Utor u Hiihii 3:1-28
3 Tso Solomon hingir wankem u Farou tor u Igipiti, gadia vôso wan u Farou+ va a na ken Gar u Davidi,+ va lu vea na zan zan kar maan ya na been,+ kua iyou i Yehova,+ man kpekpe u Yerusalem ningir tseren.+
2 Kpa ior lu nan iniav sha ajiir a taven her,+ sha ci u zan zan hen shighe la, i lu a maa iyou sha ci u iti i Yehova ga.+
3 Yehova za hemen u doon Solomon ishima her, gadia lu zenden sha akaawan a ter na Davidi tese un la, saa di iniav mbi lu nan, eren mnyim ma iniav mbi shon kôndon sha hen ajiir a taven la tseegh.+
4 Tsô tor za hen Gibeon u za nan iniav her, sha ci u lu ijiir i taven i i fa i wuee* yô.+ Solomon na iniav mbi nanden 1,000 sha atse a nan nagh la.+
5 Shighe u Solomon lu hen Gibeon la, Yehova ande hen a na tugh ken mnya, Aôndo kaa ér: “Ôrom kwagh u u soo wer m na u yô.”+
6 Solomon maa kaa ér: “U tese wanye wou Davidi terem dooshima je gande, un u yange zende sha ishigh you sha mimi man sha perapera man a ishima i jighilii la. U za hemen u tesen un dooshima ne zan zan nyian sha u nan un wan wer, a tema sha ikyônough nagh ki torough.+
7 Man hegen yô, Yehova Aôndo wam, u ver wanye wou tor sha ityough ki terem Davidi, shin er m lu gumor* shi m lu a kwaghfan kpishi ga nahan kpaa.*+
8 Wanye wou ngu môm ken ior mba u tsough yô.+ Ior mban ngee je or a fatyô u ôron iyenge ve shin ingyegh ve ga.
9 Nahan na wanye wou ishima i ungwan kwagh sha er una ôr ior ou ijir,+ shi una fa mkposo u kwagh u dedoo a kwagh u bo yô,+ gadia ka an nana fatyô u ôron ior ou mba ve ngee kpishi* ne ijiri?”
10 Yange doo Yehova er Solomon sôn kwagh ne yô.+
11 Nahan Aôndo kaa a na ér: “Er u sen kwagh ne, u kera sen wer u tsa gbem* shin u lu a inyaregh shin i wua mbahyomov ou ga, kpa u gem u sen wer i na u kwaghfan u ôron ajir yô,+
12 me er kwagh u u sen la.+ Me na u ishima i fan kwagh man i kaven kwagh,+ sha er mayange orgen nana tsa a lu er we nahan ga,+ vough er orgen nan lu a vande lun er we nahan ga la.
13 Kwagh u u sen ga la kpa me na u;+ me na u inyaregh man icivir cii,+ sha er shighe u u lu uma la cii,* tor ugen nana lu er we nahan ga yô.+
14 Shi aluer u ngu zenden sha igbenda yam, u ngu dondon akaawan a am shi u ngu kuran atindi a am, vough er teru Davidi zenden la yô,+ shi me na u u tsa gbem.”*+
15 Solomon nderen yô, a kav ér lu mnyam cier un ye. Maa a yem ken Yerusalem, a za tile sha ishigh ki areki u ikyuryan u Yehova la, a na iniav mbi nanden man iniav mbi bem,+ shi a er iniongo sha ci u mbatomov nav cii.
16 Hen shighe la, mbaagbaga uhar nyôr za hen tor, za tile sha ishigh nagh.
17 Kwase u hiihii la kaa ér: “Terem, kwase ne man mo se mba ken iyou i môm; kwase ne lu ken iyou shighe u m mar la.
18 Yange m maren ayange atar nga kar yô, kwase ne kpa mar. Se lu imôngo, se uhar tseegh; orgen môm lu ken iyou vea vese ga.
19 Tugh mbugen yô, a nôngo mnyam a kighir wan na, maa a kpe.
20 Nahan kwase ne mough atôutu va tôôm wan hen ikyum, er kpankwase wou lu yaven la za gbir un hen ikyum na, gema tôô wan na u kpe la va gbir hen ikyum yam.
21 M nderen pepe mer me na wan wam ityumba yô, m kav un kpenegh. Nahan m yengen un iyol pepe la tsembelee yô, m kav mer ka wan wam u m mar la ga.”
22 Kpa kwase ugen la gema kaa ér: “Ei, wan wam ngu uma, ka wan wou a kpe ye!” Kpa kwase u hiihii la lu kaan ér: “Ei, wan wou kpe, ka wan wam a lu uma ye.” Kape ve lu nyiman kwagh sha ishigh ki tor je ne.
23 Ken masejime yô, tor kaa ér: “Kwase ngun ka a kaa ér, ‘Wan wam ngu uma, ka wan wou a kpe ye!’ Kwase ugen la di a kaa ér, ‘Ei, wan wou kpe, ka wan wam a lu uma ye!’”
24 Nahan tor kaa ér: “Vam a sanker.” Maa i va tor a sanker.
25 Tsô tor kaa ér: “Pav wan u a lu uma la ker avegher ahar, gema vegher môm na kwase u hiihii la, gema vegher ugen la na kwase u sha uhar la.”
26 Fese je, kwase u wan na lu uma la zamber a tor, sha ci u mhôônom kôr un a wan na. A kaa ér: “Wea lumun yô, terem! Gema wan u a lu uma ne na kwase la! Mayange de woo un ga!” Kpa kwase ugen la lu kaan ér: “Una lu u wam ga, shin u wou kpaa ga! I pav un ker avegher ahar!”
27 Tor maa kaa ér: “Gema wan u a lu uma ne na kwase u hiihii la! Mayange de woo un ga, sha ci u ka un a lu ngô na ye.”
28 Tsô Mbaiserael cii ungwa kwagh u ijir i tor kure la, nahan kpiligh ve iyol* a tor,+ sha ci u ve nenge er kwaghfan u Aôndo lu a na u ôron ijir sha mimi yô.+
Ngeren mba shin kpe
^ Zwa Heberu, “i i hemba cii.”
^ Shin “wanye u kiriki.”
^ Zwa Heberu, “shi m fa u nyôron shi duen ga.”
^ Shin a fatyô u kaan ér, “taver kwagh.” Zwa Heberu, “yoho.”
^ Zwa Heberu, “ayange kpishi.”
^ Zwa Heberu, “sha ayange a ou cii.”
^ Zwa Heberu, “seer we ayange.”
^ Zwa Heberu, “cier ve iyol.”
