Utor u Hiihii 2:1-46
2 Shighe zurum u Davidi una kpe yô, a wa wan na Solomon kwagh, a kaa ér:
2 “Kuma u me kpe hegen,* nahan tile dông,+ shi tese wer u ngu nomsoor.+
3 Gba kpee u u ungwan imo i Yehova Aôndo wou, u zenden sha igbenda na shi u dondon akaawan a na, shi u kuran atindi a na shi u dondon ajiraôron a na, kua akaa a a umbur se la, er i nger ken Tindi u Mose nahan;+ nahan hanma kwagh u u er, man hanma ijiir i u gem cii, kwagh una za a we a doo.*
4 Nahan Yehova una kure ityendezwa i a er sha kwagh wam la, ér: ‘Aluer ônov ou ver ishima sha gbenda ve, mba zenden sha mimi sha ishigh yagh, a ishima ve cii man a uma ve cii yô,+ mayange or nana ban hen tsombor wou* u nana tema sha ikyônough ki torough ki Iserael ga.’+
5 “We kpa u fa kwagh u Yoabi wan u Seruya yange er a mo la tsembelee. Yange wua ukurmbautyaav mba akumautya a Iserael uhar—lu Abiner+ wan u Ner, man Amasa+ wan u Yeter. A wua ve a haa awambe inya+ shighe u i lu nôngon ityav ga yô, shi a haa awambe sha kwange na u hen iwenge man sha akôv a na a shin angahar, shighe u i lu nôngon ityav ga yô.
6 Gba kpee u u er kwagh sha kwaghfan wou, nahan de deen wer ivu na i sen shin Uwar* bem bem ga.+
7 “Kpa gema tesen ônov mba Barshilai+ Orgileadi la dooshima tsung, shi ve lu ken ior mba yan kwagh sha tebul wou, sha ci u kape ve kpa yange ve kendem shighe u m yevese anmgbian wou Abesalom+ ga je la.+
8 “Shimei wan u Gera Orbenyamin, u ken Bahurim la kpa ngu vea we. Ka un yange tuhwam kpishi,+ sha iyange i m lu zan ken Mahanaim la ye;+ kpa va senen u za keghen mo gbenda hen Yordan yô, m bum a na ken iti i Yehova mer: ‘Me wua u sha sanker ga.’+
9 Nahan tsaha un kpee+ sha ci u u ngu or u lun a kwaghfan, shi u fa kwagh u u er a na yô; gba u u sen a ivu na shin Uwar* a awambe kpee je.”+
10 Tsô i ii Davidi vea uter nav, i ii un ken Gar u Davidi.+
11 Shighe u* Davidi hemen Iserael yô, lu anyom 40. Yange hemen anyom 7 ken Heberon,+ gema hemen anyom 33 ken Yerusalem.+
12 Solomon maa tema sha ikyônough ki torough ki ter na Davidi, nahan kure kure tsô tartor na taver gbang.+
13 Shighe kar yô, Adoniya wan u Hagiti va hen Batesheba, ngô u Solomon. Maa Batesheba pine un ér: “U va ka bem kpa?” A gema a kaa ér: “Een, m va ka bem.”
14 Adoniya kaa ér: “M ngu a kwagh u m soo u ôron we yô.” Tsô a kaa ér: “Ôr ase.”
15 Adoniya za hemen kaa ér: “U fa wang er tor lu u wam shi Iserael cii ver ishima* sha a mo ér mo m hingir tor yô;+ kpa tor va karem, hingir u anngôm, sha ci u Yehova soo ér i lu u na.+
16 Kpa hegen yô, m ngu sônon kwagh môm hen a we tsô. De vendan ga.” Tsô Batesheba kaa a na ér: “Ôr ase.”
17 Maa a kaa ér: “Wea lumun yô, ôr Tor Solomon a nam Abishagi+ Wanshunam la a hingir kwase wam, sha ci u una nyume u kwagh ga.”
18 Batesheba gema kaa ér: “U ôr doo! Me lam a tor sha ci wou.”
19 Tsô Batesheba nyôr za kohol Tor Solomon, u lamen a na sha ci u Adoniya. Fese je tor mough za kohol un, ngurum sha ishigh nagh. Maa tor tema sha ikyônough nagh ki torough, shi a kaa ér i ver ngô u tor kpa ikyônough ki torough, sha er una tema un ken iyan yô.
20 Maa a kaa ér: “M ngu a ankwagh u m soo mer er sha ci wam yô. De vendan ga.” Tor gema kaa a na ér: “Ôrom, ngôm; sha ci u me nyume u kwagh ga.”
21 A kaa ér: “De Abishagi Wanshunam la, a hingir kwase u anmgbian wou Adoniya.”
22 Tor Solomon gema kaa a ngô na ér: “U ngu kaan wer m na Adoniya Abishagi Wanshunam la sha ci u nyi? Tor je kpa u va sôn sha ci na,+ gadia ka anmgbian wam u vesen,+ shi pristi Abiatar man Yoabi+ wan u Seruya+ mba suen un.”
23 Tsô Tor Solomon bum ken iti i Yehova kaa ér: “Aluer Adoniya kpe sha ci u kwagh u a sen ne ga yô, Aôndo a tsaham tsung.
24 Mimi je, er Yehova u a taver mo gbang+ shi a verem sha ikyônough ki torough ki terem Davidi, shi a maa ya* sha ci wam,+ vough er yange tôndo zwa la, a lu u uma ne, a wua Adoniya+ nyian.”
25 Fese je, Tor Solomon tindi Benaia+ wan u Yehoyada, due za ta num sha Adoniya, wua un kende inya.
26 Kpa tor gema kaa a pristi Abiatar+ ér: “Yem hen ishule you ken Anatoti!+ U kuma ku, kpa sha iyange ne yô, me wua u ga, sha ci u yange u tôô Areki u Yehova Ter u Hemban Cii la, sha ishigh ki terem Davidi,+ man sha ci u atsan a terem ya la cii, u ya vea na.”+
27 Tsô Solomon zenda Abiatar, de u eren tom u pristi u Yehova, sha u kuren kwaghôron u Yehova ôr sha ya u Eli+ ken Shilo+ la.
28 Ibaver va nyôron a Yoabi yô, Yoabi yevese yem ken tenti u Yehova,+ za kôr ave sha akor a atse a nan nagh la, sha ci u Yoabi yange sue Adoniya,+ kpa gema venda u suen Abesalom.+
29 Tsô i za kaa a Tor Solomon ér: “Yoabi yevese yem ken tenti u Yehova, ngu her, hen kpe u atse a nan nagh la.” Maa Solomon tindi Benaia wan u Yehoyada, kaa a na ér: “Za wua un kende inya!”
30 Nahan Benaia za ken tenti u Yehova za kaa a na ér: “Ka kwagh u tor a kaa ne, ér, ‘Due kera!’” Kpa a gema a kaa ér: “Ei! Me kpe heen.” Benaia hide va kaa a tor ér: “Ka kwagh u Yoabi a kaa ne, shi ka kwagh u a gem a ôrom kpaa je ne.”
31 Tor maa kaa a na ér: “Er vough er a kaa nahan; wua un za ii, nahan kar a awambe a Yoabi yange haa inya a ityôkyaa shio la,+ hen a mo man hen ya u terem kera.
32 Yehova una hide a awambe a na sha ityough nagh, sha ci u yange ta num sha nomso uhar mba ve hemba lun perapera a na, shi ve hemba doon inja a na yô, wua ve sha sanker, a mfe u terem Davidi shio: Lu Abiner+ wan u Ner, kurutya u ikyumutya i Iserael,+ man Amasa+ wan u Yeter, kurutya u ikyumutya i Yuda.+
33 Me hide a awambe a ve sha ityough ki Yoabi, man sha ityough ki wan na* gbem sha won;+ kpa bem u Yehova a lu sha Davidi, man sha wan na,* man sha ya na, man sha ikyônough nagh ki torough gbem sha won.”
34 Nahan Benaia wan u Yehoyada kôndo za wua un kende inya, maa i za ii un hen ya na ken taaikyôngo.
35 Tsô tor ver Benaia+ wan u Yehoyada hingir orhemen u ikyumutya la sha ityough nagh, shi tor ver pristi Sadoki+ sha ian i Abiatar lu sha mi la.
36 Tor maa yila Shimei+ kaa a na ér: “Za maa ya wou ken Yerusalem lu her; de dugh her yemen ijiir igen i môm ga.
37 Sha iyange i u due u per Pev u Kideron la,+ fa wer u kpe kpee a bunde ga; awambe a ou aa lu sha ityough you.”
38 Shimei gema kaa a tor ér: “Kwagh u u ôr la vihi ga. Wanye wou una er vough er terem tor a kaa nahan.” Nahan Shimei lu ken Yerusalem ayange kpishi.
39 Kpa anyom atar nga been yô, ikpan i Shimei ihiar yevese yem hen Akishi+ wan u Maaka, tor u Gati. Mba za ôron Shimei ér: “Nenge! Ikpan you ngi ken Gati” yô,
40 fese je, Shimei kange shidi* sha jaki na, henda yem hen Akishi ken Gati u za keren ikpan na. Shimei hidi ken Gati a ikpan na yô,
41 i za kaa a Solomon ér: “Shimei due ken Yerusalem za ken Gati shi cin hide.”
42 Tsô tor yila Shimei kaa a na ér: “Yange m na u bum ken iti i Yehova, shi m ta u icin mer: ‘Sha iyange i u due heen u yem ijiir igen yô, fa wer u kpe kpee a bunde ga’ zee? Shi we kpa u kaa wer, ‘Kwagh u u ôr la vihi ga; me ungwa imo you’ ga zee?+
43 Nahan er nan u we ibumun i Yehova ikyo ga, shi u kor tindi u m we u la ga?”
44 Tor maa kaa a Shimei ér: “U fa hanma iferkwagh i u er a terem Davidi la cii ken ishima you wang,+ nahan Yehova una hide a iferkwagh shon sha ityough you.+
45 Kpa Tor Solomon yô, a ver un doo doo,+ shi ikyônough ki torough ki Davidi kia taver gbang sha ishigh ki Yehova gbem sha won.”
46 Tsô tor na Benaia wan u Yehoyada zwa, due za wua un kende inya.+
Sha nahan yô, tartor la taver gbang sha uwegh ku Solomon.+
Ngeren mba shin kpe
^ Zwa Heberu, “Nyian ne, m ngu zan sha gbenda u ior mba shin tar cii ve ze sha mi la.”
^ Shin “u er kwagh sha kwaghfan.”
^ Zwa Heberu, “or nana tôndo hen a we.”
^ Shin “Sheol,” ka uwar u uumace je la. Nenge Ngeren u Pasen Asember.
^ Shin “Sheol,” ka uwar u uumace je la. Nenge Ngeren u Pasen Asember.
^ Zwa Heberu, “Ayange a.”
^ Zwa Heberu, “ver mshim vev.”
^ Shin “a ver hementor.”
^ Shin “ônov nav.”
^ Shin “ônov nav.”
^ Ka kwagh u pendan zendenya sha igyundu teman sha mi.
