Utor u Hiihii 21:1-29
21 Akaa ne nga eren cii yô, kwagh ugen er sha kwagh u sule u wain u Naboti Oryesereel; sule ne lu ken Yesereel+ ikyua a ya u Ahaba tor u Samaria.
2 Ahaba kaa a Naboti ér: “Nam sule wou u wain la, m kaha ikyaiue, sha ci u ngu ikyua a ya wam. Nahan me na u sule u wain u u hembe doon yô, sha ityough ki u. Kpa aluer u soo yô, me kimbi u inyaregh ki ki kom sha u yô.”
3 Kpa Naboti kaa a Ahaba ér: “Aluer m na u dyako u uter av yô, mayange a doo Yehova a mo ga.”+
4 Tsô Ahaba hide hen ya na zunguluu, saan un iyol ga, sha ci u kwagh u Naboti Oryesereel la kaa a na ér: “Me na u dyako u uter av ga” la. Nahan a yav sha gambe na, a gema ishigh nagh a ver kera, a venda u yan kwaghyan.
5 Kwase na Yesebel+ nyôr ape lu la, za pine un ér: “U ule je u venda u yan kwaghyan sha ci u nyi?”
6 A gema a kaa a na ér: “Ka sha ci u m kaa a Naboti Oryesereel la mer, ‘Nam sule wou u wain la m kimbi u inyaregh sha mi. Shin wea soo yô, de m na u sule u wain ugen sha ityough ki u.’ Kpa a kaa ér, ‘Me na u sule wam u wain ga.’”
7 Kwase na Yesebel kaa a na ér: “Ka we u lu tor, u lu hemen Iserael gaa? Mough sha, ya kwagh, i saan we iyol. Me na u sule u wain u Naboti Oryesereel la.”+
8 Tsô a nger uwashika ken iti i Ahaba, a ver ikyav i tor sha mi,+ maa a tindi a uwashika mbara hen mbatamen+ man ashagbaior a a lu ken gar u Naboti la.
9 A nger ken uwashika mbara ér: “Yôô, i hôr kwaghyan, nahan kaa nen Naboti a tema sha ishigh ki ior cii.
10 Shi ôr nen agbilinaior ahar, a va tema sha ishigh nagh, a wa un akaa iyol,+ a kaa ér, ‘U tuhwa Aôndo man tor!’+ Maa due nen a na, za ta un nen awen, a kpe.”+
11 Tsô nomso mba ken gar na, man mbatamen man ashagbaior a a lu ken gar na la, er vough er i nger ken uwashika mba Yesebel tindi hen a ve la nahan.
12 Ve yôô, i hôr kwaghyan, maa ve kaa Naboti va tema sha ishigh ki ior cii.
13 Nahan agbilinaior ahar nyôr va tema sha ishigh ki Naboti, ve gba wan un akaa iyol sha ishigh ki ior, kaan ér: “Naboti tuhwa Aôndo man tor!”+ Mba been yô, ve due a na ken akôngo a gar, ve za ta un awen, a kpe.+
14 Maa ve tindi loho hen Yesebel ve kaa ér: “I ta Naboti awen a kpe ve.”+
15 Yesebel ongo ér i ta Naboti awen a kpe yô, fese je a kaa a Ahaba ér: “Mough, za ngohol sule u wain u Naboti Oryesereel+ a vende u nan we ér u kimbi un inyaregh sha mi la, sha ci u Naboti kera ngu uma ga, a kpe.”
16 Ahaba ongo ér Naboti kpe yô, fese je Ahaba mough sen shin sule u wain u Naboti Oryesereel la, za ngohol u.
17 Kpa Yehova ôr kwagh a Eliya+ Ortishibi la, kaa ér:
18 “Mough sha, sen za ken Samaria+ za kohol Ahaba tor u Iserael. Ngu ken sule u wain u Naboti, gadia a za, u za ngohol u.
19 Kaa a na wer, ‘Ka kwagh u Yehova a kaa je ne, ér: “U wua or,+ shi u ngohol kwagh u nanaa?”’+ Maa kaa a na wer, ‘Ka kwagh u Yehova a kaa ne, ér: “Ape aniwaav ve ndiar awambe a Naboti la, ka her we kpa aniwaav vea ndiar awambe a ou ye.”’”+
20 Ahaba kaa a Eliya ér: “U zua a mo ve ga, orhyom wama?”+ A gema a kaa ér: “Een, m zua a we. ‘Er u kange ishima* u eren kwaghbo sha ishigh ki Yehova yô,+
21 nenge, m ngu van a kwaghtseren sha a we, me ese ônov ou kera vindi vindi, shi me bee a hanma nomsoor* u Ahaba ken Iserael kera,+ kua or u nan lu a or u wasen nan ga, shi nan gbe kwagh ga la kpaa.+
22 Shi me gema ya wou, una hingir er ya u Yeroboam+ wan u Nebati, man er ya u Baasha+ wan u Ahiya nahan, sha ci u u vihim ishima, shi u na Iserael er isholibo.’
23 Hide sha kwagh u Yesebel yô, Yehova kaa ér: ‘Aniwaav vea ya Yesebel hen inya i Yesereel.+
24 Hanma or u Ahaba u nana kpe ken gar yô, aniwaav vea ya nan, shi hanma or u nana kpe ken toho yô, inyon i sha ia ya.+
25 Sha mimi yô, mayange or ngu a kange ishima* u eren kwaghbo sha ishigh ki Yehova er Ahaba+ nahan ga; lu kwase na Yesebel tuur un er akaa ne ye.+
26 A er akaa a hemban vihin cii, lu civir ieev mbi ndôhôrshima,* vough er Mbaamor mba Yehova zenda ve sha ishigh ki Mbaiserael+ la cii eren nahan.’”
27 Ahaba ongo mkaanem man yô, fese je, a ande akondo a na kera, a gema a hua ikyondo i zungwen;* a yem a gba za hôron kwaghyan, yaven inya a ikyondo i zungwen* shi zenden zunguluu.
28 Tsô Yehova ôr kwagh a Eliya Ortishibi la kaa ér:
29 “U nenge er Ahaba a hidi a iyol ijime sha kwagh wam kpa?+ Er a hidi a iyol ijime sha ishigh yagh yô, me va a kwaghtseren la sha ayange a a lu uma ne ga. Me va a kwaghtseren la sha ya na, sha ayange a wan na.”+
Ngeren mba shin kpe
^ Zwa Heberu, “tee iyol you.”
^ Zwa Heberu, “hanma or u nyanden sha kpekpe.” Ka mkaanem ma ken zwa Heberu ma tuhwan nomso a mi.
^ Zwa Heberu, “tee iyol i nan.”
^ Alaghga ishember i ken zwa Heberu i i gem nahan ne zua vea ishember i “ambi a uile,” u tesen ér kwagh la ndôhôr ishima.
^ Shin “ibyashôhô.”
^ Shin “ibyashôhô.”
