Utor u Hiihii 14:1-31
14 Hen shighe la, Abiya wan u Yeroboam gba angev.
2 Nahan Yeroboam kaa a kwase na ér: “Wea lumun yô, mough sha, yer iyol sha er a fa ér u ngu kwase u Yeroboam ga yô, nahan za ken Shilo. Nenge! Profeti Ahiya ngu ker. Ka un yange kaa ér mo me tema tor sha ior mban ye.+
3 Tôô ikpenberedi pue man uberedi mba lun par par, kua ikpa i iyoughough, za hen a na. Nahan una ôr u kwagh u una er wannomso la yô.”
4 Kwase u Yeroboam er kwagh u kaa la. A mough a yem hen Shilo,+ a za nyôr hen ya u Ahiya. Ashe a Ahiya lu nôôr, kera faantyô u nengen ga, sha ci u bee iyol.
5 Kpa Yehova kaa a Ahiya ér: “Nenge! Kwase u Yeroboam ngu van u va pinen we kwagh u wan na u nomso, sha ci u a gba angev. Me ôr u kwagh u u ôr un yô.* Una yer iyol shighe u una va la.”
6 Ahiya ongo acin a angahar a kwase la, er lu nyôron sha hunda la yô, fese je a kaa ér: “Kwase u Yeroboam, nyôr ker. Er nan u lu yeren iyolo? I kaa ér mo m ôr u loho u vihin tsung.
7 Hide za ôr Yeroboam wer, ‘Ka kwagh u Yehova Aôndo u Iserael a kaa ne, ér: “Yange m tsua u hen atô u ior ou, sha u me ver u orhemen sha ior av Iserael yô.+
8 Maa m ande tartor la hen ya u Davidi kera, m gema u m na u.+ Kpa u ngu er ortom wam Davidi nahan ga; un yange kuran atindi a am shi dondom a ishima na cii, eren kwagh u vough tseegh sha ishigh yagh.+
9 Kpa u er kwagh hemba vihin a mba ve vande lun a we la cii, u er aôndo ugen man ieev mbi iyôôv* sha ci wou sha u vihin mo ishima,+ shi ka mo u gem ijime a mo ye.+
10 Sha ityôkyaa ne yô, m ngu van a kwaghtseren sha ya u Yeroboam, shi me bee a* hanma nomsoor* u Yeroboam kera, kua mba ve lu a or u wasen ve ga, shi i vôr ve iyol ken Iserael la, shi me ese ya u Yeroboam vindi vindi,+ vough er or ka nan ese ambi a uile kera zan zan a kera lu ga nahan!
11 Hanma or u Yeroboam u nana kpe ken gar yô, aniwaav vea ya nan; shi hanma or u nana kpe ken toho yô, inyon i sha ia ya nan, sha ci u ka Yehova a ôr nahan ye.”’
12 “Hegen yô, mough sha, yem hen ya wou. Ú za nyôron ken gar yô, wan la una kpe.
13 Iserael cii una vaa un shi una ii un, sha ci u ka un tseegh a ii un ken uwar ken tsombor u Yeroboam ye, gadia ken ya u Yeroboam cii, ka un tseegh Yehova Aôndo u Iserael a zough un a kwagh u dedoo ye.
14 Yehova una va a tor sha ci na, u nana tema tor sha Iserael yô; ka nan nana bee a* ya u Yeroboam,+ hii sha iyange la zan zan yem ken hemen ye, een, hegen je kpaa.
15 Yehova una tsaha Iserael, una hingir er kunakwa u u lu tenger sha mnger nahan, shi una wuhe Iserael ken tar u dedoo u yange na uter vev ne kera,+ shi una sambe ve Ifi* yande la,+ sha ci u ve er mtôm ma akombom ma sha ikyon,*+ nahan ve vihi Yehova ishima.
16 Shi una undu Iserael sha ci u asorabo a Yeroboam a er shi a ne Iserael kpa a er la.”+
17 Tsô kwase u Yeroboam mough sha, yem za nyôr hen Tirsa. Za nyer hen hunda u iyou na yô, wannomso la kpe.
18 Nahan i ii un, Iserael cii vaa un, vough er Yehova ôr sha ikyev i ortom na profeti Ahiya nahan.
19 Akaa agen ken yiase i Yeroboam cii, er nôngo ityav+ man er hemen la, i nger ken takeda u yiase i sha ayange a utor mba Iserael la.
20 Shighe u* Yeroboam tema tor yô, lu anyom 22, maa a kpe, i ii un a uter nav;+ Nadabi wan na kar tema tor sha ityough nagh.+
21 Hen shighe ne, Rehoboam wan u Solomon tema tor sha Yuda. Rehoboam lu anyom 41 shighe u hingir tor la, a hemen anyom 17 ken Yerusalem, gar u Yehova tsua+ ken uipyaven mba Iserael cii ér, a lu ijiir i una ver iti na her la.+ I yilan ngô u Rehoboam ér Naama, lu Wan-amon.+
22 Yuda lu eren kwaghbo sha ishigh ki Yehova,+ shi asorabo a ve la na yô, ve vihi un ishima ker hemba er uter vev vihi un ishima la.+
23 Ve kpa ve lu maan ajiir a taven sha, sha ci ve ayol a ve, man mtôm ma akombom ma awenem kua mtôm ma akombom ma sha ikyon,*+ sha hanma igyungu i taven+ man shin hanma itinekon u lun gese gese.+
24 Shi nomso mba eren gbaga ken tempel kpa lu ken tar la.+ Ve lu eren akaa a ndôhôr ishima a akuraior a Yehova zenda a sha ishigh ki Mbaiserael, eren la cii.
25 Ken inyom i sha utaan i Rehoboam tema tor la, Shishaki+ tor u Igipiti kôndo va ta ityav sha Yerusalem.+
26 A kura akaainjaa a ken iyou i Yehova man akaainjaa a hen ya u tor.*+ A kura hanma kwagh, kua ipyerutya i sha zanaria i Solomon er la cii.+
27 Nahan Tor Rehoboam er ipyerutya sha togula ver sha ityough ki ingira, a ver i sha ikyev i mbahemen mbakuran* mba ve kuran hunda u ya u tor la.
28 Hanma kwa u tor una va ken iyou i Yehova yô, mbakuran ve tôô i, shi ve hide a i ve yem a mi ken iyou i mbakuran.
29 Akaa agen ken yiase i Rehoboam cii, akaa a a er cii, i nger ken takeda u yiase i sha ayange a ator a Yuda la.+
30 Rehoboam man Yeroboam nôngon ityav hanma shighe.+
31 Tsô Rehoboam kpe, i ii un vea uter nav ken Gar u Davidi.+ I yilan ngô na ér Naama, lu Wan-amon.+ Maa wan na Abiyam*+ kar tema tor sha ityough nagh.
Ngeren mba shin kpe
^ Shin “Ôr un kwagh ne man ngura.”
^ Shin “ieev mbi keren a ker.”
^ Zwa Heberu, “tôndo.”
^ Zwa Heberu, “ma or u nyanden sha kpekpe.” Ka ishemberkwaghôron i ken zwa Heberu i lahan nomso a mi.
^ Zwa Heberu, “tôndo.”
^ Ka Uferati je la.
^ Nenge Ngeren u Pasen Asember, “Ityôgh ki akombough ki sha kon.”
^ Zwa Heberu, “ayange a.”
^ Nenge Ngeren u Pasen Asember, “Ityôgh ki akombough ki sha kon.”
^ Shin “iyou i tor.”
^ Zwa Heberu, “mbayevese.”
^ I yilan un kpaa ér Abiya.
