Un Revelashon ku Huan a Risibí 2:1-29
2 Skirbi e angel+ di e kongregashon na Efeso+ lo siguiente: Esaki ta loke e persona ku tin e shete streanan den su man drechi, sí, e persona ku ta kana meimei di e shete kándelarnan di oro,+ ta bisa:
2 ‘Mi sa di bo obranan, bo trabou duru i bo perseveransia. Mi sa ku bo no ta tolerá mal hende. Mi sa tambe ku bo a pone e hendenan ku ta bisa ku nan ta apòstel+—pero ku no ta apòstel—na prueba i ku bo a haña sa ku nan ta gañadó.
3 Ademas, bo ta demostrá perseveransia; bo a para firme pa motibu di mi nòmber+ i bo no a kansa.+
4 Pero mi tin algu kontra bo: Bo no tin e amor ku bo tabatin na kuminsamentu.
5 P’esei, kòrda ken bo tabata promé ku bo a kai; arepentí+ i hasi e obranan ku bo tabata hasi ántes. Si bo no arepentí,+ lo mi bini serka bo i kita bo kándelar+ for di su lugá.
6 Pero tin algu ku bo ta hasi bon: Bo ta odia e kosnan ku e sekta di Nikolas+ ta hasi; mi tambe ta odia e kosnan ei.
7 Laga ken ku tin orea skucha loke spiritu santu ta bisa e kongregashonnan:+ Lo mi laga ken ku sali viktorioso+ kome for di e palu di bida+ ku ta den e paradeis di Dios.’
8 Skirbi e angel di e kongregashon na Smirna lo siguiente: Esaki ta loke e persona ku ta ‘e Promé i e Último,’+ kende tabata morto i kende a bolbe biba,+ ta bisa:
9 ‘Mi sa di bo sufrimentu* i di bo pobresa, pero den mi bista, bo ta riku.+ Mi sa tambe di e kalumnia ku e hendenan ku ta yama nan mes hudiu, maske en realidat nan no ta hudiu, ta lansa kontra bo. E hendenan ei ta un grupo ku ta pertenesé na* Satanas.+
10 No tene miedu di loke bo ta bai sufri.+ Tende! Diabel lo sigui tira algun di boso den prizòn. Di e manera ei, boso lo ser poné kompletamente na prueba, i boso lo tin tribulashon dies dia largu. Sea fiel, sí, asta te na morto, i lo mi duna bo bida komo premio.*+
11 Laga ken ku tin orea skucha+ loke spiritu santu ta bisa e kongregashonnan: Ken ku sali viktorioso+ lo no hañ’é ku e di dos morto.’*+
12 Skirbi e angel di e kongregashon na Pérgamo lo siguiente: Esaki ta loke e persona ku tin e spada largu i skèrpi, ku ta kòrta tur dos banda,+ ta bisa:
13 ‘Mi sa unda bo ta biba; mi sa ku bo ta biba kaminda e trono di Satanas ta. Apesar di esei, bo ta fiel na mi;*+ bo no a nenga bo fe den mi,+ ni sikiera den tempu di Antipas, mi testigu fiel,+ ku nan a mata+ den boso stat, kaminda Satanas ta biba.
14 Pero mi tin algun kos kontra bo: Entre boso tin hende ku ta tene duru na siñansa di Bálam.+ Ta Bálam a siña Bálak+ kon pa laga e israelitanan kai den tentashon i* kome kos sakrifiká na dios falsu* i kometé inmoralidat seksual.*+
15 Entre boso tin tambe hende ku ta tene duru na siñansa di e sekta di Nikolas.+
16 Pues, arepentí. Si bo no arepentí, mi ta bini pronto serka bo, i lo mi bringa kontra e hendenan ei ku e spada largu ku ta sali for di mi boka.+
17 Laga ken ku tin orea skucha loke spiritu santu ta bisa e kongregashonnan:+ Lo mi duna ken ku sali viktorioso+ un tiki di e mana skondí.+ Ademas, lo mi dun’é un piedra chikitu blanku, i riba e piedra, tin un nòmber nobo skirbí ku ningun persona no sa, solamente e persona ku haña e nòmber.’
18 Skirbi e angel di e kongregashon na Tiatira+ lo siguiente: Esaki ta loke e Yu di Dios, e persona ku tin wowo manera vlam di kandela+ i pia manera koper puru,+ ta bisa:
19 ‘Mi sa di bo obranan, bo amor, bo fe, bo sirbishi i bo perseveransia. Mi sa ku loke bo ta hasi awor ta mas ku ántes.
20 Pero mi tin algu kontra bo: Bo ta tolerá e muhé Yézabèl,+ ku ta yama su mes profeta. Ku su siñansanan, e ta gaña mi esklabonan, di manera ku nan ta kometé inmoralidat seksual*+ i kome kos sakrifiká na dios falsu.
21 Mi a duna e muhé ei tempu pa e arepentí, pero e no ke arepentí di su inmoralidat seksual.*
22 Tende! Mi ta na punto di lag’é haña un malesa grave. I lo mi laga hende ku ta kometé adulterio kuné sufri masha hopi mes,* a ménos ku nan arepentí di e kosnan ku el a pone nan hasi.
23 Lo mi mata e muhé ei su yunan ku malesa mortal, di manera ku tur e kongregashonnan lo sa ku ami ta e persona ku ta saminá kurason i e pensamentunan di mas íntimo.* Lo mi paga kada un di boso di akuerdo ku boso obranan.+
24 Ma e restu di boso ku ta na Tiatira, esta, tur hende ku no ta sigui e siñansanan di Yézabèl, sí, e hendenan ku no sa nada di e siñansanan falsu* ku ta bini di Satanas,+ mi ta bisa lo siguiente: Mi no ta pone ningun otro karga riba boso.
25 Solamente, tene duru na loke boso tin te ora mi bini.+
26 Ken ku sali viktorioso i kumpli te na fin ku loke mi a manda* lo mi duna outoridat riba e nashonnan.+
27 Lo e risibí outoridat meskos ku ami a risibí outoridat for di mi Tata. I e persona ei lo goberná* e nashonnan ku un bara di heru+ di manera ku nan lo ser destruí na pida pida manera ta destruí pòchi di klei.
28 I lo mi dun’é e strea di mardugá.+
29 Laga ken ku tin orea skucha loke spiritu santu ta bisa e kongregashonnan.’
Nota
^ Lit.: “un snoa di.”
^ Òf: “tribulashon.”
^ Lit.: “korona.”
^ Esta, morto eterno.
^ Lit.: “bo ta sigui tene duru na mi nòmber.”
^ Òf: “kon pa pone un piedra di trompeká dilanti di e israelitanan i laga nan.”
^ Òf: “na imágen.”
^ Òf: “pasa den tribulashon.”
^ Òf: “i e sintimentunan di mas profundo.” Lit.: “e nirnan.”
^ Lit.: “e supuesto kosnan profundo.”
^ Òf: “i ku te na fin, ta hasi loke mi a hasi.”
^ Òf: “kastigá.”
