Utor u Hiihii 6:1-38
6 Yange Solomon tema tor sha Iserael, mba ker ken inyom i sha unyiin, ken uwer u Shiv*+ yô, (ka uwer u sha uhar je la), Solomon hii u maan iyou i Yehova.*+ Hen shighe ne, Mbaiserael* due ken Igipiti+ zurum anyom 480.
2 Iyou i Tor Solomon maa Yehova la lihe aseva* 60, gbanger aseva 20, gema tav aseva 30.+
3 Varenda+ u sha ishigh ki tempel* la gbanger aseva 20; lu kwagh môm a igbanger i iyou la.* Ilihen i varenda u sha ishigh ki iyou la lu aseva pue.
4 I er uwindou mba sha iyou la gbanger va hoghol ken won.+
5 Heela tseegh ga, a maa kwagh suur ken kpekpe u iyou la; i maa kwagh ne ningir kpekpe u iyou la, man u tempel* la, kua kparyou u hemban lun ken atô la+ ningir tser, shi a maa ukpombaayoughough mba kiriki ken akpe ningir tser.+
6 Igbanger i kpoyou u kiriki u shin inya la lu aseva ataan; igbanger i kpoyou u hen atô la lu aseva ataratar; igbanger i kpoyou u kiriki u masen sha la lu aseva ataankarahar. A maa kwagh a ningir iyou la cii, sha er a wa kwagh môm ken ukpekpe mba iyou la ga yô.+
7 I maa iyou la sha awen a i vande dughun sôron yô.+ Sha nahan yô, i ungwa iov i uhama shin azembe shin ma ikyagh ki tomough ki iyôgh ken iyou la, shighe u i lu maan i la ga.
8 Ijiir i nyôron hen kpoyou u masen shin inya la lu vegher u ken imbusutariyan* u iyou la,+ shi i er angahar a unden, kôndo yem za nyôr hen kpoyou u hen atô la, shi angahar a unden la mough hen kpoyou u hen atô la, kôndo yem za nyôr sha kpoyou u masen sha la.
9 A maa iyou la zan zan a kar been,+ a er haav sha ikyon i sedar i vesen shi a tera ikpande i sedar sha mi sha nongo.+
10 A maa ukpombaayoughough ken akpe ningir iyou la tser;+ hanma yô, tav aseva ataan; i gema i zua ukpombaayoughough mbara sha iyou shon a ikyon i sedar.
11 Hen shighe ne, Yehova tindi ér i kaa Solomon ér:
12 “Aluer u ngu eren sha akaawan a am, shi u ngu dondon ajiraôron a am, shi u ngu kuran atindi a am cii, zenden sha a yô,+ mo kpa, me er kwagh u yange m tôndo zwa mer me er a teru Davidi sha kwagh u iyou i u lu maan ne la,+
13 shi me tema hen atô u Mbaiserael,+ me kende ior av Iserael ga.”+
14 Solomon maa iyou la zan zan kar been.
15 A cir ikpande i sedar sha ukpekpe mba ken atô u iyou la. Shi a var ikyon sha ukpekpe mba ken atô la, hii hen inya kôndo zan zan nyôr sha ikyon i sha uha la, shi a cir ikpande i yunipa ken iyou la hen inya.+
16 Shi a er anjiir u lun aseva 20 u masen shin kpekpe u iyou i Aôndo la sha ikpande i sedar, hii hen inya zan zan kôndo nyôr sha ikyon i sha uha la, maa a er kparyou u hemban lun ken atô+ la ker,* ka Icighankpar u Hemban Cii+ la je la.
17 Shi tempel* la,+ ka vegher u sha ishigh ki iyou la je la, lu aseva 40.
18 I gba atam a ikyon a kiriki, a lun vingir vingir+ man ufaluwa mba mondon+ sha ikyon i sedar i ken atô u iyou la. Ikyon i sedar cir sha ukpekpe mba iyou la je yô, awen a sha ukpekpe mbara due cuku tsô kpaa ga.
19 Shi a sôr kparyou u hemban lun ken atô+ u iyou la, sha er una ver areki u ikyuryan u Yehova+ la her yô.
20 Kparyou u hemban lun ken atô la lihe aseva 20, gbanger aseva 20, tav aseva 20;+ a var zanaria u wang ker; a gema a cir ikyon i sedar sha atse a nan nagh la.+
21 Solomon cir zanaria u wang ken atô u iyou la,+ gema ta mshirim ma zanaria sha ishigh ki kparyou u hemban lun ken atô,+ u i cir un zanaria la.
22 A cir iyou la cii zanaria iyol, zan zan i kar maan iyou la cica cii been; shi a cir atse a nan nagh+ a a lu ikyua a kparyou u hemban lun ken atô la zanaria iyol cica cii.
23 A er ucerubi+ uhar ken kparyou u hemban lun ken atô la sha kon u pain;* ityaven i hanma ve lu aseva pue.+
24 Kperegh ku cerubi ku môm lu aseva ataan, ku gen kura kpa lu aseva ataan. Mough hen ikighir i kperegh môm, yem hen ikighir i kperegh ku gen kura lu aseva pue.
25 Cerubi u sha uhar la kpa lu aseva pue. Ucerubi mba uhar mbara lu indi kwaghmôm, shi mluyol ve kpa lu kwaghmôm.
26 Ityaven i cerubi u môm la lu aseva pue, cerubi ugen la kpa lu nahan.
27 Maa a ver ucerubi+ mbara ken iyou i ken atô la.* Akper a ucerubi mbara naregh, nahan kperegh ku cerubi u môm la bende a kpekpe la vegher ne, kperegh ku cerubi ugen la di bende ken kpekpe vegher la; akper a ve naregh zua iyol hen atô u iyou la.
28 Shi a cir ucerubi mbara zanaria iyol.
29 Shi a gba ucerubi+ man ikyon i avilegh+ kua ufaluwa mba mondon+ sha ukpekpe mba iyou la jimin cii ningir tser, sha ayou a ken atô man a ken won la cii.
30 A cir zanaria hen inya ken ayou a ken atô man a ken won a iyou la.
31 Shi a er ihinda sha kon u pain man mtôm ma ken ambusu, kua ikpandehinda i i lu vegher u sha utaan la,* hen hunda u nyôron ken kparyou u hemban lun ken atô la.
32 I er ihinda i ihiar la sha kon u pain, i gema i gba ucerubi man avile kua ufaluwa mba mondon sha mi. A cir ve zanaria iyol shi a cir ucerubi mbara man avile la zanaria iyol hanma ijiir cii.
33 A er ikpandehinda i vegher u sha unyiin la* sha kon u pain, sha ci u hunda u nyôron ken tempel.*
34 Shi a er ihinda ihiar sha kon u yunipa. Hunda môm lu ker avegher ahar; i wa kokombo hen atô zua avegher a ahar ne, hunda ugen la kpa lu avegher ahar; i wa kokombo hen atô zua avegher a ahar la.+
35 A gba ucerubi man avile man ufaluwa mba mondon, a cir zanaria sha akaa a a gba ne.
36 A maa tembe u ken atô la+ a kase sha awen a kuan iniongo itiar, shi a seer ikyon i sedar sha mi, sha nongo kwa môm.+
37 Yange i wa ityô i iyou i Yehova la ken inyom i sha unyiin, ken uwer u Shiv;*+
38 i maa iyou la, i er hanma kwagh cii, vough er i kpela nahan;+ i bee sha inyom i sha 11, ken uwer u Bul* (ka, uwer u sha anigheni je la), nahan a tôô anyom ataankarahar u maan i.
Ngeren mba shin kpe
^ Zwa Heberu, “ônov mba Iserael.”
^ Nenge Ngeren u Seer u B8 la.
^ Nenge Ngeren u Seer u B15 la.
^ Ishiva i môm yange i lu usentimita 44.5 (uinci 17.5). Nenge Ngeren u Seer u B14 la.
^ Zwa Heberu, “tempel u iyou.”
^ Shin “igbanger i iyou la, lu aseva 20.”
^ Mba ôron ka kwagh u Icighan Ruumyou.
^ Zwa Heberu, “ken iyan.”
^ Ka ken iyou la je la.
^ Ka Icighankpar u lu sha ishigh ki Icighankpar u Hemban Cii la je la.
^ Zwa Heberu, “kon u mkure,” a fatyô u lun kon u Aleppo pain.
^ Ka Icighankpar u Hemban Cii je la.
^ Alaghga mba ôron ka kwagh u ikpandeihinda i i er la, shin ityaven man igbanger i ihinda shon.
^ Alaghga mba ôron ka kwagh u ikpandeihinda i i er la, shin ityaven man igbanger i ihinda shon.
^ Mba ôron ka kwagh u Icighankpar.
^ Nenge Ngeren u Seer u B15 la.
^ Nenge Ngeren u Seer u B15 la.
