Un Revelashon ku Huan a Risibí 16:1-21
16 I mi a tende un stèm duru for di e tèmpel*+ bisa e shete angelnan: “Bai i basha e shete kònchinan di rabia di Dios riba tera.”+
2 E promé angel a bai, i el a basha su kònchi riba tera.+ I e hendenan ku tabatin e marka di e bestia salbahe+ i ku tabata adorá su imágen+ a haña un herida doloroso i maligno.+
3 E di dos angel a basha su kònchi den laman.+ I laman a bira sanger;+ el a bira manera sanger di hende morto, i tur kriatura* den laman+ a muri.
4 E di tres angel a basha su kònchi den e riunan i e fuentenan di awa.+ I e awanan a bira sanger.+
5 Anto mi a tende e angel ku tabatin outoridat riba e awanan bisa: “Abo, e Persona ku ta eksistí i ku tabata eksistí,+ nos Dios leal,+ bo ta hustu, pasobra bo a deklará ku e kosnan akí mester sosodé.+
6 E hendenan ku a drama sanger di e santunan i di e profetanan,+ bo a duna sanger pa bebe;+ esei ta loke nan meresé.”+
7 I mi a tende un stèm for di e altar* bisa: “Sí, Yehova* Dios, Dios Todopoderoso,+ bo huisionan* ta konfiabel i hustu.”+
8 E di kuater angel a basha su kònchi riba solo.+ I solo a haña pèrmit pa kima e hendenan.
9 E kayente intenso a kima e hendenan, pero nan no a arepentí. Mas bien, nan a falta rèspèt pa* e nòmber di Dios; nan no a duna gloria na Dios, kende tin outoridat riba e plaganan akí.
10 E di sinku angel a basha su kònchi riba trono di e bestia salbahe. I e bestia su reino a bira skur,+ i e hendenan a kuminsá morde nan lenga di doló.
11 Pero nan no a arepentí di nan obranan. Nan a insultá* Dios di shelu pa motibu di e doló ku nan tabata sinti i pa motibu di nan heridanan.
12 E di seis angel a basha su kònchi riba e riu grandi, esta, Eufrátes,+ i awa di e riu a seka+ pa prepará kaminda pa e reinan+ ku ta bini di ost.*
13 I mi a mira tres mensahe inspirá i impuru* ku tabata parse sapu* sali for di boka di e dragon,+ for di boka di e bestia salbahe i for di boka di e profeta falsu.
14 De echo, nan ta mensahe ku ta bini di demoño,* i e reinan di henter e tera habitá ta tende e mensahenan ei. E mensahenan ta hasi milager+ pa reuní e reinan pa e guera+ ku lo tuma lugá riba e dia grandi di Dios Todopoderoso.+
15 “Tende! Mi ta bini manera un ladron.+ Felis ta un hende ku ta keda lantá+ i ku paña na su kurpa pa e no mester kana sunú i hende mira su bèrgwensa.”+
16 E mensahenan inspirá a reuní e reinan na e lugá ku na hebreo yama Armagedon.*+
17 E di shete angel a basha su kònchi riba airu. Anto un stèm duru for di e trono, ku ta keda den e tèmpel,*+ a bisa: “A kaba!”
18 Tabatin rayo di welek, zonido di bos* i stèm. Ademas, tabatin un temblor grandi; e tabata asina potente i grandi ku e tabata distinto for di tur otro temblor ku a yega di tuma lugá for di tempu ku tin hende riba tera.+
19 E stat poderoso+ a parti na tres, i e statnan di e nashonnan a ser destruí.* Anto Dios a kòrda riba Babilonia, e Grandi,+ pa dun’é e kopa di biña ku ta kontené e furia di Dios su rabia.+
20 Ademas, tur isla a hui, i e serunan a disparsé.+
21 I hagel grandi* a kai for di shelu riba e hendenan.+ Kada piedra di hagel tabata pisa mas o ménos un talento.* I e hendenan a insultá* Dios pa motibu di e plaga di hagel,+ pasobra e plaga tabata masha destruktivo.
Nota
^ Esta, e lugá Santísimo di e tèmpel.
^ Òf: “i tur alma bibu.”
^ Lit.: “mi a tende e altar.”
^ Òf: “bo sentensianan; bo desishonnan hudisial.”
^ Òf: “blasfemá.”
^ Lit.: “di kaminda solo ta sali.”
^ Lit.: “tres spiritu impuru.”
^ Òf: “dori.”
^ Òf: “mensahe ku demoño ta inspirá.”
^ Na griego, Harmagedon. E ta bini di un palabra hebreo ku ta nifiká “seru di Megido.”
^ Esta, e lugá Santísimo di e tèmpel.
^ Òf: “dònder; strena.”
^ Òf: “a kai den otro.”
^ Òf: “I piedra grandi di eis.”
^ Òf: “blasfemá.”
