Utor u Hiihii 20:1-43
20 Tsô Ben-hada+ tor u Shiria+ kohol ikyumutya na cii imôngo, un vea utor mbagen 32, man anyinya man akekeautya a ve; a kôndo a za kase+ Samaria+ a wa un atô, a nôngo ityav a na.
2 Maa a tindi mbaôron-loho hen Ahaba,+ tor u Iserael ken gar, a kaa a na ér: “Ka kwagh u Ben-hada a kaa je ne, ér,
3 ‘Azurufa wou man zanaria wou ka mba av, kua kasev ou man ônov ou mba nomso mba hemban doon la cii.’”
4 Tor u Iserael gema kaa ér: “Er u kaa nahan terem tor, mo kua hanma kwagh u m lu a mi cii, ka u wou.”+
5 Shighe kar yô, mbaôron-loho mbara hide va, va kaa ér: “Ka kwagh u Ben-hada a kaa je ne, ér, ‘Yange m tindi loho ne hen a we, m kaa mer: “Azurufa wou man zanaria wou man kasev ou kua mbayev ou mba nomso cii u nam.”
6 Kpa kper, er hen shighe ne nahan, me tindi mbatomov av hen a we, vea va ker akaa hen ya wou, man hen ya u mbatomov ou vighe vighe, nahan vea ngohol akaa a ou a a gbe u kwagh la cii vea yem a mi.’”
7 Tsô tor u Iserael yila mbatamen mba ken tar la cii, kaa a ve ér: “Nengem nen ase, iferkwagh i or ne a kange ishima u van a mi ne; a kaa ér mo m na un kasev av man ônov av mba nomso man azurufa wam, kua zanaria wam, shi mo kpa m venda u nan un ga.”
8 Maa mbatamen cii, kua ior cii kaa a na ér: “De ongo imo na ga, shi de eren kwagh u a soo la kpaa ga.”
9 Tsô a kaa a mbaôron-loho mba Ben-hada ér: “Kaa nen a terem tor ner, ‘Akaa a yange u hii kaan a wanye wou wer a er la cii me er, kpa ngun yô, me fatyô u eren ga.’” Maa mbaôron-loho mbara hide yem za ôr Ben-hada kwagh ne.
10 Ben-hada maa tindi a loho ne hen a na, kaa ér: “Aluer inya i ken Samaria kuma u me haa hanma or u nan dondon mo ijime ken ikyevwe yô, mbaaôndo ve tsaham tsung!”
11 Tor u Iserael gema kaa ér: “Ôr a na wer, ‘Or u nan woho iyol a ikyav mbi utyaav la, nana de te ihyagh a iyol i nan, er or u nan er mbi kera la nahan ga.’”+
12 Ongo loho ne shighe u un man utor ve lu man kwagh ken utenti vev* la yô, fese je, a kaa a mbatomov nav ér: “Wa nen iyol u za tan ityav!” Nahan ve wa iyol u za tan ityav sha gar la.
13 Kpa profeti ugen za hen Ahaba,+ tor u Iserael za kaa ér: “Ka kwagh u Yehova a kaa je ne, ér, ‘U nenge a zegeikpelaior ne cii kpa? Nenge, m ngu nan i sha ikyev you nyian, nahan u fa er mo m lu Yehova yô.’”+
14 Ahaba pine ér: “A lu sha ikyev i ana?” Profeti la gema kaa ér: “Ka kwagh u Yehova a kaa ne, ér, ‘Ka sha ikyev i mbatomov mba mbahemen ikpentar* mban.’” Nahan a pine ér: “Ka an nana hii ityava?” Profeti la gema kaa ér: “Ka we!”
15 Ahaba maa ôr iyenge i mbatomov mba mbahemen ikpentar la, ve lu iorov 232; been yô, a ôr iyenge i nomso mba Iserael cii, ve lu iorov 7,000.
16 Ve due ken gar shighe u iyange lu sha tembe la. Hen shighe ne, Ben-hada lu man kwagh, hunden ken utenti* vea utor 32, mba ve lu wasen un la.
17 Mbatomov mba mbahemen ikpentar la mba hiin duen yô, fese je, Ben-hada tindi mbaôron-loho ve va kaa a na ér: “Nomso mough ken Samaria va.”
18 Nahan a kaa ér: “Aluer ve va ka bem yô, va a ve uma; shi aluer ve va ka ityav kpa, va a ve uma.”
19 Kpa mban mba duen ken gar yô, mbatomov mba mbahemen ikpentar la, man akumautya a a lu dondon ve ijime la,
20 hanma ve nan wua or u nan ve sha a nan cii. Nahan Mbashiria yevese,+ maa Iserael zenda ve ijime, kpa Ben-hada Tor u Shiria yevese sha nyinya vea mbahendananyinya mbagenev, war.
21 Kpa tor u Iserael due, gba za wuan mbahyomov mba ve lu hendan anyinya man akekeautya la, a wua Mbashiria je falegh gba.
22 Shighe kar yô, profeti la+ va hen tor u Iserael va kaa a na ér: “Za wa iyol i utya tsembelee, nahan nenge kwagh u u er yô,+ gadia sha mhii u inyom i i lu van la,* tor u Shiria una va ityav sha a we.”+
23 Tsô mbatomov mba tor u Shiria kaa a na ér: “Aôndo ve ka Aôndo u iwoogh. Ka nahan ve, ve hembe se ityav ye. Kpa aluer se nôngo ityav a ve hen ijiir i lun vaanaa yô, se hemba ve ityav.
24 Shi er kwagh ne: Dugh ator+ cii sha aan a ve kera, gema ver ugomna sha ityouv vev.
25 Maa kohol ikyumutya i kuma sha iyenge i ikyumutya you i yange i kpe ken utya la, anyinya man akekeautya kpa nahan. Se za nôngo ityav a ve hen ijiir i lun vaanaa, nahan se hemba ve keng je.” Maa a ungwa kwaghwan ve la, a er vough er ve kaa nahan.
26 Sha mhii u inyom la,* Ben-hada kohol Mbashiria kôndo sha Afeki+ u za nôngon ityav a Iserael.
27 Ior i Iserael kpa, í kohol ve imôngo, i na ve kwaghyan, maa ve due ve yem u za nôngon ityav a ve. Ior i Iserael mba za haan afo sha ishigh vev yô, ve lu inja er akum ahar a kiriki a ivo nahan, kpa Mbashiria yô, gema iv tar la cii.+
28 Tsô or u Aôndo u mimi la va hen tor u Iserael va kaa a na ér: “Ka kwagh u Yehova a kaa je ne, ér, ‘Er Mbashiria ve kaa ér: “Yehova ka Aôndo u iwoogh, ka Aôndo u ajiir a lun vaanaa ga” yô, me na zegeikpelaior ne cii sha ikyev you,+ nahan u fa er mimi je mo m lu Yehova yô.’”+
29 Ve haa afo, ve zua ishigh ayol a ve, ve lu her ayange ataankarahar; sha iyange i sha utaankaruhar la yô, ve hii ityav. Ior i Iserael wua ushoja mba Shiria mba zenden angahar 100,000 ken iyange i môm.
30 Mba ve shi la cii ve yevese ve yem ken gar u Afeki.+ Kpa kpekpe gba kighir ushoja 27,000 mba ve shi la. Ben-hada kpa yevese nyôr ken gar, za yer ken iyou i ken atô.
31 Tsô mbatomov nav kaa a na ér: “Nenge, se ungwa ser ator a ya u Iserael ka ator a zungwen mhôônom.* Wea lumun yô, de se hua akondo a zungwen* shi se kange ikyor sha ityo, se due se za hen tor u Iserael. Alaghga una de u u lu uma.”+
32 Tsô ve hua akondo a zungwen* shi ve kange ikyor sha ityo, ve nyôr ve za hen tor u Iserael, ve za kaa ér: “Wanye wou Ben-hada kaa ér, ‘Wea lumun yô, de m lu uma.’” A gema a pine ér: “Ngu uma here? Ka anmgbian wam.”
33 Nomso mbara nenge kwagh ne ér ka ikyav i dedoo, shi ve kav ér mimi je a wa ishima u eren kwagh u a kaa la, nahan ve kaa ér: “Ben-hada ka anmgbian wou.” Tor u Iserael gema kaa ér: “Za va nen a na.” Maa Ben-hada due za hen a na, nahan tor u Iserael nyôr a na shin ikyekyeutya na.
34 Ben-hada maa kaa a na ér: “Me hide a agar a yange terem ngohol hen teru la cii, shi u fatyô u bughun ukasua* sha ci wou ken Damaseku, vough er terem er ken Samaria nahan.”
Ahaba gema kaa ér: “Er se ye ikyur ne yô, me de u u yem.”
Maa a ya ikyur a na, a de un a yem.
35 Yehova ôr kwagh a môm ken ônov mba uprofeti*+ ér a kaa huror na ér: “Wea lumun yô, tam iju.” Kpa or la venda u tan un iju.
36 Nahan a kaa a na ér: “Er u ongo imo i Yehova ga yô, u karen hen a mo kera yô, fese je, begha una wua u.” Yemen yô, begha za ta num sha a na, wua un.
37 A za zua a orgen, maa a kaa ér: “Wea lumun yô, tam iju.” Tsô or la ta un iju, vihi un iyol.
38 Maa profeti la za tile hen kpegbenda, lu keghen tor, a kange tsar sha ashe, a yer iyol.
39 Tor ngur karen yô, a yila tor genger genger, a kaa ér: “Wanye wou za ape ityav mbi hembe taver yô, maa orgen due ken ityav mbi shon, a va a or hen a mo a va kaa ér, ‘Nengen sha or ne. Aluer a saa yô, me wua u sha ityough nagh,+ gayô u kimbi talenti* u azurufa.’
40 Kpa wanye wou we ityough, ngur eren akaa agen yô, or la yem kwagh na.” Nahan tor u Iserael kaa a na ér: “Ka ijir i a ôr u je la; u kure ijir iyol you.”
41 Maa fese je, a sagh tsar la sha ashe kera, nahan tor u Iserael kav er lu môm ken uprofeti yô.+
42 Profeti la maa kaa a na ér: “Ka kwagh u Yehova a kaa je ne, ér, ‘Er u de or u m kaa mer i wua un la a yem yô,+ a wua u sha ityough nagh,+ shi a wua ior ou sha ityough ki ior nav.’”+
43 Nahan tor u Iserael yem hen ya na ken Samaria,+ lu zunguluu, kera saan un iyol ga.
Ngeren mba shin kpe
^ Shin “atumbe a ve.”
^ Shin “uipyaventar.”
^ Shin “atumbe.”
^ Ka fam u sha je la.
^ Ka fam je la.
^ Shin “ka ator a lun a dooshima tsung.”
^ Shin “aba a sôhô.”
^ Shin “aba a sôhô.”
^ Shin “lun a ugodobi.”
^ Alaghga mkaanem ma “ônov mba uprofeti” la, ma ôron kwagh u makeranta u tesen uprofeti, shin mzough u uprofeti.
^ Talenti môm yange a lu ukilogeram 34.2. Nenge Ngeren u Seer u B14 la.
