Utor u Hiihii 17:1-24
17 Hen shighe ne, Eliya*+ Ortishibi u lu ken Gileadi la,+ kaa a Ahaba ér: Mimi je, er Yehova Aôndo u Iserael, un u m eren un tom* la, a lu u uma ne, ken anyom a a lu van ne, avure aa gba ga, shi ura kpa ua nôô ga, saa me kaa mer i lu nahan!”+
2 Tsô Yehova ôr kwagh a na kaa ér:
3 “Undu ijiir ne, yem vegher u sha ityoughkitaregh la, za yer hen Pev u Keriti,* u a lu Yordan vegher u sha ityoughkitaregh la.
4 Maan mngerem ma shin uwagh la, nahan me tindi uôô-ôô vea va naan we kwaghyan her.”+
5 Fese je a yem a za er, er Yehova kaa nahan; a yem a za lu hen Pev u Keriti,* u a lu Yordan vegher u sha ityoughkitaregh la.
6 Nahan uôô-ôô ve va na un beredi man inyam pepe, kua beredi man inyam aikighe; maan mngerem shin uwagh la.+
7 Kpa ayange nga kar yô, uwagh la uma+ sha ci u ura kera nôô ken tar la ga.
8 Tsô Yehova ôr kwagh a na kaa ér:
9 “Mough sha, yem ken Sarefati u Shidon, za lu ker. Nenge! Me ôr kwasecôghol ugen ker, una naan we kwaghyan.”+
10 Nahan a mough a yem ken Sarefati. Za nyer sha hundagar yô, a nenge a kwasecôghol ugen, lu sangen ayegher a ikyon. Maa a yila un a kaa ér: “Wea lumun yô, vam a an-mnger shin kôôpu m ma.”+
11 Er lu yemen ér una za va a mi la, shi a yila un a kaa ér: “Wea lumun yô, vaan mo a ivurugh ki beredi.”
12 Tsô kwase la kaa ér: “Mimi je, er Yehova Aôndo wou a lu u uma ne, m ngu a beredi ga. An-mwe shi cuku shin ityegh ki vesen, man an-mkure kpuaa ken ishegh i cuku di tsô.+ M ngu sangen ayegher a ikyon kpuaa, sha er me yem me za er kwagh sha ci wam man wan wam yô. Ka kwagh u se mase shin a mi u se ya, maa se kpe je ne.”
13 Kpa Eliya kaa a na ér: “De cie ga. Yem za er, er u kaa nahan. Nahan kpa, hii eren mo kpenbredi u vingir u kiriki, a kwagh u a lu la, va a mi va nam, tsô u mase za eren kwagh sha ci wou man wan wou.
14 Gadia ka kwagh u Yehova Aôndo u Iserael a kaa ne, ér: ‘Mwem ma shin ityegh ki vesen kira ma a bee ga, shi mkurem ma ken ishegh i cuku la kpa ma a bee ga, zan zan iyange i Yehova una er ura ua nôô sha tar la.’”+
15 Tsô a yem a za er, er Eliya kaa nahan, nahan un man Eliya man ya na cii, ya kwagh ayange imôngo.+
16 Mwem ma shin ityegh ki vesen mara bee ga, shi mkurem ma ken ishegh i cuku la kpa bee ga, vough er Yehova ôr sha ikyev i Eliya nahan.
17 Akaa ne nga eren kera cii yô, wan u kwase u lu ya na la gba angev, man angev nav mbura taver je yô, a kpe.*+
18 Tsô kwase la pine Eliya ér: “Ka nyi m er u,* we or u Aôndo u mimi nee? U va u va umbur mo ibo yam shi wuan wan wamaa?”+
19 Kpa a gema a kaa a na ér: “Nam wan wou.” Tsô a ngohol un hen a na, a yem a na sha kpoyou u sha, ape lu tsan la, a za gbir un sha gambe na.+
20 Maa a yila Yehova genger genger a kaa ér: “Yehova Aôndo wam,+ u soo u eren kwasecôghol u m lu tsan hen ya na ne kpa ican sha u wuan wan naa?”
21 Nahan a samber sha wan la kwa tar, a yila Yehova genger genger, a kaa ér: “Yehova Aôndo wam, wea lumun yô, de wan ne a hide a lu uma.”
22 Yehova maa ungwa zamber u Eliya,+ nahan wan la nder, hide lu uma.+
23 Tsô Eliya tôô wan la sha kpoyou u sha la, hungwa a na, va nyôr a na ken iyou, gema un na ngô na; maa Eliya kaa ér: “Nenge, wan wou ngu uma.”+
24 Tsô kwase la kaa a Eliya ér: “Hegen yô m fa, mimi je, u ngu or u Aôndo,+ shi kwaghôron u Yehova u u ôron sha zwa wou la kpa ka u mimi.”
