Un Revelashon ku Huan a Risibí 13:1-18
13 Awor, el* a para ketu riba e santu di laman.
I mi a mira un bestia salbahe+ ku dies kachu i shete kabes sali for di laman.+ Riba kada kachu, tabatin un korona. Riba su kabesnan, tabatin nòmber ku ta insultá* Dios.
2 E bestia salbahe ku mi a mira tabata manera un leopardo, pero su patanan tabata manera pata di ber, i su boka tabata manera boka di leon. I e dragon+ a duna e bestia ei poder, trono i hopi outoridat.+
3 Mi a mira ku un di e kabesnan di e bestia tabata parse mortalmente heridá, pero su herida mortal a kura.+ I henter tera a sigui e bestia salbahe ku atmirashon.
4 Hende a adorá e dragon pasobra el a duna e bestia salbahe outoridat, i nan a adorá e bestia salbahe ku e siguiente palabranan: “Ken ta manera e bestia salbahe? Ken por bringa kontra dje?”
5 E dragon a duna e bestia salbahe un boka ku ta papia na un manera arogante i ku ta papia kos malu di* Dios. E bestia a risibí outoridat pa hasi loke e ke 42 luna largu.+
6 I el a habri su boka pa falta rèspèt+ pa Dios,* pa falta rèspèt pa Dios su nòmber i pa Dios su lugá di biba, sí, pa falta rèspèt pa e personanan ku ta biba den shelu.+
7 Ademas, a permití e bestia salbahe bringa kontra e santunan i vense nan,+ i el a risibí outoridat riba hende di tur tribu, pueblo, idioma i nashon.
8 Tur hende ku ta biba riba tera lo adorá e bestia. For di dia ku mundu a ser fundá, no a skirbi ni un di nan su nòmber den e buki di bida.+ E buki akí ta pertenesé na e Lamchi ku a ser matá.+
9 Ken ku tin orea, lag’é skucha bon.+
10 Ken ku mester bai prizòn, lo bai prizòn.* Ken ku mata ku spada, tin ku ser matá ku spada.*+ P’esei, e santunan+ mester tin perseveransia+ i fe.+
11 Mi a mira un otro bestia salbahe; el a sali for di tera. E tabatin dos kachu manera un lamchi, pero el a kuminsá papia manera un dragon.+
12 Den presensia di e promé bestia salbahe,+ e tin* mesun outoridat ku e bestia ei. I e ta pone e habitantenan di tera* adorá e promé bestia salbahe, kende su herida mortal a kura.+
13 E ta hasi milager impreshonante* den bista di hende; e ta asta laga kandela for di shelu baha riba tera.
14 E ta gaña e hendenan ku ta biba riba tera mediante e milagernan ku a permitié hasi den presensia di e promé bestia salbahe. Ademas, e ta bisa e hendenan ku ta biba riba tera pa nan traha un imágen+ pa* e promé bestia salbahe, sí, pa e bestia ku a ser heridá ku spada i ku tòg a rebibá.+
15 Ademas, el a haña pèrmit pa supla rosea di bida den e imágen di e promé bestia salbahe. Di e manera ei, e imágen di e bestia salbahe por a papia i duna òrdu pa mata tur hende ku nenga di adorá e imágen di e bestia salbahe.
16 E ta obligá tur hende—grandi i chikitu, riku i pober, liber i esklabo—pa nan aseptá un marka riba nan man drechi òf riba nan frenta.+
17 Di e manera ei, ningun hende no por kumpra ni bende nada a ménos ku e tin e marka, esta, e nòmber,+ òf number, di e bestia salbahe.+
18 Un hende mester tin sabiduria pa komprondé esaki: Laga ken ku tin perspikasia* kalkulá e number di e bestia salbahe, pasobra e number ta un number di hende; e ta 666.+
Nota
^ Esta, e dragon.
^ Òf: “i ku ta blasfemá.”
^ Òf: “pa blasfemá Dios.”
^ Òf posiblemente: “Si un persona mester ser matá ku spada, lo e ser matá ku spada.”
^ Òf: “mester ser kapturá, lo ser kapturá.”
^ Òf: “e ta ehersé.”
^ Lit.: “e ta pone tera i e hendenan ku ta biba riba dje.”
^ Òf: “señal grandi.”
^ Òf: “di.”
^ Òf: “komprondementu.”
