Utor u Hiihii 10:1-29
10 Hen shighe ne, torkwase u Sheba ungwa gwa u Solomon, man er gwa na ne va iti i Yehova a icivir yô.+ Nahan a va hen a na u va pinen un mbampin* mba taver sha u karen un.+
2 A va nyôr ken Yerusalem vea mbatomov* kpishi;+ a va a urakumi mba ve tôô mkurem ma balsam+ man zanaria kpishi man awen a injaa yô. A nyôr a za lam a Solomon sha hanma kwagh u lu un ken ishima cii.
3 Tsô Solomon na un mlumun sha mbampin nav cii. Kwagh môm taver* tor gande u pasen un ga.
4 Torkwase u Sheba nengen kwaghfan u Solomon cii,+ man ya u maa la,+
5 man kwaghyan u sha tebul na+ man gbenda u mbatomov nav teman la man er ior nav mbanan kwaghyan karen kwaghyan sha tebul la kua iyolwuhan ve, man ior nav mbatoon kwaghman man iniav nav mbi nanden mbi naan hanma shighe hen iyou i Yehova la yô, kpiligh un iyol saa her.
6 Nahan a kaa a tor ér: “Kwagh u yange m ungwa ken tar wam sha kwagh u akaa a u er,* man sha kwagh u kwaghfan wou la ka mimi.
7 Kpa m na jighjigh a akaa a m ungwa la ga, zan zan m va m va nenge a mi sha ashe a am. Man m va nenge yô, yange i ôrom kwagh cuku tsô kpaa ga. U ngu a kwaghfan shi u ngu yôughyôugh hemba kwagh u yange m ungwa la yem zende zende.
8 Saan ior ou iyol, kua mbatomov ou mba ve tilen sha ishigh you hanma shighe, ve ungwan kwaghfan wou la!+
9 I wuese Yehova Aôndo wou,+ un u i doo un a we, nahan a pende u sha ikyônough ki torough ki Iserael la. Er Yehova a lu a dooshima u tsôron sha Iserael yô, a tsua u ér we u lu tor, u ôron ijir sha mimi shi u hemen sha perapera.”
10 Tsô a na tor zanaria utalenti* 120, shi a na un mkurem ma balsam kpishi+ kua awen a injaa.+ Mayange or shi kera va a mkurem ma balsam kpishi, er ma torkwase u Sheba na Tor Solomon la ga.
11 Lu utso mba Hiram mba ve lu kpishi mba ve tôôn zanaria hen Ofir la,+ shi ve tôô ikyon i algum*+ hen Ofir kpishi man awen a injaa,+ ve va a mi ye.
12 Tor gema ikyon i algum* la er akaa a suen iyou i Yehova man iyou i tor* kua mbaadiguve man akaa a kuhwan a lun a ikyar sha ci u mbawanatsam.+ Mayange mba a kera va a ikyon i algum* imba la nahan ga, shin i nenge a i ga zan zan nyian.
13 Tor Solomon kpa na torkwase u Sheba hanma kwagh u sar un shi sôn cii, seer sha akaa a a na un a ishima na mgbeghaa la.* Tsô a hide a yem ken tar na vea mbatomov nav imôngo.+
14 Nahan zanaria u i va Solomon a mi ken inyom i môm la yuhwa kuma utalenti mba zanaria 666,+
15 i wa mtsera u mbazendenkasua man mbaerenkpenga kua utor mba Arabia man ugomna mba tar la cii, va un a mi la ker ga.
16 Tor Solomon er ipyerutya i vesen 200 sha zanaria u i nungwa iyôgh sha mi yô,+ (lu zanaria ushekel* 600 i tôô i er hanma perutya ye)+
17 man ipyerutya i kiriki* 300 i i er sha zanaria u i nungwa iyôgh sha mi yô (lu zanaria umina* utar i tôô i er hanma perutya u kiriki ne a mi ye). Tor maa ver i ken Iyou i i yilan ér Ikyô i Lebanon la.+
18 Tor shi er zege ikyônough ki torough sha anyi a nortar,+ cir ki zanaria u wang iyol.+
19 I er angahar ataratar a unden zan hen ikyônough ki torough kira, shi i er haav mbu gbilititi ken ijime i ikyônough ki shon; ki lu a ave keen man keen, i gema i er ubegha uhar+ tile ken akpe a ave a ikyônough kira keen man keen.
20 Shi i er ubegha 12 tile sha angahar a unden a ataratar la; hanma nguhar ku unden yô, ubegha uhar tile her keen man keen, sha angahar a ataratar la. Ma tartor ugen lu a vande eren ikyônough ki torough er kin nahan ga.
21 I er ukôôpu mba man kwagh a mi mba Tor Solomon cii sha zanaria, shi i er ikyav mbi Iyou i Ikyô i Lebanon+ la cii sha zanaria u wang. I er kwagh môm sha azurufa ga, sha ci u sha ayange a Solomon la i nengen ér azurufa gba kwagh ga.+
22 Gadia tor lu a utso mba Tarshishi kpishi+ sha zegemnger vea utso mba Hiram mba ve lu kpishi la imôngo. Utso mba Tarshishi mba ve lu kpishi ne, ve wa zanaria man azurufa man anyi a nortar+ man mbaambo kua upikôku,* ve va a mi kwa môm ken atô u anyom atar.
23 Nahan Tor Solomon hemba utor mbagenev cii sha tar inyaregh+ man kwaghfan.+
24 Shi ior mba sha tar cii ve soo u van hen* Solomon, sha u vea ungwa kwaghfan u Aôndo na un la yô.+
25 Hanma ve nan vaan a iyua, ka ikyav mbi sha azurufa man ikyav mbi sha zanaria man akondo man ikyav mbi utyaav, man mkurem ma balsam man anyinya kua mbaalfadari* je la; i vaan a uiyua mban nahan hanma inyom.
26 Nahan Solomon za hemen u ombon akekeautya man anyinya;* yange lu a akekeautya 1,400 man anyinya* 12,000;+ a ver a ken agar a akekeautya shi lu ikyua a tor ken Yerusalem.+
27 Tor er azurufa ngee ken Yerusalem er awen nahan, shi a er ikyon i sedar ngee kpishi er ikyon i sikamor* i ken Shefela nahan.+
28 Lu ken Igipiti i va a anyinya a Solomon ye; mbazendenkasua mba tor ve za yam anyinya kpishi* sha ishe i i wa ve la,+ ve va a mi.
29 Yange í yam hanma ikyekyeutya ken Igipiti sha agbenger a azurufa 600 i va a mi, í yam nyinya i môm sha agbenger a azurufa 150; ve di ve gema ve tee utor mba Mbahiti+ man utor mba Mbashiria cii.
Ngeren mba shin kpe
^ Shin “tan un ukikya.”
^ Shin “ior.”
^ Zwa Heberu, “kwagh môm lu myer hen.”
^ Shin “akaaôron a ou.”
^ Talenti môm yange a lu ukilogeram 34.2. Nenge Ngeren u Seer u B14 la.
^ Shin “sandal.”
^ Shin “sandal.”
^ Shin “ya u tor.”
^ Shin “sandal.”
^ Zwa Heberu, “sha uwegh ku Tor Solomon.”
^ Shekel môm yange a lu ukilogeram 11.4. Nenge Ngeren u Seer u B14 la.
^ Perutya u kiriki, u ashighe kpishi mbakerenavaan ve lu a mi la.
^ Mina u i ter kwagh na ken Ruamabera u ken zwa Heberu ne, yange a lu ugeram 570. Nenge Ngeren u Seer u B14 la.
^ Annyon u lun a ukala mba doon tsung, u lun er tôki nahan. Ka i yila annyon ne ken zwa Buter ér peacock.
^ Zwa Heberu, “ve soo u nengen a ishigh ki.”
^ Alfadari ka wan u jaki i unde nyinya a mar yô.
^ Shin “mbahendananyinya.”
^ Shin “mbahendananyinya.”
^ U kpa ka kon u tur.
^ Shin a fatyô u kaan ér, “hen Igipiti man hen Kue, mbazendenkasua mba tor ve yam a hen Kue.” Alaghga ka Shilishia.
