Utor u Hiihii 7:1-51
7 Solomon maa ya* na.+ Yange tôô un anyom 13 u maan ya na cii been.+
2 Shi a maa iyou i tema sha mtôm ma sedar, ma lu iniongo inyiin; i yilan i ér Iyou i Ikyô i Lebanon.+ I lihe aseva* 100, i gbanger aseva 50, i gema i tav aseva 30; i tera ikyon i sedar i vesen+ sha mtôm mara.
3 I mande iyou la sha ikyon i sedar, sha itiran i i tema sha mtôm mara la; í* lu 45, hanma nongo lu a mi 15.
4 Uwindou mba lun a ikpande lu sha iniongo itiar. Hanma windou yô, zua ishigh a windou ugen sha iniongo itiar.
5 I er ihinda man ikpande i ihinda shon cii lu azongo anyiin anyiin. Ishigh ki uwindou mba ve zua ishigh a uwindou mbagen, mba ve lu sha iniongo itiar la kpa lu nahan.
6 A maa Iyou* i Mtô, i lihe aseva 50, i gbanger aseva 30, shi i maa varenda sha ishigh ki iyou la, i tim mtôm ma ma kôr haav mbu varenda shon yô.
7 Shi a maa Iyou* i Ikyônough ki Torough,+ ape una teman a ôron ijir yô, lu Iyou i Ijirôron,+ i cir ikyon i sedar sha mi, hii hen inya zan zan nyôr sha uha.
8 Yange maa iyou* i una tsaan ker yô, hen tembe ugen la,+ ken ijime i Iyou i Ikyônough ki Torough la; i maa iyou ne er Iyou i Ikyônough ki Torough la nahan. Shi Solomon maa iyou igen er Iyou i Ikyônough ki Torough la nahan sha ci u wan u Farou u a vôso la.+
9 I maa akaa ne cii sha awen a taver ishe,+ a i tôndo sha ikyaren u i na la, i sôr a iyol ken ishi man ken ijime sha asôm a tôndon awen; i er nahan hii sha imaagh ki i wa la zan zan nyôr sha ikighir i kpekpe, man ken won zan zan za nyôr hen tembe u vesen la.+
10 I wa imaagh kira sha uzegembaawenev, lu awen a taver ishe; awen agen lu aseva pue, agen di lu aseva anigheni.
11 Shi sha awen ne, i maa awen agen a taver ishe, a i tôndo sha ikyaren u i na la yô, kua ikyon i sedar kpaa.
12 I wa awen a i tôndo la sha iniongo itiar, man ikyon i vesen i sedar kpa sha iniongo itiar, ningir tembe u vesen la tser; i er nahan a tembe u ken atô+ u iyou i Yehova la, man varenda u iyou la kpaa.+
13 Tsô Tor Solomon tindi i za ken Tiru, i za va a Hiram.+
14 Un lu wan u kwasecôghol ugen ken ipyaven u Nafetali. Ter na lu Ortiru u varen iwa i togula yô.+ Hiram yange fa tom tsembelee, shi lu a mkav+ man mfe u eren hanma tom u togula* cii. Tsô a va hen Tor Solomon, a va er un hanma tom cii.
15 Hiram er mtôm mhar ma togula;+ hanma ityôgh yô tav aseva 18, shi i kar indi i mtôm ma mhar+ mara a kor u karen kwagh, hanma ityôgh yô lu aseva 12.
16 Shi a er mtem mhar sha togula, a penda sha ityouv mbi mtôm mara. Ityegh i môm tav aseva ataan, kigen la kpa tav aseva ataan.
17 A er hwe u lun er kper u i er sha mshirim ma i tume ma tume nahan,+ sha mtem ma i penda sha ityouv mbi mtôm mara la; ukper utaankaruhar sha ityegh ki i môm la, kigen kira kpa ukper utaankaruhar.
18 Shi a er upomegraneti sha iniongo ihiar, ningir hwe môm u i er, er ka kper nahan cir mtem ma ma lu sha ityouv mbi mtôm mara la; a er kwagh shon môm sha mtem mara cii.
19 I er ufaluwa mba taven aseva anyiin sha mtem ma ma lu sha ityouv mbi mtôm ma hen varenda la.
20 Mtem mara lu sha mtôm ma mhar mara, ma tema sha vegher u gbilititi u zua vea kper u i er la; shi upomegraneti 200 lu sha iniongo, ningir hanma ityegh tser.+
21 A tim mtôm hen varenda u tempel* la.+ A tim ityôgh ken uwegh ku iyanegh,* a yila ki ér Yakin,* shi a tim ityôgh ken uwegh ku imesegh,* a yila ki ér Boashi.*+
22 Shi i er ufaluwa sha ityouv mbi mtôm mara. Nahan i er tom sha mtôm mara i bee.
23 Maa a er Zegegbangi u Mnger sha iyô,+ i ker un a ker; a yila un ér Zegemnger u Togula. Mough hen kurugh nagh môm yem hen kurugh nagh ku genegh kura lu aseva 10, gema tav aseva 5. Shi i kar indi i Zegegbangi u Mnger la a kor u karen kwagh yô, lu aseva 30.+
24 Shi ikyua a akur a Zegegbangi u Mnger la, i er hwe u atamaikyon a kiriki a lun vingir vingir+ ningir un cii tser; lu pue sha hanma ishiva ningir Zegegbangi u Mnger la tser; i er atamaikyon la iniongo ihiar a Zegegbangi u Mnger la imôngo.
25 Zegegbangi u Mnger la tema sha anomabua 12,+ a 3 na ishigh ken imbusutarimese, a 3 na ishigh shin ityôtar, a 3 na ishigh ken imbusutariyan, a 3 agen la gema na ishigh sha ityoughkitaregh; Zegegbangi u Mnger la tema sha anomabua shon, anomabua la na atô a a cii hen atô.
26 Zegegbangi u Mnger la civir er igbangese i ikyevwe* nahan; i er kurugh nagh lu er kurugh ku kôôpu nahan, man er imondon i faluwa nahan. Yange a tôô ubav mba mngerev uikyaren 2,000.*
27 Maa a er akaa a tôôn ikyav*+ pue sha togula. Hanma kwagh ne yô, lihe aseva anyiin, gbanger aseva anyiin shi tav aseva atar.
28 Kape yange i er akaa a tôôn ikyav la je ne: Akaa ne lu a ikpande ken ambusu, ikpande i ken ambusu la gema lu hen atô u ikyon i i tera la.
29 Shi i er ubegha+ man anomabua kua ucerubi+ sha ikpande i ken ambusu i i lu hen atô u ikyon i i tera la, shi i er akaa ne nahan sha, ikyua a ikyon i i tera la. I er akaa a hweegh, er faluwa u i tume yô. Akaa ne lu ubegha man anomabua la sha man shin.
30 Shi hanma kwagh u tôôn ikyav a mi ne lu a akaver a i er sha togula yô anyiin, man itiran i wan akaver sha mi i sha togula, i gema i wa akaa sha azongo a anyiin la, a a kôr akaver man itiran la tile a mi yô. I er aheran sue gbangi la shin ityô na, i gema i er akaa a lun er faluwa u i tume nahan sha aheran la cii.
31 I wa gbangi la nyôr shin ian i kwagh u lu gbilititi, u i er sue un la; ian la lihe ishiva i môm, shi i lu gbilititi. Mough hen aheran a a sue gbanyi la va sha zwa na, lihe ishiva i môm man tiôn. I gema i er akaa a hweegh sha zwa na. Ikpande i ken ambusu a kwagh u gbilititi la lu azongo anyiin, lu gbilititi ga.
32 Akaver a na a anyiin la, lu ikpande i ken ambusu la shin inya, i gema i wa akaa kôr akaver a sha kwagh u tôôn ikyav la. Hanma ikyaver yô, tav ishiva i môm man tiôn.
33 Shi i er akaver la, lu er akaver a ikyekye i kperan a kpera nahan. Akaa a kôron a, man uwii man uwaya man ityev mbi a cii, i er sha iyô.
34 Hanma kwagh u tôôn ikyav a mi yô, lu a akaa anyiin sha azongo a na anyiin, a kôron akaver man itiran; i er akaa ne* a kwagh u tôôn ikyav a mi la gedee.
35 Kwagh u gbilititi u sue gbangi u lu sha kwagh u tôôn ikyav la, tav tiôn ishiva. I er akaa a a kôr kwagh u gbilititi la, man ikpande i ken ambusu a na la cii a kwagh u tôôn ikyav la gedee.*
36 A er hwe u ucerubi man ubegha kua avile ape ian lu cii, sha akaa a a kôr kwagh u gbilititi la, man sha ikpande i ken ambusu a kwagh u gbilititi la; shi a er akaa a lun er ufaluwa mba i tume nahan sha mi ningir tser.+
37 Kape yange er akaa a tôôn ikyav a pue la+ je la; i er a cii lu kwaghmôm,+ ikyaren man mluashe u a, lu kwaghmôm.
38 A er ugbangi mba sha togula pue;+ hanma yô, a tôô ubav mba mngerev uikyaren 40. Hanma gbangi yô, gbanger aseva anyiin. Hanma kwagh u tôôn ikyav ken akaa a pue a tôôn ikyav la, lu a gbangi môm.
39 Maa a ver akaa a tôôn ikyav ataan vegher u ken iyan u iyou la, a gema a ataan agen la a ver ken imese u iyou la, shi a ver Zegegbangi u Mnger la ken iyan u iyou la, vegher u sha ityoughkitaregh.+
40 Hiram+ shi er ugbangi man ushebul+ kua agbande.+
Nahan Hiram er tom sha iyou i Yehova sha ci u Tor Solomon cii bee:+
41 lu mtôm mhar+ man mtem ma ma lu sha ityouv mbi mtôm ma mhar mara, man uhwe uhar mba lun er kper nahan+ sha u cirin mtem mhar, ma ma lu sha ityouv mbi mtôm mara la;
42 man upomegraneti 400+ sha ci u uhwe uhar mba i er ve lu er kper nahan la, man iniongo ihiar i pomegraneti sha ci u hanma hwe u lun er kper nahan la, sha u cirin mtem mhar ma ma lu sha ityouv mbi mtôm ma mhar mara la;
43 man akaa a pue a tôôn ikyav la,+ man ugbangi pue+ mba ve lu sha akaa a tôôn ikyav shon la;
44 man Zegegbangi u Mnger+ la kua anomabua 12 a a lu shin ityô i Zegegbangi u Mnger shon la;
45 man akaa a haan mtwem shimi man ushebul man agbande, kua ikyav mbigen cii mbi Hiram er sha togula u engem sha ci u Tor Solomon man sha ci u iyou i Yehova la.
46 Tor ker akaa ne hen inyatyuu i tiher i hen haregh u Yordan, hen atô u Sukoti man Saretan.
47 Ikyav mbigen mbira cii Solomon kar myohom ma mbi ga, sha ci u mbi ngee kpishi je yô, i fa myohom ma togula la ga.+
48 Solomon er ikyav mbi ken iyou i Yehova cii: lu atse a nan nagh+ a sha zanaria; man tebul u sha zanaria+ u a veren beredi u sha ishigh ki Aôndo sha mi la;
49 man udaarmbaamengerev+ mba i er sha zanaria u wang yô; utaan lu ken iyan, utaan lu ken imese, sha ishigh ki kparyou u hemban lun ken atô cii la; man uimondon mba faluwa+ man amenger man ugbegba,* ve cii i er ve sha zanaria.+
50 man ugbangi man akaa a pirin usu a mi+ man agbande man ukôôpu+ man agbande a usu,+ ve cii i er ve sha zanaria u wang; man akaa a kôron ihinda i iyou i ken atô la,+ ka Icighankpar u Hemban Cii je la man akaa a kôron ihinda i iyou i tempel la cii,+ i er sha zanaria.
51 Tsô Tor Solomon er hanma tom u gba u una er sha ci u iyou i Yehova la cii bee. Solomon maa nyôr a akaa a ter na Davidi tsegha a la,+ shi a ver azurufa man zanaria kua akaa agen ken ayou a koson akaainjaa ken iyou i Yehova la.+
Ngeren mba shin kpe
^ Shin “ya u tor.”
^ Ishiva i môm yange i lu usentimita 44.5. Nenge Ngeren u Seer u B14 la.
^ A fatyô u lun itiran la.
^ Shin “Varenda.”
^ Shin “Varenda.”
^ Shin “iyou i tor.”
^ Shin “iyôgh ki bronz,” heen man ajiir agen ken ityough kin cii.
^ Heen mba ôron ka kwagh u Icighanjiir.
^ Shin “imbusutariyan.”
^ Inja na yô ér, “A [Ka Yehova je la] A Na i Taver Gbang.”
^ Shin “ken imbusutarimese.”
^ Inja na a fatyô u lun “A Agee.”
^ Bav môm yange a lu Ulita 22. Nenge Ngeren u Seer u B14 la.
^ Nôngo u kuman er usentimita 7.4 nahan. Nenge Ngeren u Seer u B14 la.
^ Shin “akeke a tôôn mngerem.”
^ Shin “a lu gungur môm.”
^ Shin “ve lu gungur môm.”
^ Shin “akambe a dughun usu a mi.”
