a tsua iyol na je la; shi a ver iniongo sha ci u ior i Iserael, maa a unde sha atse la, u za nanden iniav, mnyim ma due.
