Utor u Hiihii 1:1-53
1 Hen shighe ne, tor Davidi bee iyol,+ shi za ayange, nahan a cir un akondo je kpa, i tsee un iyol ga.
2 Tsô mbatomov nav kaa a na ér: “Terem tor a de i ker un wanyekwase u nan lu iniuun yô, nana eren tor tom shi nana nengen sha a na. Nana yaven ikyua a we sha er a tseen terem tor iyol yô.”
3 Ve ker wanyekwase u doon kwase hen haregh u Iserael cii, maa ve za zua a Abishagi,+ Wanshunam+ ve va a na hen tor.
4 Wankwase la doo kwase je gande, nahan a hingir u nengen sha tor shi eren un tom, kpa tor yav a na ga.
5 Hen shighe ne, Adoniya+ wan u Hagiti lu kenden a iyol na sha, kaan ér: “M ngu lun tor!” Yange er ikyekyeutya sha ci na, shi ver anyinya man nomso 50 ér ve zaan un sha hemen.+
6 Kpa mayange ter na venda a na* kaa ér: “Er nan u er kwagh nee?” ga. Un kpa doo or kpishi, shi lu un ngô na mar dondo sha Abesalom ye.
7 Adoniya za lam a Yoabi, wan u Seruya man pristi Abiatar,+ nahan ve lumun u wasen shi suen un.+
8 Kpa pristi Sadoki,+ man Benaia+ wan u Yehoyada, man profeti Natan,+ man Shimei,+ man Rei, kua mbautyaav mba Davidi mba ageev yô,+ venda u suen Adoniya.
9 Shighe kar yô, Adoniya sôngo iyôngo man ibua kua ilev mbi kehen dindim dindim sha iwen i Soheleti, i i lu ikyua a En-rogel la u nan nagh,+ nahan a lôhô anmgbianev nav cii, ka ônov mba tor mba nomso je la, man nomso mba Yuda cii, ka mbatomov mba tor je la.
10 Kpa a lôhô profeti Natan, shin Benaia, shin mbautyaav mba ageev, shin anmgbian na Solomon kpaa ga.
11 Natan+ maa pine Batesheba,+ ngô u Solomon ér:+ “U ungwa er Adoniya+ wan u Hagiti a hingir tor, man ter wase Davidi a fe kwagh sha mi ga kpa?
12 Wea lumun yô, va m wa u ayom, sha er u yima uma wou man uma u wan wou Solomon yô.+
13 Nyôr za kaa a Tor Davidi wer, ‘Yange lu we terem tor, u bum a wanyekwase wou, u kaa wer: “Wan wou Solomon una hingir tor shighe u me kera lu ga la, shi ka un una tema sha ikyônough yagh ki torough ye” gaa?+ Nahan er nan Adoniya a hingir toro?’
14 Er u lu lamen a tor zan a mi ave la, me va nyôr me ôr tor kwagh shon môm u we kpa u ôr un la.”
15 Tsô Batesheba nyôr za hen tor, ken iyou na i shin atô la. Hen shighe ne, tor bee iyol kumbur kumbur, nahan Abishagi+ Wanshunam la lu nengen sha tor.
16 Nahan Batesheba ngurum, maa yav inya sha ishigh ki tor, tor gema kaa ér: “Ka nyi kwagh u soo?”
17 Batesheba kaa ér: “Terem, ka we yange u bum a wanyekwase wou ken iti i Yehova Aôndo wou wer, ‘Wan wou Solomon una hingir tor shighe u me kera lu ga la, shi ka un una tema sha ikyônough yagh ki torough ye.’+
18 Kpa nenge! Adoniya hingir tor, man terem tor fa kwagh môm sha kwagh ne ga.+
19 A na nagh sha anomabua man ilev mbi kehen dindim dindim, kua iyôngo kpishi, shi a lôhô ônov mba tor mba nomso cii man pristi Abiatar, man kurutya Yoabi;+ kpa a gema a lôhô wanye wou Solomon ga.+
20 Hegen yô, terem tor, ashe a Iserael cii nga sha a we ér, we u ôr ve or u nana tema sha ikyônough ki torough ki terem tor, shighe u una kera lu ga la.
21 Ga yô, a iin terem tor una za kohol uter nav yô, fese je a nengem man wan wam Solomon ér se mba mbahyomov.”
22 Er Batesheba lu lamen a tor zan a mi ave la je, profeti Natan va nyôr.+
23 Fese je i kaa a tor ér: “Profeti Natan ngu heen!” Maa a nyôr a za tile sha ishigh ki tor, a ngurum sha ishigh ki tor, a wa ityough inya.
24 Nahan Natan pine ér: “Terem tor, yange u kaa wer, ‘Adoniya una hingir tor shighe u me kera lu ga la, shi ka un una tema sha ikyônough yagh ki torough yee’?+
25 Gadia nyian a sen u za nan nagh+ sha anomabua man ilev mbi kehen dindim dindim, kua iyôngo kpishi, shi a lôhô ônov mba tor mba nomso cii man ukurmbautyaav mba ikyumutya, man pristi Abiatar.+ Mba her vea na, mba yan kwagh shi man kwagh, kaan ér, ‘Tor Adoniya a lu uma gbem!’
26 Kpa a lôhôm mo wanye wou ga, shin pristi Sadoki shin Benaia+ wan u Yehoyada shin wanye wou Solomon kpaa ga.
27 Terem tor na zwa ér kwagh a lu nahan, a u ôron wanye wou or u nana tema sha ikyônough ki torough ki terem tor, shighe u una kera lu ga la shio?”
28 Tor Davidi maa kaa ér: “Yilam Batesheba.” Tsô a nyôr a za tile sha ishigh ki tor.
29 Tor Davidi maa bum kaa ér: “Mimi je, er Yehova un u yange yimam ken ican yam cii,+ a lu u uma ne,
30 man vough er yange m bum a we ken iti i Yehova Aôndo u Iserael, m kaa mer, ‘Wan wou Solomon una hingir tor shighe u me kera lu ga la, shi ka un una tema sha ikyônough yagh ki torough sha ityough yagh nahan!’ ka kwagh u me er sha iyange ne je la.”
31 Tsô Batesheba ngurum wa ityough inya, maa yav inya sha ishigh ki tor, kaa ér: “Terem Tor Davidi a lu uma gbem!”
32 Fese je Tor Davidi kaa ér: “Yilam pristi Sadoki man profeti Natan, kua Benaia+ wan u Yehoyada.”+ Tsô ve va nyôr ve tile sha ishigh ki tor.
33 Tor kaa a ve ér: “Mough nen vea mbatomov mba ter wen, penda nen wan wam Solomon sha alfadari* wam a henda,+ hemen nen un gbenda sen nen shin Gihon.+
34 Pristi Sadoki man profeti Natan ve shighe un mkurem+ her, a tema tor sha Iserael; maa ve tôngo korough ve kaa ér, ‘Tor Solomon a lu uma gbem!’+
35 Maa dondo un nen ijime hide nen, nahan una nyôr una tema sha ikyônough yagh ki torough; una lu tor sha ityough yagh, shi me ver un una lu orhemen sha Iserael man sha Yuda cii.”
36 Fese je, Benaia wan u Yehoyada kaa a tor ér: “Amen! Yehova Aôndo u terem tor a lumun a kwagh ne.
37 Er Yehova lu a terem tor nahan, kape Solomon kpa, a lu a na vough je la,+ shi A na ikyônough nagh ki torough ki hemba ikyônough ki torough ki terem Tor Davidi.”+
38 Tsô pristi Sadoki man profeti Natan man Benaia+ wan u Yehoyada, man Mbakereti, kua Mbapeleti+ sen za penda Solomon sha alfadari* u Tor Davidi+ hendan la, maa ve za a na hen Gihon.+
39 Pristi Sadoki maa za ken tenti+ za tôô korough ku mkure+ due a mi, va shighe Solomon,+ nahan ve gba tôngon korough, ior gba ngoron, kaan ér: “Tor Solomon a lu uma gbem sha won!”
40 Nahan ior cii dondo un ijime kôndo, ve lu tôngon amar ember tsung je yô, tar lu tenger sha ci u ayôôso a ve la.+
41 Adoniya man ior mba lôhô ve la cii ungwa ayôôso ne shighe u ve ya kwaghyan bee kera la.+ Yoabi ongo imo i korough kura yô, fese je a pine ér: “Er nan i lu eren ayôôso kpishi ken gar nahana?”
42 Er lu lamen zan a mi ave la je, Yonatan+ wan u pristi Abiatar va nyôr. Adoniya maa kaa ér: “Nyôr ker, sha ci u u ngu or u dedoo,* nahan u va a loho u dedoo.”
43 Kpa Yonatan gema kaa a Adoniya ér: “Ei, ka nahan ga! Ter wase Tor Davidi ver Solomon tor.
44 Tor tindi pristi Sadoki man profeti Natan, man Benaia wan u Yehoyada, man Mbakereti, kua Mbapeleti, ve za vea na ve za penda un sha alfadari* u tor, a henda.+
45 Maa pristi Sadoki man profeti Natan shighe un mkurem hen Gihon a hingir tor. Mba been yô, ve mough her ve lu kôndon ember, nahan ayôôso nga ken gar kpishi. Ka ayôôso a u ongo je la.
46 Heela tseegh ga, Solomon tema sha ikyônough ki torough.
47 Kwagh ugen yô, mbatomov mba tor nyôr ker u za sughun ter wase Tor Davidi, kaan ér, ‘Aôndo wou a na iti i Solomon i hemba iti you, shi A na ikyônough nagh ki torough ki hemba ki you!’ Tor maa wa ityough inya sha gambe, sugh Aôndo.
48 Shi tor kpa kaa ér, ‘I wuese Yehova Aôndo u Iserael, un u nyian a ne ian ér or nan tema sha ikyônough yagh ki torough, shi a de ashe a am a nenge kwagh ne la!’”
49 Nahan cier ior mba Adoniya lôhô ve la cii iyol, maa hanma ve nan mough nan yem kwagh u nan.
50 Adoniya kpa kwagh u Solomon cier un iyol, nahan a mough a yem a za kôr ave sha akor a atse a nan nagh la.+
51 Tsô i za kaa a Solomon ér: “Nenge, Adoniya ngu cian Tor Solomon; shi a za kôr ave sha akor a atse a nan nagh la, ngu kaan ér, ‘Tor Solomon a vande bumun a mo ér, una wua wanye na sha sanker ga.’”
52 Solomon gema kaa ér: “Aluer a er kwagh sha inja yô, gwarce na môm una gba hen inya ga; kpa aluer i zua un a kwaghbo yô,+ una kpe.”
53 Tsô Tor Solomon tindi ér i za kôr un sha atse a nan nagh la i hungwa a mi. Maa a va nyôr a ngurum sha ishigh ki Tor Solomon, nahan Solomon kaa a na ér: “Yem hen ya wou.”
