Utor u Hiihii 15:1-34
15 Ken inyom i sha 18 i Yeroboam+ wan u Nebati tema tor la, Abiyam hingir tor u Yuda.+
2 Yange hemen ken Yerusalem anyom atar. I yilan ngô na ér Maaka,+ lu wan u wan u Abishalom.
3 A za hemen u eren asorabo a ter na vande eren la cii, shi ishima na lu sha Yehova Aôndo na jighilii,* er ishima i ter na u tamen Davidi lu nahan ga.
4 Nahan kpa, sha ci u Davidi yô,+ Yehova Aôndo na, na un imenger ken Yerusalem;+ a ver wan na sha ityough nagh sha er Yerusalem una lu her yô.
5 Gadia Davidi er kwagh u vough sha ishigh ki Yehova, kwagh môm u kaa ér Davidi a er sha ayange a uma na cii, u er ga yô lu ga, saa di kwagh u Uria Orhiti la tseegh.+
6 Shi ityav lu hen atô u Rehoboam man Yeroboam sha ayange a uma na cii.+
7 Akaa agen ken yiase i Abiyam cii, hanma kwagh u er la cii, i nger ken takeda u yiase i sha ayange a utor mba Yuda la.+ Shi ityav lu hen atô u Abiyam man Yeroboam.+
8 Tsô Abiyam kpe, i ii un vea uter nav ken Gar u Davidi, maa wan na Asa+ kar tema tor sha ityough nagh.+
9 Ken inyom i sha 20 i Yeroboam lu tor u Iserael la, Asa hii u hemen Yuda.
10 Yange hemen ken Yerusalem anyom 41. I yilan ngô u ter na ér Maaka,+ un lu wan u wan u Abishalom.
11 Asa er kwagh u vough sha ishigh ki Yehova,+ er ter na u tamen Davidi nahan.
12 A zenda nomso mba eren gbaga ken tempel ken tar la kera,+ shi a bee a ieev mbi ndôhôrshima* mbi uter nav er la cii.+
13 Shi a dugh ngô na u tamen Maaka+ torkwase kera je kpaa, gadia a er eev mbu ndôhôrshima sha u i civir ityôgh ki akombough ki sha kon* la yô. Asa gber eev nav mbu ndôhôrshima mbura,+ za nande mbu shin Pev u Kideron.+
14 Kpa i bee a ajiir a taven la ga.+ Nahan kpa, ishima i Asa lu sha Yehova jighilii* sha ayange a uma na cii.
15 Shi a va a akaa a un man ter na ve tsegha la ken iyou i Yehova, lu azurufa man zanaria kua ikyav mbigenev kposo kposo.+
16 Ityav lu hen atô u Asa man Baasha+ tor u Iserael hanma shighe cii.
17 Nahan Baasha tor u Iserael kôndo u za nôngon ityav a Yuda, maa gba va maan Rama*+ sha er or môm nana de duen shin nyôron hen* Asa tor u Yuda ga yô.+
18 Nahan Asa kura azurufa man zanaria mba ve shi ken ayou a koson akaainjaa a ken iyou i Yehova man ayou a koson akaainjaa a ken iyou i tor* la cii, na sha ikyev i mbatomov nav. Tor Asa maa tindi ve hen Ben-hada wan u Taberimon wan u Heshion, tor u Shiria,+ u lu ken Damaseku la, kaa ér:
19 “Ikyuryan ngi hen atô wam a we, man hen atô u terem a teru. Nenge, m ngu tindin we a iyua i azurufa man zanaria. Yô, va va vihi ikyuryan you a Baasha tor u Iserael, sha er una due ken tar wam kera yô.”
20 Ben-hada ungwa kwagh u Tor Asa ôr la, nahan a tindi ukurmbautyaav mba akumautya a na za ta ityav sha agar a Iserael, ve ngohol Iyon+ man Dan+ man Abel-bete-maaka man Kinereti cii, kua tar u Nafetali cii.
21 Baasha ongo kwagh ne yô, fese je a de u maan Rama,* kpa a lu ken Tirsa her.+
22 Tor Asa maa yila ior mba ken Yuda cii, i undu or môm ken inya ga, ve za kura awen man ikyon i Rama, i Baasha lu maan kwagh a mi la, Tor Asa gema awen man ikyon la maa* Geba+ ken Benyamin man Misepa+ a mi.
23 Akaa agen ken yiase i Asa cii, ityom na i ageegh cii man akaa a a er la cii, kua agar a a maa* la, i nger ken takeda u yiase i sha ayange a ator a Yuda la. Kpa va been iyol yô, a gba angev sha angahar.+
24 Tsô Asa kpe, i ii un vea uter nav ken Gar u Davidi, ter na u tamen; wan na Yehoshafati+ kar tema tor sha ityough nagh.
25 Ken inyom i sha uhar i Asa tema tor sha Yuda la, Nadabi+ wan u Yeroboam hingir tor u Iserael, a hemen Iserael anyom ahar.
26 A za hemen u eren kwaghbo sha ishigh ki Yehova, zenden sha gbenda u ter na,+ shi eren isholibo i ter na er, shi na Iserael kpa er la.+
27 Baasha wan u Ahiya u ken ipyaven u Isakar er ayom a wuan un. Baasha maa za wua un hen Gibeton,+ gar u Mbafiliti. Hen shighe ne, Nadabi man Iserael cii, kase u nôngon ityav a Gibeton.
28 Nahan Baasha wua un ken inyom i sha utar i Asa tema tor sha Yuda la, maa a kar a tema tor sha ityough nagh.
29 Tem tor yô, fese je a wua ior mba hen ya u Yeroboam cii. A undu or môm u hen ya u Yeroboam uma ga; a tim ve vough er Yehova ôr sha ikyev i ortom na Ahiya, Orshilo la nahan.+
30 Kwagh lu nahan, sha ci u asorabo a Yeroboam er, shi na Iserael kpa er la, gadia a vihi Yehova Aôndo u Iserael ishima ker tsung je.
31 Akaa agen ken yiase i Nadabi cii, hanma kwagh u er cii, i nger ken takeda u yiase i sha ayange a ator a Iserael la.
32 Shi ityav lu hen atô u Asa man Baasha tor u Iserael hanma shighe cii.+
33 Ken inyom i sha utar i Asa tema tor sha Yuda la, Baasha wan u Ahiya tema tor sha Iserael cii ken Tirsa; a hemen anyom 24.+
34 Kpa a za hemen u eren kwaghbo sha ishigh ki Yehova,+ zenden sha gbenda u Yeroboam, shi eren isholibo i Yeroboam er, shi na Iserael kpa er la.+
Ngeren mba shin kpe
^ Shin “lu civir un a ishima i môm ga.”
^ Alaghga ishember i ken zwa Heberu i i gem nahan ne zua vea ishember i “ambi a uile,” u tesen ér kwagh la ndôhôr ishima.
^ Nenge Ngeren u Pasen Asember.
^ Shin “lu civir un a ishima i môm.”
^ Shin “maan Rama kasen; hiden maan Rama.”
^ Shin “duen shin nyôron hen haregh u.”
^ Shin “ya u tor.”
^ Shin “maan Rama kasen; hiden maan Rama.”
^ Shin “maa Rama kase; hide maa Rama.”
^ Shin “a maa a kase; hide maa.”
