Utor u Hiihii 11:1-43
11 Kpa kasev kpishi mba ken akuraior agen+ doo Tor Solomon ishima. Dugh wan u Farou+ kera yô, kasev mba Moabi+ doo un ishima, kua kasev mba Amon+ man kasev mba Edom man kasev mba Shidon+ man kasev mba Mbahiti.+
2 Ve lu kasev mba ken akuraior a Yehova kaa a Mbaiserael ér: “De za luun nen vea ve imôngo ga,* ve kpa ve de vôson ne ga, shi ve kpa ve de va luun vea ven imôngo ga la, sha ci u vea gema asema a en, ne hingir u dondon mbaaôndo vev kpee je.”+ Kpa Solomon var a ve gbang shi ve doo un ishima.
3 Shi lu a kasev 700 mba ve lu ônov mba utor yô, man kasev mba sha uikya 300. Tegh tegh tsô kasev nav mban gema un ishima.
4 Solomon va been iyol yô,+ kasev nav gema un ishima hingir u dondon mbaaôndo mbagenev,+ nahan a kera ver ishima na cii sha Yehova Aôndo na,* er ter na Davidi er nahan la ga.
5 Shi Solomon dondo Ashetaroti,+ inmgbianaôndo* u Mbashidon man Milkom,+ aôndo u ndôhôrshima u Mbaamon la.
6 Nahan Solomon er kwaghbo sha ishigh ki Yehova, a dondo Yehova a ishima na i môm,* er ter na Davidi er nahan ga.+
7 Lu hen shighe ne, Solomon maa ijiir i taven+ sha ci u Kemoshi, aôndo u ndôhôrshima u Moabi, sha uwo u u lu sha ishigh ki Yerusalem man sha ci u Moleki,+ aôndo u ndôhôrshima u Mbaamon la ye.+
8 Lu kwagh u er sha ci u kasev nav mba vôso ken akuraior agen, mba ve lu nanden iniav mnyim lu duen, shi ve lu nan mbaaôndo vev iniav la cii je la.
9 Tsô ishima vihi Yehova a Solomon tsung, sha ci u ishima na kera lu hen Yehova Aôndo na ga,+ un u yange ande hen a na kwa har+
10 shi ta un icin sha kwagh ne ér a de dondon mbaaôndo mbagen ga la.+ Kpa ungwa kwagh u Yehova kaa la ga.
11 Nahan Yehova kaa a Solomon ér: “Er u er kwagh ne, shi u kor ikyuryan yam man akaawan a am, er m kaa u la ga yô, me ande tartor la hen a we kera, me gema u me na orgen ken mbatomov ou+ kpee a bunde ga.
12 Nahan kpa, sha ci u teru Davidi yô, me er kwagh ne hen shighe u u lu uma ne ga. Ka sha uwegh ku wan wou me ande u kera ye,+
13 kpa me ande tartor la cii kera ga.+ Me na wan wou ipyaven i môm,+ sha ci u ortom wam Davidi man sha ci u Yerusalem, u m tsough la.”+
14 Yehova maa va a or u hendan kwagh a Solomon,+ lu Hadadi Oredom u ken tsombor u tor u Edom.+
15 Shighe u Davidi hemba Edom ityav la,+ Yoabi kurutya la kôndo za sha u za iin mba i wua ve la, shi nôngo ér una wua hanma nomsoor ken Edom.
16 (Gadia Yoabi man Iserael cii lu her iwer ataratar, zan zan a kar been a* hanma nomsoor ken Edom.)
17 Kpa Hadadi yevese vea Mbaedom mbagen mba ve lu mbatomov mba ter na yô, ve yem ken Igipiti; Hadadi lu wanye hen shighe la.
18 Tsô ve mough hen Midian, ve va hen Paran. Maa ve kua a nomso mbagen hen Paran,+ ve va ken Igipiti hen Farou tor u Igipiti; Farou na un ya, shi kaa ér i naan un kwaghyan, shi na un inya kpaa.
19 Kwagh u Hadadi doo Farou je yô, a na un won na u kwase a vôso. Won na ne lu anmgbian u kwase na, torkwase* Tapeneshi.
20 Shighe kar yô, anmgbian u Tapeneshi u kwase la mar Hadadi wan u nomso, i yilan un ér Genubati. Tapeneshi maa yese un* ken ya u Farou, nahan Genubati lu hen ya u Farou vea ônov mba Farou imôngo.
21 Hadadi ungwa ken Igipiti ér i ii Davidi vea uter nav,+ shi Yoabi kurutya la kpa kpe.+ Nahan Hadadi kaa a Farou ér: “Nam ian m hide m yem ken tar wam.”
22 Kpa Farou pine un ér: “Ka nyi i ban u hen a mo ve, hegen u lu keren u yemen ken tar wouwe?” A gema a kaa ér: “Kwagh môm banem ga, kpa wea lumun yô, nam ian m yem.”
23 Aôndo shi va a orgen u hendan kwagh a Solomon,+ i yilan un ér Reson, un lu wan u Eliada u yevese orvesen na Hadadeser,+ tor u Soba la.
24 Yange kohol nomso ve lu vea na, maa a hingir kurutya u mbayanishar shighe u Davidi hemba ve ityav* la.+ Nahan ve yem ken Damaseku,+ ve za tema her, ve gba hemen ken Damaseku.
25 Shi a hingir orhendan kwagh a Iserael sha ayange a Solomon cii, a va a zayol er Hadadi nahan. Shighe u lu hemen Shiria la, kwagh u Iserael vihi un ishima tsung.
26 Shi Yeroboam+ wan u Nebati kpa lu, un lu Oreferaim ken Sereda, lu ortom u Solomon,+ i yilan ngô na ér Serua, un lu kwasecôghol. Un kpa hii u hemban* tor ato.+
27 Ka kwagh u na ve hemba tor ato je ne: Solomon yange maa Igyungu,*+ cir ian i ken kpekpe, i Gar u Davidi ter na la.+
28 Hen shighe ne, Yeroboam ne lu orageegh. Solomon nengen ér gumor ne ka or u eren tom kpoghuloo yô, a ver un orhemen+ sha ior mba i kighir ve, ve lu eren tom hen ya u Yosev la cii.
29 Hen shighe la, Yeroboam due ken Yerusalem, maa profeti Ahiya+ Orshilo la za nenge a na sha gbenda. Ahiya hua ikyondo i he, ve lu ken toho ve uhar tseegh.
30 Tsô Ahiya kôr ikyondo i he i hua la, ande ker abamber 12.
31 Maa a kaa a Yeroboam ér:
“Tôô abamber pue sha ci wou, gadia ka kwagh u Yehova Aôndo u Iserael a kaa ne, ér: ‘Hegen m ngu anden tartor la sha uwegh ku Solomon kera, me gema me na u uipyaven pue.+
32 Kpa ipyaven i môm ia lu i na her+ sha ci u ortom wam Davidi,+ man sha ci u Yerusalem, gar u m tsough ken uipyaven mba Iserael cii la.+
33 Me er kwagh ne sha ci u ve undum,+ mba za guren Ashetaroti, inmgbianaôndo* u Mbashidon la inya, kua Kemoshi aôndo u Moabi, man Milkom aôndo u Mbaamon, shi ve zende sha igbenda yam ga, mba eren kwagh u vough sha ishigh yagh ga, shi mba dondon akaawan a am man ajiraôron a am, er ter na Davidi er nahan la ga.
34 Kpa me ngohol tartor la cii sha uwegh nagh kera ga, shi me de una za hemen u lun orhemen sha ayange a uma na cii, sha ci u ortom wam Davidi u m tsough la,+ gadia yange kura atindi a am man akaawan a am.
35 Kpa me ngohol hementor la sha uwegh ku wan na, me gema me na u, ka uipyaven pue je la.+
36 Me na wan na ipyaven i môm, sha er ortom wam Davidi una lu a imenger sha ishigh yagh hanma shighe ken Yerusalem,+ gar u m tsough sha ci wam mer iti yam i lu her la yô.
37 Me tôô u, u hemen sha hanma kwagh u u soo cii, shi u tema tor sha Iserael.
38 Shi aluer u er hanma kwagh u m kaa u, shi u ngu zenden sha igbenda yam, shi u ngu eren kwagh u vough sha ishigh yagh, sha u dondon akaawan a am man atindi a am, vough er ortom wam Davidi er nahan la yô,+ we kpa me lu a we. Me maa u iyou i tsôron vough er m maa Davidi nahan,+ shi me na u Iserael.
39 Shi me hee ônov mba Davidi sha ci u kwagh ne,+ kpa a lu gbem sha won ga.’”+
40 Nahan Solomon nôngo ér una wua Yeroboam, kpa Yeroboam yevese yem ken Igipiti, hen Shishaki+ tor u Igipiti,+ a za lu ken Igipiti zan zan Solomon kar kpen.
41 Akaa agen ken yiase i Solomon cii, ka hanma kwagh u er man kwaghfan na je la, i nger ken takeda u yiase i Solomon la.+
42 Shighe u* Solomon tema tor sha Iserael cii ken Yerusalem yô, lu anyom 40.
43 Tsô Solomon kpe, i ii un vea uter nav, i ii un ken Gar u ter na Davidi; maa wan na Rehoboam+ kar tema tor sha ityough nagh.
Ngeren mba shin kpe
^ Shin “De vôson nen ve ga.”
^ Shin “civir un a ishima na cii.”
^ Shin “aôndo u kwase.”
^ Zwa Heberu, “cii.”
^ Zwa Heberu, “tôndon.”
^ Lu torkwase, kpa lu hemen ga.
^ Shin a fatyô u kaan ér, “de un ityumba.”
^ Zwa Heberu, “wua ve.”
^ Zwa Heberu, “kende uwegh nagh sha.”
^ Shin “Milo.” Inja i ishember ne ken zwa Heberu ér “iv.”
^ Shin “aôndo u kwase.”
^ Zwa Heberu, “ayange a.”
