Utor u Hiihii 13:1-34
13 Yange or u Aôndo ugen+ u Yehova tindi un yô, mough ken Yuda va hen Betel. Hen shighe ne, Yeroboam tile hen atse a nan nagh,+ sha u una nande nagh mnyim ma due yô.
2 Maa er Yehova kaa nahan, or la yila atse la genger genger kaa ér: “Atse, atse! Ka kwagh u Yehova a kaa ne ér: ‘Nenge! A mar wan u nomso hen ya u Davidi, a ii un iti ér Yoshia!+ Una na nagh sha upristi mba sha ajiir a taven sha a we, ve mba ka ve nande iniav mnyim ma due sha a we la, shi una nande akuhe a uumace sha a we.’”+
3 Nahan or la na ikyav* sha iyange la, a kaa ér: “Ka ikyav* i Yehova a ne je ne: Nenge! Atse aa pav, nahan mtwem* maa tsenda kera.”
4 Tor Yeroboam ongo kwagh u or u Aôndo u mimi ôr ér una er atse a nan nagh, a hen Betel la yô, fese je Yeroboam tôô uwegh nagh sha atse la kera, gema hôn sha or u Aôndo u mimi la, kaa ér: “Kôr un nen!”+ Fese je, uwegh ku hôn sha a na la uma kera,* a kera fatyô u hiden a ku ga.+
5 Maa atse la pav, nahan mtwem ma sha atse la tsenda kera. Kwagh ne er vough er ikyav* i Yehova kaa a or u Aôndo u mimi la ér a ôr la nahan.
6 Tor maa kaa a or u Aôndo u mimi la ér: “Wea lumun yô, zamber a Yehova Aôndo wou a zungwem mhôônom, shi er msen sha ci wam sha er uwegh agh ku a hide her yô.”+ Tsô or u Aôndo u mimi la zamber a Yehova ér a zungwe tor mhôônom, nahan uwegh ku tor hide lu her, er ku vande lun la.
7 Tor maa kaa a or u Aôndo u mimi la ér: “Kar se yem ken ya, za ya kwagh, shi m na u iyua.”
8 Kpa or u Aôndo u mimi la kaa a tor ér: “Aluer u gema vegher u ya wou môm u nam je kpa, me za vea we me za ya beredi shin me ma mngerem hen ijiir ne ga.
9 Gadia ka kwagh u Yehova a kaa a mo je ne, ér: ‘De ye beredi shin me mngerem ga, shi de hidi yemen sha gbenda u u ve la ga.’”
10 Tsô a yem sha gbenda ugen, a kera hide a yem sha gbenda u a mough a va hen Betel la ga.
11 Profeti u been iyol ugen lu hen Betel, nahan ônov nav mba nomso hide hen ya, ve va ôr un akaa a or u Aôndo u mimi er hen Betel sha iyange la cii, man akaa a a ôr a tor la kpaa. Mba ôron ter ve kwagh ne mba been yô,
12 ter ve pine ve ér: “Ka gbenda u han a yeme?” Ônov nav mbara tese un gbenda u or u Aôndo u mimi u ken Yuda la yem la.
13 Maa a kaa a ônov nav ér: “Kangem nen shidi* sha jaki.” Tsô ve kange un shidi sha jaki, a henda.
14 A zenda or u Aôndo u mimi la ijime, a za zua a na, a tema hen itine i zegekon ugen. Maa a pine un ér: “Ka we u lu or u Aôndo u mimi u a mough ken Yuda a ve la yee?”+ A gema a kaa ér: “Een, ka mo.”
15 Profeti u been iyol la kaa a na ér: “Hide vea mo hen ya va ya beredi.”
16 Kpa a kaa ér: “Me fatyô u hiden yemen vea we shin zan hen ya wou ga, shin yan beredi, gayô man mngerem hen ijiir ne kpaa ga.
17 Gadia Yehova kaa a mo ér, ‘De ye beredi shin me mngerem her ga; de hidi yemen sha gbenda u u mough u ve la kpaa ga.’”
18 Tsô a kaa a na ér: “Mo kpa m ngu profeti er we nahan, nahan ortyom ôrom kwagh u Yehova a kaa yô, ér, ‘Ôr un a hide a yem vea we hen ya wou, sha er una ya beredi shi una ma mngerem yô.’” (Nahan a tsugh un.)
19 Tsô a hide a yem vea na, a za ya beredi shi a ma mngerem hen ya na.
20 Er ve tema hen tebul la, Yehova ôr kwagh a profeti u za hide a or u Aôndo u mimi la,
21 maa a yila or u Aôndo u mimi u ken Yuda la genger genger, a kaa ér, “Ka kwagh u Yehova a kaa ne, ér: ‘Er u vende u eren kwagh u Yehova a kaa, shi u kor tindi u Yehova Aôndo wou a we u ga,
22 kpa u hidi u yem u za yan beredi shi man mngerem hen ijiir i m kaa a we mer, “De ye beredi shin me mngerem ga” la yô, a nyôr a ikyom you shin uwar u uter ou ga.’”+
23 Or u Aôndo u mimi la ye beredi shi me mngerem yô, profeti u been iyol la kange shidi* sha jaki sha ci u profeti u un za hide a na la.
24 Maa or u Aôndo u mimi la mough gba yemen sha gbenda, kpa begha va due sha a na sha gbenda, wua un.+ I kende ikyom na sha gbenda, jaki gema tile ikyua a i; begha la kpa tile ikyua a ikyom shon.
25 Ior mba karen gbenda nenge a ikyom i i kende sha gbenda la, kua begha u tile ikyua a ikyom shon la kpaa. Maa ve nyôr ken gar, ape profeti u been iyol la lu la, ve za ôr kwagh a mi.
26 Profeti u za hide a na sha gbenda la, ongo kwagh ne yô, fese je a kaa ér: “Ka or u Aôndo u mimi u a vende u eren kwagh u Yehova a kaa ér a er yô;+ ka nahan ve Yehova a ne un sha ikyev i begha, a te num sha a na, a woo un ye, vough er Yehova ôr a na nahan.”+
27 Tsô a kaa a ônov nav mba nomso ér: “Kangem nen shidi* sha jaki.” Nahan ve kange i kwaghteman.
28 Maa a yem a za nenge a ikyom la, i kende i sha gbenda, jaki man begha tile ikyua a i. Begha la ya ikyom shon ga, shin ta num sha jaki la kpaa ga.
29 Profeti la kôr ikyom i or u Aôndo u mimi la penda sha jaki, maa a hide a na ken gar na, sha u va vaan un shi iin un.
30 Tsô a ii ikyom la ken uwar na, maa ve gba vaan ku na kaan ér: “Anmgbian wam, ku wou vihi je gande!”
31 Iin un yô, a kaa a mbayev nav ér: “Me kpe yô, iim nen hen ijiir i i ii or u Aôndo u mimi la kpee je. Ver akuhe a am a dondo a a na.+
32 Kwaghôron u Yehova u or u Aôndo u mimi la, ôr sha kwagh u atse a ken Betel man sha kwagh u ayou a mbacivir mbaaôndo cii, a sha ajiir a taven+ a ken agar a Samaria la, una er kpee a bunde ga.”+
33 Er kwagh ne er nahan cii kpa, Yeroboam de u dondon gbenda na u bo la ga, kpa a za hemen u tsuan mbagen ken ior, veren ve upristi+ sha ajiir a taven. Hanma or u nan soo u lun pristi cii, a ver nan pristi,* a kaa ér: “De a hingir môm ken upristi sha ajiir a taven.”+
34 Isholibo i ya u Yeroboam+ ne na yô, i tim ve shi i bee a ve sha tar kera.+
Ngeren mba shin kpe
^ Ka ikyav i tesen ér, or ne ngu lamen ken iti i Aôndo.
^ Ka ikyav i tesen ér, or ne ngu lamen ken iti i Aôndo.
^ Shin “mtwem ma lun a ahôm,” ka mtwem ma ma nyer a ahôm a iniav mbi i ne la je la.
^ Shin “kpe.”
^ Ka ikyav i tesen ér, or ne ngu lamen ken iti i Aôndo.
^ Ka kwagh u pendan zendenya sha igyundu teman sha mi.
^ Ka kwagh u pendan zendenya sha igyundu teman sha mi.
^ Ka kwagh u pendan zendenya sha igyundu teman sha mi.
^ Zwa Heberu, “a iv uwegh ku nan.”
