Utor u Hiihii 18:1-46
18 Shighe kar yô, Yehova ôr kwagh a Eliya ken inyom i sha utar,+ kaa ér: “Za, Ahaba a nenge a we, gadia me er ura ua nôô sha tar.”+
2 Nahan Eliya za, za nenge a Ahaba. Hen shighe ne, zegejen gba+ ken Samaria.
3 Tsô Ahaba yila Obadia u nengen un sha ya la. (Obadia lu or u cian Yehova tsung,
4 nahan shighe u Yesebel+ lu wuan uprofeti mba Yehova la, Obadia kua a uprofeti 100 za yer ve ken ubar 50, 50; lu nan ve beredi man mngerem.)
5 Ahaba maa kaa a Obadia ér: “Zende ken tar ne, za hen hanma imbormnger cii, man hen hanma pev* cii. Alaghga se zua a toho ua kuma u se na anyinya man mbaafadari* vea ya a lu uma, sha er ilev yasev mbia kpe cii ga yô.”
6 Tsô ve pav tar la ker, ape hanma ve nana za yô. Ahaba yem vegher ugen un tswen, Obadia di yem vegher ugen un tswen.
7 Er Obadia lu yemen sha gbenda la, Eliya va kohol un. Fese je a kav er lu un yô, maa a gure a wa ityough inya, a kaa ér: “Terem Eliya, ka we nee?”+
8 A kaa a na ér: “Een, ka mo. Yem za ôr teru wer: ‘Eliya ngu heen.’”
9 Kpa a kaa ér: “Ka nyi kwaghbo m er ve u soo u nan wanye wou sha ikyev i Ahaba wer a wuama?
10 Mimi je, er Yehova Aôndo wou a lu u uma ne, ma ikyurior shin tartor ngu u terem a tindi ér i za ker u her ga ze. Ka vea kaa ér, ‘Ngu heen ga’ yô, a kaa tartor la, man ikyurior la, ve bum ér ve nenge a we ga.+
11 Hegen yô, u ngu kaan wer, ‘Za, za ôr teru wer: “Eliya ngu heen.”’
12 Me karen ape u lu ne kera yô, jijingi u Yehova una tôô u,+ una yem a mi hen ijiir i m fe ga yô, nahan me za ôron Ahaba, man una va zuan a we ga yô, una wuam kpee je. Man yô, wanye wou cie Yehova, hii iyev na je.
13 I ôr terem kwagh u yange m er shighe u Yesebel lu wuan uprofeti mba Yehova la gaa? Yange m yer uprofeti mba Yehova 100 ken bar iorov 50, 50; m lu nan ve beredi man mngerem.+
14 Kpa hegen yô, u ngu kaan wer, ‘Yem, za ôr teru wer: “Eliya ngu heen.”’ Una wuam kpee je.”
15 Nahan kpa, Eliya kaa ér: “Mimi je, er Yehova u akum a sha, un u m eren un tom* la, a lu u uma ne, nyian una nenge a mo.”
16 Nahan Obadia yem za kohol Ahaba ôr un, maa Ahaba due za hen Eliya.
17 Ahaba nengen a Eliya yô, fese je a pine un ér: “Ka we or u u lu van a zayol u vesen sha* Iserael ne ga?”
18 A gema a kaa ér: “M va a zayol sha Iserael ga, kpa ka we man ya u teru, ne ve a zayol ye; ne de u kuran atindi a Yehova, ne gema ne mba dondon Ubaal.+
19 Hegen yô, kaa Iserael ve kohol mo sha Uwo u Karmel,+ kua uprofeti mba Baal mba 450 mbara, man uprofeti mba Ashera*+ mba 400, mba ve ye kwagh sha tebul u Yesebel la.”
20 Tsô Ahaba tindi i ôr ior i Iserael cii, shi kohol uprofeti mbara sha Uwo u Karmel.
21 Maa Eliya za ape ior cii lu la, kaa ér: “Ka hanma shighe ne de u lun asema ahara?+ Aluer Yehova ka Aôndo u mimi yô, dondo nen un;+ kpa aluer ka Baal yô, dondo nen un!” Kpa ior mbara bugh zwa ôr kwagh a na ga.
22 Eliya maa kaa a ior ér: “Ka mo tswen m mase shin ken uprofeti mba Yehova ye,+ kpa uprofeti mba Baal yô, gema mba 450.
23 De ve na se agumabua ahar, nahan vé tsua gumbua môm, ve bur aci aci, ve penda sha ikyon, kpa ve de we usu ga. Mo kpa me bur gumbua ugen la, me penda sha ikyon, kpa me wa usu ga.
24 Nahan ne yila sha iti i aôndo wen,+ mo di me yila sha iti i Yehova. Aôndo u una ungwa, una er usu ua due la, a tese ér ka un a lu Aôndo u mimi ye.”+ Ior cii mba ongo kwagh ne yô, ve kaa ér: “Kwagh u u ôr la doo.”
25 Nahan Eliya kaa a uprofeti mba Baal ér: “Tsua nen gumbua môm vande burun nen, sha ci u ne ne hemba ngeen. Maa yila nen sha iti i aôndo wen, kpa de we nen usu ga.”
26 Nahan ve kôr gumbua u i na ve la ve bur, maa ve gba yilan sha iti i Baal, pepe zan zan iyange sha tembe, kaan ér: “Baal, ungwa se!” Kpa ve ungwa imo ga, shi or môm ôr kwagh a ve ga.+ Ve lu tsuen ningir atse a ve ta la.
27 Ka va kom er iyange sha tembe nahan yô, Eliya gba nahan ve tar, kaan ér: “Yila un nen i taver! Kera ga je kpa, ngu aôndo!+ Alaghga tsô ngu henen kwagh zulee, shin a za u za wanger iyol.* Gayô alaghga ngu yaven, nahan gba u or a za nder un!”
28 Ve lu ngoron tôndon avav iyol sha ahô man awange, vough er ve vanden eren nahan, zan zan awambe va hii u duen ve iyol cii.
29 Iyange va kpeese, kpa ve lu eren er ka uprofeti nahan her, zan zan shighe u nan nagh ku sha samuyia aikighe la, kpa ve ungwa imo ga, shi or môm ôr kwagh a ve ga; or kegh ato a ve kpaa ga.+
30 Ka ze deghôô yô, Eliya kaa a ior cii ér: “Kporom nen hen a mo.” Nahan ior cii kporom hen a na. Maa a sôr atse a nan nagh a Yehova, a i hembe kera la.+
31 Eliya maa tôô awen 12 sha iyenge i uipyaven mba ônov mba Yakob, un u Yehova yange kaa a na ér: “Iti you a hingir Iserael” la.+
32 A maa atse a nan nagh ken iti i Yehova a awen la.+ Maa a er akpa ningir atse la tser, gbanger kuma u lôôn samkwagh uikyaren mba sea uhar.*
33 Been yô, a penda ikyon vough vough, maa a bur gumbua la aci aci, a penda sha ikyon shon.+ Maa a kaa ér: “Kese nen mngerem shin mtem ma vesen mnyiin ma iv poo, haa nen sha nagh ku nanden man sha ikyon la.”
34 Maa a kaa ér: “Shi er nen nahan.” Nahan shi ve kimbir eren. Kpa shi a kaa ér: “Shi er nen sha kwa tar.” Nahan shi ve er sha kwa u sha utar.
35 Nahan mngerem mara samber sha atse la cii, shi a haa mngerem shin akpa la kpa iv poo.
36 Ka va kom aikighe, sha shighe u nan nagh ku sha samuyia la yô,+ profeti Eliya kporom tile ken hemen, kaa ér: “Yehova, Aôndo u Aberaham+ man Isaka+ man Iserael, de i fa nyian er u lu Aôndo ken Iserael, man er m lu ortom wou, shi i lu we u kaa wer, m er akaa a m er ne cii yô.+
37 Ungwam, Yehova! Ungwam, sha er ior mban vea fa er i lu we Yehova, u lu Aôndo u mimi shi u lu hiden a asema a ve hen a we yô.”+
38 Tsô Yehova er usu sen sha, va hia nagh ku nanden kura,+ man ikyon man awen, kua inya, shi u uma mngerem ma shin akpa la.+
39 Ior cii mba nengen kwagh ne yô, fese je ve gure, ve wa ityough inya, ve kaa ér: “Yehova ka Aôndo u mimi! Yehova ka Aôndo u mimi!”
40 Eliya maa kaa a ve ér: “Kôr nen uprofeti mba Baal! De deen nen mô ve môm ner nana war ga!” Fese je ve kôr ve, nahan Eliya sen a ve shin uwagh u Kishon,+ za sôngo ve her.+
41 Eliya kaa a Ahaba ér: “Kôndo za ya kwagh shi ma kwagh, gadia m ungwa zegeura ngu kumen.”+
42 Nahan Ahaba kôndo yem u za yan kwagh shi man kwagh, Eliya di kôndo yem sha ityough ki Karmel, a za gure anu inya, a sua ityough hen anu na.+
43 Maa a kaa a wanye na ér: “Wea lumun yô, kôndo za kenger vegher u shin zegemnger la.” Tsô a kôndo a za kenger, maa a kaa ér: “M nenge a kwagh môm ga.” Kwa taankaruhar cii Eliya kaa ér, “Hide za.”
44 Kwa u sha utaankaruhar la yô, wanye na la kaa ér: “Nenge! Ibyeenegh ki kpuaa ki lun er uwegh ku or nahan, ki duen shin zegemnger kôndon sha.” Eliya maa kaa ér: “Za kaa Ahaba wer, ‘Kange anyinya sha ikyekyeutya you! Sen sha er ura ua yisa u ga yô!’”
45 Hen shighe ne, kwavaôndo wa ime dimii, shi ahumbe lu karen, maa zegeura nôô;+ Ahaba henda ikyekye gba yemen ken Yesereel.+
46 Kpa uwegh ku Yehova na Eliya agee, nahan a fiir* ikyondo shin iwenge, a yevese zan zan a za kar Ahaba, a yem a nyôr ken Yesereel.
Ngeren mba shin kpe
^ Shin “uwagh.”
^ Alfadari ka wan u jaki i unde nyinya a mar yô.
^ Zwa Heberu, “m tilen sha ishigh nagh.”
^ Shin “anzughul ken.”
^ Shin “ityôgh ki akombough ki sha kon.”
^ Shin a fatyô u kaan ér, “a za zende.”
^ Sea môm yange a lu ulita 7.33. Nenge Ngeren u Seer u B14 la.
^ Shin “a zer.”
