Utor u Hiihii 22:1-53
22 Yange Shiria man Iserael kera nôngo ityav ga kuma anyom atar.
2 Sha inyom i sha utar la, Yehoshafati+ tor u Yuda sen za hen tor u Iserael.+
3 Tor u Iserael maa pine mbatomov nav ér: “Ne fa er Ramoti-gileadi+ a lu u wase kpa? Man yô, se mba tan anu u hiden ngohol un hen tor u Shiria kera.”
4 Nahan a pine Yehoshafati ér: “U za vea mo u za nôngon ityav hen Ramoti-gileadi?” Yehoshafati gema kaa a tor u Iserael ér: “Mo man we se mba môm, ior ou ka ior av. Anyinya a am kpa ka anyinya a ou.”+
5 Kpa Yehoshafati kaa a tor u Iserael ér: “Wea lumun yô, vande pinen+ Yehova kwagh sha kwagh ne.”+
6 Tsô tor u Iserael kohol uprofeti imôngo kuma er iorov 400 nahan, pine ve ér: “M za nôngo ityav a Ramoti-gileadi, shin m de ze ga?” Ve gema ve kaa ér: “Kôndo za, Yehova una na un sha ikyev i tor.”
7 Yehoshafati maa pine ér: “Ma profeti u Yehova ngu heen gaa? Nan kpa ma se pin kwagh sha ikyev i nan.”+
8 Nahan tor u Iserael kaa a Yehoshafati ér: “Or shi môm u se fatyô u pinen Yehova kwagh sha ikyev i nan yô;+ kpa m soo kwagh u nan ga,+ sha ci u nan ôron akaaôron a profeti a dedoo sha a mo ga, ka a bo tseegh.+ Ka Mikaia wan u Imla.” Nahan kpa, Yehoshafati kaa ér: “Tor a de er imbakwagh la ga.”
9 Tsô tor u Iserael yila orgen u eren tom hen ya u tor, kaa a na ér: “Va a Mikaia wan u Imla fese.”+
10 Hen shighe ne, tor u Iserael man Yehoshafati tor u Yuda tema, hanma ve sha ikyônough ki torough ki nan, ve wuha iyol i tor ve lu hen vande u gbidyen iyiav, hen hundagar u Samaria la, shi uprofeti mbara cii lu ôron kwaghôron u profeti sha ishigh vev.+
11 Maa Sedekia wan u Kenaana, er akor a sha iyô sha ci na, maa a kaa ér: “Ka kwagh u Yehova a kaa je ne, ér, ‘U ta num sha* Mbashiria a akor ne, zan zan u tim ve kera.’”
12 Uprofeti mbagen mbara cii, lu ôron kwaghôron u profeti shon môm, kaan ér: “Kôndo za ken Ramoti-gileadi, nahan u hemba ityav; Yehova una na un sha ikyev i tor.”
13 Tsô orôron-loho u za, u za yilan Mikaia la kaa a na ér: “Nenge! Uprofeti gba zwa môm, mba ôron tor kwagh u a doo un u ungwan yô. Wea lumun yô, kwaghôron wou a lu er kwaghôron ve nahan; ôr kwagh u una doo un u ungwan yô.”+
14 Kpa Mikaia kaa ér: “Mimi je, er Yehova a lu u uma ne, ka kwagh u Yehova a kaa ér mo m ôr la me ôr ye.”
15 Nahan a nyôr a za hen tor, tor maa pine un ér: “Mikaia, se za nôngo ityav a Ramoti-gileadi, shin se de ze ga?” Fese je, a gema a kaa ér: “Kôndo za, nahan u hemba ityav; Yehova una na un sha ikyev i tor.”
16 Tor maa pine un ér: “Ka kwa me me kaa a we mer, bum wer u ôrom kwagh ugen ga, saa kwagh u mimi ken iti i Yehova?”
17 Nahan Mikaia kaa ér: “M nenge Mbaiserael cii hingir sarem sarem sha iwo,+ er iyôngo i i lu a orkuran ga nahan. Yehova kaa ér: ‘Mban ne mba a orvesen ga. De hanma ve nana hide a yem hen ya u nan bem bem.’”
18 Tor u Iserael maa kaa a Yehoshafati ér: “Ashen m ôr u mer, ‘Una ôr akaaôron a profeti a dedoo sha a mo ga, a lu a bo tseegh’ gaa?”+
19 Mikaia gema kaa ér: “Nahan yô, ungwa kwaghôron u Yehova ne: M nenge a Yehova tema sha ikyônough nagh ki torough,+ akum a sha cii tile un ken iyan man ken imese.+
20 Tsô Yehova pine ér, ‘Ka an nana za bume Ahaba, una kôndo a za kpe hen Ramoti-gileadi?’ Or môm nan ôr kwagh ngun, orgen nan ôr kwagh ngura.
21 Maa jijingi*+ ugen due va tile sha ishigh ki Yehova, kaa ér, ‘Mo me bume un.’ Yehova maa pine un ér, ‘U bume un nena?’
22 A gema a kaa ér, ‘Me due me za er uprofeti nav cii, vea ôr akaa a aiegh.’+ Nahan a kaa ér, ‘U bume un, een, u fatyô u bumen un. Za ase za er nahan.’
23 Man hegen yô, Yehova er uprofeti ou mban cii ve ôr akaa a aiegh,+ Yehova kaa ér kwagh a tser u.”+
24 Tsô Sedekia wan u Kenaana kporom za ta Mikaia sambe sha wase, pine un ér: “Ka hanma gbenda jijingi u Yehova a undum, a kar a za lamen a wee?”+
25 Mikaia gema kaa ér: “Nenge! U nenge a gbenda la sha iyange i u yevese, u za nyôr ken iyou i ken atô wer u yer la.”
26 Tor u Iserael maa kaa ér: “Kôr Mikaia za na sha ikyev i Amon orhemen u gar, man Yoashi wan u tor.
27 Kaa a ve wer, ‘Ka kwagh u tor a kaa ne, ér: “Kende nen orne ken purusu,+ naan nen un beredi man mngerem cuku cuku zan zan me kar hiden bem bem.”’”
28 Kpa Mikaia kaa ér: “Aluer u hide bem bem yô, Yehova ôr kwagh a mo ga.”+ Shi a kaa ér: “Ver nen ishima, ne ior cii.”
29 Tsô tor u Iserael man Yehoshafati tor u Yuda kôndo za ken Ramoti-gileadi.+
30 Tor u Iserael maa kaa a Yehoshafati ér: “Mo me yer iyol me za ken utya, kpa we gema hua akondo ou a tor.” Nahan tor u Iserael yer iyol+ za nyôr ken utya.
31 Hen shighe ne, tor u Shiria kaa a ukurmbautyaav mba akekeautya a na 32 ér:+ “De nôngon nen ityav a orgen ga, mbautyaav shin mbahemenev kpaa ga, saa tor u Iserael tseegh.”
32 Ukurmbautyaav mba akekeautya la mba nengen a Yehoshafati nahan maa, ve ôr a ayol a ve ér: “Ka tor u Iserael jim jim je ne.” Nahan ve gema ishigh ve ver sha a na ér vea nôngo ityav a na; maa Yehoshafati gba vaan ér i wase un.
33 Ukurmbautyaav mba akekeautya la mba nengen ér, ka tor u Iserael ga yô, fese je, ve de u zendan un.
34 Kpa orgen gba keren ivaan tsô,* maa i za ta tor u Iserael hen ijuan i rigautya na. Nahan tor kaa a orhendan un ikyekyeutya ér: “Goom due a mo ken utya* kera, sha ci u i vihim iyol kehelee.”+
35 I nôngo ityav taveraa sha iyange la cii, nahan ve sue tor tema sha, shin ikyekyeutya na la, ver ishigh sha Mbashiria. Ivav la due awambe haa shin atô u ikyekyeutya la, maa a va kpe aikighe.+
36 Ka va zurum u iyange a mire yô, i yôô ken afo la ér: “Hanma or nana yem ken gar u nan! Hanma or nana yem ken tar u nan!”+
37 Nahan tor kpe, maa i hide a na ken Samaria; ve va ii tor ken Samaria.
38 Mba va kiren ikyekyeutya la hen ityungu i Samaria yô, aniwaav va ndiar awambe a na, shi mbaagbaga va ôô iyol her,* vough er Yehova yange ôr nahan.+
39 Akaa agen ken yiase i Ahaba cii, hanma kwagh u er cii, man ya* u maa sha anyi a nor la,+ kua agar a a maa la cii, i nger ken takeda u yiase i sha ayange a ator a Iserael la.
40 Tsô Ahaba kpe, i ii un vea uter nav,+ maa wan na Ahashia+ kar tema tor sha ityough nagh.
41 Ken inyom i sha unyiin i Ahaba tema tor sha Iserael la, Yehoshafati+ wan u Asa hingir tor u Yuda.
42 Yehoshafati lu anyom 35 shighe u tema tor la, a hemen ken Yerusalem anyom 25. I yilan ngô na ér Asuba, lu wan u Shilhi.
43 Lu zenden sha igbenda i ter na Asa cii.+ A undu i ga, a er kwagh u vough sha ishigh ki Yehova.+ Nahan kpa, i bee a ajiir a taven la ga, shi ior lu nan iniav shi ve lu nanden iniav, mnyim lu duen sha ajiir a taven la her.+
44 Yehoshafati lu eren kwagh ken bem vea tor u Iserael.+
45 Akaa agen ken yiase i Yehoshafati cii, ityom na i ageegh, man er nôngo ityav la cii, i nger ken takeda u yiase i sha ayange a ator a Yuda la.
46 Shi a bee a nomso mba eren gbaga ken tempel,+ mba ve mase shin ken tar la, mba i de ve, ve lu her sha ayange a ter na Asa la cii.+
47 Hen shighe ne, tor lu ken Edom+ ga; lu muetor lu hemen sha ityough ki tor ye.+
48 Shi Yehoshafati er utso* mba Tarshishi ér ve za tôôn zanaria ken Ofir,+ kpa ve fatyô u zan ga, sha ci u utso mbara vihi hen Eshion-geber.+
49 Lu hen shighe ne, Ahashia wan u Ahaba kaa a Yehoshafati ér: “De mbatomov av ve za vea mbatomov ou shin utso” ye, kpa Yehoshafati lumun ga.
50 Tsô Yehoshafati kpe, i ii un vea uter nav+ ken Gar u Davidi ter na u tamen; wan na Yehoram+ kar tema tor sha ityough nagh.
51 Ken inyom i sha 17 i Yehoshafati tema tor sha Yuda la, Ahashia+ wan u Ahaba hingir tor u Iserael ken Samaria, a hemen Iserael anyom ahar.
52 Ahashia lu eren kwagh u bo sha ishigh ki Yehova, shi zenden sha gbenda u ter na+ man ngô na,+ man sha gbenda u Yeroboam wan u Nebati, u na Iserael er isholibo la.+
53 A za hemen u civir Baal,+ guren un inya, vihin Yehova Aôndo u Iserael ishima,+ vough er ter na yange er nahan.
